ຫົວໜ້າຫ້ອງການ ທະນາຄານໂລກ ປະຈຳ ສປປ ລາວ ເຂົ້າລາຍງານ
ການຮັບຮອງໃຫ້ທືນຊ່ວຍເຫຼືອ 30 ລ້ານໂດລາສະຫະລັດ ເຂົ້າໃນການຈັດຕັ້ງປະຕິບັດ ທລຍ III
ໂດຍ: ທລຍ
ຜ່ານການຈັດຕັ້ງປະຕິບັດວຽກງານກອງທຶນຫລຸດຜ່ອນຄວາມທຸກຍາກ (ທລຍ) ໄລຍະ II ປີ 2012-2015 ຜ່ານມາ, ໂດຍນຳໃຊ້ທຶນຊ່ວຍເຫຼືອຫລ້າ ແລະ ທຶນສົມທົບລັດຖະບານ ຈຳນວນທັງໝົດ 1.426 ໂຄງການ ເຊັ່ນ: ໂຄງການກໍ່ສ້າງ ແລະ ສ້ອມແປງເສັ້ນທາງຊົນນະບົດ ຈຳນວນ 225 ເສັ້ນ (ຍາວທັງໝົດ 1.228 ກິໂລແມັດ); ໂຄງການຂົວຂ້າມນ້ຳ 45 ແຫ່ງ; ໂຄງການຈັດສັນຜັງບ້ານ ແລະ ທໍ່ລອດທາງ 18 ແຫ່ງ; ໂຄງການສະໜອງຕາຄ່າຍໄຟຟ້າຂະໜາດນ້ອຍ 18 ແຫ່ງ; ໂຄງການກໍ່ສ້າງ ແລະ ສ້ອມແປງໂຮງຮຽນ 386 ແຫ່ງ (ລວມ 955 ຫ້ອງ); ໂຄງການກໍ່ສ້າງ ແລະ ສ້ອມແປງລະບົບນ້ຳສະອາດ 711 ແຫ່ງ; ໂຄງການກໍ່ສ້າງ ແລະ ສ້ອມແປງຊົນລະປະທານ ແລະ ຝາຍກັ້ນນ້ຳ 63 ແຫ່ງ ແລະ ໂຄງການຕະຫຼາດຊຸມຊົນ 10 ແຫ່ງ , ມີມູນຄ່າ 300 ກວ່າຕື້ກີບ, ທີ່ນອນຢູ່ເຂດເປົ້າໝາຍຫຼາຍກວ່າ 1.300 ກວ່າບ້ານ, ກວມເອົາ 683.797 ກວ່າຄົນ. ໃນນັ້ນ, ເປັນເພດຍິງກວມເອົາ 50 % ແລະ ຊົນເຜົ່າສ່ວນນ້ອຍຫຼາຍກວ່າ 60 % ຂອງຜູ້ໄດ້ຮັບຜົນປະໂຫຍດທັງໝົດ. ຄຽງຄູ່ກັນນັ້ນ, ໃນການຈັດຕັ້ງປະຕິບັດວຽກງານຂອງ ທລຍ ທີ່ສົ່ງເສີມ ແລະ ສ້າງຄວາມເຂັ້ມແຂງໃຫ້ອຳນາດການປົກຄອງທ້ອງຖິ່ນ ແລະ ປະຊາຊົນ ໃຫ້ເພີງຕົນເອັງ, ກຸ້ມຕົນເອັງ ແລະ ສ້າງຄວາມເຂັ້ມແຂງດ້ວຍຕົນເອັງ ກໍເປັນສິ່ງສຳຄັນທີ່ປະກອບສ່ວນໃນການຍູ້ແຮງໃຫ້ວຽກງານຂອງຕົນມີຜົນສຳເລັດຢ່າງຕໍ່ເນື່ອງ ແລະ ບັນລຸເປົ້າໝາຍຕາມແຜນການທີ່ວາງໄວ້.
ດັ່ງນັ້ນ, ໃນວັນທີ 25 ພືດສະພາ 2016 ທີ່ຫ້ອງຮັບແຂກຊັ້ນ I ຂອງຫ້ອງວ່າການສຳນັກງານນາຍົກລັດຖະມົນຕີ, ທ່ານ ນາງ ຊາລີ ເບີນນິ່ງແຮມ (Sally Burningham), ຫົວໜ້າຫ້ອງການທະນາຄານໂລກ ປະຈຳ ສປປ ລາວ ພ້ອມດ້ວຍຄະນະ ກໍໄດ້ເຂົ້າລາຍງານ ກ່ຽວກັບການຮອງຮັບໃຫ້ທຶນ ມູນຄ່າ 30 ລ້ານໂດລາສະຫະລັດ ທີ່ມີທຶນສົມທົບລັດຖະບານ ມູນຄ່າ 6 ລ້ານໂດລາສະຫະລັດ ເພື່ອສືບຕໍ່ຈັດຕັ້ງປະຕິບັດໂຄງການ ທລຍ III, ເປັນກຽດຕ້ອນຮັບ ແລະ ພົບປະ ຕາງໜ້າໃຫ້ລັດຖະ ບານ ໂດຍ ທ່ານ ສົມສະນິດ ສຸວັນນະລາດ, ຮອງລັດຖະມົນຕີ, ຮອງຫົວໜ້າຄະນະພັດທະນາຊົນນະ ບົດ ແລະ ລຶບລ້າງຄວາມທຸກຍາກ ຂັ້ນສູນກາງ ພ້ອມດ້ວຍຄະນະ ແລະ ຜູ້ຕາງໜ້າກອງທຶນຫລຸດຜ່ອນຄວາມທຸກຍາກ ເຂົ້າຮ່ວມຢ່າງພ້ອມພຽງ.
ໃນວາລະໂອກາດດັ່ງກ່າວ, ທ່ານ ສົມສະນິດ ສຸວັນນະລາດ ກໍໄດ້ສະແດງຄວາມຂອບໃຈ ແລະ ດີໃຈຫຼາຍ ທີ່ໄດ້ຕ້ອນຮັບ ແລະ ພົບປະ ທ່ານ ນາງ ຊາລີ ເບີນນິ່ງແຮມ ແລະ ລາຍງານບາງວຽກງານຈຳ ນວນໜຶ່ງ ເຊັ່ນ: ບັນຫາທີ່ໜຶ່ງ: ພາຍຫຼັງທີ່ສະພາແຫ່ງຊາດ ໄດ້ຮັບຮອງເອົາຄະນະລັດ ຖະບານຊຸດໃໝ່ແລ້ວ, ລັດຖະບານໄດ້ມີການປັບປຸງກົງຈັກຂອງຄືນໃໝ່. ໃນນັ້ນ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນສູນກາງ ຍ້ອນວ່າໄດ້ມີຜົນງານພົ້ນເດັ່ນຫຼາຍດ້ານ ໃນການແກ້ໄຂຄວາມ ທຸກຍາກ ຂອງປະຊາຊົນບັນດາເຜົ່າ ໃນໄລຍະຜ່າມາ, ລັດຖະບານຈຶ່ງໄດ້ຍົກຖານະບົດບາດຂອງ ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນສູນກາງ ໃຫ້ສູງເດັ່ນຂຶ້ນ ແລະ ສ້າງຕັ້ງເປັນກະຊວງ ແລະ ໄປສັງກັດຢູ່ກະຊວງກະສິກໍາ ແລະ ປ່າໄມ້, ແຕ່ວ່າ ໃນສະເພາະໜ້ານີ້ ແມ່ນຍັງຮັກສາກົງຈັກ ຂອງ ຄພທສ ໄວ້ຄືເກົ່າ ຈົນກວ່າຈະມີການສ້າງຕັ້ງເປັນກະຊວງກະສິກໍາ-ປ່າໄມ້ ແລະ ພັດທະນາຊົນນະບົດ, ການປ່ຽນແປງຄືດັ່ງກ່າວນີ້ ແມ່ນບໍ່ມີຫຍັງກະທົບເຖິງການຮ່ວມມືຂອງພວກເຮົາ ແລະ ເປັນໂອກາດດີ ເພື່ອຮັດແໜ້ນການຮ່ວມມື ເພື່ອແກ້ໄຂຄວາມທຸກຍາກ ໂດຍພາຍໃຕ້ການຊີ້ນຳ-ນຳພາ ຂອງລັດຖະມົນຕີຜູ້ໃໝ່, ແຕ່ເຖີງຢ່າງໃດກໍຕາມ ທະນາຄານໂລກຍັງໃຫ້ການສືບຕໍ່ສະໜັບສະໜູນໃນອະນາຄົດ; ບັນຫາທີ່ສອງ: ສະແດງຄວາມຂອບໃຈ ແລະ ຕີລາຄາສູງ ຕໍ່ທະນາຄານໂລກ ກໍຄື ຄູ່ຮ່ວມໃຫ້ທຶນ ທີ່ໄດ້ໃຫ້ການສະໜັບສະໜູນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຢູ່ ສປປ ລາວ ມາຢ່າງຕໍ່ເນື່ອງ ແລະ ມີຜົນສໍາເລັດດີ, ເປັນຕົ້ນແມ່ນ: ທາງດ້ານວິຊາການ, ດ້ານການເງິນ ແລະ ດ້ານບໍລິຫານຈັດການໂຄງການ ທລຍ II ແລະ ການຮ່າງມາດຕະຖານຄວາມທຸກຍາກ 2016-2020 ເພື່ອກວດກາປະເມີນຄວາມທຸກຍາກ ແລະ ນຳໃຊ້ຂໍ້ມູນດັ່ງກ່າວໃນການສ້າງໂຄງການແກ້ໄຂຄວາມທຸກຍາກ ຢູ່ ສປປ ລາວ ແລະ ບັນຫາອື່ນໆ ທີ່ສໍາຄັນໃນການຮ່ວມມືໃນຕໍ່ໜ້າ.
ໃນຕອນທ້າຍ, ທ່ານ ນາງ ຊາລີ ເບີນນິ່ງແຮມ, ຫົວໜ້າຫ້ອງການທະນາຄານໂລກ ປະຈຳ ສປປ ລາວ ກໍໄດ້ກ່າວຄວາມຂອບໃຈ ມາຍັງລັດຖະບານລາວ ທີ່ໃຫ້ການຮ່ວມມື ແລະ ສະໜັບສະໜູນ ການຈັດຕັ້ງປະຕິບັດວຽກງານ ຂອງ ທລຍ ໃນໄລຍະຜ່ານມາ ແລະ ຕໍ່ໜ້າ ໃຫ້ບັນລຸຈຸດປະສົງ ແລະ ເປົ້າໝາຍທີ່ວ່າງໄວ້. ພ້ອມກັນນັ້ນ, ທ່ານ ມີຄວາມຕ້ອງການໃຫ້ທຸກພາກສ່ວນທີ່ກ່ຽວຂ້ອງຕ້ອງປະສານສົມທົບກັນ ແລະ ມີແຜນພັດທະນາໄປລວງດຽວກັນ ເພື່ອຮັບປະກັນການພັດທະນາຊົນນະບົດ ຢູ່ ສປປ ລາວ ມີປະສິດທິພາບ ແລະ ປະສິດທິຜົນ ດີຂື້ນເລື້ອຍໆ ໃນອານາຄົດ.
