ບ້ານ ອົມເພຍ ມີນໍ້າລິນຊົມໃຊ້ຢ່າງສະດວກສະບາຍແລ້ວ
ໂດຍ: ແສງອາລຸນ ພິລາຈັນ
ພາຍຫລັງທີ່ສໍາເລັດໃນການລົງໄປມອບເຄື່ອງຊ່ວຍເຫລືອຂອງສະມາຄົມສົ່ງເສີມເດັກນ້ອຍລາວຈາກປະເທດຍີ່ປຸ່ນໃຫ້ແກ່ ບ້ານຕີນຕົກ, ກຸ່ມເພຍເລາະເກົ່າ, ບ້ານ ນາລໍາ, ກຸ່ມນາລໍາ ເມືອງໃໝ່ ແຂວງຜົ້ງສາລີ ໃນວັນທີ 25-26 ກັນຍາ 2013.
ເພື່ອເປັນການແລກປ່ຽນບົດຮຽນ ທີ່ທາງ ທລຍ ໄດ້ນໍາໃຊ້ໃນໄລຍະຜ່ານມາ ວ່າມີຈຸດດີ ແລະ ຈຸດ ອ່ອນຄືແນວໃດ ເພື່ອປັບປຸງແບບແຜນວິທີການເຮັດວຽກ ແລະ ເຮັດໃຫ້ການຈັດຕັ້ງປະຕິບັດໂຄງການຍ່ອຍຂອງ ທລຍ ສໍາເລັດຕາມແຜນທີ່ວາງໄວ້ ໃຫ້ມີປະສິດທິພາບ ແລະ ປະສິດທິຜົນພ້ອມທັງປຸກລະດົມ ແລະ ມອບຄວາມເປັນເຈົ້າໃຫ້ແກ່ອໍານາດການປົກຄອງບ້ານ ກໍຄືປະຊາຊົນພາຍໃນບ້ານເຊີດຊູຈິດໃຈຄວາມຮັບຜິດຊອບຕາມຄໍາຂັວນທີ່ວ່າ: “ຮັກຊາດ ແລະ ພັດທະນາ ຄວາມເປັນເຈົ້າໃນການນໍາໃຊ້ສິ່ງປຸກສ້າງໄດ້ຢ່າງຍາວນານ”.
ໃນວັນທີ 27 ກັນຍາ 2013 ທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ພ້ອມດ້ວຍທີມງານ ທລຍ ໄດ້ນໍາພາ ທ່ານ ອໍາໄພ ຫລ້າດວງພັນ, ຮອງຫົວໜ້າກົມບັນດາເຜົ່າ, ຄະນະກໍາມາທິການບັນດາເຜົ່າສະພາແຫ່ງຊາດ, ທ່ານ ນາງ ບົວຄໍາ ວໍລະອຸ່ນຄໍາ, ຮອງເຈົ້າເມືອງເມືອງຂົວ, ທ່ານ ສົມຊາຍ ຄໍາທະມາ, ຜູ້ຕາງໜ້າສະມາຄົມສົ່ງເສີມເດັກນ້ອຍລາວຈາກປະເທດຍີ່ປຸ່ນ, ລົງຕິດຕາມກວດກາການກໍ່ສ້າງສ້ອມແປງນໍ້າລິນບ້ານ ອົມເພຍ, ກຸ່ມແສນລາດ ເມືອງຂົວ. ບ້ານດັ່ງກ່າວເປັນບ້ານ ຊົນເຜົ່າກຶມມຸ, ມີ 52 ຫລັງຄາເຮືອນ, 57 ຄອບຄົວ, ມີປະຊາກອນທັງໝົດ 324 ຄົນ, ຍິງ 152 ຄົນ ອາຊີບຕົ້ນຕໍແມ່ນເຮັດໄຮ່, ປູກສາລີ, ໝາກແໜ່ງ, ກາເຟ ແລະ ຄ່າ. ບ້ານດັ່ງກ່າວຕັ້ງຫ່າງຈາກເທດສະບານເມືອງປະມານ 17 ກິໂລແມັດ ແຕ່ເສັ້ນທາງໃນການເຂົ້າຫາແມ່ນທຸລະກັນດານ ເຊິ່ງໃຊ້ເວລາເດີນທາງໂດຍລົດກະບະທີ່ຂັບເຄື່ອນ 4 ລໍ້ ກວ່າ 1 ຊົ່ວໂມງ ຈຶ່ງຮອດບ້ານດັ່ງກ່າວ.
ສໍາລັບຮອບວຽນທີ 10 ສົກປີ 2012-2013 ບ້ານອົມເພຍ ໄດ້ຮັບການຊ່ວຍເຫລືອ ໂຄງການການສ້ອມແປງນໍ້າລິນຈາກ ທລຍ ໃນນັ້ນ ກ່ອນຈະໄດ້ໂຄງການສ້ອມແປງນໍ້າລິນດັ່ງກ່າວນັ້ນ ປະຊາຊົນໝົດບ້ານໄດ້ພ້ອມພາກັນຕັດສິນໃຈຄັດເລືອກບຸລິມະສິດຄວາມຕ້ອງການ ມາແຕ່ຂັ້ນບ້ານ, ໂດຍຜ່ານການປ້ອງກັນເອົາໂຄງການດັ່ງກ່າວຈາກຕົວແທນບ້ານ ແລະ ຕັດສິນເອົາຢູ່ຂັ້ນກຸ່ມບ້ານ ແລະ ຕົວແທນກຸ່ມບ້ານປ້ອງກັນຮັບຮອງເອົາໂຄງການດັ່ງກ່າວຢູ່ຂັ້ນເມືອງ ໂດຍປະສານສົມທົບກັບຫ້ອງການຂະແໜງການທີ່ກ່ຽວຂ້ອງ ເພື່ອເຍືອງໃສ່ແຜນພັດທະນາເສດຖະກິດ-ສັງຄົມ ຂອງເມືອງວ່າ ໂຄງການດັ່ງກ່າວບໍ່ໄດ້ຊໍ້າຊ້ອນກັນ.
ໂຄງການສ້ອມແປງນໍ້າລິນບ້ານດັ່ງກ່າວ ໄດ້ເລີ່ມກໍສ້າງໃນວັນທີ 26 ສິງຫາ 2013 ແລະ ສໍາເລັດໃນວັນທີ 23 ກັນຍາ 2013 ເຊິ່ງນໍ້າລິນດັ່ງກ່າວມີຄວາມຍາວເຖິງ 2,800 ແມັດ ແລະ ປະກອບມີ 4 ກ໊ອກ ເຊິ່ງມີມູນຄ່າການກໍ່ສ້າງສ້ອມແປງທັງໝົດ 105 ກວ່າລ້ານກີບ ໃນນັ້ນ ຊຸມຊົນປະກອບສ່ວນທາງດ້ານແຮງງານ ແລະ ວັດຸຖທ້ອງຖິ່ນ ຄິດເປັນມູນຄ່າ 9 ລ້ານກວ່າກີບ.
ທ່ານ ທອງດີ ສຸລິພອນ, ນາຍບ້ານ ບ້ານອົມເພຍ ໄດ້ກ່າວວ່າ: “ນໍ້າລິນຢູ່ບ້ານຂອງພວກຂ້າພະເຈົ້າ ໃນເບື້ອງຕົ້ນໄດ້ຮັບການສະໜັບສະໜູນຈາກ ອົງການແຄນາໆຊາດ ສະຫະພາບເອີລົບໃນປິ 2012 ພາຍຫລັງທີ່ຊົມໃຊ້ມາໃນໄລຍະໜຶ່ງ ໄດ້ມີໂຕອົ້ນກັດທໍ່ເຮັດໃຫ້ທໍ່ນໍ້າລິນຮົ່ວ ແຕກ ເຊິ່ງເຮັດໃຫ້ມີນໍ້າຊົມໃຊ້ບໍ່ພຽງພໍ ໂດຍສະເພາະແມ່ນນັບແຕ່ເດືອນ ພຶດສະພາ ຫາ ເດືອນກໍລະກົດ ສະນັ້ນ ປະຊາຊົນພາຍໃນບ້ານໂດຍສະເພາະແມ່ນແມ່ຍິງ ແລະ ເດັກນ້ອຍຕ້ອງໄປຕັກນໍ້າຢູ່ຫ້ວຍດ່ວນ ທີ່ຫ່າງຈາກບ້ານ 2 ກິໂລແມັດ ເຊິ່ງໃຊ້ເວລາໃນການເດີນທາງ 1 ຊົ່ວໂມງ” “ ພາຍຫລັງທີ່ ທລຍ ກໍ່ສ້າງສ້ອມແປງນໍ້າລິນໃຫ້ສໍາເລັດ ແລະ ມອບໃຫ້ພວກເຮົາຄຸ້ມຄອງນໍາໃຊ້ແລ້ວ ພວກເຮົາຊາວບ້ານໝົດທຸກຄົນມີຄວາມພາກພູມໃຈ ແລະ ສະດວກສະບາຍກວ່າແຕ່ກ່ອນຫລາຍ ສາມາດຊົມໃຊ້ນໍ້າໄດ້ທຸກລະດູ ແລະ ພວກເຮົາໄດ້ມີການສ້າງຕັ້ງກອງທຶນບູລະນະສ້ອມແປງ ເພື່ອຮັບໃຊ້ສ້ອມແປງນໍ້າລິນແຫ່ງນີ້ໃນເວລາເປ່ເພ ແລະ ຖືກຊົມໃຊ້ຢ່າງຍາວນານ”.
ໃນການລົງຢ້ຽມຢາມ ແລະ ຕິດຕາມການກໍ່ສ້າງສ້ອມແປງນໍ້າບ້ານອົມເພຍ, ກຸ່ມແສນລາດໃນເທື່ອນີ້ ເພື່ອໃຫ້ມີຄວາມໝາຍສໍາຄັນ ແລະ ມີຜົນປະໂຫຍດໃຫ້ແກ່ພໍ່ແມ່ປະຊາຊົນນັ້ນ ທ່ານ ນາງ ບົວຄໍາ ວໍລະອຸ່ນຄໍາໄດ້ກ່າວວ່າ: “ໃນເມື່ອ ທລຍ ໄດ້ກໍ່ສ້າງສ້ອມແປງນໍ້າລິນໃຫ້ແລ້ວ ຢາກຊັກຊວນພໍ່ແມ່ປະຊາຊົນພາຍໃນບ້ານ ຈົ່ງເປັນເຈົ້າການໃນການປົກປັກຮັກສາ ແລະ ສ້າງຕັ້ງກອງທຶນບູລະນະສ້ອມແປງ ເພື່ອເຮັດແນວໃດ ຈະສາມາດປົກປັກຮັກສານໍ້າລິນແຫ່ງນີ້ໄດ້ຊົມໃຊ້ຢ່າງຍາວນານ ແລະ ກຸ້ມຄ່າທີ່ສຸດ”.
ທ່ານ ອໍາໄພ ຫລ້າດວງພັນ, ຮອງຫົວໜ້າກົມບັນດາເຜົ່າ, ຄະນະກໍາມາທິການບັນດາເຜົ່າສະພາແຫ່ງຊາດ
ໄດ້ກ່າວຕີລາຄາຕໍ່ການລົງຢ້ຽມຢາມ ແລະ ຕິດຕາມການຈັດຕັ້ງປະຕິບັດການກໍ່ສ້າງສ້ອມແປງນໍ້າລິນບ້ານອົມເພຍວ່າ: “ສໍາລັບການລົງຢ້ຽມຢາມ ແລະ ເຮັດວຽກຢູ່ບ່ານອົມເພຍນີ້ ແມ່ນເປັນໂອກາດອັນດີ ທີ່ໄດ້ເຫັນຮູບແບບວິທີການເຮັດວຽກຂອງ ທລຍ ທີ່ໄດ້ນໍາໃຊ້ຮູບແບບການພັດທະນາທີ່ຂັບເຄື່ອນໂດຍຊຸມຊົນເອງ ເຊິ່ງເປັນຮູບແບບທີ່ວາງແຜນແຕ່ລຸ່ມຂື້ນເທິງ ນັບແຕ່ການວາງແຜນພັດທະນາບ້ານ, ກຸ່ມບ້ານ, ເມືອງ ຕະຫລອດຮອດການສໍາຫລວດອອກແບບ, ການຈັດຊື້-ຈັດຈ້າງ, ການຈັດຕັ້ງປະຕິບັດ ແລະ ການປົກປັກຮັກສາ ແມ່ນຊຸມຊົນມີສ່ວນຮ່ວມແຕ່ຕົ້ນ ແລະ ເປັນຜູ້ເຮັດເອງ”
“ຂ້າພະເຈົ້າຄິດວ່າ ການລົງຕິດຕາມການກໍ່ສ້າງໂຄງການຍ່ອຍຕ່າງໆ ເປັນປະຈໍານັ້ນ ຈຶ່ງຈະເຮັດໃຫ້ໂຄງ ການເຫລົ່ານັ້ນ ຖືກຈັດຕັ້ງປະຕິບັດສໍາເລັດຕາມຄາດໝາຍ ທັງເຮັດໃຫ້ມີປະສິດຕິພາບ ແລະ ປະສິດຕິຜົນ ເຊິ່ງສະແດງອອກຢູ່ບ່ອນວ່າ ລານກ໊ອກແຕ່ລະຈຸດໄດ້ມີການມຸງຫລັງຄາ, ຮົ້ວອ້ອມ, ມີກະຕ່າຂີ້ເຫຍື້ອຍ ແລະ ມີສະພາບທີ່ສະອາດງາມຕາ.” ທ່ານກ່າວຕື່ມ.
