ຊຸມຊົນສາມັກຄີ ສ້າງຂົວຂ້າມເຊບັງຫຽງ ສໍາເລັດພາຍໃນ 3 ວັນ
ໂດຍ: ສິນນະຄອນ ອິນທິລາດ
ພາຍຫຼັງທີ່ ທລຍ ໄດ້ໃຫ້ການສະໜັບສະໜູນ ໃນການສ້ອມແປງເສັ້ນທາງ ຂອງບ້ານ ພະໂລະ ແລະ ຫ້ວຍຍືງແລ້ວ ປະຊາຊົນ ພາຍໃນ 2 ບ້ານ ແລະ ບ້ານໃກ້ຄຽງ ພ້ອມທັງ ຜູ້ທີ່ຈະໄປມາຫາສູ່ ຄ້າຂາຍ ຜົນຜະລິດ ຫຼື ສິນຄ້າ ກໍຍັງມີຄວາມຫຍຸ້ງຍາກຫຼາຍຢູ່ ຍ້ອນຕ້ອງໄດ້ ຂ້າມນໍ້າ ເຊບັງຫຽງທີ່ ມີຄວາມກວ້າງ ເຖິງ 60 ກວ່າ ແມັດ ມີບາງຈຸດ ມີຄວາມເລີກເກືອບ 1 ແມັດເຄິ່ງ ອັນເປັນສາຍເຫດ ສ້າງຄວາມຫຍຸ້ງຍາກ ລໍາບາກຫລາຍ ໃຫ້ແກ່ ພໍ່ແມ່ປະຊາ
ຊົນທີ່ຈະເດີນທາງໄປມາ ໂດຍສະເພາະເວລາກາງຄືນ ແລະ ຍາມເຈັບເປັນ ແຕ່ຖ້າຈະອາໃສງົບປະມານ ຂອງ ທລຍ ທີ່ໃຫ້ການສະໜັບສະໜູນ ແຕ່ລະກຸ່ມ ໃນແຕ່ລະຮອບວຽນຫຼືຈະເວົ້າອີກວ່າ ຕະຫຼອດທັງ 4ຮອບວຽນ ກໍບໍ່ພຽງ
ພໍ ຖ້າຈະນໍາມາກໍ່ສ້າງຂົວແຫ່ງດັ່ງກ່າວນັ້ນ. ແຕ່ຖ້າຈະບໍ່ເຮັດຫຍັງເລີຍການສ້ອມແປງທາງເສັ້ນດັ່ງກ່າວ ກໍບໍ່ມີປະໂຫຍດ ເຖີງວ່າມັນຈະຊ່ວຍອໍານວຍຄວາມສະດວກໃນການເດີນທາງມາຮອດ ຈຸດນໍ້າເຊ ແລະ ສືບຕໍ່ໄປຫາຕົວເມືອງ ແຕ່ຢູ່ໃນຈຸດຂ້າມເຊດັ່ງກ່າວ ຕ້ອງໄດ້ແບກຫາມລົດ ຖ້າຈະໃຊ້ເຮືອກໍບໍ່ສະດວກເພາະມີແກ້ງ ມີຫີນ. ດັ່ງນັ້ນ ຜ່ານການເອົາ ປະຊາຊົນໄປຢ້ຽມຢາມ ລະຫວ່າງບ້ານ ລະຫວ່າງກຸ່ມ ບວກກັບການປຸກລະດົມແນວຄິດໃຫ້ເຂົາເຈົ້າໄດ້ເຂົ້າອົກເຂົ້າໃຈ ໃນການສ້າງສາພັດທະນາ ເປັນເຈົ້າຕົນເອງໃນການລິເລີ່ມ. ຊາວບ້ານ ພະໂລ ແລະ ບ້ານຫ້ວຍຍືງ ຈຶ່ງໄດ້ມີຄວາມສາມັກຄີກັນ ຕັດສີນໃຈກໍ່ສ້າງ ຂົວໄມ້ລຽນລໍາ ເຊິ່ງມີຄວາມຍາວ 68 ແມັດ ແລະ ມີມູນຄ່າລວມ ຫຼາຍກວ່າ 10 ລ້ານ ກີບ ໃຫ້ສໍາເລັດພາຍໃນ 3 ວັນ ບວກກັບການກະກຽມ ໄມ້ຕອກຄອກຕາ ອີກ 2 ວັນ ພໍດີເປັນ 5 ວັນ ແລະ ສາມາດຊົມໃຊ້ໄດ້ 7 ຫຼື 9 ເດືອນຕໍ່ປີ ຍ້ອນວ່າ ຮອດກາງລະດູຝົນ ອາດຈະຖືກໄພທໍາມະຊາດພັດເອົາໄປ.
ການກໍ່ສ້າງຂົວແຫ່ງດັ່ງກ່າວນີ້ ເຖີງວ່າຈະມີມູນຄ່າດັ່ງທີ່ກ່າວມາຂ້າງເທີງນັ້ນ ແຕ່ເມື່ອ ພໍ່ແມ່ປະຊາຊົນພາຍໃນ 2 ບ້ານມີຄວາມສາມັກຄີກັນແລ້ວ ໄດ້ຕັດສີນໃຈ ອອກແຮງງານລວມ ຕັດໄມ້ ເຊິ່ງເປັນໄມ້ ຂະໜາດນ້ອຍ ໝາຍຄວາມວ່າ ບໍ່ແມ່ນໄມ້ທີ່ຈະໃຫຍ່ ມີມູນຄ່າສູງ ຫຼາຍກວ່າ 2,000 ລໍາ ແລະ ຊ່ວຍກັນມາອອກແຮງງານແຕ່ລະມື້ 189 ເທື່ອຄົນ ຜູ້ທີມີລົດຕ໊ອກໆກໍໄດ້ເອົາມາປະກອບສ່ວນ ແລະ ເອົາເງີນກອງ ທືນ ຊື້ນໍ້າມັນໃສ່ ແລະ ອາຫານການກິນກໍແມ່ນ ເອົາມາຈາກ ແຕ່ລະຄົນທີ່ມາອອກແຮງງານນັ້ນ ໝາຍຄວາມວ່າ ຫຼີກລ້ຽງ ການນໍາໃຊ້ເງິນ ຖ້າໃຊ້ກໍໄດ້ຊື້ ແຕ່ສິ່ງທີ່ຈໍາເປັນ ເຊັ່ນ: ເຫຼັກຕາປູ . ເຮັດໃຫ້ການກໍ່ສ້າງຂົວແຫ່ງດັ່ງກ່າວນັ້ນໄດ້ນໍາໃຊ້ງົບປະມານ ພຽງແຕ່ 1 ສ່ວນ 5 ຂອງງົບປະມານ ທີ່ຄິດໄລ່ທັງໝົດ ນີ້ແມ່ນສະແດງເຖີງຄວາມສາມັກຄີອັນແຂງແກ່ນ ແລະ ຄວາມເປັນເຈົ້າການ ເຂົາເຈົ້າມີຄວາມຕື່ນຕົວ ບໍ່ລໍຖ້າແຕ່ການຊ່ວຍເຫຼືອທາງນອກ ສິ່ງໃດ ສາມາດແກ້ໄຂໄດ້ດ້ວຍຕົນເອງກໍຈະບໍ່ລັ່ງເລ ພໍ່ແມ່ປະຊາຊົນ 2 ບ້ານດັ່ງກ່າວແມ່ນມີຄວາມພອ້ມ ມີຄວາມຫ້າວຫັນ ສາມາດກຸ້ມຕົນເອງ ແລະ ເພິ່ງຕົນເອງໄດ້ ເຖິງແມ່ນວ່າຂົວດັ່ງກ່າວຈະບໍ່ໝັ້ນຄົງກໍຕາມ ແຕ່ມັນສ່ອງແສງໃຫ້ເຫັນເຖິງ ຄວາມເຂັ້ມແຂງຂອງປະຊາຊົນ 2 ບ້ານ ແລະ ສາມາດເປັນບົດຮຽນໃຫ້ກັບບ້ານອື່ນໆ ທີ່ມີບັນຫາຄ້າຍຄື ສອງບ້ານດັ່ງນີ້ໄດ້ເຊັ່ນດຽວກັນ.
