ກອງປະຊຸມແລກປ່ຽນບົດຮຽນ
ການວາງແຜນແບບມີສ່ວນຮ່ວມຂັ້ນທ້ອງຖິ່ນຢູ່ໃນ ສ ປ ປ ລາວ
ໂດຍ: ຄອນທິບ ພວງເພັດ
ເພື່ອເປັນການນຳສະເໜີບົດຮຽນ ແລະ ປະສົບການຕົວຈິງ ຂອງພາກສ່ວນຕ່າງໆທີ່ໄດ້ນຳໃຊ້ຢູ່ພາກສະໜາມ ພາຍຫລັງທີ່ໄດ້ຖືກຮັບຮອງ ແລະ ປະກາດໃຫ້ນຳໃຊ້ແຕ່ປີ 2012 ເປັນຕົ້ນມາ; ແລະ ເພື່ອປັບປຸງປື້ມຄູ່ມືການວາງແຜນແບບມີສ່ວນຮ່ວມຂັ້ນບ້ານ ໃຫ້ມີຄວາມແທດເໝາະ ກັບສະພາບຂອງແຕ່ລະທ້ອງຖິ່ນ.
ການວາງແຜນແບບມີສ່ວນຮ່ວມໃນ ສ ປ ປ ລາວ ໄດ້ລິເລີ່ມພັດທະນາມາແຕ່ປີ 2005 ເປັນຕົ້ນມາ ໂດຍກະຊວງແຜນນການ ແລະ ການລົງທຶນ ເປັນແກນກາງໃນການປະສານງານ ກັບກະຊວງທະບວງກົມ, ໃນນັ້ນ ບັນດາອົງການ ຫຼື ໂຄງການພັດທະນາຕ່າງໆທີ່ຊ່ວຍເຫລືອຢູ່ໃນ ສ ປ ປ ລາວ ກໍໄດ້ມີສ່ວນຮ່ວມຢ່າງຫ້າວຫັນ. ຈຸດປະສົງຕົ້ນຕໍຂອງການວາງແຜນພັດທະນາແບບມີສ່ວນຮ່ວມຂັ້ນບ້ານ ແມ່ນການສ້າງໂອກາດໃຫ້ແກ່ພໍ່ແມ່ປະຊາຊົນ, ໂດຍສະເພາະຜູ້ຍິງໄດ້ສະເໜີຄວາມຕ້ອງການ ແລະ ແນວຄວາມຄິດຂອງເຂົາເຈົ້າ ເພື່ອປະກອບສ່ວນເຂົ້າໃນການສ້າງແຜນພັດທະນາບ້ານ,ຊຶ່ງແຜນພັດທະນາຂັ້ນໝູ່ບ້ານນີ້ຈະກາຍເປັນຂໍ້ມູນພື້ນຖານໃຫ້ແກ່ການສ້າງແຜນພັດທະນາເສດຖະກິດ-ສັງຄົມຂອງເມືອງໃນແຕ່ລະໄລຍະ.
ໃນວັນທີ 31/03/2015 ຜ່ານມາ ກະຊວງແຜນການ ແລະ ການລົງທືນ ຮ່ວມກັບ ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ພາຍໃຕ້ການສະໜັບສະໜູນຈາກ ທະນາຄານໂລກ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ໄດ້ຈັດກອງປະຊຸມດັ່ງກ່າວຂື້ນທີ່ໂຮງແຮມເສດຖາປາລາສ ໂດຍການເປັນປະທານຮ່ວມຂອງທ່ານ ລຽນທອງ ສຸພານີ, ຮອງຫົວໜ້າກົມແຜນການ, ກະຊວງແຜນການ ແລະ ການລົງທຶນ, ທ່ານ ຄໍາຜາຍ ວິໄລຫົງ, ຫົວໜ້າພະແນກພົວພັນຕ່າງປະເທດ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ທ່ານ ຊາໂຕຊິ ອິຊິຮາລາ(Satoshi Ishihara) ຊ່ຽວຊານອາວຸໂສ ດ້ານພັດທະນາສັງຄົມ, ທະນາຄານໂລກ ແລະ ການເຂົ້າຮ່ວມຂອງບັນດາກະຊວງທີ່ກ່ຽວຂ້ອງ ແລະ ອົງການຈັດຕັ້ງສາກົນ 53 ຄົນ, ຍິງ 25 ຄົນ.
ທີ່ກອງປະຊຸມ ຕາງໜ້າຈາກ ກົມແຜນການ, ກະຊວງແຜນການ ແລະ ການລົງທຶນໄດ້ນໍາສະເໜີປະຫັວດຄວາມເປັນມາກ່ຽວກັບ ປະຫວັດຄວາມເປັນມາ ກ່ຽວກັບການພັດທະນາປື້ມຄູ່ມືການວາງແຜນແບບມີສ່ວນຮ່ວມຂັ້ນບ້ານ,ຈາກນັ້ນ ຜູ້ຕາງໜ້າ ໂຄງການພັດທະນາເຂດເນີນສູງພາກເໜືອຂອງລາວນຳສະເໜີບົດຮຽນແລະ ປະສົບການ ໃນການວາງແຜນແບບມີສ່ວນຮ່ວມຂັ້ນບ້ານ ຢູ່ 3 ແຂວງພາກເໜືອ ແລະ ຜູ້ຕາງໜ້າ ທລຍ (PRF)ນໍາສະ ເໜີບົດຮຽນ ແລະ ປະສົບການ ແລະໃນການວາງແຜນແບບມີສ່ວນຮ່ວມຂັ້ນບ້ານ ແລະ ຂັ້ນກຸ່ມບ້ານ ຢູ່ 44 ເມືອງ ໃນ 10 ແຂວງ, ສ່ວນປະສົບການ ແລະ ບົດຮຽນໃນການວາງແຜນພັດທະນາເມືອງ ແມ່ນ ນໍາສະເໜີ້ໂດຍຜູ້ຕາງໜ້າໂຄງການ GPAR, ສຸດທ້າຍ ຜູ້ຕາງໜ້າໂຄງການ SNV ນໍາສະເໜີບົດຮຽນ ແລະ ປະສົບການການວາງແຜນພັດທະນາແບບມີສ່ວນຮ່ວມຂັ້ນບ້ານ.
ພາຍຫລັງສໍາເລັດການນໍາສະເໜີບົດຮຽນ ແລະ ປະສົບການແລ້ວ ຜູ້ເຂົ້າຮ່ວມໄດ້ສືບຕໍ່ສົນທະນາແລກປ່ຽນບົດຮຽນຊຶ່ງກັນ ແລະ ກັນຕື່ມ, ຊຶ່ງກອງປະຊຸມໄດ້ເຕັມໄປດ້ວຍບັນຍາກາດຟົດຟື້ນ ແລະ ມີເນື້ອໃນຄວາມໝາຍຄົບຖ້ວນສົມບູນ ແລະ ມີໝາກຜົນເປັນທີ່ໜ້າພໍໃຈ, ທຸກຄົນມີຄວາມເປັນເອກະພາບໃນດ້ານຫລັກການ ແລະ ຮູບແບບວິທີການວາງແຜນແບບມີສ່ວນຮ່ວມຂັ້ນບ້ານ ຢູ່ໃນ ສ ປ ປ ລາວ ແລະ ເຫັນດີໃຫ້ມີການປັບປຸງປື້ມຄູ່ມື ເພື່ອສືບຕໍ່ຊຸກຍູ້ນໍາໃຊ້ຢູ່ໃນຂັ້ນທ້ອງຖີ່ນ ໂດຍນໍາໃຊ້ຮູບແບບ ການພັດທະນາທີ່ຂັບເຄື່ອນໂດຍຊຸມຊົນ(CDD). ການວາງແຜນດັ່ງກ່າວມີຢູ່ຂອບທົ່ວປະເທດ ເພາະໄດ້ຮັບຮອງເອົາໂດຍ ກະຊວງແຜນການ ແລະ ການລົງທຶນ
ໃນຕອນທ້າຍ ທ່ານ ລຽນທອງ ສຸພານີກ່າວໃນພິທີປິດກອງປະຊຸມວ່າ: ກອງປະຊຸມຄັ້ງນີ້ເປັນກອງປະຊຸມຄັ້ງທໍາອິດທີ່ພວກເຮົາໄດ້ຈັດຂື້ນ ແຕ່ວ່າມັນມີຄວາມໝາຍຄວາມສໍາຄັນຫລາຍຕໍ່ກັບການຮ່ວມມືປະສານງານ ແລະ ສ້າງຄວາມເປັນເອກະພາບ ເພື່ອບໍ່ໃຫ້ພໍໍ່ແມ່ປະຊົນມີຄວາມສັບສົບກັບຮູບແບບຂອງພວກເຮົາ ສະນັ້ນ ພວກເຮົາຄວນມີວິໃນການຈັດຕັ້ງປະຕິບັດແບບດຽວກັນ ຈຶ່ງຈະຖືໄດ້ວ່າລັດຖະບານລາວມີລະບົບແບບແຜນວິທີເຮັດວຽກ ທີ່ສອດຄອ່ງກັນ ນັບແຕ່ສູນກາງຈົນຮອດຂັ້ນທ້ອງຖິ່ນ ຖ້າເຮັດໄດ້ຄືແນວນີ້ ຈຶ່ງຈະສ່ອງແສງໃຫ້ເຫັນເຖີງການເຮັດວຽກຂອງພວກເຮົາມີປະສິດຕິພາບກ່ຽວກັບວິທີການວາງແຜນຢູ່ຂັ້ນທ້ອງຖິ່ນ ແລະ ນໍາໃຊ້ຢ່າງກ້ວາງຂວາງໃນຂອບເຂດທົ່ວປະເທດ. ນອກຈາກນີ້ ເພື່ອເປັນການສຶກສາຕໍ່ ອົງການພັດທະນາຂອງປະເທດສະວິດເຊີແລນປະຈໍາລາວ (SDC) ຈະໃຫ້ການຊ່ວຍເຫຼືອ ໃນການດໍາເນີນການສຶກສາຄົ້ນຄວ້າ( Case Study) ທັງນີ້ ເພື່ອເຮັດໃຫ້ຄວາມເຂົ້າໃຈກ່ຽວກັບການນໍາໃຊ້ວິທີການວາງແຜນດັ່ງກ່າວ ແລະ ຊ່ອງທາງໃນການປະສານງານກັບທຸກພາກສ່ວນໃຫ້ມີຄວາມກົມກຽວໄປໃນລວງດຽວກັນ.
