ຄວາມຄືບໜ້າໃນການຈັດຕັ້ງປະຕິບັດໂຄງການຍ່ອຍຮອບວຽນທີ 12 (ສົກປີ 2014-2015) ແລະ ຮອບວຽນທີ 13 (ສົກປີ 2015-2016) ພ້ອມທັງກະກຽມ ທລຍ 3 [1]
ຄວາມຄືບໜ້າໃນການຈັດຕັ້ງປະຕິບັດໂຄງການຍ່ອຍຮອບວຽນທີ 12 (ສົກປີ 2014-2015)
ແລະ ຮອບວຽນທີ 13 (ສົກປີ 2015-2016) ພ້ອມທັງກະກຽມ ທລຍ 3
ໂດຍ: ທລຍ
ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ຮັບການສ້າງຕັ້ງຂຶ້ນໃນເດືອນພຶດສະພາ 2002 ຕາມດໍາລັດຂອງນາຍົກລັດຖະມົນຕີ ເລກທີ 73/ນຍ, ເປັນອົງການຈັດຕັ້ງໜຶ່ງທີ່ເປັນເຈົ້າຕົນເອງທາງດ້ານການເງິນ ແລະ ການບໍລິຫານຄຸ້ມຄອງທີ່ຂຶ້ນກັບຫ້ອງວ່າການລັດຖະບານ ແລະ ຢູ່ພາຍໃຕ້ການຊີ້ນໍາໂດຍກົງຂອງຄະນະຮາກຖານ ຄະນະພັດທະນາຊົນນະບົດ ແລະ ລືບລ້າງຄວາມທຸກຍາກ ຂັ້ນສູນກາງ. ທລຍ ໄດ້ຖືກຈັດຕັ້ງຂຶ້ນໂດຍມີຈຸດປະສົງເພື່ອປະກອບສ່ວນເຂົ້າໃນການແກ້ໄຂຄວາມທຸກຍາກຢູ່ພື້ນທີ່ບູລິມະສິດຂອງລັດຖະບານ ແລະ ເພື່ອເຮັດໃຫ້ຊຸມຊົນໄດ້ເຂົ້າເຖິງການບໍລິການ ແລະ ສິ່ງເອົານວຍຄວາມສະດວກດ້ານສາທາລະນະ ໃນການປັບປຸງຄຸນນະພາບການດໍາລົງຊີວິດປະຈໍາວັນຂອງປະຊາຊົນບັນດາເຜົ່າ ດ້ວຍການກໍ່ສ້າງພື້ນຖານໂຄງຮ່າງສໍາລັບການພັດທະນາເສດຖະກິດ-ສັງຄົມ ຢູ່ບັນດາບ້ານ ແລະ ເມືອງທຸກຍາທທີ່ສຸດ, ໂດຍຖືເອົາຮູບແບບການພັດທະນາທີ່ມີສ່ວນຮ່ວມຂອງຊຸມຊົນເປັນຫລັກການຕົ້ນຕໍ.
ສໍາລັບການຈັດຕັ້ງປະຕິບັດໂຄງການຍ່ອຍໃນຮອບວຽນທີ 12 (ສົກປີ 2014-2015) ຜ່ານມາ ມີຈຳນວນທັງໝົດ 438 ໂຄງການຍ່ອຍ ໃນນັ້ນ ຈຳນວນໂຄງການຍ່ອຍພາຍໃຕ້ທຶນພາຍໃນມີ 74 ໂຄງການ ເປັນມູນຄ່າປະ ມານ 16 ຕື້ກີບ ທີ່ໄດ້ຜ່ານການປະມູນແລ້ວ. ໃນນັ້ນ ຈັດຕັ້ງປະຕິບັດສໍາເລັດແລ້ວ 100% ມີ 428 ໂຄງການເທົ່າກັບ 98%, ຄວາມຄືບໜ້າຫລາຍກວ່າ50% ມີ 9 ໂຄງການ, ໜ້ອຍກວ່າ 50% ມີ 1 ໂຄງການ ເຊິ່ງໂຄງການທັງໝົດເຫລົ່ານັ້ນ ໄດ້ກວາມເອົາຂະແໜງກະສິກໍາ ແລະ ປ່າໄມ້ 41 ໂຄງການ, ໂຍທາທິການ ແລະ ຂົນສົ່ງ 75 ໂຄງການ, ສາທາລະນະສຸກ 155 ໂຄງການ, ສຶກສາທິການ ແລະ ກິລາ 165 ໂຄງການ, ພະລັງງານ ແລະ ບໍ່ແຮ່ 2 ໂຄງການ. ໂຄງການເຫລົ່ານັ້ນ ພາຍຫລັງທີ່ໄດ້ກໍ່ສ້າງສໍາເລັດ ທລຍ ໄດ້ມອບໃຫ້ຊຸມຊົນເປັນຜູ້ຄຸ້ມຄອງນໍາໃຊ້ ເພື່ອເຮັດແນວໃດໃຫ້ໂຄງການຕ່າງໆເຫລົ່ານັ້ນມີຄວາມຍືນຍົງ ແລະ ກຸ້ມຄ່າໃນການລົງທຶນ.
ປະຈຸບັນ ທລຍ ກໍາລັງຈັດຕັ້ງປະຕິບັດຮອບວຽນທີ 13 (ສົກປີ 2015-2016) ເຊິ່ງເປັນຮອບວຽນສຸດທ້າຍຂອງ ທລຍ ໄລຍະທີ 2 ທັງເປັນໄລຍະເຊື່ອມຕໍ່ລະຫວ່າງ ທລຍ ໄລຍະທີ 2 ແລະ ໄລຍະທີ 3. ສຳລັບຮອບວຽນທີ 13 ນີ້ ທລຍ ຈະໄດ້ຈັດຕັ້ງປະຕິບັດໂຄງການຍ່ອຍທັງໝົດ 507 ໂຄງການມີຈຳນວນຫຼາຍກວ່າເຄິ່ງໜຶ່ງ ແມ່ນໂຄງການກ່ຽວຂ້ອງກັບຂະແໜງການສຶກສາ ແລະ ກິລາ ຖືວ່າເປັນບູລິມະສິດຫຼັກໃນຮອບວຽນທີ 13 ເພາະວ່າວຽກຂະ ແໜງການສຶກສາ ແລະ ກິລາ ແມ່ນມີບົດບາດສຳຄັນຫລາຍໃນການລຶບລ້າງຄວາມທຸກຍາກ. ສຳລັບໂຄງການພາຍໃຕ້ທຶນສົມທົບຂອງລັດຖະບານ16 ຕື້ຈຳນວນ 52 ໂຄງການ, ສ່ວນໃຫຍ່ແມ່ນໄດ້ຈັດຕັ້ງປະຕິບັດ ແລະຫຼາຍໆໂຄງການແມ່ນໄດ້ສຳເລັດການຈັດຕັ້ງປະຕິບັດສຳເລັດແລ້ວ. ສິ່ງທ້າທາຍຂອງພະນັກງານທລຍ ແມ່ນທຸກໆໂຄງການແມ່ນຈະຕ້ອງຖືກຈັດຕັ້ງປະຕິບັດໃຫ້ສຳເລັດກ່ອນ ເດືອນກັນຍາ 2016 ເພື່ອຄ້ຳປະກັນໃຫ້ໂຄງການທລຍ 2 ສຳເລັດຢ່າງສົມບູນແບບ. ສະນັ້ນ ພະນັກງານທຸກຄົນໃນແຕ່ລະຂັ້ນແມ່ນກຳລັງຂຸ້ນຂ້ຽວເພື່ອໃຫ້ວຽກທັງໝົດສຳເລັດຕາມແຜນ.
ອີກວຽກງານໜຶ່ງ ສິ່ງທີ່ພົ້ນເດັ່ນແມ່ນການກະກຽມໂຄງການທລຍ ໄລຍະທີ 3 ເຊິ່ງໄດ້ດໍາເນີນໄປຕາມລະບົບ ແລະລະບຽບຫຼັກການ. ປະຈຸບັນແມ່ນກຳລັງຢູ່ໃນຂັ້ນຕອນການອອກແບບລະບົບຖານຂໍ້ມູນ ແລະການຄັດເລືອກພື້ນທີ່ເປົ້າໝາຍພ້ອມທັງຄິດໄລ່ງົບປະມານກຸ່ມບ້ານຕ່າງໆອີງໃສ່ລະດັບຄວາມທຸກຍາກຂອງແຕ່ລະເມືອງ ແລະກຸ່ມບ້ານຕາມຄວາມເໝາະສົມ. ສຳລັບແຫຼ່ງທຶນຕ່າງໆ, ໂຄງການທລຍ 3 ຈະໄດ້ນຳໃຊ້ທຶນຈຳນວນທັງໝົດ 52 ລ້ານໂດລາສະຫະລັດ (30 ລ້ານຈາກທະນາຄານໂລກ, 16 ລ້ານຈາກສະວິດເຊີແລນ ແລະ 6 ລ້ານຈາກທຶນສົມທົບລັດຖະບານ). ການເຈລະຈາລະຫວ່າງລັດຖະບານ ແລະ ຜູ້ໃຫ້ທຶນກ່ຽວກັບໂຄງການ ທລຍ 3 ພ້ອມດ້ວຍການເຊັນສັນຍາ ແມ່ນໄດ້ສຳເລັດໃນທ້າຍເດຶອນ ເມສາ 2016 ທີ່ຜ່ານມາ.
ສຳລັບການຈັດຕັ້ງປະຕິບັດໂດຍລະອຽດຂອງວຽກງານ ທລຍ 3 ແມ່ນກຳລັງດຳເນີນໄປພ້ອມໆກັບການຈັດຕັ້ງປະຕິບັດວຽກງານ ທລຍ 2 ເປັນຕົ້ນແມ່ນການກຳນົດແບບຟອມຕ່າງໆ ທີ່ເປັນເອກະພາບທີ່ສອດຄ່ອງກັບຕົວຊີ້ວັດໂຄງການ ແລະ ເພື່ອການອອກແບບລະບົບຖານຂໍ້ມູນໃຫ້ມີປະສິດທິພາບທີ່ສຸດ. ພ້ອມນັ້ນກໍແມ່ນກຳລັງກະກຽມທົບທວນລະບົບການຈັດຕັ້ງ, ພາລະບົດບາດຂອງພະນັກງານແຕ່ລະຕຳແໜ່ງຢູ່ແຕ່ລະຂັ້ນ (ເມືອງ, ແຂວງ ແລະ ສູນກາງ), ການປັບປຸງປື້ມຄູ່ມືໃນການຈັດຕັ້ງປະຕິບັດດ້ານເຕັກນິກ ແລະ ດ້ານການເງິນກໍໄດ້ສໍາເລັດ ຊຶ່ງເປັນເງື່ອນໄຂໜຶ່ງທີ່ສົ່ງຜົນ ໃຫ້ ທລຍ 3 ສາມາດດໍາເນີນໄດ້ຢ່າງເປັນທາງການ ເພື່ອຮັບປະກັນປະສິດທິພາບຂອງວຽກງານ ແລະ ຄວາມເໝາະສົມຂອງແຕ່ລະວຽກ. ສຳລັບ ທລຍ 3 ແມ່ນຈະເນັ້ນໃສ່ການກວດກາຄວາມຖືກຕ້ອງ ແລະ ຄຸນນະພາບຂອງໂຄງການເປັນຫລັກ.
