ໂຄງການ ທລຍ/ຄປພ ໄດ້ມີບົດບາດໃນການສ້າງຄວາມເຂັ້ມແຂງ ແລະ ຍົກສູງບົດບາດຂອງຜູ້ຍິງພ້ອມດ້ວຍການໃຫ້ໂອກາດແກ່ພະນັກງານຈົບໃໝ່
ໂດຍ: ສິນນະຄອນ ອິນທິລາດ
ຄໍາວ່າ “ຜູ້ທີ່ມີປະສົບການ ຈາກເທົ່ານີ້ປີ ຫາ ເທົ່ານັ້ນປີຈະໄດ້ຖືກພິຈາລະນາເປັນພິເສດ” ນີ້ຄືຄຳ ໝາຍເຫດ ຂອງການປະກາດຮັບສະໝັກພະນັກງານໃໝ່ ຂອງຫລາຍໆພາກສ່ວນ ເຊິ່ງເມື່ອໄດ້ອ່ານເບິ່ງ ແລະ ຟັງແລ້ວມັນຄືກັນກັບການປິດກັ້ນໂອກາດນັກສຶກສາທີ່ຈົບໃໝ່ ຍ້ອນວ່າ ຄວາມຈິງແລ້ວນັກສຶກສາທີ່ກຳລັງ ຈົບ ໃໝ່ສ່ວນຫຼາຍກໍຈະຍັງຂາດປະສົບການ.
ແຕ່ສໍາລັບການປະກາດຮັບສະໝັກພະນັກງານຂອງໂຄງການ ທລຍ/ຄປພ ໃນກິດຈະກໍາປັບປຸງຊີວິດການເປັນຢູ່ ເພື່ອຄໍ້າປະກັນດ້ານໂພຊະນາການ ຫຼື ຄປພ ແມ່ນໄດ້ເປີດໂອກາດໃຫ້ແກ່ນັກສຶກສາຈົບໃໝ່ ໂດຍສະເພາະ ແມ່ນເພດຍິງ ແລະ ຊົນເຜົ່າຈະໄດ້ຖືກພິຈາລະນາເປັນພິເສດ ເຊິ່ງຜ່ານມາໄດ້ບັນຈຸເຂົ້າເປັນພະ ນັກງານ ຫຼື ຜູ້ປະສານງານປະຈຳກຸ່ມບ້ານ ຮັບຜິດຊອບໃນການສ້າງຄວາມເຂັ້ມແຂງໃຫ້ແກ່ຊຸມຊົນ ແລະ ຜ່ານການຈັດຕັ້ງປະຕິບັດວຽກງານມາຕົວຈິງມັນກໍໄດ້ ພິສູດອອກມາໃຫ້ເຫັນວ່າໂຄງການ ຄປພ ໄດ້ມີບົດບາດໃນການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ຊົນເຜົ່າທີ່ໄດ້ເຂົ້າຮ່ວມ ຫຼື ວ່າໄດ້ເປັນພະນັກງານ ຂອງໂຄງການ. ຈາກທີ່ພວກເຂົາເຈົ້າບໍ່ຊີ້ນເຄີຍ ແລະ ບໍ່ສາມາດນຳສະເໜີ ບໍ່ສາມາດນຳພາໃນການຈັດຕັ້ງປະຕິບັດຈົນກາຍມາເປັນພະນັກງານທີ່ມີຄວາມ ເຂັ້ມແຂງ ສາມາດນຳພາພໍ່ແມ່ປະຊາຊົນ ທີ່ຢູ່ໃນເຂດຮັບຜິດ ຊອບຂອງການຈັດຕັ້ງປະຕິບັດ ກິດຈະ ກຳສ້າງລາຍຮັບຕ່າງໆ ເຮັດໃຫ້ຊີດວິດການເປັນຢູ່ຂອງພໍ່ ແມ່ປະຊາຊົນມີການປ່ຽນແປງໃນທາງທີ່ດີຂື້ນ ນອກນັ້ນກໍຍັງສາມາດນຳສະເໜີບົດຕ່າງໆ ຢູ່ໃນກອງປະຊຸມຕ່າງໆ ຈາກກອງປະຊຸມໃນລະດັບບ້ານ ລະດັບກຸ່ມ ບ້ານ ລະດັບເມືອງ ແລະ ລະດັບແຂວງ ລວມທັງກອງປະຊຸມທົບທວນຄືນການຈັດຕັ້ງປະຕິບັດໂຄງການປະຈຳປີ ເຊິ່ງແມ່ນກອງປະຊຸມປືກສາຫາລືຖອດຖອນ ບົດຮຽນຮ່ວມກັນ ໃນລະດັບປະເທດຂອງໂຄງການ ເຊິ່ງໄດ້ສັງເກດເຫັນວ່າບັນດາພະນັກງານທີ່ເປັນແມ່ຍິງກໍມີຄວາມສາມາດໃນການນຳສະເໜີໄດ້ດີ.
ອັນນີ້ມັນກໍແມ່ນສິ່ງໜື່ງທີ່ສາມາດພິສູດຄໍາເວົ້າທີ່ວ່າ “ ໂອກາດຄື ຂໍກຸນແຈ ເພື່ອເປີດປະຕູໃຫ້ຄວາມສາມາດ ກ້າວໄປສູ່ຄວາມສຳເລັດ “ ເຊິ່ງການຈັດຕັ້ງປະຕິ ບັດກິດຈະກໍາຕ່າງໆ ຂອງ ທລຍ ກໍໄດ້ເອົາການເຂົ້າຮ່ວມ ການມີສ່ວນຮ່ວມຂອງແມ່ຍິງ,ຊົນເຜົ່າ ແລະ ຜູ້ດ້ອຍໂອກາດ ພ້ອມທັງການສ້າງຄວາມເຂັ້ມແຂງໃຫ້ ແກ່ເຂົາເຈົ້າ. ເປັນຕົ້ນການເຂົ້າຮ່ວມກອງປະຊຸມແມ່ນໃຫ້ມີແມ່ຍິງ ຕັ້ງແຕ່ 50% ຂື້້ນໄປ, ການຄັດເລືອກເອົາ ຜູ້ປະສານງານກຸ່ມບ້ານ ໃນຈຳນວນ 3 ຄົນ ຕ້ອງປະກອບມີແມ່ຍິງຢ່າງນ້ອຍ 1 ຄົນ ຖ້າເປັນແມ່ຍິງໝົດຍິ່ງເປັນການດີ , ການຄັດເລືອກເອົາຕົວແທນ ກໍເຊັ່ນດຽວກັນຕ້ອງເປັນຕົວແທນທີ່ມາຈາກແມ່ຍິງ ແລະ ຕົວແທນຊົນເຜົ່າສ່ວນນ້ອຍ. ນອກຈາກນັ້ນ ທລຍ ຍັງໄດ້ເປີດໂອກາດໃຫ້ແກ່ຜູ້ທີ່ເຂົ້າຮ່ວມນັ້ນໄດ້ມີສ່ວນຮ່ວມໃນການປືກສາຫາລື ມີຄຳຄິດເຫັນສ້າງ ຄວາມສາມາດໃຫ້ແກ່ຕົນເອງ ເທື່ອລະກ້າວ ຈົນກາຍເປັນພະນັກງານທີ່ມີຄວາມສາມາດ ແລະ ເຂັ້ມແຂງ.
