ທລຍ ເນັ້ນໃສ່ການພັດທະນາຊັບພະຍາກອນມະນຸດ
ໂດຍ: ຫັດທະຈັນ ພິມພັນທະວົງ
ເພື່ອປະຕິບັດຕາມທິດເນື້ອໃນ 4 ບຸກທະລຸຂອງກອງປະຊຸມໃຫຍ່ຄັ້ງທີ່ 9 ຂອງພັກ ກໍຄືບຸກທະລຸທາງດ້ານການພັດທະນາຊັບພະຍາກອນມະນຸດ ໂດຍສະເພາະ ແມ່ນການບໍາລຸງສ້າງ ແລະ ຍົກລະດັບຄວາມຮູ້ຄວາມສາມາດຂອງພະນັກງານໃຫ້ມີຄວາມເຂັ້ມແຂງຮອບດ້ານນັ້ນ ໃນລະຫວ່າງວັນທີ 21 ມັງກອນ ຫາ 04 ກຸມພາ 2015. ພະແນກຕິດຕາມ-ປະເມີນຜັນ ໄດ້ລົງຕິດຕາມ ແລະ ທໍາຄວາມເຂົ້າໃຈຄືນກ່ຽວກັບຄວາມໝາຍ-ຄວາມສຳຄັນຂອງຂໍ້ມູນທີ່ກ່ຽວຂ້ອງກັບຕົວຊີ້ວັດຜົນໄດ້ຮັບຂອງໂຄງການ ໃຫ້ແກ່ພະນັກງານຂັ້ນແຂວງ ໂດຍສະເພາະ ແມ່ນຜູ້ປະສານງານຂັ້ນແຂວງ ແລະ ຜູ້ຮັບຜິດຊອບວຽກຕິດຕາມ-ປະເມີນຜົນຂັ້ນແຂວງ ຢູ່ 6 ແຂວງພາກເໜືອ (ແຂວງຫລວງນໍ້າທາ, ອຸດົມໄຊ, ຜົ້ງສາລີ, ຫລວງພະບາງ, ຊຽງຂວາງ ແລະ ແຂວງຫົວພັນ) ພ້ອມດຽວກັນນັ້ນກໍເພື່ອໃຫ້ຄວາມ ກະຈ່າງແຈ້ງກ່ຽວກັບພາລະບົດບາດຂອງພະນັກງານຕິດຕາມ-ປະເມີນຜົນ ເຊິ່ງມີຄວາມໝາຍແຕກຕ່າງກັບຜູ້ປ້ອນຂໍ້ມູນ ເພາະຜູ້ປະເມີນຜົນແມ່ນເປັນບຸກຄົນທີ່ສາມາດຕີລາຄາ ຜົນໄດ້ຮັບຂອງໂຄງການ ຕາມຕົວຊີ້ວັດທີ່ເຫັນດີລະຫວ່າງຜູ້ໃຫ້ທຶນ ແລະ ລັດຖະບານແຫ່ງ ສ ປປ ລາວ.
ສໍາລັບການລົງຕິດຕາມ ແລະ ຊຸກຍູ້ ກໍຄືການຝຶກອົບຮົມກັບທີ່ໃນເທື່ອນີ້ ແມ່ນໄດ້ຊີ້ນໍາ ຕົວຊີ້ວັດຜົນໄດ້ຮັບ ແລະ ການເກັບກຳຂໍ້ມູນ ລວມທັງການປ້ອນຂໍ້ມູນເຂົ້າໃນລະບົບຖານຂໍ້ມູນ, ນອກນັ້ນ ກໍ່ຍັງມີວຽກງານການລາຍງານ, ການປະເມີນ ແລະ ການກວດກາຄວາມຖືກຕ້ອງຂອງຂໍ້ມູນ, ລະຫັດຂໍ້ມູນ, ຄວາມ ຈໍາເປັນຂອງວຽກງານ ກົນໄກສະແດງຄໍາຄິດຄໍາເຫັນ ແລະ ແກ້ໄຂບັນຫາ (ກສກ), ວຽກແຜນທີ່, ການໃສ່ຊື່ໂຄງການທີ່ເປັນພາສາລາວ ແລະ ພາສາອັງກິດ ແລະ ວຽກອື່ນໆ. ຍ້ອນເຫດຜົນທີ່ວ່າວຽກງານຕິດຕາມປະເມີນຜົນແມ່ນກ່ຽວຂ້ອງກັບທຸກພະແນກ ສະນັ້ນ ຈິ່ງມີຄວາມຈຳເປັນຕ້ອງ ໄດ້ທຳຄວາມເຂົ້າໃຈຄືນໃໝ່ໃຫ້ທຸກຄົນ ໃນແຕ່ລະຂັ້ນ ເພື່ອມີສ່ວນຮ່ວມໃນການກວດກາ ແລະ ສະໜອງຂໍ້ມູນໃຫ້ມີຄວາມຖືກຕ້ອງທີ່ສຸດ.
ພ້ອມດຽວກັນນີ້ກໍ່ຍັງໄດ້ມີການຖອດຖອນບົດຮຽນລະຫວ່າງຜູ້ຮັບຜິດຊອບວຽກ ຕິດຕາມ-ປະເມີນຜົນຂັ້ນແຂວງ ທີ່ເຂົ້າສັງກັດໃໝ່ ແລະ ພະນັກງານເກົ່າທີ່ມີປະສົບການ ເພາະໃນໄລຍະຕໍ່ໄປແມ່ນ ຈະໃຫ້ພະນັກງານທີ່ຜ່ານການເຮັດວຽກກ່ຽວກັບວຽກງານຕິດຕາມ-ປະເມີນຜົນ ຫລາຍປີ ແລະ ມີຜົນງານດີ ໄປຊ່ວຍບາງແຂວງທີ່ແມ່ນພະນັກງານບັນຈຸໃໝ່ ເພື່ອໃຫ້ເຂົາເຈົ້າເຫລົ່ານັ້ນສາມາດຊ່ວຍເຫລືອ ເຊິ່ງກັນ ແລະ ກັນ ເພື່ອແບ່ງເບົາພາລະຂອງ ຜູ້ຮັບຜິດຊອບວຽກດັ່ງກ່າວຢູ່ ຂັ້ນສູນກາງ. ເຊິ່ງໄດ້ມີການປະຕິບັດທົດລອງຕົວຈິງເຊັ່ນວ່າ ເອົາຜູ້ຮັບຜິດຊອບວຽກຕິິດຕາມປະເມີນຜົນແຂວງຜົ້ງສາລີ ມາຖອດ ຖອນບົດຮຽນຢູ່ແຂວງຫລວງພະບາງ ແລະ ຜູ້ຮັບຜິດຊອບວຽກຕິິດຕາມປະເມີນຜົນແຂວງແຂວງຊຽງຂວາງ ມາຖອດຖອນບົດ ຮຽນຢູ່ແຂວງຫົວພັນ.
ຜ່ານການລົງຕິດຕາມ ແລະ ຝຶກອົບຮົມກັບທີ່ ເປັນໄລຍະເວລາ 15 ວັນ ເຫັນໄດ້ວ່າ ປະສົບຜົນສຳເລັດຕາມຄາດໝາຍທີ່ວາງໄວ້ ເພາະເຫັນໄດ້ວ່າພະນັກງານທຸກ ຄົນແມ່ນມີຄວາມເຂົ້າໃຈກ່ຽວບັນດາຕົວຊີ້ວັດທີ່ສໍາຄັນຂອງ ທລຍ ພ້ອມທັງວິທີເກັບກໍາຂໍ້ມູນຕາມໂຄງຮ່າງທີ່ໄດ້ກໍານົດໄວ້ ເປັນແຫລ່ງຂໍ້ມູນຕ່າງໆຕາມແບບຟອມຂອງ ທລຍ ທີ່ກໍານົດໄວ້ໃນໄລຍະຕົ້ນ. ເພື່ອຮັບປະກັນປະສິດທິພາບຂອງໜ້າວຽກໃນອະນາຄົດແມ່ນໄດ້ສະເໜີໃຫ້ຜູ້ປະສານງານແຂວງ ໃນແຕ່ລະແຂວງເປັນຜູ້ສືບຕໍ່ ແລະ ຜັນຂະຫຍາຍຄວາມຮູ້ດັ່ງກ່າວໃຫ້ພະນັກງານຂອງຕົນ ພ້ອມທັງການ ກວດກາ ແລະ ຮັບຮອງຄວາມຖືກຕ້ອງຂອງຂໍ້ມູນຢ່າງມີປະສິດຕິຜົນ.
