ທລຍ ເສີມສ້າງຄວາມເຂັ້ມແຂງໃຫ້ແກ່ ພະນັກງານການເງິນຂັ້ນແຂວງ ແລະ ເມືອງ
ໂດຍ: ແສງອາລຸນ ພິລາຈັນ
ເພື່ອເສີມສ້າງຄວາມອາດສາມາດຂອງອ້າຍເອື້ອຍນ້ອງພະນັກງານການເງິນ ທລຍ ຢູ່ຂັ້ນແຂວງ ແລະ ເມືອງນັ້ນ ໃນວັນທີ 16-19ກຸມພາ 2016ນີ້ ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ຈັດຝຶກອົບຮົມວຽກງານ ບໍລິຫານ-ການເງິນ ຂຶ້ນທີ່ໂຮງແຮມວັນຊະນະ, ນະຄອນຫລວງວຽງຈັນ ໂດຍການເປັນຄູຝຶກຈາກທີມງານ ທະນາຄານໂລກ, ພະແນກບໍລິຫານ-ການເງິນ ແລະ ພະແນກກ່ຽວຂ້ອງ ທລຍ ສູນກາງ ແລະ ການເຂົ້າຮ່ວມເປັນນັກສໍາມະນາກອນຈາກ 10 ແຂວງ, 44 ເມືອງ ເປົ້າໝາຍຂອງ ທລຍ ຈໍານວນທັງໝົດ 75 ຄົນ, ຊາຍ 22 ຄົນ.
ສໍາລັບຫົວຂໍ້ໃນການຝຶກອົບຮົມໃນຄັ້ງນີ້ ແມ່ນເໜັ້ນໜັກໃສ່ ບັນດາຫົວຂໍ້ທີ່ສໍາຄັນຫລັກ ກ່ຽວກັບວຽກງານບໍລິຫານການເງິນ ແລະ ວຽກງານຈັດຊື້ຈັດຈ້າງຄື: ຄວາມເອກະພາບກ່ຽວກັບການນໍາໃຊ້ແບບຟອມໃບສະເໜີຕ່າງໆ ທີ່ມາຈາກແຂວງ, ການວາງແຜນງົບປະມານ ແລະ ການເງິນ, ການສະຫລຸບລາຍງານ, ການບໍລິຫານເງິນສົດ, ການຕິດຕາມງົບປະມານໂຄງການຍ່ອຍ, ການຈັດຊຶ້-ຈັດຈ້າງ, ລະບຽບການ ແລະ ຂັ້ນຕອນການສະຫລຸບເງິນລ່ວງໜ້າ, ທົບທວນຄືນ ພາລະບົດບາດ ແລະ ໜ້າທີ່ຮັບຜິດຊອບຂອງແຕ່ລະພາກສ່ວນ ອື່ນໆ.
ຕະຫລອດໄລຍະການຝຶກອົບຮົມ 5 ວັນເຕັມ ບັນຍາກາດໃນກອງປະຊຸມມີຄວາມຟົດຟື້ນ, ຜູ້ເຂົ້າຮ່ວມໃຫ້ຄວາມສົນໃຈຫລາຍ ຍ້ອນວ່າ ໃນກອງປະຊຸມ ຍັງມີການປຶກສາຫາລື ແລກປ່ຽນບົດຮຽນ ແລະ ພອ້ມກັນຄົ້ນຄວ້າຊອກຫາວິທີແກ້ໄຂບັນຫາທີ່ພົບ ໃນຊ່ວງໄລຍະເວລາຈັດຕັ້ງປະຕິບັດວຽກງານຜ່ານມາດ້ວຍຄວາມເປັນເອກະພາບ ແລະ ທຸກຄົນມີສ່ວນຮ່ວມ ຊຶ່ງເຮັດໃຫ້ ຜູ້ເຂົ້າຮ່ວມມີຄວາມເຂົ້າໃຈຕໍ່ກັບຫົວຂໍ້ສໍາຄັນຕ່າງໆ ຂອງຊຸດອົບຮົມ ຢ່າງເລີກເຊິ່ງ. ບົດຮຽນທີ່ໄດ້ຈາກການຝຶກອົບຮົມໃນຄັ້ງນີ້ ເຂົາເຈົ້າຈະນໍາເອົາໄປຜັນຂະຫຍາຍເຂົ້າໃນວຽກງານຕົວຈິງຢູ່ຂັ້ນທ້ອງຖິ່ນ ເພື່ອເປັນການປັບປຸງວຽກງານດັ່ງກ່າວໃຫ້ມີທ່າກ້າວໃນຕໍ່ໜ້າ , ໂດຍສະເພາະ ແມ່ນການຝຶກອົບຮົມຕໍ່ໃຫ້ແກ່ທີມງານບໍລິຫານ-ການເງິນ ຂັ້ນບ້ານ ແລະ ຂັ້ນກຸ່ມ ກ່ຽວກັບ ການຄຸ້ມຄອງງົບປະມານ ໂຄງການຍ່ອຍ ໃຫ້ປະກົດຜົນເປັນຈິງ , ເພາະວ່າ ທີມງານດັ່ງກ່າວແມ່ນໝາກຫົວໃຈສໍາຄັນ ຂອງຄວາມເປັນເຈົ້າການ ໃນການຄຸ້ມຄອງບໍລິຫານເງິນໂຄງການຍ່ອຍ ໃຫ້ມີປະສິດ ທິພາບ ແລະ ປະສິດທິຜົນ.
ທ່ານ ນາງ ລັດຕະນາ ຮັກວັນນະແພງ, ຜູ້ຮັບຜິດຊອບວຽກບໍລິຫານ-ການເງິນ ແຂວງຫລວງນໍ້າທາ ໄດ້ກ່າວວ່າ: “ ຂ້າພະເຈົ້າ ຮູ້ສຶກພາກພູມໃຈຫລາຍທີ່ໄດ້ມີໂອກາດ ເຂົ້າຮ່ວມຝຶກອົບຮົມໃນຄັ້ງນີ້ ເພາະການຝຶກອົບຮົມໃນຄັ້ງນີ້ແມ່ນແຕກຕ່າງຈາກທຸກໆຄັ້ງຜ່ານມາ ຍ້ອນມີຄູຝຶກມາຈາກທະນາຄານໂລກ, ຄູຝຶກມາຈາກ ພະແນກອອ້ມຂ້າງ ທລຍ ສູນກາງ, ເຫັນວ່າມີຜົນປະໂຫຍດຫລາຍ “ ສໍາລັບ ການຝຶກອົບຮົມໃນຄັ້ງນີ້ ຂ້າພະເຈົ້າບໍ່ພຽງແຕ່ໄດ້ຄວາມຮູ້ກ່ຽວກັບການເງິນເທົ່ານັ້ນ ແຕ່ຂ້າພະເຂົ້າຍັງໄດ້ ຄວາມຮູ້ກ່ຽວກັບ ການພັດທະນາຊຸມຊົນ, ວິສະວະກໍາ ແລະ ການຕິດຕາມ-ປະເມີນໂຄງການຍ່ອຍ ທີ່ມີປະສິດທິພາບ ແລະ ມີປະສິດທິຜົນ ອີກດ້ວຍ“.
ສະນັ້ນ, ຂ້າພະເຈົ້າ ຈະຂໍນໍາເອົາຄວາມຮູ້ຈາກການຝຶກອົບຮົມໃນເທື່ອນີ້ ໄປຜັນຂະຫຍາຍເຂົ້າສູ່ວຽກງານຕົວຈິງທີ່ຕົນໄດ້ຮັບຜິດຊອບຢູ່ຂັ້ນທ້ອງຖິ່ນ ໃຫ້ປະກົດຜົນເປັນຈິງ ໂດຍສະເພາະແມ່ນ ຈະສືບຕໍ່ຝຶກອົບຮົມວຽກງານດັ່ງກ່າວນີ້ ໃຫ້ແກ່ທີມງານການເງິນຂັ້ນບ້ານ ເພື່ອນໍາໃຊ້ເຂົ້າໃນການຄຸ້ມຄອງບໍລິຫານການເງິນໂຄງການຍ່ອຍ” ທີ່ ທລຍ ກໍຄືລັດຖະບານ ໃຫ້ການສະໜັບສະໜູນແກ່ປະຊາຊົນຜູ້ທຸກຍາກຢູ່ໃນແຂວງຂອງຂ້າພະເຈົ້າ. ເພື່ອເຮັດແນວໃດ ໃຫ້ ງົບປະມານ ຖຶກນໍາເອົາໄປ ຈັດຕັ້ງປະຕິບັດຢ່າງຖຶກຕ້ອງ ແລະຮັບປະກັນໃຫ້ປະຊາຊົນບັນດາເຜົ່າໄດ້ຮັບສິດຜົນປະໂຫຽດຢ່າງແທ້ຈິງ.
