ນ້ອງນ້ອຍນັກຮຽນໃນເກນອາຍຸຢູ່ເຂດຊົນນະບົດຫ່າງໄກສອກຫລີກ ໄດ້ເຂົ້າໂຮງຮຽນຢ່າງທົ່ວເຖິງ
ໂດຍ: ສິນນະຄອນ ອິນທິລາດ
ເມື່ຶອເວົ້າເຖິງຂະແໜງການສຶກສາ ກໍແມ່ນຂະແໜງການໜຶ່ງທີ່ ທລຍ ກໍາລັງພວມສຸມກໍາລັງໃຫ້ການຊ່ວຍເຫລືອຢູ່ໃນ 10 ແຂວງເປົ້າໝາຍ ເຊິ່ງໃນນັ້ນ ໄດ້ກວາມເອົາການກໍ່ສ້າງໂຮງຮຽນປະຖົມ ທີ່ນອນຢູ່ໃນແຜນພັດທະນາກຸ່ມບ້ານຂອງຫຼາຍບ້ານໃນ 5 ເມືອງເປົ້າໝາຍຂອງ ທລຍ ແຂວງສະຫວັນນະເຂດ ທີ່ໄດ້ກໍ່ສ້າງສໍາເລັດ ແລະ ມອບໃຫ້ຊຸມຊົນເປັນຜູ້ຄຸ້ມຄອງນໍາໃຊ້ ຕັ້ງແຕ່ເລີ່ມເປີດສົກຮຽນໃໝ່ ໃນຕົ້ນເດືອນກັນຍາ 2013 ຜ່ານມານີ້ ເຊິ່ງມັນແມ່ນຜົນງານອັນຍິງໃຫຍ່ຂອງຊຸມຊົນໃນການວາງແຜນແບບມີສ່ວນຮ່ວມ, ເປັນເຈົ້າການໃນການຈັດຕັ້ງປະຕິບັດໂຄງການຍ່ອຍ ບໍ່ວ່າຈະເປັນການສໍາຫລວດອອກແບບ, ການບໍລິຫານຄຸ້ມຄອງເງິນໂຄງການຍ່ອຍ, ການຈັດຊື້-ຈັດຈ້າງ ຄັດເລືອກເອົາບໍລິສັດຮັບເໝົາກໍ່ສ້າງ ແລະ ການຄຸ້ມຄອງໂຄງການຍ່ອຍໃຫ້ມີຄວາມຍືນຍົງ ທັງໝົດນັ້ນ ໄດ້ເຮັດໃຫ້ລູກຫຼານຂອງເຂົາເຈົ້າໄດ້ຮຳ່ຮຽນຢູ່ໃນຫ້ອງຮຽນຖາວອນຫລັງໃໝ່.
ສໍາລັບຮອບວຽນທີ 9 ແລະ ທີ10 ຜ່ານມານີ້ ທລຍ ໄດ້ໃຫ້ການສະໜັບສະໜູນທຶນໃນການກໍ່ສ້າງໂຮງຮຽນຢູ່ໃນບ້ານເປົ້າໝາຍທັງໝົດຈຳນວນ 22 ຫຼັງ ເຊິ່ງໄດ້ນໍາໃຊ້ງົບປະມານທັງໝົດ ຫຼາຍກວ່າ 8,252 ລ້ານກີບ ເຊິ່ງມີຈໍານວນບ້ານໄດ້ຮັບປະໂຫຍດຫຼາຍກວ່າ 25 ບ້ານ, ໃນນັ້ນ ມີຈຳນວນນັກຮຽນໄດ້ເຂົ້າຮຽນ ຈຳນວນທັງໝົດຫຼາຍກວ່າ 1,500 ຄົນ.
ໂຮງຮຽນທັງໝົດເຫລົ່ານັ້ນ ທີ່ ທລຍ ໄດ້ໃຫ້ການສະໜັບສະໜູນໃນການກໍ່ສ້າງນັ້ນ ໄດ້ເຮັດໃຫ້ພວກລູກຫຼານມີຄວາມດີອົກດີໃຈ ພ້ອມພຽງກັນໄປໂຮງຮຽນ ຢ່າງຫ້າວຫັນ. ບໍ່ວ່າແຕ່ນັກຮຽນເທົ່ານັ້ນ ຄູສອນເຊິ່ງແຕ່ກ່ອນເຄີຍສອນນັກ ຮຽນຢູ່ໃນຫ້ອງຮຽນເກົ່າ ເວລາຝົນຕົກກໍຮົ່ວ ເວລາລົມພັດມາກໍໜາວແຮງ ມີຄວາມ ສ່ຽງຕໍ່ອັນຕະລາຍ ບໍ່ມີຄວາມໝັ້ນອົກໝັ້ນໃຈໃນການສິດສອນນັກຮຽນ ບໍ່ພຽງເທົ່ານັ້ນ ບາງບ້ານຍັງໃຊ້ຮົ່ມໄມ້ເປັນບ່ອນຮຽນ ມາຮອດປະຈຸບັນ ເຂົາເຈົ້າໄດ້ ຮຽນໃນໂຮງຮຽນຫລັງໃໝ່. ແຕ່ສິ່ງທີເຂົາເຈົ້າພູມໃຈບໍ່ນ້ອຍໜ້າກວ່າ ການໄດ້ຮັບຫ້ອງຮຽນໃໝ່ນັ້ນ ກໍຄືໝາກຜົນຂອງການມີສ່ວນຮ່ວມໃນການໃຊ້ສິດໃຊ້ສຽງ ຂອງພໍ່ແມ່ປະຊາຊົນໝົດທຸກຄົນພາຍໃນບ້ານ ເຂົ້າໃນການວາງແຜນພັດທະນາບ້ານ ໃນ 2 ປີຜ່ານມາ ແລະ ແຜນດັ່ງກ່າວນັ້ນມັນໄດ້ກາຍເປັນຄວາມຈິງ ພວກ ເຂົາເຈົ້າ ໄດ້ພາກັນເອົາໃຈໃສ່ໃນການປົກປັກຮັກສາ ແລະ ຄຸ້ມຄອງນຳໃຊ້ໃຫ້ໄດ້ນຳໃຊ້ຢ່າງຍາວນານກຸ້ມຄ່າການລົງທຶນ.
