ຖ້າ ການເປັນຜູ້ອຳນວຍຄວາມສະດວກໄດ້ດີ
ປະຊາຊົນຈະມີຄວາມເຂັ້ມແຂງ
ໂດຍ: ແສງເພັດ ວັນນະວົງ
ວຽກງານພັດທະນາຊົນນະບົດ ບໍ່ມີຄວາມຍືນຍົງ
ຍ້ອນ ຊຸມຊົນບໍ່ມີຄວາມເປັນເຈົ້າການ
ຊຸມຊົນບໍ່ມີຄວາມເປັນເຈົ້າການ
ຂຶ້ນກັບ ວິທີການສ້າງຄວາມເຂັ້ມແຂງ.
ໃນລະຫວ່າງວັນທີ່ 7-9 ມັງກອນ 2014 ຜ່ານມານີ້ ພະແນກພັດທະນາຊຸມຊົນຈຶ່ງໄດ້ຈັດຊຸດຝຶກອົບຮົມ ກ່ຽວກັບວິທີການເປັນຜູ້ອຳນວຍຄວາມສະດວກໃຫ້ແກ່ຊຸມຊົນ ໃຫ້ແກ່ພະນັກງານໂຄງການປັບປຸງຊີວິດການເປັນຢູ່ ເພື່ອຄ້ຳປະກັນທາງດ້ານໂພຊະນາການ ຊຶ່ງເປັນໂຄງການທົດລອງຂອງ ທລຍ ໂດຍມີຜູ້ເຂົ້າຮ່ວມທັງໝົດ 26 ຄົນ, ເປັນຍິງ 11 ຄົນ. ສຳລັບຊຸດຝຶກອົບຮົມຢູ່ເມືອງວຽງທອງ, ແຂວງຫົວພັນນັ້ນ ໂດຍການເປັນຄູຝຶກຂອງ ທ່ານ ຄຳພັນ ພັນທະວົງ ຜູ້ຮັບຜິດຊອບວຽກງານພັດທະນາຊຸມຊົນ ປະຈຳໂຄງການ ທລຍ ແຂວງຫລວງພະບາງ ແລະ ທ່ານ ນາງ ຕົງສອນ ທ່ໍ ຜູ້ຮັບຜິດຊອບວຽກງານພັດທະນາຊຸມຊົນ ປະຈຳໂຄງການ ທລຍ ແຂວງຫົວພັນ ແລະ ສຳລັບຊຸດຝຶກອົບຮົມຢູ່ເມືອງເຊໂປນ, ແຂວງສະຫວັນນະເຂດນັ້ນ ໂດຍການເປັນຄູຝຶກຂອງ ທ່ານ ສຸກສະໝອນ ແສງອາລຸນ ຜູ້ຮັບຜິດຊອບວຽກງານພັດທະນາຊຸມຊົນ ປະຈຳໂຄງການ ທລຍ ແຂວງສາລະວັນ ແລະ ທ່ານ ສິນນະຄອນ ອິນທິລາດ ຜູ້ຮັບຜິດຊອບວຽກງານພັດທະນາຊຸມຊົນ ປະຈຳໂຄງການ ທລຍ ແຂວງສະຫວັນນະເຂດ.
ການຝຶກອົບຮົມຊຸດນີ້ ເປັນການນຳເອົາປະສົບການ ແລະ ບົດຮຽນຕົວຈິງ ຈາກການພັດທະນາຊົນນະບົດ ຕາມຮູບແບບຂອງ ທລຍ ທີ່ເຄີຍຈັດຕັ້ງປະຕິບັດໃນໄລຍະຜ່ານມາ ຈົນມາຮອດປະຈຸບັນ ຊື່ງເປັນວິທີທີ່ເນັ້ນໃສ່ໃຫ້ພ່ໍແມ່ປະຊາຊົນຢູ່ຂັ້ນບ້ານ ມີສ່ວນຮ່ວມໃນການປຶກສາຫາ ແລະ ມອບສິດໃຫ້ເຂົາເຈົ້າເປັນຜູ້ຕັດສິນບັນຫາຕ່າງໆໃນການພັດທະນາຊຸມຊົນຂອງເຂົາເຈົ້າໂດຍເຂົາເຈົ້າເອງ ຊຶ່ງຕິດພັນກັບການຜັນຂະຫຍາຍທິດ 3 ສ້າງຂອງລັດຖະບານ ໂດຍສະເພາະແມ່ນການສ້າງບ້ານໃຫ້ເປັນຫົວໜ່ວຍພັດທະນາ.
_______________________________________________
