ທລຍ ໃຫ້ຄວາມສໍາຄັນຕໍ່ການສ້າງຄວາມເຂັ້ມແຂງໃຫ້ແກ່ຊຸມຊົນ
ໂດຍ: ຄຳພັນ ພັນທະວົງ
ການເພີ່ມຄວາມຮູ້ຄວາມສາມາດ ແລະ ຄ່ຽນຄວາມຮັບຜິດຊອບໃຫ້ແກ່ຊຸມຊົນ ແມ່ນວຽກງານໜຶ່ງທີ່ ທລຍ ໃຫ້ຄວາມສໍາຄັນ ແລະ ເອົາໃຈໃສ່ເປັນພິເສດ ເພາະວ່າແມ່ນຂອດສໍາຄັນທີ່ກ້າວໄປສູ່ການພັດທະນາທີ່ຂັບເຄື່ອນໂດຍຊຸມຊົນເອງແບບເຕັມຮູບແບບ ເພື່ອໃຫ້ໂຄງການຍ່ອຍມີຄວາມຍືນຍົງ ໃນວັນທີ 7-8 ກໍລະກົດ 2015 ທລຍ ເມືອງນໍ້າບາກໄດ້ຈັດກອງປະຊຸມ ຝຶກອົບຮົມກ່ຽວກັບ ວຽກງານການກວດສອບທາງສັງຄົມຂັ້ນບ້ານ ໃຫ້ແກ່ບ້ານທີ່ໄດ້ຮັບໂຄງການຍ່ອຍຮອບວຽນ 12 ສົກປີ 2014-2015
ທີ່ຫ້ອງປະຊຸມ ຫ້ອງການສາທາເມືອງນໍ້າບາກ ໂດຍການເປັນປະທານ ຂອງ ທ່ານ ຄຳຜາຍ ມະນີແສງຫົວໜ້າຫ້ອງການພັດທະນາຊົນນະບົດ ແລະ ລຶບລ້າງຄວາມທຸກຍາກເມືອງນໍ້າບາກ.
ກອງປະຊຸມປະກອບມີຄະນະກວດສອບຂັ້ນບ້ານ ທີ່ມາຈາກ 6 ບ້ານເປົ້າໝາຍ, ທລຍ ເມືອງ ,ທລຍ ແຂວງ ແລະ ທລຍ ສູນກາງ ເຂົ້າຮ່ວມທັງໝົດ 35 ທ່ານ, ໃນນັ້ນ ມີແມ່ຍິງຈໍານວນ 13 ທ່ານ.
ຈຸດປະສົງແມ່ນ:
· ເພື່ອສ້າງຄວາມເຂັ້ມແຂງໃຫ້ແກ່ຄະນະກວດສອບທາງສັງຄົມຂັ້ນບ້ານກ່ຽວກັບວິທີການກວດສອບການຈັດຕັ້ງປະຕິບັດໂຄງການຍ່ອຍທີ່ຈະໄດ້ຮັບການຊ່ວຍເຫລືອຈາກທລຍ;
· ເພື່ອຮັບປະກັນໃຫ້ແກ່ໂຄງການຍ່ອຍທີ່ໄດ້ຮັບການຊ່ວຍເຫລືອຈາກ ທລຍ ມີຄຸນນະພາບ ແລະ ສາມາດນຳໃຊ້ໄດ້ຍາວນານ.
ທີ່ກອງປະຊຸມໄດ້ ມີຫລາຍຫົວຂໍ້ໃນການຝຶກອົບຮົມ ເປັນຕົ້ນແມ່ນ: ທົບທວນຄືນຄະນະກວດສອບທາງສັງຄົມຂັ້ນບ້ານ, ໜ້າວຽກທີ່ຈະຕ້ອງກວດກາ, ນຳສະເໜີບົດຮຽນທີ່ພົບເຫັນຈາກການຈັດ ຕັ້ງປະຕິບັດໂຄງການຍ່ອຍໃນໄລຍະຜ່ານມາ, ສ້າງປື້ມບັນທຶກຂອງຄະນະກວດສອບ, ສ້າງແຜນ ການເຄື່ອນໄຫວຂອງຄະນະກວດສອບຂັ້ນບ້ານ.
ການດໍາເນີນກອງປະຊຸມ ຝຶກອົບຮົມແມ່ນດຳເນີນ ເປັນເວລາ 2 ວັນເຕັມ ເຊິ່ງຄະນະກວດສອບຂັ້ນບ້ານໄດ້ເອົາໃຈໃສ່ຄົ້ນຄົ້ວ ປຶກສາຫາລືຢ່າງກົງໄປກົງມາ ,ເຈາະຈິ້້ມ ແລະ ຖອດຖອນກັບບົດຮຽນທີ່ໄດ້ເຫັນຜ່ານມາ ແລະ ວຽກງານກວດສອບກໍ່ເປັນວຽກທີ່ສຳຄັນ ທີ່ສຸດທີ່ຈະເຮັດໃຫ້ໂຄງການຍ່ອຍມີຄຸນນະພາບ, ນຳໃຊ້ໄດ້ຢ່າງຍາວນານ, ມີຄວາມໂປ່ງໃສໃນຂະບວນການຕ່າງໆ ແລະ ເປັນຫົນທາງກ້າວໄປສູ່ການພັດທະນາທີ່ຂັບເຄື່ອນໂດຍຊຸມຊົນເອງ ແບບເຕັມຮູບແບບ.
ຕອນທ້າຍຂອງການຝຶກອົບຮົມ ທ່ານຄຳຜາຍ ມະນີແສງ ໄດ້ມີຄຳເຫັນ ທິດຊີ້ນຳໃນຂັ້ນຕອນຂະບວນການ ຈັດຕັ້ງປະຕິບັດຢູ່ຂັ້ນບ້ານ, ຂັ້ນຕອນການປະສານງານກັບພາກສ່ວນຕ່າງໆ ຢູ່ຂັ້ນທ້ອງຖິ່ນ ເຮັດແນວໃດ ໃຫ້ຄະນະກວດສອບຂັ້ນບ້ານໄດ້ນຳເອົາບົດຮຽນ ໄປຈັດຕັ້ງປະຕິບັດ ແລະ ຜັນຂະຫຍາຍ ເຂົ້າສູ່ວຽກງານຕົວຈິງຢ່າງເປັນຮູບປະທຳ.
