ລັດຖະບານປະເທດສະວິດເຊີແລນ
ໃຫ້ທຶນຊ່ວຍເຫລືອລ້າ ແກ່ລັດຖະບານລາວ 18 ລ້ານ ໂດລາສະຫະລັດ
ສຳລັບຈັດຕັ້ງປະຕິບັດໂຄງການກອງທຶນຫລຸດຜ່ອນຄວາມທຸກຍາກໄລຍະທີ 3 (ທລຍ3)
ລັດຖະບານປະເທດສະວິດເຊີແລນ ຕົກລົງໃຫ້ທຶນຊ່ວຍເຫລືອລ້າ ຈໍານວນ 18 ລ້ານ ໂດລາສະຫະລັດ ສໍາລັບການຈັດຕັ້ງປະຕິບັດໂຄງການ ກອງທຶນຫລຸດຜ່ອນຄວາມທຸກຍາກ ໄລຍະທີ 3 (2017-2020). ໂດຍ ທ່ານ ທິມ ເອັນເດີລິນ, ຜູ້ອໍານວຍການ ເພື່ອການຮ່ວມມື ເຂດພາກພື້ນແມ່ນໍ້າຂອງ, ອົງການເພື່ອການພັດທະນາ ແລະ ຮ່ວມມືຂອງປະເທດສະວິດເຊີແລນ ແລະ ທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ ກະຊວງການເງິນ ໄດ້ຮ່ວມກັນເຊັນສັນຍາຢ່າງເປັນທາງການ ໃນລະຫວ່າງການດໍາເນີນກອງປະຊຸມໂຕະມົນຢູ່ແຂວງວຽງຈັນ ໃນວັນທີ 25 ພະຈິກ 2016 ຜ່ານມາ. ລວມການຊ່ວຍເຫລືອ ຂອງລັດຖະບານປະເທດສະວິດເຊີແລນ ໃຫ້ແກ່ ທລຍ ມາຮອດປະຈຸບັນ ທັງໝົດແມ່ນ 43 ລ້ານໂດລາສະຫະລັດ.
ເປົ້າໝາຍຂອງ ທລຍ ແມ່ນເພື່ອປັບປຸງການເຂົ້າເຖິງການບໍລິການຂັ້ນພື້ນຖານໂຄງລ່າງ ໃຫ້ແກ່ຊຸມຊົນຜູ້ທຸກຍາກທີ່ສຸດໃນ ສປປ ລາວ. ໂດຍຜ່ານການເຂົ້າຮ່ວມຂອງຊຸມຊົນ ໃນຂະບວນການພັດທະນາ ຂັ້ນທ້ອງຖິ່ນ ທີ່ເນັ້ນໃສ່ຮັບປະກັນການພັດທະນາທີ່ຍືນຍົງ.
ທລຍ 3 ປະກອບມີ 2 ຈຸດປະສົງຫລັກ: 1). ເພື່ອປັບປຸງ ການເຂົ້າເຖິງການບໍລິການຂອງລັດ ຢູ່ຂັ້ນບ້ານ ໃນເຂດຫ່າງໄກສອກຫລີກ ເຊັ່ນ: ການເຂົ້າເຖິງການບໍລິການ ດ້ານສາທາລະນະສຸກ, ການເຂົ້າເຖິງການສຶກສາ, ນໍ້າກິນ-ນໍ້າໃຊ້ ແລະ ຊົນລະປະທານ; 2) ເພື່ອສ້າງຄວາມເຂັ້ມແຂງໃຫ້ແກ່ອໍານາດການປົກຄອງທ້ອງຖິ່ນໃນການພັດທະນາ ແລະ ຊຸກຍູ້ການນໍາໃຊ້ ຂະບວນການມີສ່ວນຮ່ວມ ແລະ ການປຶກສາຫາລື ຢູ່ໃນຂັ້ນຕອນການວາງແຜນ, ການຄຸ້ມຄອງງົບປະມານ ແລະ ການຈັດຕັ້ງປະຕິບັດໂຄງການຍ່ອຍດ້ານຕ່າງໆ.
ທລຍ 3 ໄດ້ຖືກອອກແບບ ເພື່ອເພີ່ມການມີສ່ວນຮ່ວມຂອງຊຸມຊົນ ໃນຂະບວນການພັດທະນາຢູ່ຂັ້ນທ້ອງຖິ່ນ ໂດຍສະເພາະ ແມ່ນແມ່ຍິງ ແລະ ຊົນເຜົ່າ. ທລຍ ຈະເຮັດວຽກຢູ່ 1.820 ບ້ານ, 263 ກຸ່ມບ້ານ, 43 ເມືອງ ຂອງ 10 ແຂວງເປົ້າໝາຍ ຄື: ຫົວພັນ, ຊຽງຂວາງ, ຫລວງນໍ້າທາ, ຫລວງພະບາງ, ອຸດົມໄຊ, ຜົ້ງສາລີ, ສະຫວັນນະເຂດ, ເຊກອງ, ອັດຕະປື ແລະ ສາລະວັນ ເຊິ່ງເປັນແຂວງທີ່ມີອັດຕາຄວາມທຸກຍາກສູງພໍສົມຄວນ.
ແຕ່ລະກຸ່ມບ້ານ ທີ່ ທລຍ ໃຫ້ການຊ່ວຍເຫລືອ ຈະໄດ້ຮັບເງິນ ລະຫວ່າງ 35,000 ຫາ 50,000 ໂດລາສະຫະລັດຕໍ່ປີ ເພື່ອສະໜັບສະໜູນບຸລິມະສິດຄວາມຕ້ອງການໃນການພັດທະນາຢູ່ຊຸມຊົນຂອງເຂົາເຈົ້າ. ທລຍ ຈະສຶບຕໍ່ປັບປຸງຄວາມອາດສາມາດຂອງອໍານາດການປົກຄອງທ້ອງຖິ່ນໃນການວາງແຜນ, ຈັດຕັ້ງປະຕິບັດ ແລະ ຕິດຕາມຂະບວນການພັດທະນາຢູ່ຂັ້ນທ້ອງຖິ່ນ ໂດຍການມີສວ່ນຮ່ວມຂອງຊຸມຊົນ.
ການສະໜັບສະໜູນທຶນ ຂອງລັດຖະບານປະເທດສະວິດເຊີແລນໃນຄັ້ງນີ້ ຈະເຮັດໃຫ້ ທລຍ ສາມາດຂະຫຍາຍພື້ນທີ່ເປົ້າໝາຍຕື່ມອີກ ແລະ ຈະເປັນການສ້າງຄວາມເຂັ້ມແຂງ ໃຫ້ແກ່ຊຸມຊົນຜູ້ທຸກຍາກ ໃນການເຂົ້າຮ່ວມ ໃນຂະບວນການພັດທະນາ ແລະ ເຊື່ອມສານເຂົ້າກັບລະບົບການຈັດຕັ້ງປະຕິບັດວຽກງານຂອງລັດຖະບານຢູ່ຂັ້ນທ້ອງຖິ່ນ ທັງເປັນການສະໜັບສະໜູນເປົ້າໝາຍຂອງ ສປປ ລາວ ໃນການພະຍາຍາມນໍາພາປະເທດຊາດຫລຸດພົ້ນ ອອກຈາກສະຖານະພາບຄວາມເປັນປະເທດດ້ອຍພັດທະນາ ເທື່ອລະກ້າວ.
