ພິທີເປີດການນໍາໃຊ້ຂົວອູ່ ບ້ານພູລວງ ເມືອນາແລ ແຂວງຫລວງນໍ້າທາ
ໂດຍ: ທລຍ
ໃນວັນທີ 4 ພຶດສະ ພາ 2017 ຜ່ານມາ ໄດ້ມີພິທີເປີດການນໍາໃຊ້ຂົວອູ່ ບ້ານພູລວງ ເມືອນາແລ ແຂວງຫລວງນໍ້າທາ ໂດຍການເປັນປະທານຮ່ວມຂອງ ທ່ານ ຄໍາບຸນນັດ ໄຊຍະນົນ, ຮອງລັດຖະມົນຕີກະຊວງກະສິກໍາ ແລະ ປ່າໄມ້ ແລະ ທ່ານ ປອ. ເພັງຜາວັນ ດາວພອນຈະເລີນ, ຮອງເຈົ້າແຂວງຫລວງນໍ້າທາ ແລະ ການເຂົ້າຮ່ວມເປັນສັກຂີພະຍານຂອງ ຄະນະຮັບຜິດຊອບໂຄງການ ທລຍ, ຜູ້ຕາງໜ້າຈາກ ອົງການເຮວວີຕັດລາວ (HelvetasLaos), ອໍານາດການປົກຄອງທ້ອງຖິ່ນ ແລະ ພໍ່ແມ່ປະຊາຊົນຈໍານວນຫລາຍກວ່າ 200 ຄົນ.
ໂດຍປະຕິບັດຕາມແນວທາງນະໂຍບາຍຂອງລັດຖະບານ ກ່ຽວກັບການແກ້ໄຂຄວາມທຸກຍາກໃຫ້ປະຊາຊົນບັນດາເຜົ່າທີ່ຢູ່ໃນເຂດຊົນນະບົດ ແລະ ອີງໃສ່ບົດຮຽນຕົວຈິງໃນການຈັດຕັ້ງປະຕິບັດຜ່ານມາ, ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ໃຫ້ການສະໜັບສະໜູນໂຄງການກໍ່ສ້າງຂົວອູ່ແບບຖາວອນຕາມຄວາມຮຽກຮ້ອງຕ້ອງການຂອງຊຸມຊົນແຕ່ປີ 2013 ເປັນຕົ້ນມາ ເພື່ອເຊື່ອມຕໍ່ເສັ້ນທາງຄົມມະນາຄົມຢູ່ເຂດຫ່າງໄກສອກຫລີກ ພາຍໃຕ້ການຊີ້ນໍາດ້ານເຕັກນິກຢ່າງໃກ້ຊິດຈາກ ກົມຂົວທາງ ແລະ ພະແນກ ຍທຂ ແຂວງ, ກະຊວງໂຍທາທິການ ແລະ ຂົນສົ່ງ ຊຶ່ງໃນນັ້ນ ການກໍ່ສ້າງຂົວອູ່ບ້ານພູລວງ ເມືອງນາແລ ແຂວງຫລວງນໍ້າທາ ແມ່ນໂຄງການໜຶ່ງທີ່ ທລຍ ໄດ້ຮ່ວມມືກັບ ອົງການເຮວວີຕັດລາວ (HelvetasLaos) ເພື່ອຖ່າຍທອດເຕັກນິກການກໍ່ສ້າງຂົວອູ່ແບບຖາວອນຈາກປະເທດເນປານ ເຂົາເຈົ້າໄດ້ກໍ່ສ້າງຂົວດັ່ງກ່າວກວ່າ 5,000 ແຫ່ງ ມາກ່ອນແລ້ວ ໂດຍຜ່ານໂຄງການເຮວວິຕັດເນປານ (Helvetas Nepal) ແລະ ນໍາໃຊ້ທຶນສົມທົບ ຈາກລັດຖະບານລາວ, ທະນາຄານໂລກ, ອົງການເພື່ອການພັດທະນາ ແລະ ການຮ່ວມມືຂອງປະເທດສະວິດເຊີແລນ ແລະ ອົງການເຮວວິດຕັດ ລວມມູນຄ່າການກໍ່ສ້າງທັງໝົດ 657 ລ້ານກວ່າກີບ. ຂົວອູ່ດັ່ງກ່າວສາມາດຮັບນໍ້າໜັກໄດ້ເຖິງ 30 ກວ່າໂຕ່ນ, ກວ້າງ 1,2 ແມັດ, ຍາວ 118 ແມັດ, ມີຜູ້ໄດ້ຮັບຜົນປະໂຫຍດໂດຍກົງ 513 ຄົນ, ຍິງ 262 ເປັນບ້ານຊົນເຜົ່າກຶມມຸ.ນອກຈາກນັ້ນ ບ້ານທີ່ໄດ້ຮັບຜົນປະໂຫຍດທາງອ້ອມແມ່ນບ້ານໜອງປ່າແສດຊຶ່ງມີພົນລະເມືອງທັງໝົດ 328 ຄົນ, ຍິງ 173 ຄົນ.
ຂົວອູ່ບ້ານພູລວງ ເປັນຂົວແບບຖາວອນ ຍ້ອນວ່າມີອາຍຸການນໍາໃຊ້ຫລາຍກວ່າ 50 ປີ ແລະ ຕ້ອງການການບໍາລຸງຮັກສາໜ້ອຍ (ບໍ່ເປັນໝ້ຽງ) ເພາະສິ້ນສ່ວນຂອງຂົວລ້ວນແຕ່ເຄືອບສານກາ ວາໄນ(ສານກັນໝ້ຽງ), ສາຍກາບນອກຈາກຈະເຄືອບດ້ວຍສານກາວາໄນແລ້ວຍັງເປັນສາຍກາບສະໜິດ ທີ່ຢືດທີ່ໄດ້ຮັບການຢືດມາກ່ອນແລ້ວ, ສະນັ້ນເວລາໄປນໍາໃຊ້ແລ້ວຈະບໍ່ຢືດອອກ ແລະ ເຮັດໃຫ້ຂົວບໍ່ ຍານລົງ. ຂົວອູ່ແບບຖາວອນຊະນິດນີ້ເໝາະສໍາລັບສົມກໍ່ສ້າງຂ້າມແມ່ນໍ້າຢູ່ເຂດຮ່ອມພູເຂົາ ສູງຊັນ ແລະ ຕະລິງນໍ້າເລີກ ໂດຍສະເພາະ ແມ່ນເຂດພາກເໜືອຂອງລາວ.
ຖ້າປຽບທຽບໃສ່ການກໍ່ສ້າງຂົວອູ່ໃນໄລຍະຜ່ານມາຂອງ ທລຍ ເຮົາແມ່ນມີ 2 ຊະນິດ ຄື:
ຂົວອູ່ທີ່ເປັນຂາງເຫລັກ ແລະ ໜ້າທາງແລ່ນເຮັດດ້ວຍໄມ້ ແລະ ຂົວອູ່ທີ່ເປັນຂາງໄມ້ ໜ້າທາງແລ່ນເຮັດດ້ວຍໄມ້ ຂົວດັ່ງກ່າວມີອາຍຸການນໍາໃຊ້ປະມານ 5 ປີ ແລ້ວຕ້ອງໄດ້ປ່ຽນຖ່າຍໄມ້.
ຂົວອູ່ດັ່ງກ່າວຈະໄດ້ສ້າງຜົນປະໂຫຍດຫລາຍຢ່າງມາສູ່ບ້ານພູລວງ ກໍຄືບ້ານອ້ອມຂ້າງ ເປັນຕົ້ນແມ່ນ ການໄປມາຫາສູ່, ການ ນໍາເອົາຜົນຜະລິດກະສິກໍາເຂົ້າຫາຕົວເມືອງ. ນອກຈາກການກໍ່ສ້າງ ຂົວອູ່ບ້ານພູລວງ ແຫ່ງນີ້ແລ້ວ ຍັງມີອີກ 2 ແຫ່ງທີ່ມີລັກສະນະດຽວກັນຄື: ຂົວອູ່ ບ້ານສະແກນ ເມືອງນາແລ ສາມາດຮັບນໍ້າໜັກໄດ້ 30 ກວ່າໂຕ່ນ, ກວ້າງ 1,4 ແມັດ, ຍາວ 62,3 ແມັດ, ຕົກເປັນມູນຄ່າກວ່າ 964 ລ້ານກີບ, ມີຜູ້ໄດ້ຮັບຜົນປະໂຫຍດ 325 ຄົນ, ຍິງ 171 ຄົນ ເປັນບ້ານຊົນເຜົ່າກຶມມຸ. ແຫ່ງທີ 3 ແມ່ນການກໍ່ສ້າງຂົວອູ່ບ້ານຈ່າປີ, ເມືອງລອງ ສາມາດຮັບນໍ້າໜັກ 30 ໂຕ່ນ, ກວ້າງ 1,4 ແມັດ, ຍາວ 65 ແມັດ, ມູນຄ່າກໍ່ສ້າງ 1,229 ກວ່າລ້ານກີບ, ມີຜູ້ໄດ້ຮັບຜົນປະໂຫຍດ 215 ຄົນ, ຍິງ 102 ຄົນ ເປັນບ້ານຊົນເຜົ່າອາຄາ.
ການກໍ່ສ້້າງຂົວແບບຖາວອນທັງ ສາມ ແຫ່ງນີ້ ນອກຈາກ ມີຜົນໄດ້ຮັບຫລາຍຢ່າງມາສູ່ ສ.ປ.ປ ລາວ ເຮົາແລ້ວຍັງເປັນການຖ່າຍທອດເຕັກນິກໃໝ່ໃນການກໍ່ສ້າງຂົວອູ່ ໃຫ້ບັນດາວິສະວະກອນໜຸ່ມຂອງລາວໄດ້ຮຽນຮູ້ ແລະ ນໍາໄປຈັດຕັ້ງປະຕິບັດໃນວົງກວ້າງ, ປະຊາຊົນຜູ້ທຸກຍາກເຂດຫ່າງໄກສອກຫລີກສາມາດເຂົ້າເຖິງການບໍລິການດ້ານຕ່າງໆຈາກພາກລັດໄດ້ຫລາຍຂຶ້ນ ຈາກການເຊື່ອມຕໍ່ຂອງຕາຂ່າຍເສັ້ນທາງຄົມມະນາຄົມໃນເຂດຊົນນະບົດ ຕາມແນວທາງຂອງພັກ ແລະ ລັດຖະບານລາວເຮົາ ກ້າວໄປສູ່ການຫລຸດຜ່ອນຄວາມທຸກຍາກເທື່ອລະກ້າວຢ່າງມີປະສິດຕິຜົນ.
ທ່ານ ຄໍາບຸນນັດ ໄຊຍະນົນ, ຮອງລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ກ່າວມີຄໍາເຫັນໃນພິທີເປີດນໍາໃຊ້ຂົວອູ່ວ່າ: “ຜົນສໍາເລັດການກໍ່ສ້າງຂົວດັ່ງກ່າວ ກໍແມ່ນກິດຈະກໍາໜຶ່ງ ໃນຈໍານວນ ຫລາຍກິດ ຈະກໍາ ໂດຍແມ່ນ ທລຍ ຊຶ່ງຕາງໜ້າໃຫ້ລັດຖະບານໄດ້ຂົນຂວາຍຊອກຫາທຶນຮອນ ຈາກພາຍໃນ ແລະ ຕ່າງປະເທດ ມາຈັດຕັ້ງປະຕິບັດ ໂດຍການເຂົ້າຮ່ວມເປັນເຈົ້າການຂອງປະຊາຊົນ ໃນການຄັກເລືອກ, ອອກແບບ, ກໍ່ສ້າງ, ຕິດຕາມກວດກາ ແລະ ເພື່ອຄຸ້ມຄອງ ນໍາໃຊ້ບົວລະບັດຮັກສາ. ໂຄງການ ນີ້ຍັງໄດ້ບໍາລຸງສ້າງພະນັກງານລັດຢູ່ທ້ອງຖິ່ນ ເພື່ອຍົກບົດບາດຄວາມຮັບຜິດຊອບໃນການນໍາພາຊຸກ ຍູ້ສົ່ງເສີມ ແລະ ຖ່າຍຖອດເຕັກໂນໂລຊີ ໃຫ້ປະຊາຊົນບັນດາເຜົ່າ ພັດທະນາບ້ານຕາມທິດສາມສ້າງ”.
“ໃນຕໍ່ໜ້ານີ້ ຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າ ສືບຕໍ່ມູນເຊື້ອອັນດີງາມໃນການອອກແຮງຈັດຕັ້ງ ຄະນະຮັບຜິດຊອບ ບູລະນະສ້ອມແປງຂົວ ເຊັ່ນ: ອອກລະບຽບໃນການນໍາໃຊ້, ບົວລະບັດຮັກສາ, ປູກດອກໄມ້ປະດັບຢູ່ບໍລິເວັນທາງເຂົ້າຂົວ ເພື່ອຄວາມສວຍງາມ, ປູກຕົ້ນໄມ້ກັນຕາຝັ່ງເຈື່ອນໃນບໍລິເວນກອ້ງຂົວ, ປົກປັກຮັກສາປ່າໄມ້ທັງສອງຝາກຝັ່ງ, ສ້າງວັງສະຫງວນ ເພື່ອເພີ່ມແຫລ່ງອາຫານຈາກທໍາມະຊາດ...ທັງໝົດນີ້ ກໍເພື່ອແນ່ໃສ່ສ້າງຂົວອູ່ແຫ່ງນີ້ໃຫ້ກາຍເປັນແຫລ່ງທ່ອງທ່ອງທໍາມະຊາດ, ເປັນແຫລ່ງ ສ້າງລາຍຮັບແກ່ຊົມຊົນ ທັງກາຍເປັນໂຄງການຕົວແບບໃຫ້ແກ່ທ້ອງຖິ່ນອຶ່ນມາຖອດຖອນບົດຮຽນ”.
