ກອງປະຊຸມສະພາບໍລິຫານ ທລຍ ຄັ້ງທີ 20
ໂດຍ: ທລຍ
ກອງປະຊຸມສະພາບໍລິຫານ ທລຍ ສະໄໝສາມັນຄັ້ງທີ 20 ໄດ້ໄຂຂື້ນໃນວັນທີ 26 ມີຖຸນາ 2014 ຜ່ານມາທີ່ແຂວງອັດຕະປື. ກອງປະຊຸມສະພາບໍລິຫານ ຄັ້ງນີ້ໄດ້ໄຂຂຶ້ນ ໃນທ່າມກາງບັນຍາກາດ ທີ່ທົ່ວພັກທົ່ວ ລັດ ທົ່ວປວງຊົນພວກເຮົາ ພວມຜັນຂະຫຍາຍ ການເຮັດທົດລອງສາມສ້າງແລະ ຂະບວນການຮັກຊາດ-ພັດທະນາ ເຂົ້າສູ່ລວງເລິກ ຊຶ່ງເປັນການເພີ່ມທະວີກຳລັງແຮງເຂົ້າໃນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຢູ່ໃນ ສປປ ລາວ ຂອງພວກເຮົາ.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອທົບທວນຄືນການຈັດຕັ້ງປະຕິບັດໜ້າວຽກຂອງກອງທຶນຫລຸດຜ່ອນຄວາມທຸກຍາກ ໃນ 1 ປີ ຜ່ານມາ ເຊິ່ງນັບແຕ່ກອງປະຊຸມ ສະພາບໍລິຫານຄັ້ງທີ 19 ທີ່ແຂວງຊຽງຂວາງ ທີໄດ້ຈັດຂຶ້ນໃນເດືອນພຶດສະພາ 2013 ຈົນມາເຖິງປະຈຸບັນ ແລະ ພິຈາລະນາບັນຫາຕ່າງໆ ລວມທັງສະເໜີແຜນການຈັດຕັ້ງປະຕິບັດໃນອີກ 1 ປີຕໍ່ໜ້າ.
ກອງປະຊຸມຄັ້ງນີ້ໄດ້ຮັບກຽດເປັນປະທານຂອງທ່ານ ບຸນເຮືອງ ດວງພະຈັນ ລັດຖະມົນຕີປະຈໍາຫ້ອງວ່າການລັດຖະບານ, ຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ປະທານສະພາບໍລິຫານ ທລຍ, ພ້ອມດ້ວຍການເຂົ້າຮ່ວມຂອງ ທ່ານ ນາງ ຫວັດສະດີ ໂຄດໂຍທາ, ຮອງເຈົ້າແຂວງອັດຕະປື, ທ່ານ ນາງ ເຂັມເພັດ ພົນເສນາ, ຜູ້ຊົງຄຸນວຸດທິ, ທ່ານ ດຣ. ອິນລາວັນ ແກ້ວບຸນພັນ, ລັດຖະມົນຕີຊ່ວຍກະຊວງສາທາລະນະສຸກ, ທ່ານ ດຣ. ຄໍາມະນີ ອິນທິລາດ, ລັດຖະມົນຕີຊ່ວຍກະຊວງພະລັງງານ ແລະ ບໍ່ແຮ່,ແລະຕາງໜ້າຈາກກະຊວງທີ່ກ່ຽວຂ້ອງ, ອົງການຈັດຕັ້ງມະຫາຊົນ ແລະ ຮອງເຈົ້າແຂວງຂອງ 9 ແຂວງເປົ້າໝາຍທີ່ຍັງເຫລືອ. ນອກຈາກນັ້ນ ພິເສດໃນກອງປະຊຸມຄັ້ງນີ້ ໄດ້ມີບັນດາຜູ້ໃຫ້ທຶນເຂົ້າຮ່ວມເຊັ່ນ: ທະນາຄານໂລກ ລວມທັງໝົດ 70 ທ່ານ.
ທີ່ກອງປະຊຸມໄດ້ມີການປຶກສາຫາລືກັນລະຫວ່າງບັນດາຜູ້ໃຫ້ທຶນ ແລະ ຄະນະກໍາມະການສະພາບໍລິ ຫານ ທລຍ ໃນຫລາຍຫົວຂໍ້ເຊັ່ນ:
1. ສິ່ງທີ່ໄດ້ພົບເຫັນ ຈາກການປະເມີນຜົນ ໄລຍະກາງສະໄໝ, ວຽກງານ ທລຍ II ຂອງຜູ້ໃຫ້ທຶນ
2. ປຶກສາຫາລື ກ່ຽວກັບ ທຶນປະກອບສ່ວນຂອງລັດຖະບານ
3. ປຶກສາຫາລືທິດທາງກ່ຽວກັບ ທລຍ III ໂດຍອີງໃສ່ສິ່ງທີ່ຄົ້ນພົບຈາກ ການປະເມີນຜົນໄລຍະກາງສະໄໝວຽກບານ ທລຍ II ແລະ ເໜັ້ນໃສ່ສົນທະນາໂຄງສ້າງ, ຂອບເຂດໜ້າວຽກ, ດ້ານການເງີນ: ກິດຈະກໍາຫລັກ ສໍາລັບອີກ 5 ປີຕໍ່ໜ້າ ເປັນຕົ້ນແມ່ນ: ກຸ່ມເປົ້າໝາຍ(ບ້ານ, ແຂວງ ແລະ ເມືອງ) ຈະຈັດຕັ້ງປະຕິບັດ, ໂຄງຮ່າງການຈັດຕັ້ງດ້ານການບໍລິຫານ, ການເງິນ ແລະ ອື່ນໆ. ນອກຈາກນັ້ນ ຍັງໄດ້ ປຶກສາຫາລື ບັນດາກາລະໂອກາດ ແລະ ສິ່ງທ້າທາຍ ໃນການເສີມຂະຫຍາຍສິດເປັນເຈົ້າຂອງປະຊາຊົນ ແລະ ການສ້າງຄວາມເຂັ້ມແຂງໃຫ້ແກ່ຂະບວນ ການມີສ່ວນຮ່ວມທີ່ມີຄຸນນະພາບມີຫັຍງແດ່ ລວມທັງການກະກຽມດ້ານການເງີນ ແລະ ການປະສານສົມທັບກັບໂຄງການອື່ນໆ ກ່ຽວກັບ ການປັບປຸງຊີວິດການເປັນຢູ່ ດ້ານສຸຂະສຶກສາ, ດ້ານໂພຊະນາການ ແລະ ອື່ນໆ ເພື່ອບັນລຸເປົ້າໝາຍສະຫັດສະວັດກໍຄືຫລຸດພົ້ນອອກຈາກປະເທດດ້ອຍພັດທະນາໃນປີ 2020.
ທ່ານ ບຸນກວ້າງ ສຸວັນນະພັນ ຜູ້ອໍານວຍການບໍລິຫານ ທລຍ ໄດ້ລາຍງານຕໍ່ກອງປະຊຸມ ກ່ຽວກັບການ ຈັດຕັ້ງປະຕິບັດວຽກງານ ທລຍ ໃນ 1 ປີຜ່ານມາວ່າ ມີຂໍ້ສະດວກ ແລະ ຂໍ້ຫຍຸ້ງຍາກຄືແນວໃດ ແລະ ຄວນຈະມີການປັບປຸງໃນຕໍ່ໜ້າຄືແນວໃດ. ສໍາລັບສົກປີ 2013-2014 ກໍຄືຮອບວຽນທີ 11 ຈະນໍາໃຊ້ງົບປະມານ 78,321 ຕື້ກີບ ເຂົ້າໃນການຈັດຕັ້ງປະຕິບັດ 338 ໂຄງການຍ່ອຍ ໃນນີ້ 86 ໂຄງການຍ່ອຍ ຈະນໍາໃຊ້ທຶນສົມທົບຂອງລັດຖະບານຈໍານວນ 16 ຕື້ກີບ ແລະ ຈະຈັດຕັ້ງປະຕິບັດຢູ່ 1,950 ບ້ານ, 278 ກຸ່ມບ້ານ, 42 ເມືອງ ຂອງ 10 ແຂວງ ໝາຍຄວາມວ່າມີ 2 ເມືອງ ເພີ້ມຂຶ້ນຈາກປີຜ່ານມາຄື: ເມືອງໄຊແຂວງອຸດົມໄຊ, ແລະ ເມືອງຈອມເພັດແຂວງຫລວງພະບາງ.
ເພື່ອເຮັດກອງປະຊຸມສະພາບໍລິຫານໃນເທື່ອນີ້ມີຄວາມໝາຍຄວາມສໍາຄັນນັ້ນ ທ່ານ ບຸນເຮືອງ ດວງພະຈັນ ລັດຖະມົນຕີປະຈໍາຫ້ອງວ່າການລັດຖະບານ, ຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ປະທານສະພາບໍລິຫານ ທລຍ ໄດ້ກ່າວມີຄວາມເຫັນທີ່ກອງປະຊຸມວ່າ: ວຽກງານ ທລຍ ກໍແມ່ນວຽກອັນດຽວກັນກັບວຽກສາມສ້າງ ໂດຍສະເພະ ການສ້າງບ້ານໃຫ້ເປັນຫົວໜ່ວຍຍພັດທະນາ ເພາະວ່າວຽກງານ ທລຍ ກໍແມ່ນການສ້າງຄວາມເຂັ້ມແຂງ ໃຫ້ແກອຳນາດການປົກຄອງ ແລະ ພໍ່ແມ່ປະຊາຊົນ ຢູ່ຂັ້ນທ້ອງຖີ່ນ ເພື່ອໃຫ້ເຂົາເຈົ້າສາມາດດຳເນີນການພັດທະນາຊຸມຊົນຂອງເຂົາເຈົ້າ ດ້ວຍໂຕຂອງເຂົາເຈົ້າເອງ ຊຶ່ງສອດຄ່ອງກັບ ຫລັກການ ແລະ ທິດທາງຂອງພັກ-ລັດເຮົາ ທີ່ເວົ້າວ່າ ມາຈາກປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ ຊຶ່ງເປັນການມອບສິດ ແລະ ໃຫ້ພໍ່ໍແມ່ປະຊາຊົນ ເປັນເຈົ້າໂຕເອງ ໃນການພັດທະນາ ແລະ ຫຼຸດຜ່ອນແນວຄິດເອື່ອຍອີງຂອງເຂົາເຈົ້າລົງເທື່ອລະກ້າວ ນອກຈາກນັ້ນ ທລຍ ກໍໄດ້້ຝຶກອົບຮົມສ້າງຄວາມເຂັ້ມແຂງໃຫ້ແກ່ຜູ້ຮັບຜິດຊອບຢູ່ແຕ່ລະກຸ່ມບ້ານ ແລະ ແຕ່ລະບ້ານ ທີ່ໄດ້ຮັບໂຄງການຍ່ອຍ ຊຶ່ງເປັນການສົ່ງເສີມສ້າງນັກພັດທະນາກັບທີ່ຢູ່ຂັ້ນທ້ອງຖີ່ນ ຕາມທິດຊີ້ນຳ ຂອງພະນະທ່ານປະທານປະເທດທີ່ໄດ້ກ່າວ ຢູ່ກອງປະຊຸມ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ທົ່ວປະເທດ ເທື່ອທີ່ 3.
ສະນັ້ນ ພວກເຮົາຈະໄດ້ພ້ອມກັນປຶກສາຫາລື ແລະ ຊອກຫາວິທີການປັບປຸງ ເພື່ອໃຫ້ການຈັດຕັ້ງປະຕິບັດວຽກງານ ທລຍ 2 ໃຫ້ມີຜົນສຳເລັດ ຕາມທີ່ໄດ້ກຳນົດໄວ້ ໃນເບື້ອງຕົ້ນ ພ້ອມທັງປຶກສາຫາລື ກ່ຽວກັບທິດທາງ ກໍຄືການກະກຽມວຽກງານ ທລຍ ໃນອະນາຄົດ ຫຼື ທລຍ ໄລຍະທີ່ 3 (2016-2020) ຊຶ່ງ ພື້ນຖານ ຂອງການປຶກສາຫາລື ກ່ຽວກັບບັນຫານີ້ ແມ່ນອີງໃສ່ ຜົນຂອງການປະເມີນ ໄລຍະກາງວຽກງານ ທລຍ 2 ເປັນຫຼັກ.
ສ່ວນກອງປະຊຸມສະພາບໍລິຫານ ທລຍ ຄັ້ງຕໍ່ໄປ ຫລື ຄັ້ງທີ 21ແມ່ນຈັດໄດ້ຈັດຂຶ້ນທີ່ແຂວງສະຫວັນນະເຂດ.
