ທລຍ ເສີມສ້າງຄວາມເຂັ້ມແຂງໃຫ້ແກ່ ພະນັກງານພັດທະນາຊຸມຊົນຂັ້ນແຂວງ ແລະ ເມືອງ
ໂດຍ: ແສງອາລຸນ ພິລາຈັນ
ເພື່ອເສີມສ້າງຄວາມອາດສາມາດຂອງອ້າຍເອື້ອຍນ້ອງພະນັກງານພັດທະນາຊຸມຊົນ ທລຍ ຢູ່ຂັ້ນແຂວງ ແລະ ເມືອງນັ້ນ ໃນວັນທີ 22-26ກຸມພາ 2016ນີ້ ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ຈັດກອງປະຊຸມການຈັດຕັ້ງປະຕິບັດວຽກງານພັດທະນາຊຸມຊົນ ປະຈຳຮອບວຽນທີ 13ຂຶ້ນທີສະຖາບັນພັດທະນາຊັບພະຍາກອນມະນຸດລາວ-ຍີ່ຢຸ່ນ, ຄະນະເສດຖະສາດ, ມະຫາວິທະຍາໄລແຫ່ງຊາດ, ນະຄອນຫຼວງວຽງຈັນ ໂດຍການປະທານ ແລະ ກ່າວເປີດ ແລະ ປິດຂອງ ທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ທລຍ ແລະ ການເຂົ້າຮ່ວມຂອງຊ່ຽວຊານຈາກທະນາຄານໂລກ, ບັນດາຫົວໜ້າພະແນກທີ່ກ່ຽວຂ້ອງຂອງ ທລຍ ພ້ອມດ້ວຍອ້າຍເອື້ອຍນ້ອງພະນັກງານພັດທະນາຊຸມຊົນຈາກ 10 ແຂວງ ແລະ 44 ເມືອງ ກວ່າ 60 ຄົນ.
ກອງປະຊຸມ ໄດ້ມີການທົບທວນຄືນກ່ຽວກັບການຈັດຕັ້ງປະຕິບັດວຽກງານພັດທະນາຊຸມຊົນໃນສົກປີຜ່ານມາ ໃນນັ້ນ ໄດ້ມີຫົວຂໍ້ໃນການແລກປ່ຽນບົດຮຽນທີ່ສໍາຄັນ ແລະ ເໜັ້ນໜັກໃສ່ ບັນດາຫົວຂໍ້ທີ່ສໍາຄັນຫລັກກ່ຽວກັບການສ້າງແຜນພັດທະນາບ້ານ ແລະ ກຸ່ມບ້ານ, ການປ້ອງກັນຜົນກະທົບທາງສັງຄົມ ແລະ ສິ່ງແວດລ້ອມ, ການຈັດການຖອດຖອນບົດຮຽນລະຫວ່າງກຸ່ມບ້ານ, ການຈັດການແລກປ່ຽນບົດ ຮຽນລະຫວ່າງແຂວງ, ການຝຶກອົບຮົມໃຫ້ແກ່ຄະນະໄກ່ເກ່ຍຂັ້ນບ້ານ, ກອງປະຊຸມສະຫລຸບການຈັດຈັ້ງປະຕິບັດໂຄງການຍ່ອຍປະຈໍາງວດຂັ້ນບ້ານ, ກອງປະຊຸມປະຈໍາເດືອນ ສໍາລັບຜູ້ປະສານງານກຸ່ມບ້ານ, ວິ ທີການຂຽນບົດລາຍງານ ແລະ ການສ້າງແຜນປະຈຳເດືອນ, ໄຕມາດ, ແນະນຳວິທີການຂຶ້ນແຜນງົບປະ ມານຂອງແຕ່ລະກິດຈະກຳ, ທົບທວນຄືນ ຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານກະຈາຍຂໍ້ມູນ-ຂ່າວສານໃນ 1 ປີຜ່ານມາ ແລະ ວິທີແກ້ໄຂ, ວິທີການສ້າງຖານຂໍ້ມູນຂອງບ້ານແບບງ່າຍດາຍຢູ່ໃນ Google earth.
ຕະຫລອດໄລຍະຂອງກອງປະຊຸມໃນ 5 ວັນເຕັມ ໄດ້ມີບັນຍາກາດຟົດຟື້ນ, ຜູ້ເຂົ້າຮ່ວມໃຫ້ຄວາມສົນໃຈຫລາຍ ຍ້ອນວ່າ ໃນກອງປະຊຸມ ໄດ້ມີການປຶກສາຫາລື ແລກປ່ຽນບົດຮຽນ ແລະ ພອ້ມກັນຄົ້ນຄວ້າຊອກຫາວິທີແກ້ໄຂບັນຫາທີ່ພົບ ໃນຊ່ວງໄລຍະເວລາຈັດຕັ້ງປະຕິບັດວຽກງານຜ່ານມາດ້ວຍຄວາມເປັນເອກະພາບ ແລະ ທຸກຄົນມີສ່ວນຮ່ວມ ຊຶ່ງເຮັດໃຫ້ ຜູ້ເຂົ້າຮ່ວມມີຄວາມເຂົ້າໃຈຕໍ່ກັບຫົວຂໍ້ສໍາຄັນຕ່າງໆ ທີ່ນໍາມາແລກປ່ຽນຢ່າງເລີກເຊິ່ງ. ບົດຮຽນທີ່ອ້າຍເອື້ອຍນ້ອງພະນັກງານພັດທະນາຊຸມຊົນຂັ້ນແຂວງ ແລະ ເມືອງ ໄດ້ຈາກກອງປະຊຸມໃນຄັ້ງນີ້ ເຂົາເຈົ້າຈະນໍາເອົາໄປຜັນຂະຫຍາຍເຂົ້າໃນວຽກງານຕົວຈິງຢູ່ຂັ້ນທ້ອງຖິ່ນ ເພື່ອເປັນການປັບປຸງວຽກງານດັ່ງກ່າວໃຫ້ມີທ່າກ້າວໃນຕໍ່ໜ້າ, ໂດຍສະເພາະແມ່ນການຝຶກອົບຮົມຕໍ່ໃຫ້ແກ່ທີມງານຈັດຕັ້ງປະຕິບັດ ຂັ້ນບ້ານ ແລະ ຂັ້ນກຸ່ມ ກ່ຽວກັບ ການວາງແຜນພັດທະນາບ້ານ ແລະ ກຸ່ມບ້ານ ໃຫ້ປະກົດຜົນເປັນຈິງ , ເພາະວ່າ ທີມງານດັ່ງກ່າວແມ່ນໝາກຫົວໃຈສໍາຄັນຂອງຄວາມເປັນເຈົ້າການ ໃນການຈັດຕັ້ງປະຕິບັດໂຄງການຍ່ອຍ ໃຫ້ມີປະສິດທິພາບ ແລະ ປະສິດທິຜົນ.
ທ່ານ ວັນນາ ແພງປັນຍາ, ຜູ້ຮັບຜິດຊອບວຽກພັດທະນາຊຸມຊົນ ແຂວງເຊກອງ ໄດ້ກ່າວວ່າ: “ ຂ້າພະເຈົ້າ ຮູ້ສຶກພາກພູມໃຈຫລາຍທີ່ໄດ້ມີໂອກາດ ເຂົ້າຮ່ວມກອງປະຊຸມໃນຄັ້ງນີ້ ເພາະກອງປະຊຸມ ຄັ້ງນີ້ແມ່ນແຕກຕ່າງຈາກທຸກໆຄັ້ງຜ່ານມາ ຍ້ອນມີການນໍາສະເໜີບົດຮຽນຈາກ ພະແນກທີ່ກ່ຽວຂ້ອງຂອງ ທລຍ ສູນກາງ, ເຫັນວ່າມີຜົນປະໂຫຍດຫລາຍ “ ສໍາລັບ ກອງປະຊຸມ ໃນຄັ້ງນີ້ ຂ້າພະເຈົ້າບໍ່ພຽງແຕ່ໄດ້ຄວາມຮູ້ກ່ຽວກັບວຽກງານພັດທະນາຊຸມຊົນເທົ່ານັ້ນ ແຕ່ຂ້າພະເຂົ້າຍັງໄດ້ ຄວາມຮູ້ກ່ຽວກັບ ບໍລິຫານ-ການເງິນ, ວິສະວະກໍາ ແລະ ການຕິດຕາມ-ປະເມີນໂຄງການຍ່ອຍ ທີ່ມີປະສິດທິພາບ ແລະ ມີປະສິດທິຜົນ ອີກດ້ວຍ“.
ສະນັ້ນ, ຂ້າພະເຈົ້າ ຈະຂໍນໍາເອົາຄວາມຮູ້ ແລະ ບົດຮຽນຈາກ ກອງປະຊຸມ ໃນເທື່ອນີ້ ໄປຜັນຂະຫຍາຍເຂົ້າສູ່ວຽກງານຕົວຈິງທີ່ຕົນໄດ້ຮັບຜິດຊອບຢູ່ຂັ້ນທ້ອງຖິ່ນ ໃຫ້ປະກົດຜົນເປັນຈິງ ໂດຍສະເພາະແມ່ນ ຈະສືບຕໍ່ຝຶກອົບຮົມວຽກງານດັ່ງກ່າວນີ້ ໃຫ້ແກ່ທີມງານຈັດຕັ້ງປະຕິບັດຂັ້ນບ້ານ ເພື່ອນໍາໃຊ້ເຂົ້າໃນການວາງແຜນພັດທະນາບ້ານ ແລະ ກຸ່ມບ້ານ ໃຫ້ຖືກຕ້ອງ ແລະ ເໝາະສົມກັບສະພາບຕົວຈິງ”.
