ທລຍ ຈັດກອງປະຊຸມປຶກສາຫາລືແລກປ່ຽນບົດຮຽນການຈັດຕັ້ງປະຕິບັດໂຄງການປັບ
ປຸງຊີວິດການເປັນຢູ່ເຊື່ອມສານໂພຊະນາການ
ໂດຍ: ດຣ. ຄອນທິບ ພວງເພັດ
ວຽກງານປັບປຸງຊີວິດການເປັນຢູ່ ແລະ ໂພຊະນາການ ຖືວ່າເປັນວຽກງານໜຶ່ງທີ່ທ້າທາຍຫລາຍ ຍ້ອນເປັນວຽກທີ່ກ່ຽວ ຂ້ອງກັບວຽກງານສ້າງລາຍຮັບ ແລະ ການປ່ຽນແປງພຶດຕິກໍາການບໍລິໂພກອາຫານຂອງປະຊາຊົນຜູ້ທຸກຍາກ ລວມທັງການສ້າງປະຖົມປັດໃຈດ້ານການດໍາລົງຊີວິດທີ່ປອດໄພຈາກການຄຸກຄາມພະຍາດຕ່າງໆທີ່ມັກເກີດຂື້ນກັບແມ່ ແລະ ເດັກໃນເຂດຊົນນະບົດ ອັນເປັນສາເຫດເຮັດໃຫ້ການດໍາລົງຊີວິດຂອງແມ່ ແລະ ເດັກນ້ອຍໃນ ສປປ ລາວ ບໍ່ມີຄຸນນະພາບທີ່ດີໃນໄລຍະຜ່ານມາ.
ໃນປີ 2012-2015 ທລຍ ໃຫ້ຄວາມເອົາໃຈໃສ່ ແລະ ຈັດສັນງົບປະມານຈໍານວນບໍ່ໜ້ອຍ ເພື່ອສ້າງເປັນໂຄງການທົດລອງ, ຊຶ່ງຈຸດປະສົງຂອງການທົດລອງດັ່ງກ່າວແມ່ນເພື່ອຊອກຫາຊ່ອງທາງ ແລະ ແນວທາງໃນການ ປັບປຸງຊີວິດການເປັນຢູ່, ຮັບປະກັນດ້ານໂພຊະນາການ ເຮັດແນວໃດໃຫ້ຊີວິດການເປັນຢູ່ຂອງພໍ່ແມ່ປະຊານຜູ້ດ້ອຍໂອກາດ ແລະ ທຸກຍາກ ລວມທັງແມ່ຍິງໄວຈະເລີນພັນ ແລະ ເດັກຂອງເຂົາເຈົ້າ ມີການດໍາລົງຊີວິດດີ ສາມາດເປັນຜູ້ສຶບທອດອະນາຄົດຂອງຊາດທີ່ມີປະສິດທິພາບດີຂື້ນເທື່ອລະກ້າວ. ດ້ວຍຄວາມພະຍາຍາມ ແລະ ເອົາໃຈໃສ່ລັດຖະບານ ແຫ່ງ ສ ປ ປ ລາວ ທີ່ໄດ້ມອບໝາຍໃຫ້ ທລຍ ແລະ ຜູ້ໃຫ້ທຶນເຊັ່ນ ທະນາຄານໂລກ ແລະ ກອງທຶນພັດທະນາສັງຄົມ ລັດຖະບານຍີ່ປຸ່ນ. ມາຮອດປະຈຸບັນ ແມ່ນມີຕົວແບບ ແລະ ໄດ້ຮັບທຶນສຶບຕໍ່ວຽກງານຂະຫຍາຍໃໝ່ຕື່ມອີກ 80 ບ້ານ, 3 ເມືອງທີ່ທຸກຍາກ. ຖ້າລວມທັງເມືອງເກົ່າ ມາຮອດປະຈຸບັນ ແມ່ນ ທລຍ ກໍາລັງໃຫ້ການຊ່ວຍເຫຼືອ ທັງໝົດ 5 ເມືອງ ແລະ 165 ບ້ານ. ຊຶ່ງຈໍານວນ 80 ບ້ານ ທີ່ ທລຍ ຂະຫຍາຍໃໝ່ນີ້ ແມ່ນຍັງຢູ່ໃນຂັ້ນຕອນກະກຽມວາງແຜນຂັ້ນບ້ານ.
ເພື່ອກຽມຄວາມພອ້ມໃຫ້ກັບວຽກງານດັ່ງກ່າວ ໃນລະຫວ່າງ ວັນທີ 10 -11 ທັນວາ 2015 ທລຍ ໄດ້ຈັດກອງປະຊຸມປຶກສາຫາລືແລກປ່ຽນບົດຮຽນການຈັດຕັ້ງປະຕິບັດໂຄງການປັບປຸງຊີວິດການເປັນຢູ່ ເຊື່ອມສານໂພຊະນາການ ຂື້ນທີ່ຫອ້ງປະຊຸມຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ມີຜູ້ເຂົ້າຮວ່ມທັງໝົດ 36 ຄົນ, ໃນນີ້ ມີແມ່ຍິງ 18 ຄົນ.
ຈຸດປະສົງຂອງກອງປະຊຸມແມ່ນເພື່ອ:
1. ສ້າງຄວາມເຂັ້ມແຂງໃຫ້ກັບພະນັກງານວິຊາການ ກ່ຽວກັບ ການປັບປຸງລະບົບການຄຸ້ມຄອງບໍຫານຂໍ້ມູນ ດ້ານວຽກງານໂພຊະນາການ ແລະ ປັບປຸງຊີວິດການເປັນຢູ ໂດຍສະເພາະແມ່ນການເກັບກໍາຂໍ້ມູນ ທີ່ກ່ຽວຂອ້ງກັບ ປະລິມານ ແລະ ຄຸນນະພາບຂອງການຈັດຕັ້ງປະຕິບັດວຽກງານ ເພື່ອຮັບປະກັນໃຫ້ຂໍ້ມູນດັ່ງກ່າວຖຶກບັນທຶກເຂົ້າໃສ່ຖານຂໍ້ມູນ ທລຍໃຫ້ຄົບຖ້ວນ ເພື່ອເຮັດໃຫ້ລະບົບການລາຍງານມີປະສິດທິພາບ ແລະ ມີປະສິດທິຜົນ ສາມາດເປັນຂໍ້ມູນອ້າງອີງໃຫ້ແກາການດໍາເນີນວຽກງານດັ່ງກ່າວໃນຕໍ່ໜ້າໃຫ້ເປັນລະບົບຮັດກຸ່ມກວ່າເກົ່າ.
2. ເພື່ອເປັນການລະດົມແນວຄວາມຄິດ ກ່ຽວກັບ ຂະບວນການຈັດຕັ້ງປະຕິບັດ ໃຫ້ມີຄວາມສອດຄ່ອງ ແລະ ເຊື່ອມຍົງກັນ ລະຫວ່າງວຽກງານປັບປຸງຊີວິດການເປັນຢູ່ ແລະ ໂພຊະນາການ.
3. ເພື່ອຕົກລົງເປັນເອກະພາບກັນ ກ່ຽວກັບ ລະບົບການຄຸ້ມຄອງບໍລິຫານການເງີິນ ແລະ ວາງແຜນສືບຕໍ່ຈັດຕັ້ງປະຕິບັດໃນຕໍ່ໜ້າ.
ໃນກອງປະຊຸມໄດ້ມີການ ປຶກສາຫາລືລົງເລິກຄົ້ນຄ້ວາຫລາຍດ້ານ ເປັນຕົ້ນແມ່ນ ຄົ້ນຄ້ວາຮໍ່າຮຽນ ແລະ ທໍາຄວາມເຂົ້າໃຈກັບ ຂໍ້ມູນທີ່ຈະນໍາເອົາມາປອ້ນເຂົ້າໃສ່ຖານຂໍ້ມູນ ມີຂໍ້ມູນປະເພດໃດແດ່, ຜົນໄດ້ຮັບຂອງຂໍ້ມູນທີ່ອອກມາແມ່ນຂໍ້ມູນຫັຍງແດ່, ຜົນປະໂຫຍດຂອງສະໂມສອນໂພຊະນາການບ້ານທີ່ດີເປັນແນວໃດ. ຈາກນັ້ນ ຍັງໄດ້ປຶກສາຫາລື ແລະ ຄົ້ນຄ້ວາກ່ຽວກັບບັນດາເຄື່ອງມືທີ່ນໍາໃຊ້ເຂົ້າໃນການຄວາມຮູ້ກ່ຽວກັບໂພຊະນາກນແກ່ຊຸມຊົນມີຂໍ້ດີ ແລະ ຈຸດບົກຜ່ອງແນວໃດ ແລະ ເຮັດແນວໃດຈຶ່ງຈະເຮັດໃຫ້ເຄື່ອງມືໄດ້ຮັບການປັບປຸງ ສອດຄອ່ງກັບສະພາບການດ້ານຄວາມຮັບຮູ້ທີ່ມີຈໍາກັດຂອງປະຊາຊົນໄດ້ເຂົ້າໃຈງ່າຍ ມີທິດສະດີໜ້ອຍ ແຕ່ມີເນື້ອໃນຄົບຖ້ວນ, ອື່ນໆ. ສໍາລັບວຽກງານປັບປຸງຊີວິດການເປັນຢູ່ໄດ້ຄົ້ນຄວ້າປຶກສາຫາລື ກ່ຽວກັບ ຂັ້ນຕອນ ແລະ ຂະບວນການຈັດຕັ້ງປະຕິບັດໂດຍສະເພາະແມ່ນຂະບວນການວາງແຜນ ແບບມີສ່ວນຮ່ວມ, ພອ້ມກັນນັ້ນຍັງໄດ້ທົບທວນຄືນ ບັນດາຕົວຊີ້ວັດຜົນສໍາເລັດ ທີ່ກ່ຽວຂ້ອງກັບ ກຸ່ມຊ່ງເຫຼືອຊຶ່ງກັນ ແລະ ກັນ(ກຊກ), ທິດທາງ, ຄວາມຕ້ອງການໃນການເຊື່ອມສານກິດຈະກໍາປັບປຸງຊີວິດການເປັນຢູ່/ສ້າງລາຍຮັບ ແລະ ໂພຊະນາການຄວນເຮັດແນວໃດໃຫ້ເຊື່ອມຕໍ່ກັນໄດ້ດີກວ່າເກົ່າ ເພື່ອຮັບປະກັນໃຫ້ສະມາຊິກສະໂມສອນໂພຊະນາການ ແລະ ຄົວເຮືອນມີອາຫານໄວ້ບໍລິໂພກໃຫ້ຄົບ 3 ໝວດ 6 ໝູ່ພຽງພໍ, ບັນຫາທີ່ສໍາຄັນທີ່ສຸດ ແມ່ນນັກສໍາມະນາກອນໄດ້ປຶກສາຫາລື ແລະ ວາງແຜນເຄື່ອນໄຫວໃນຕໍ່ໜ້າຮ່ວມກັນດ້ວຍຄວາມເປັນເອກະພາບ, ເຂົ້າໃຈ ເຫັນໄດ້ຄວາມສຳຄັນ ແລະ ຄວາມຂອງການເກັບກໍາຂໍ້ມູນກໍຄືຄວາມຈໍາເປັນຂອງລະບົບຖານຂໍ້ມູນ, ນອກຈາກນັ້ນ, ພະນັກງານ ຄປພ ຍັງເຂົ້າໃຈ ເຖິງການບໍລິຫານງົບປະມານ, ຂັ້ນຕອນໃນການຈັດຕັ້ງປະຕິບັດວຽກງານລວມທັງມີທິດທາງແຜນການ ເພື່ອເປັນທິດທາງ ສືບຕໍ່ເຄື່ອນໄຫວກິດຈະກຳໃນຕໍ່ໜ້າທີ່ເປັນເອກະພາບ ລະຫວ່າງ ສູນກາງ, ຜູ້ໃຫ້ທຶນ, ແຂວງ, ເມືອງ ແລະ ປະສານງານບ້ານເປົ້າໝາຍຂອງໂຄງການລະອຽດອີກດ້ວຍ.
ທ່ານ ຈອນຈິດ ດວງພະຈັນ ຜູ້ຮັບຜິດຊອບວຽກງານປັບປຸງຊີວິດການເປັນຢູ່ໄດ້ໃຫ້ສໍາພາດວ່າ: ຕະຫລອດໄລຍະ 5 ປີ ທີ່ຂ້າພະເຈົ້າຮັບຜິດຊອບວຽກງານດັ່ງກ່າວນີ້ ເຫັນວ່າ ມີຜົນສໍາເລັດຫລາຍດ້ານ, ຜູ້ໃຫ້ທຶນມີຄວາມເພິ່ງພໍໃຈ ແລະ ສືບຕໍ່ໃຫ້ການຊ່ວຍເຫຼືອ ອີກ 1 ປີ ອັນນີ້ສະແດງໃຫ້ເຫັນເຖິງຜົນສໍາເລັດບາດກ້າວທໍາອິດທີ່ ທລຍ ກໍ່ຄືລັດຖະບານ ໄດ້ໃຫ້ຄວາມເອົາໃຈໃສ່ແກ້ໄຂບັນຫາຊີວິດການເປັນຢູ່ ໄປຄຽງຄູ່ກັບການພັດທະນາດ້ານສັງຄົມ ກໍຄືແມ່ ແລະ ເດັກ ຊຶ່ງເປັນຊັບພະຍາກອນມະນຸດຜູ້ທີ່ຈະສຶບທອດອະນາຄົດຂອງຊາດ. ຕໍ່ກັບກອງປະຊຸມສໍາມະນາຄັ້ງນີ້ ຂ້າພະເຈົ້າເຫັນວ່າເປັນກອງປະຊຸມ ທີ່ສໍາຄັນທີ່ສຸດ ເພາະວ່າ ທຸກຄົນທີ່ໄດ້ຮັບການມອບໝາຍໃຫ້ຮັບຜິດຊອບວຽກງານນີ້ ມີຄວາມເຂົ້າອົກເຂົ້າໃຈກັນ ບໍ່ວ່າຈະເປັນຂັ້ນຕອນຈັດຕັ້ງປະຕິບັດ, ການມີສ່ວນຮ່ວມຂອງຊາວບ້ານ ຂະບວນການຈັດຕັ້ງປະຕິບັດກິດຈະກໍາ ຄວາມຈໍາເປັນ ແລະ ຄວາມສໍາຄັນຂອງຂໍ້ມູນກ່ຽວກັບຜົນສໍາເລັດ ຫຼື ຜົນຜະລິດຂອງໂຄງການ. ຂ້າພະເຈົ້າຕີລາຄາວ່າ ຖ້າມີກອງປະຊຸມແບບນີ້ເປັນປົກກະຕິ ຈະເຮັດໃຫ້ການເຮັດວຽກຂອງພວກເຮົາເປັນລະບົບລະບຽບດີຂື້ນ, ມີແຜນການ ແລະ ມີການແບ່ງຄວາມຮັບຜິດຊອບທີ່ຊັດເຈັນໃນແຕ່ລະຂັ້ນ ຊຶ່ງໃນຕໍ່ໜ້າ ຂ້າພະເຈົ້າເຊື່ອໝັ້ນວ່າ ທລຍ ຈະສາມາດນໍາເອົາຜົນສໍາເລັດ ແລະ ບົດຮຽນນີ້ໄປສືບຕໍ່ຜັນຂະຫຍາຍເຂົ້າໃນໂຄງການ ທລຍ III ໄດ້ ແລະ ຈະສາມາດເຮັດໃຫ້ລາຍຮັບຜູ້ທຸກຍາກເພີ່ມຂື້ນ, ຈໍານວນເດັກຂາດສານອາຫານຈະຫລຸດລົງ ແລະ ກໍຈະເປັນການສະໜັບສະໜູນເຮັດໃຫ້ຄວາມທຸກຍາກຂອງປະເທດເຮົາຫລຸດລົງເທື່ອລະກ້າວເຊັ່ນດຽວກັນ.
