ບ້ານສັນຄິງ, ກຸ່ມບ້ານ ນໍ້າອຸ່ນ ມີນໍ້າສະອາດຊົມໃຊ້ແລ້ວ
ໂດຍ: ແວວ ທລຍ ເມືອງຄູນ
ຕົ້ນເດືອນສິງຫາ 2017 ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ຈັດພິທີ ມອບ-ຮັບ ໂຄງການກໍ່ສ້າງລະບົບນ້ຳລິນ ບ້ານ ສັນຄີງ, ກຸ່ມບ້ານ ນ້ຳອຸ່ນ ເມືອງຄູນ ແຂວງຊຽງຂວາງ ຂຶ້ນ ເຊິ່ງມີຜູ້ເຂົ້າຮ່ວມມາຈາກຫ້ອງການສາທາລະນະສຸກເມືອງ, ຫ້ອງການກະສິກຳ ແລະ ປ່າໄມ້, ເລຂາພັກກຸ່ມ, ຄະນະພັກກຸ່ມ, ທລຍ ເມືອງ, ທລຍ ກຸ່ມບ້ານ,ອຳນາດການປົກຄອງຂັ້ນບ້ານພ້ອມດ້ວຍພໍ່ແມ່ປະຊາຊົນ ບ້ານ ສັນຄີງເຂົ້າຮ່ວມ ທັງໝົດ ຈຳນວນ 68 ຄົນ, ຍິງ 36 ຄົນ.
ບ້ານ ສັນຄີງ ແມ່ນບ້ານໜຶ່ງທີ່ຂຶ້ນກັບກຸ່ມບ້ານ ນ້ຳອຸ່ນ ເມືອງຄູນ ແຂວງຊຽງຂວາງ ປະກອບມີ 86 ຫຼັງຄາ, ມີພົນລະເມືອງທັງໝົດ 552 ຄົນ, ຍິງ 272 ຄົນ. ບ້ານດັ່ງກ່າວ ປະກອບມີສອງຊົນເຜົ່າຄື: ຊົນເຜົ່າມົ້ງ ແລະ ຊົນເຜົ່າລາວ ລຸ່ມ ຢູ່ຮ່ວມກັນດ້ວຍຄວາມສາມັກຄີ ອາຊີບຕົ້ນຕໍຂອງເຂົາເຈົ້າ ແມ່ນເຮັດນາ, ປູກຝັງ ແລະ ລ້ຽງສັດ, ໃນເມື່ອກ່ອນບ້ານ ສັນຄີງ ແມ່ນ ມີຄວາມຫຍຸ້ງຍາກຫຼາຍ ບໍ່ມີນ້ຳສະອາດຊົມໃຊ້, ຜູ້ຍິງ ແລະ ເດັກນ້ອຍຕ້ອງໄດ້ໄປຕັກນ້ຳຢູ່ໄກ, ເສຍເວລາໃນການທຳການຜະລິດ ແລະ ຍາມລະດູຝົນແມ່ນມັກເກີດພະຍາດຖອກທ້ອງ.
ຕົກມາຮອດ ຮອບວຽນ 14 ປີ 2017 ທລຍ ໄດ້ສະໜອງທຶນໃນການກໍ່ສ້າງ ລະບົບນ້ຳລິນໃຫ້ ເຊິ່ງມີຄວາມຍາວທັງໝົດ 5,600 ແມັດ, ລວມມີ 8 ກັອກ ເຊິ່ງໄດ້ລົງມືກໍ່ສ້າງໃນວັນທີ 28 ມິຖຸນາ 2017 ແລະ ສໍາເລັດໃນວັນທີ 28 ກໍລະກົດ 2017, ໃນນັ້ນ ມູນຄ່າ ທີ່ ທລຍ ສະໜອງແມ່ນກວ່າ 138 ລ້ານ ກີບ, ແລະ ຊຸມຊົນປະກອບສ່ວນທາງດ້ານແຮງງານ ແລະ ວັດຖຸທ້ອງຖິ່ນທີ່ຫາໄດ້ ຄິດເປັນມູນຄ່າ ກວ່າ 74 ລ້ານ ກີບ ຖ້າທຽບໃສ່ແຜນແມ່ນລື່ນຄາດໝາຍ.
ທ່ານ ໄກ່ແກ້ວ ນາຍບ້ານ ສັນຄີງ ພ້ອມດ້ວຍພໍ່ແມ່ປະຊາຊົນພາຍໃນບ້ານໝົດທຸກຄົນໄດ້ກ່າວວ່າ: “ມີຄວາມພາກພູມໃຈຫຼາຍທີ່ທາງ ທລຍ ໄດ້ໃຫ້ທຶນສະໜັບສະໜູນໃນການກໍ່ສ້າງ ລະບົບນ້ຳລິນໃຫ້ ເພາະວ່າຊາວບ້ານ ຈະສະດວກສະບາຍໃນການນຳໃຊ້ລະບົບນ້ຳລິນ, ຫຼຸດຜ່ອນ ເວລາ ແລະ ແຮງງານ ຜູ້ຍິງ ແລະ ເດັກນ້ອຍ ໄປຕັກນ້ຳຢູ່ໄກ, ໄດ້ໃຊ້ນ້ຳທີ່ສະອາດ, ຫຼຸດຜ່ອນການເກີດພະຍາດຖອກທ້ອງ ແລະ ຂໍສະແດງຄວາມຂອບໃຈອັນລົ້ນເຫຼືອ ມາຍັງ ທລຍ ກໍຄື ພັກ-ລັດ ທີ່ໄດ້ເອົາໃຈໃສ່ເບິ່ງແຍງບ້ານຂອງພວກເຮົາ ພວກຂ້າພະເຈົ້າພ້ອມແລ້ວທີ່ຈະເອົາໃຈໃສ່ໃນການປົກປັກຮັກສາ, ສ້າງກອງທຶນໃນການຄຸ້ມຄອງ ເພື່ອໃຫ້ ໂຄງການມີຄວາມຍືນຍົງ ແລະ ນຳໃຊ້ໄດ້ຕະຫຼອດໄປ.
