ທລຍ ເສີມສ້າງຄວາມເຂັ້ມແຂງໃຫ້ແກ່ພະນັກງານດ້ານບົດບາດຍິງ-ຊາຍ
ໂດຍ:ແສງອາລຸນ ພິລາຈັນ
ເມື່ອເວົ້າເຖິງບົດບາດຍິງ-ຊາຍ ແລ້ວ ທລຍ ຍາມໃດກໍພະຍາຍາມເອົາໃຈໃສ່ ຍົກສູງ ແລະ ໃຫ້ຄວາມສໍາຄັນຕໍ່ບັນຫາດັ່ງກ່າວ ເຊິ່ງສະແດງອອກໃນເວລາຈັດກອງປະຊຸມວາງແຜນພັດທະນາບ້ານ ແລະ ກຸ່ມບ້ານ ທລຍ ໄດ້ມີຂໍ້ກໍານົດວ່າ: “ຢ່າງໜ້ອຍ 50% ຂອງຈໍານວນຜູ້ໃຫຍ່ພາຍໃນບ້ານ(ຜູ້ທີ່ມີອາຍຸ 15 ປີຂຶ້ນໄປ) ຕ້ອງໄດ້ເຂົ້າຮ່ວມ ແລະ ຢ່າງໜ້ອຍ 60 % ຂອງຈໍານວນຄອບຄົວຜູ້ທຸກຍາກພາຍໃນບ້ານຕ້ອງໄດ້ເຂົ້າຮ່ວມ ໃນນັ້ນ ຢ່າງໜ້ອຍ 40% ຂອງຈໍານວນຜູ້ເຂົ້າຮ່ວມປະຊຸມທັງໝົດ ຕ້ອງແມ່ນແມ່ຍິງ ຖ້າບໍ່ດັ່ງນັ້ນ ໃຫ້ເລື່ອນກອງປະຊຸມດັ່ງກ່າວອອກໄປ”
ເພື່ອຍົກສູງຄວາມເຂົ້າໃຈຂອງພະນັກງານ ທລຍ ກ່ຽວກັບບົດບາດຍິງ-ຊາຍ ຫລາຍກວ່າເກົ່າ ແລະ ການເຂົ້າຮ່ວມກິດຈະກໍາສັງຄົມຂອງໝົດທຸກຄົນ ສະນັ້ນ ໃນວັນທີ 20 ພະຈິກ 2013 ກອງທຶນຫລຸດຜ່ອນຄວາມທຸກຍາກ(ທລຍ) ໄດ້ຈັດຊຸດຝຶກອົບຮົມຂຶ້ນຢ່າງເປັນທາງການທີ່ໂຮງແຮມເມີຄິວ ໂດຍການເປັນປະທານຂອງທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ທລຍ ແລະ ໄດ້ຮັບກຽດການເປັນຄູຝຶກຂອງທ່ານ ນາງ ລິຕ່າ ເຈເບີດ(Rita Gebert) ຊ່ຽວຊານດ້ານບົດບາດຍິງ-ຊາຍ ຈາກປະເທດເຢຍລະມັນແລະ ທ່ານ ນາງ ນີ ຫລວງໂຄດ, ທີ່ປຶກສາ/ຄູຝຶກດ້ານການພັດທະນາຊຸມຊົນ, ບົດບາດຍິງ-ຊາຍ ແລະ ສັງຄົມ. ເຊິ່ງການຝຶກອົບຮົມໃນຄັ້ງນີ້ໄດ້ມີນັກສໍາມະນາກອນມາຈາກຫ້ອງການ ທລຍ ສູນກາງ 7 ທ່ານ ແລະ 10 ທ່ານຈາກ 10 ແຂວງເປົ້າໝາຍຂອງ ທລຍ: ຜົ້ງສາລີ, ຫລວງນໍ້າທາ, ຫົວພັນ, ອຸດົມໄຊ, ຊຽງຂວາງ, ຫລວງພະບາງ, ສະຫວັນນະເຂດ, ເຊກອງ, ສາລະວັນ ແລະ ອັດຕະປື.
ສໍາລັບການຝຶກອົບຮົມໃນຄັ້ງນີ້ແມ່ນໄດ້ດໍາເນີນເປັນເວລາ 2 ວັນເຕັມ ເຊິ່ງບັນດານັກສໍາມະນາກອນໄດ້ຮຽນຮູ້ຫລາຍໆຫົວຂໍ້ເຊັ່ນ: ເພດ, ບົດບາດຍິງ-ຊາຍ, ການພັດທະນາແມ່ຍິງ, ບົດບາດຍິງ-ຊາຍ ແລະ ການພັດທະນາ, ສິດສະເໝີພາບ ລະຫວ່າງ ຍິງຊາຍ ສະແດງອອກຄືແນວໃດ?, ຫລັກການສິດສະເໝີພາບຕາມສົນທິສັນຍາຊີດໍ, ການມີສ່ວນຮ່ວມຂອງກຸ່ມສັງຄົມສະເພາະແມ່ນຫຍັງ, ການຍົກເວັ້ນການມີສ່ວນຮ່ວມຂອງກຸ່ມສັງຄົມສະເພາະແມ່ນຫຍັງ, ເປັນຫຍັງການມີສ່ວນຮ່ວມຂອງກຸ່ມສັງຄົມສະເພາະຈຶ່ງເປັນສິ່ງສໍາຄັນ. ເຊິ່ງຄູຝຶກໄດ້ນໍາໃຊ້ຮູບແບບໃນການແບ່ງກຸ່ມຄົ້ນຄົ້ວເປັນກຸ່ມ ແລະ ໃຫ້ຕາງໜ້າກຸ່ມນໍາສະເໜີຂອງຜົນການຄົ້ນຄົ້ວໃນແຕ່ລະຫົວຂໍ້ ເພື່ອເປັນການລະດົມສະໝອງຂອງແຕ່ລະຄົນ ໃຫ້ເກີດມີການພັດທະນາສະໝອງຂອງເຂົາເຈົ້າ ຫລັງຈາກນັ້ນ ຄູຝຶກໄດ້ສະຫລຸບການນໍາສະເໜີຂອງແຕ່ລະກຸ່ມຄົ້ນຄົ້ວ ພ້ອມທັງນໍາສະເໜີບົດຮຽນຂອງແຕ່ລະຫົວຂໍ້ ຕົວຢ່າງ:
ສິດສະເໝີພາບ ລະຫວ່າງຍິງຊາຍສະແດງອອກແນວໃດ?
ຍິງ ແລະ ຊາຍຖືກຮັບຮູ້ວ່າມີຖານະພາບເຊັ່ນດຽວກັນ ແລະ ໄດ້ຮັບເງື່ອນໄຂເຊັ່ນດຽວກັນ ເພື່ອຊົມໃຊ້ສິດທິມະນຸດຂອງເຂົາເຈົ້າ, ເພື່ອສະແດງສັກກາຍະພາບຂອງເຂົາເຈົ້າ ເຊັ່ນດຽວກັນ ໃນທຸກຂົງເຂດການພັດທະນາ. ຍິງ ແລະ ຊາຍ ໄດ້ຮັບຜົນປະໂຫຍດເຊັ່ນດຽວກັນຈາກການພັດທະນາ.
ທ່ານ ສໍສະຫວັນ ບານຄໍາມີ, ຜູ້ປະສານງານ ທລຍ ແຂວງຫົວພັນ ເຊິ່ງເປັນຜູ້ໜຶ່ງທີ່ໄດ້ເຂົ້າຮ່ວມໃນການຝຶກອົບຮົມໃນຄັ້ງນີ້ ໄດ້ກ່າວວ່າ: “ຂ້າພະເຈົ້າມີຄວາມຮູ້ສຶກພາກພູມໃຈຫລາຍ ທີ່ໄດ້ມີໂອກາດມາເຂົ້າຮ່ວມໃນການຝຶກອົບຮົມບົດບາດຍິງ-ຊາຍໃນຄັ້ງນີ້ ເພາະວ່າບໍ່ເຄີຍໄດ້ຝຶກອົບຮົມໃນລັກສະນະນີ້ຈັກເທື່ອ ເພາະຄັ້ງນີ້ທາງ ທລຍ ໄດ້ເຊີນເອົາຊ່ຽວຊານມາແຕ່ປະເທດເຢຍລະມັນ ມາຝຶກອົບຮົມໃຫ້ສະເພາະ ຂ້າພະເຈົ້າ ຈະນໍາເອົາຄວາມຮູ້ໃນຄັ້ງນີ້ໄປເຜີຍແຜ່ໃຫ້ອ້າຍນ້ອງພະນັກງານ ທລຍ ຢູ່ແຂວງຂອງຕົນ ແລະ ທີ່ສໍາຄັນແມ່ນຈະໄດ້ຜັນຂະຫຍາຍຄວາມຮູ້ທີ່ຕົນໄດ້ຮຽນໃນຄັ້ງນີ້ ເຂົ້າໃນວຽກງານຕົວຈິງຂອງຕົນ ໃຫ້ປະກົດຜົນເປັນຈິງ”.
