ການເຊື່ອມສານ ການວາງແຜນຂັ້ນບ້ານ ແລະ ຂັ້ນກຸ່ມ ເຂົ້າໃນການວາງແຜນພັດທະນາເສດຖະກິດສັງຄົມຂອງເມືອງ ຈະໄດ້ຂະຫຍາຍທົ່ວພື້ນທີ່ເປົ້າໝາຍຂອງ ທລຍ
ໂດຍ: ແສງອາລຸນ ພິລາຈັນ
ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ຖືກສ້າງຕັ້ງຂຶ້ນຕາມດຳລັດຂອງນາຍົກລັດຖະມົນຕີສະບັບເລກທີ 073/ນຍລົງວັນທີ 31 ພຶດສະພາ 2002 ເພື່ອສະໜັບສະໜູນນຶ່ງໃນບັນດາເປົ້າໝາຍທີ່ສຳຄັນຂອງແຜນພັດທະນາເສດຖະກິດ-ສັງຄົມແຫ່ງຊາດແລະນະໂຍບາຍຂອງລັດຖະບານໃນການລຶບລ້າງຄວາມທຸກ ຍາກປີໃຫ້ໄດ້ໃນປີ 2015 ໂດຍພື້ນຖານແລະນຳພາປະເທດຊາດໃຫ້ຫລຸດພົ້ນອອກຈາກສະພາບ ດ້ອຍພັດທະນາໃນປີ 2020.
ກອງທຶນຫລຸດຜ່ອນຄວາມທຸກຍາກ (ທລຍ) ເປັນຜູ້ສະໜອງປັດໃຈເພື່ອພັດທະນາກຸມ່ບ້ານເປົ້າ ໝາຍທີ່ນອນຢູ່ໃນບັນດາເມືອງທີ່ທຸກຍາກໂດຍຜ່ານຂະ ບວນການຕັດສິນໃຈແບບມີສ່ວນຮ່ວມທີ່ຫ້າວຫັນຂອງຊຸມຊົນ, ສ້າງຂີດຄວາມສາມາດເພື່ອມອບສິດໃຫ້ຊາວບ້ານທຸກຍາກເປັນຜູ້ວາງແຜນ, ຈັດຕັ້ງປະຕິບັດແລະຄຸ້ມຄອງທຸກການລົງທຶນຢູ່ໃນກຸ່ມບ້ານດ້ວຍຕົນເອງຕາມຮູບແບບການແບ່ງຂັ້ນຄຸ້ມຄອງແລະຄວາມໂປ່ງໃສເປັນຫລັກ, ສ້າງຄວາມເຂັ້ມແຂງໃຫ້ແກ່ສະຖາບັນ, ສະໜັບສະໜູນຂະບວນການຕັດສິນໃຈແລະການແກ້ໄຂຂໍ້ຂັດແຍ່ງແບບມີສ່ວນຮ່ວມຕັ້ງແຕ່ຂັ້ນບ້ານ, ກຸ່ມບ້ານແລະເມືອງໂດຍໃຫ້ມີສ່ວນຮ່ວມຢ່າງກ້ວາງຂວາງ ຂອງຊາວບ້ານ, ເພດຍິງແລະຊົນເຜົ່າສ່ວນນ້ອຍ, ຊ່ວຍເຫລືອຊາວບ້ານໃນການພັດທະນາໂຄງລ່າງຂະໜາດນ້ອຍແລະໃຫ້ເຂົາເຈົ້າໄດ້ຮັບການບໍລິການ ດ້ານຕ່າງໆຕາມຄວາມຈຳເປັນແລະເໝາະສົມ, ທັງເປັນການຜັນຂະຫຍາຍວຽກງານ 3 ສ້າງ ເຂົ້າໃນຊີວິດຕົວຈິງຂັ້ນບ້ານ, ເປັນການປະກອບສ່ວນເຮັດໃຫ້ບ້ານທຸກຍາກໄດ້ ພົ້ນຄວາມທຸກຍາກ ກາຍເປັນບ້ານພັດທະນາໃນອະນາຄົດ.
ສໍາລັບພື້ນທີ່ເປົ້າໝາຍຂອງ ທລຍ 3 ຈະກວາມເອົາ 10 ແຂວງ, 43 ເມືອງ, 256 ກຸ່ມບ້ານ, 1,752 ບ້ານ ເພື່ອເຊື່ອມສານການວາງແຜນພັດທະນາບ້ານ ແລະ ກຸ່ມບ້ານ ເຂົ້າໃນການວາງແຜນພັດທະນາເສດຖະກິດສັງຄົມຂອງເມືອງນັ້ນ ນັບຕັ້ງແຕ່ເດືອນມິຖຸນາ 2016 ຈົນເຖິງ ເດືອນຕຸລາ 2016 ທລຍ ໄດ້ເຮັດການທົດລອງການເຊື່ອມສານການວາງແຜນຂັ້ນບ້ານ ແລະ ກຸ່ມບ້ານເຂົ້າໃນແຜນພັດທະນາເສດຖະກິດສັງຄົມຂອງເມືອງ ຢູ່ 4 ເມືອງຄື : ເມືອງແບງ ແຂວງອຸດົມໄຊ, ເມືອງໂພນໄຊ ແຂວງຫລວງພະບາງ, ເມືອງຊໍາເໜືອ ແຂວງຫົວພັນ ແລະ ເມືອງເຊໂປນ ແຂວງສະຫວັນນະເຂດ. ເພື່ອເປັນການປະເມີນ ແລະ ສະຫລຸບຕີລາຄາ ຜົນຂອງການທົດລອງນັ້ນ ໃນວັນທີ 17 ພະຈິກ 2016 ກະຊວງແຜນການ ແລະ ການລົງທຶນ ຮ່ວມກັບ ຄະນະພັດທະນາຊົນນະບົດ ແລະ ລຶຍລ້າງຄວາມທຸກຍາກ ຂັ້ນສູນກາງ ຈັດກອງປະຊຸມຖອດຖອນບົດຮຽນກ່ຽວກັບ ການເຊື່ອມສານແຜນພັດທະນາບ້ານ ແລະ ກຸ່ມບ້ານ ເຂົ້າໃນແຜນພັດທະນາເສດຖະກິດສັງຄົມຂັ້ນເມືອງ ທີ່ໂຮງແຮມດອນຈັນ ພາເລດ ໂດຍການເປັນປະທານຂອງທ່ານ ຈິດ ທະວີໃສ, ຫົວໜ້າກ້ອງການແຜນການ ແລະ ພົວພັນຕ່າງປະເທດ, ຄພທສ ແລະ ທ່ານ ລຽນທອງ ສຸພານີ, ຮອງຫົວໜ້າກົມແຜນການ, ກະຊວງແຜນການ ແລະ ການລົງທຶນ ແລະ ການເຂົ້າຮ່ວມຂອງຜູ້ໃຫ້ທຶນ ກໍຄືທະນາຄານໂລກ, ຜູ້ຕາງໜ້າອົງການຈັດຕັ້ງສາກົນຕ່າງໆ, ຜູ້ຕາງໜ້າຈາກບັນດາກະຊວງຕ່າງໆ ແລະ ມະຫາວິທະຍາໄລແຫ່ງຊາດ, ຜູ້ຕາງໜ້າຈາກພະແນກແຜນການ ແລະ ການລົງທຶນ, ຫ້ອງການພັດທະນາຊົນນະບົດຈາກແຂວງອຸດົມໄຊ, ແຂວງຫລວງພະບາງ, ແຂວງຫົວພັນ ແລະ ແຂວງສະຫວັນນະເຂດ, ບັນດາທ່ານ ຮອງເຈົ້າເມືອງ, ຫ້ອງການແຜນການ, ຫ້ອງການພັດທະນາຊົນນະບົດ, ສະຫະພັນແມ່ຍິງ, ພະນັກງານ ທລຍ ຈາກ 4 ເມືອງທົດລອງ.
ທີ່ກອງປະຊຸມໄດ້ມີການແບ່ງກຸ່ມຄົ້ນຄ້ວາ ກ່ຽວກັບປະສົບການຈາກການເຮັດທົດລອງ ເພື່ອສະຫລຸບຕີລາ ສິ່ງທ້າທາຍຈາກການເຮັດທົດລອງ ແລະ ທິດທາງໃນຕໍ່ໜ້າ ນອກຈາກນັ້ນ ຍັງມີການນໍາສະເໜີລະບົບການວາງແຜນໃນ ສປປ ລາວ, ນະໂຍບາຍກ່ຽວກັບຈຸດສຸມການລຶບລ້າງຄວາມທຸກຍາກຂອງລັດຖະບານ ຈາກກະຊວງທີ່ກ່ຽວຂ້ອງ ແລະ ພິເສດໄດ້ມີການນໍາສະເໜີບົດຮຽນ ຂະບວນການວາງແຜນຂອງປະເທດຫວຽດນາມ ຈາກທີ່ປຶກສາທະນາຄານໂລກ. ຜ່ານການປຶກສາຫາລື ແລະ ຄົ້ນຄ້ວາ ຕີລາຄາ ຂອງກອງປະຊຸມໃນຄັ້ງນີ້ ເຫັນວ່າການເຊື່ອມສານ ການວາງແຜນຂັ້ນບ້ານ ແລະ ຂັ້ນກຸ່ມ ເຂົ້າໃນການວາງແຜນພັດທະນາເສດຖະກິດສັງຄົມຂອງເມືອງມີຜົນດີຫລາຍຢ່າງ ເພາະເຮັດການວາງແຜນໃນລັກສະນະນີ້ຈະເປັນການຊ່ວຍໃຫ້ຊາວບ້ານ ແລະ ພາກລັດ ມີຄວາມໃກ້ສິດກັນຫລາຍຂຶ້ນ ແລະ ພາກລັດກໍຈະເຂົ້າໃຈຕໍ່ກັບບຸລິມະສິດຄວາມຕ້ອງການຂອງແຕ່ລະບ້ານ ແລະ ກຸ່ມບ້ານ ຢ່າງເລີກເຊິ່ງ ສາມາດແກ້ໄຂຄວາມທຸກຍາກຖືກຈຸດ ຕາມບຸລິມະສິດຄວາມຕ້ອງການຂອງຜູ້ທຸກຍາກ ດ້ອຍໂອກາດ ແລະ ຊົນເຜົ່າ ຫ່າງໄກສອກຫລີກຢ່າງແທ້ຈິງ.
ສະນັ້ນ ໃນຕໍ່ໜ້າ ທລຍ ຈະໄດ້ຜັນຂະຫຍາຍຜົນສໍາເລັດຂອງການເຮັດທົດລອງການເຊື່ອມສານ ການວາງແຜນຂັ້ນບ້ານ ແລະ ຂັ້ນກຸ່ມ ເຂົ້າໃນການວາງແຜນພັດທະນາເສດຖະກິດສັງຄົມຂອງເມືອງ ເຂົ້າສູ່ພື້ນທີ່ເປົ້າໝາຍຂອງ ທລຍ 10 ແຂວງ, 43 ເມືອງ, 256 ກຸ່ມບ້ານ, 1,752 ບ້ານ ໃຫ້ປະກົດຜົນເປັນຈິງ.
