ບ້ານ ຕັນເໜືອ ກຸ່ມ ແກ່ວແສດໄດ້ໂຮງຮຽນຫລັງໃໝ່ແລ້ວ
ນາງ ແວວ ຄຳມູນທາ
ບ້ານ ຕັນເໜືອ ແມ່ນບ້ານໜຶ່ງ ທີ່ຂຶ້ນກັບກຸ່ມບ້ານ ແກ່ວແສດ ເມືອງຄູນ ແຂວງຊຽງຂວາງ ຫ່າງຈາກເທດສະບານເມືອງປະມານ 35ກິໂລແມັດ ປະກອບມີ 114 ຄອບຄົວ, ມີ 2 ຊົນເຜົ່າຢູ່ຮ່ວມກັນຄື: ເຜົ່າມົ້ງ ແລະ ເຜົ່າລາວລຸ່ມ ປະກອບມີພົນລະເມືອງທັງໝົດ 678 ຄົນ, ຍິງ 341 ຄົນ ອາຊີບຕົ້ນຕໍຂອງເຂົາເຈົ້າແມ່ນເຮັດນາ ປູກຝັງ ແລະ ລ້ຽງສັດເປັນອາຊີບສໍຳຮອງ.
ໄລຍະຜ່ານມາ ບ້ານ ຕັນເໜືອ ແມ່ນບໍ່ມີໂຮງຮຽນພຽງພໍ ພົບຄວາມຫຍຸ້ງຍາກຫລາຍ ເດັກນ້ອຍໃນເກນອາຍຸເຂົ້າໂຮງຮຽນກໍບໍ່ໄດ້ເຂົ້າໂຮງຮຽນເປັນປົກກະຕິ ແລະ ໄດ້ປ່ຽນກັນຮຽນຕອນເຊົ້າ, ຕອນແລງ ຖ້າຈະໄປເຂົ້າໂຮງຮຽນຢູ່ບ້ານອື່ນແມ່ນຫຍຸ້ງຍາກ ແລະ ເຮັດໃຫ້ເດັກນ້ອຍບໍ່ທັນໂຮງຮຽນ.
ຕົກມາຮອດຮອບວຽນ 13 ສົກປີ (2015-2016) ບ້ານ ຕັນເໜືອ ແມ່ນບ້ານໜຶ່ງທີ່ໄດ້ຮັບທຶນຊ່ວຍເຫຼືອ ຈາກ ທລຍ ເຂົ້າໃນການກໍ່ສ້າງໂຮງຮຽນອະນຸບານ 2 ຫ້ອງ ມູນຄ່າ 352,933,344ກີບໃນນັ້ນ ທຶນ ທລຍ ແມ່ນ 319,748,344ກີບ, ຊຸມຊົນແມ່ນ 33,185,000ກີບການກໍ່ສ້າງເລີ່ມລົງມືກໍ່ສ້າງແຕ່ວັນທີ່02/4/2016ປະຈຸບັນການກໍ່ສ້າງແມ່ນໄດ້ສຳເລັດ 100% ແລະ ໄດ້ມອບໃຫ້ຊຸມຊົນເປັນຜູ້ຄຸ້ມຄອງນໍາໃຊ້ແລ້ວ.
ທ່ານ ບົວຢ່າ ນາຍບ້ານ ບ້ານ ຕັນເໜືອ ພ້ອມດ້ວຍພໍ່ແມ່ປະຊາຊົນໝົດບ້ານໄດ້ກ່າວວ່າ: “ພວກຂ້າພະເຈົ້າມີຄວາມດີອົກດີໃຈຫຼາຍທີ່ ທລຍ ໄດ້ໃຫ້ທຶນໃນການກໍ່ສ້າງໂຮງຮຽນຫຼັງນີ້ ຜ່ານມາບ້ານພວກເຮົາແມ່ນພົບຄວາມຫຍຸ້ງຍາກຫຼາຍຍ້ອນໂຮງຮຽນບໍ່ພຽງພໍເດັກນ້ອຍຮຽນບໍ່ເຕັມເມັດເຕັມໜ່ວຍ ຫລືເວົ້າອີກຢ່າງໜຶ່ງແມ່ນຮຽນຫ້ອງຄວບ“.
ທ່ານ ບົວຢ່າກ່າວຕື່ມວ່າ: “ພວກຂ້າພະເຈົ້າຈະພ້ອມພາກັນ ເອົາໃຈໃສ່ໃນການປົກປັກຮັກສາໂຮງຮຽນຫລັງນີ້ ໃຫ້ມີຄວາມຍືນຍົງ ນໍາໃຊ້ໄດ້ຍາວນານ ເພື່ອເຮັດແນວໃດ ໃຫ້ລູກຫຼານໄດ້ເຂົ້າໂຮງຮຽນທົ່ວເຖິງກັນ ແລະຈະໄດ້ຫຼຸດຜ່ອນການກືກໜັງສືໃນອະນາຄົດ ໂດຍສະເພາະ ທາງບ້ານຂ້າພະເຈົ້າຈະໄດ້ສ້າງກອງທຶນໃນການປົກປັກຮັກສາ ແລະ ບູລະນະສ້ອມແປງຂຶ້ນ ແລະ ຈະເກັບເງິນນໍາພໍ່ແມ່ນັກຮຽນ ຄອບຄົວລະ 3,000 ກີບ ເພື່ອເປັນທຶນຮອນໃນການສ້ອມແປງໃນເວລາມີສິ່ງເປ່ເພ“.
