ທລຍ ເພີ່ມທະວີແລກປ່ຽນບົດຮຽນວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ກັບສະຖາບັນການສຶກສາ
ໂດຍ: ທລຍ
ເພື່ອເປັນການແລກປ່ຽນບົດຮຽນ ແລະ ປະສົບການຕົວຈິງກັບສະຖາບັນການສຶກສາທີ່ຕິດພັນກັບວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ, ທັງເພື່ອເປັນການປະກອບສ່ວນເຂົ້າໃນກໍ່ສ້າງນັກພັດທະນາຊົນນະບົດໜຸ່ມນ້ອຍຕາມທິດທາງ ຂອງພັກ ແລະ ລັດເຮົານັ້ນ ໃນວັນທີ 2 ສິງຫາ 2013 ກອງທຶນຫຼຸດ ຜ່ອນຄວາມທຸກຍາກ ແລະ ຄະນະກະເສດສາດນາບົງ, ມະຫາວິທະຍາໄລແຫ່ງຊາດໄດ້ຈັດກອງປະຊຸມສຳມະນາກ່ຽວກັບວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຢູ່ ສປປ ລາວ ຂື້ນທີ່ຫ້ອງປະຊຸມຂອງຄະນະກະເສດສາດນາບົງ ໂດຍການໃຫ້ກຽດເປັນປະທານຮ່ວມ ຂອງ ຮອງ ຮສ.ດຣ. ອຸດົມ ພອນຄໍາເພັງ, ຄະນະບໍດີ ຄະນະກະເສດສາດ(ຄກສ) ແລະ ທ່ານ ດຣ. ບຸນກວ້າງ ສຸວັນນະພັນ ຜູ້ອໍານວຍການບໍລິຫານ ກອງທຶນຫລຸດຜ່ອນ ຄວາມທຸກຍາກ (ທລຍ) ຕະຫຼອດຮອດການເຂົ້າຮ່ວມຂອງຄະນະພາກວິຊາທີ່ກ່ຽວຂ້ອງ, ຄະນະອາຈານປະຈຳ, ນັກສຶກສາປີສຸດທ້າຍ ໃນພາກວິຊາຕ່າງໆເຊັ່ນ: ເສດຖະກິດຊົນນະບົດແລະເຕັກ ໂນໂລຊີ, ອາຫານ, ປູກຝັງ, ລ້ຽງສັດແລະການປະມົງ,ຜູ້ຕາງໜ້າຫ້ອງການ ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ (ຄພທສ) ແລະ ພະນັກງານ ທລຍ ລວມທັງໝົດຈຳນວນ 150 ກວ່າທ່ານ.
ກອງປະຊຸມ ໄດ້ມີການແລກປ່ຽນຫຼາຍຫົວຂໍ້ທີ່ສຳຄັນ ໂດຍສະເພາະ ທລຍ ໄດ້ນຳໃຊ້ຮູບແບບການພັດທະນາທີ່ຂັບເຄື່ອນໂດຍຊຸມຊົນເອງ ເຊິ່ງເປັນການຜັນຂະນະໂຍບາຍຂອງພັກ ແລະ ລັດເຮົາທີ່ວ່າ ທຸກສິງທຸກຢ່າງ ຕ້ອງມາຈາກປະຊາຊົນ, ຈັດຕັ້ງປະຕິ ບັດໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ. ຈຸດພິເສດຂອງຮູບແບບນີ້ ແມ່ນພໍ່ແມ່ປະຊາຊົນ ເປັນຜູ້ສ້າງແຜນພັດທະນາບ້ານດ້ວຍຕົນເອງ, ຈັດຕັ້ງປະຕິບັດເອງ ແລະ ບໍລິຫານຄຸ້ມຄອງໂຄງການຊ່ວຍເຫຼືອຕ່າງໆດ້ວຍຕົນເອງ. ການເຮັດວິທີນີ້ຈະ ເຮັດໃຫ້ຊາວບ້ານມີຄວາມເຂັ້ມແຂງ, ມີຄວາມເປັນເຈົ້າການໃນການພັດທະນາບ້ານຂອງເຂົາເຈົ້າ ແລະ ເຮັດໃຫ້ໂຄງ ການໄດ້ຖືກນຳໃຊ້ຕະຫຼອດໄປ.
ພ້ອມນີ້, ອີກໜຶ່ງຫົວຂໍ້ທີ່ ທລຍ ໄດ້ຖືກຍົກຂຶ້ນມາແລກປ່ຽນ ແມ່ນວິທີການປັບປຸງຊີວິດການເປັນຢູ່ທີ່ຕິດພັນກັບດ້ານໂພຊະນາການໂດຍນຳໃຊ້ຮູບແບບການພັດທະນາທີ່ຂັບເຄື່ອນໂດຍຊຸມຊົນເຊັ່ນດຽວກັນ. ປະຈຸບັນ ກຳລັງດຳເນີນເຮັດການທົດລອງ ຢູ່ເມືອງວຽງທອງ ແຂວງຫົວພັນ ແລະ ເມືອງເຊໂປນ ແຂວງສະຫວັນນະເຂດ ໂດຍຢູ່ບົນພື້ນຖານ ຂອງ ວິໃສທັດຂອງໂຄງການທີ່ວ່າ “ເພື່ອປ່ຽນແປງຊີວິດຂອງພວກເຮົາໝົດທຸກຄົນດ້ວຍການມາໂຮມກັນເປັນກຸ່ມ ເພື່ອພ້ອມກັນເປັນເຈົ້າການ ແລະ ບຸກທະລຸດ້ານຊີ ວິດການເປັນຢູ່ ແລະ ໂພຊະນາການ”.
ຖ້າຫາກໂຄງການທົດລອງນີ້ ມີຜົນສຳເລັດ, ຈະໄດ້ຖືກນຳສະເໜີຕໍ່ລັດຖະບານເຮົາ ເພື່ອນຳໃຊ້ເຂົ້າໃນການແກ້ໄຂຄວາມທຸກຍາກ ຂອງ ພໍ່ແມ່ປະຊາຊົນທຸກຍາກໃນຂອບເຂດທົ່ວປະເທດ ທັງນີ້ ເພື່ອເປັນການປະກອບສ່ວນໃນການປະຕິບັດຄາດໝາຍສູ້ຊົນ ໃນດ້ານຕ່າງໆ ລວມທັງເປົ້າໝາຍ ຂອງ ພັກ-ລັດເຮົາ, ໂດຍສະເພາະການແກ້ໄຂຄວາມທຸກຍາກໃຫ້ໄດ້ໃນປີ 2015 ແລະ ນຳພາປະເທດຊາດໃຫ້ຫຼຸດພົ້ນອອກຈາກປະເທດດ້ອຍພັດທະນາໃນປີ 2020.
ທ່ານ ຮອງ ຮສ.ດຣ. ອຸດົມ ພອນຄໍາເພັງ ໄດ້ກ່າວວ່າ : “ກອງປະຊຸມໃນຄັ້ງນີ້ແມ່ນມີຄວາມໝາຍຄວາມສໍາຄັນຫລາຍ ເພາະວ່າ ທາງ ທລຍ ໄດ້ນໍາເອົາຄວາມຮູ້ ແລະ ປະສົບປະການຕົວຈິງທີ່ຕົນເອງໄດ້ຈັດຕັ້ງປະຕິບັດຜ່ານມາ ມາເຜີຍແຜ່ຕໍ່ຄູອາຈານ ໂດຍສະພາະແມ່ນ ອ້າຍເອື້ອຍນ້ອງນັກສຶກສາຢູ່ຄະນະກະເສດສາດ, ມະຫາວິທະຍາໄລແຫ່ງຊາດ ໄດ້ຮຽນຮູ້ ແລະ ເຂົ້າໃຈຕໍ່ກັບການພັດທະນາທີ່ຂັບເຄື່ອນໂດຍຊຸມຊົນຢ່າງເລີກເຊິ່ງ ແລະ ພ້ອມທີຈະນໍາເອົາຄວາມຮູ້ທີໄດ້ຮຽນຮູ້ໃນຄັ້ງນີ້ໄປຜັນຂະຫຍາຍໃນວຽກງານຂອງຕົນ ກໍຄືການພັດທະນາປະເທດຊາດບ້ານເມືອງ ໃຫ້ມີຄວາມສີວິໄລ ຕາມທິດທາງ ຄືພັກ-ລັດ ໄດ້ກຳນົດເອົາໄວ້.
