ທລຍ ໄລຍະທີ 3 ໃຫ້ຄວາມສໍາຄັນ ຕໍ່ວຽກງານປ້ອງກັນຜົນກະທົບ
ດ້ານສັງຄົມ ແລະ ສິ່ງແວດລອ້ມ
ໂດຍ: ທລຍ
ກອງທຶນຫລຸດຜ່ອນຄວາມທຸກຍາກ ຫຼື ທລຍ ໄລຍະທີ 2 ຈະສິ້ນສຸດລົງ ໃນເດືອນທັນວາ ປີ 2016 ທີ່ຈະມາເຖິງນີ້ ຈາກນັ້ນໄປຈະເອີ້ນວ່າ ທລຍ ໄລຍະທີ 3 ເຊິ່ງຈະມີກໍານົດເວລາ 3 ປີ ຄືນັບແຕ່ ປີ 2017-2019. ເປັນຊ່ວງໄລະຍະການຈັດຕັ້ງແຜນພັດທະນາເສດຖະກິດ-ສັງຄົມ ເທື່ອທີ່ 8 ຂອງພວກເຮົາ. ສະນັ້ນ, ກ່ອນທີ່ ຈະມີການເຈລະຈາ ກ່ຽວກັບການ ໃຫ້ທຶນສືບຕໍ ວຽກງານ ທລຍ 3 ນັັ້ນ ລະຫວ່າງລັດທະບາລາວເຮົາ ກັບຜູ້ໃຫ້ທຶນນັ້ນ ຕ້ອງໄດ້ຈັດກອງປະຊຸມວິຊາການ ເພື່ອປຶກສາຫລື ກ່ຽວກັບມາດຕະການປ້ອງກັນ ການຜົນກະທົບ ດ້ານສັງຄົມ ແລະ ສິ່ງແວດລອ້ມ ຄັ້ງນີ້ຂຶ້ນ ເພາະວ່າມນເປັນເງື່ອນໄຂ 1 ຂອງທາງເບື້ອງ ທະນາຄານໂລກ.
ສະນັ້ນ ກອງປະຊຸມດັ່ງກ່າວຈຶ່ງໄດ້ຈັດຂຶ້ນໃນຕອນເຊົ້າຂອງວັນທີ 14 ມີນາ 2016 ທີ່ໂຮງແຮມດອນຈັນພາເລດ ນະຄອນຫລວງວຽງຈັນ ໂດຍການເປັນປະທານຮ່ວມ ຂອງ ທ່ານ ຈິດ ທະວີໃສ ຫົວໜ້າຫ້ອງການແຜນການ ແລະ ພົວພັນຕ່າງປະເທດ(ກາງ) ທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ທລຍ(ຊ້າຍ) ແລະ ທ່ານ ຊາໂຕຊິ ອີຊີຮາຣະ ຜູ້ຊີ້ນໍາວຽກງານ ທລຍ ຫ້ອງການທະນາຄານໂລກ ປະຈໍາ ສ ປປ ລາວ. ໃນກອງປະຊຸມມີຜູ້ເຂົ້າຮ່ວມທັງໝົດ 80 ກວ່າທ່ານ, ທີ່ມາຈາກ ກະຊວງ, ກົມ, ກອງ ແລະ ຫ້ອງການກ່ຽວຂ້ອງຕ່າງໆຈາກພາກລັດ ແລະ ບັນດາອົງການຈັດຕັ້ງຮ່ວມພັດທະນາກໍຄືອົງການຈັດຕັ້ງສາກົນ ເຂົ້າຮ່ວມທັງໝົດ 57 ພາກສ່ວນ.
ຈຸດປະສົງຂອງກອງປະຊຸມແມ່ນເພື່ອຮັບຟັງຄຳຄິດຄຳເຫັນ ຈາກທຸກພາກສ່ວນ ຈາກນັ້ນ ກໍຈະໄດ້ມີການປັບປຸງ ເພື່ອໃຫ້ສອດຄ່ອງກັບ ສະພາບຢູ່ໃນ ສ ປ ປ ລາວຂອງພວກເຮົາ ໂດຍປົກກະຕິແລ້ວ ນະໂຍບາຍ ຫຼື ກອບການປ້ອງກັນ ຜົນກະທົບຂອງ ທລຍ 3 ພື້ນຖານ ກໍໄດ້ອີງໃສ່ນະໂຍບາຍ ຫຼື ນິຕິກຳຕ່າງ ທີ່ລັດຖະບານແຫ່ງ ສ ປ ປ ລາວ ພວກເຮົາ
ປຶກສາຫາລື ແລະ ແລກປ່ຽນບົດຮຽນທີ່ຖອດ ຖອນໄດ້ໃນ ທລຍ 2 ຜ່ານມາ ແລະ ມີຄໍາເຫັນຕໍ່ແຜນການຈັດຕັ້ງປະຕິບັດວຽກງານປ້ອງກັນຜົນກະທົບທາງສັງຄົມ ແລະ ສິ່ງແວດລ້ອມທີ່ຈະນໍາໃຊ້ຢູ່ໃນ ທລຍ ໄລຍະ 3. ຈຸດປະສົງ ໃນການກຳນົດມາດຕະການນີ້ຂຶ້ນມາແມ່ນ ເພື່ອຫລີກເວັ້ນ ຫຼື ຫລຸດ ຜ່ອນ ຜົນກະທົບ ຈາກ ທີ່ ທລຍ ເຂົ້າໄປກໍ່ສ້າງ ໂຄງການຍ່ອຍ ໃຫ້ ແກ່ບ້ານ ໃນກໍລະນີທີ່ມີຜົນກະທົບ ຕ້ອງໄດ້ຮັບການແກ້ໄຂ ຫຼື ບັນເທົາ ຕາມຄວາມເໝາະສົມ
ຖ້າບໍ່ດັ່ງນັ້ນ ຈະເຮັດໃຫ້ຊຸມຊົນຜູ້ທຸກຍາກ ທີ່ທຸກຢູ່ແລ້ວ ຍິງທຸກຕື່ມອີກ.
ເວົ້າລວມແລ້ວ ມາດຕະການດັ່ງກ່າວນີ້ ຂອງ ທລຍ ຈະໄປຊ່ວຍ ສະໜັບສະໜູນ ທິດການພັດທະນາທີ່ຍືນຍົງ ຂອງ ສ ປ ປ ລາວ ພວກເຮົາ.
ການດໍາເນີນກອງປະຊຸມ ແມ່ນເຕັມໄປດ້ວຍບັນຍາກາດທີ່ດີ, ຍ້ອນວ່າ ຫລັງຈາກຜູ້ຕາງໜ້າພະນັກງານວິຊາການຂອງ ທລຍ ສະເໜີມາດຕະການປ້ອງກັນຜົນກະທົບດ້ານສັງຄົມ ແລະ ສິ່ງແວດລ້ອມ ບັນດາຜູ້ເຂົ້າຮ່ວມກໍໍ່ໄດ້ມີການປະກອບຄຳຄິດຄໍາເຫັນໃສ່ມາດຕະການດັ່ງກ່າວຢ່າງມີບັນຍາກາດຟົດຟື້ນ.ຊຶ່ງຜູ້ແທນແມ່ນໃຫ້ຄວາມສົນໃຈຫລາຍຕໍ່ກັບມາດຕະການດັ່ງກ່າວ ແລະ ໃຫ້ການສະນັບສະໜູນ ເຫັນດີເປັນເອກະພາບກັບ ທລຍ. ນອກຈາກນັ້ນ, ຜູ້ເຂົ້າຮ່ວມຍັງໄດ້ມີການແລກປ່ຽນບົດຮຽນ ແລະ ປະສົບການຊຶ່ງກັນ ແລະ ກັນຕື່ມອີກ. ສິ່ງທີ່ສໍາຄັນທີ່ສຸດແມ່ນ ຜູ້ເຂົ້າຮ່ວມມີຄວາມເຂົ້າໃຈຕໍ່ກັບຂະບວນການ ແລະ ລະບຽບຫລັກການ ຂອງການປ້ອງກັນຜົນກະທົບຕໍ່ສິ່ງແວດລອ້ມ ແລະ ສັງຄົມ ທີ່ ທລຍ ນໍາໃຊ້ເຂົ້າໃນການຈັດຕັ້ງປະຕິບັດໄດ້ເປັນຢ່າງດີ. ສະນັ້ນ ຈຶ່ງເວົ້າໄດ້ວ່າ ກອງປະຊຸມຄັ້ງນີ້ໄດ້ຮັບຜົນສໍາເລັດຕາມຈຸດປະສົງ ລະດັບຄາດໝາຍທີ່ວາງໄວ້. ໃນອະນາຄົດຈະເຮັດໃຫ້ຂອດຮ່ວມມືປະສານງານກັບບັນດາອົງການຈັດຕັ້ງທາງສັງ ຄົມ ແລະ ຄູ່ຮ່ວມພັດທະນາຂອງ ທລຍ ໄດ້ຮັບການປັບປຸງດີຂື້ນເທື່ອລະກ້າວ.
ທ່ານ ນາງ ຄໍາພອນ ບຸນວິໄລ, ຮອງຫົວໜ້າກົມ, ຫ້ອງວ່າການປະທານປະເທດໄດ້ກ່າວວ່າ: ກອງປະຊຸມຄັ້ງນີ້ເປັນກອງປະຊຸມສຸດທີ່ມີຄວາມສໍາຄັນຫລາຍ ເນື່ອງຈາກວ່າ ຂ້າພະເຈົ້າໄດ້ຮັບຂໍ້ມູນຂ່າວສານ ແລະ ປະສົບການກ່ຽວກັບມາດຕະການປ້ອງກັນຜົນກະທົບທາງສິ່ງແວດລ້ອມ ແລະ ສັງ ຄົມ. ເຂົ້າໃຈເຖິງຂະບວນການຈັດຕັ້ງປະຕິບັດໂຄງການຂອງ ທລຍ ທີ່ໄດ້ເອົາໃຈໃສ່ຕໍ່ວຽກງານດັ່ງກ່າວໄປຄຽງຄູ່ກັບການພັດທະນາຊົນນະບົດແກ້ໄຂຄວາມທຸກຍາກໃຫ້ແກ່ປະ ຊາຊົນບັນດາເຜົ່າ. ຂ້າພະເຈົ້າຄິດວ່າ ຖ້າທຸກໆອົງການຈັດຕັ້ງມີລະບຽບຫລັກການ ແລະ ມີນະໂຍບາຍສະເພາະ ທີ່ນໍາເອົາໄປຈັດຕັ້ງປະຕິບັດເປັນຮູບປະທໍາແບບນີ້ ກໍ່ຈະເຮັດໃຫ້ສັງຄົມ ແລະ ສິ່ງແວດລ້ອມບໍໍ່ມີບັນຫາ ຫຼື ບໍ່ໄດ້ຮັບຜົນກະທົບຫລາຍ ແລະ ຈະເຮັດໃຫ້ການພັດທະນາມີຄວາມຍືນຍົງ, ສັງຄົມມີຄວາມສະຫງົບປອດໄພ ປ້ອງກັນໄດ້ບັນຫາຂໍ້ຂັດແຍ່ງ, ການນໍາໃຊ້ຊັບພະຍາກອນທໍາມະຊາດກໍ່ມີຄວາມຍາວນານ ແລະ ປະຊາຊົນກໍ່ຈະມີຄວາມເຂົ້າໃຈຕໍ່ຄວາມເອົາໃຈໃສ່ຂອງພັກ ແລະ ລັດຖະບານ ທີ່ຕ້ອງການພັດທະ ນາປະເທດໃຫ້ມີຄວາມຍືນຍົງ ແລະ ມີຄວາມໝັ້ນຄົງໃນການດໍາລົງຊີວິດ.
