ຮູບແບບການສ້າງຄວາມເຂັ້ມແຂງ ລະຫວ່າງຊຸມຊົນ ກັບ ຊຸມຊົນ [1]
ຮູບແບບການສ້າງຄວາມເຂັ້ມແຂງ ລະຫວ່າງຊຸມຊົນ ກັບ ຊຸມຊົນ
ໂດຍ: ທລຍ ແຂວງຫົວພັນ
ໃນລະຫວ່າງວັນທີ 7 ຫາ 8 ກັນຍາ ປີ 2017 ຜ່ານມານີ້ ສະມາຊິກ ກຸ່ມຊ່ວຍເຫລືອເຊິ່ງກັນ ແລະ ກັນ (ກຊກ) ຂອງ ທລຍ ເມືອງ ນອງ, ເມືອງທ່າປາງທອງ ແລະ ເມືອງເຊໂປນ ແຂວງສະຫວັນນະເຂດ ໄດ້ຈັດຝຶກອົບຮົມເຕັກນິກການລ້ຽງສັດ ໃຫ້ກັບ ສະມາຊິກກຸ່ມຊ່ວຍເຫຼືອເຊິ່ງກັນ ແລະ ກັນ ຢູ່ບ້ານຫ້ວຍສາ ແລະ ບ້ານນ້ຳສາດ ເມືອງຮ້ຽມ ແຂວງ ຫົວພັນ ເປັນກຽດເຂົ້າຮ່ວມຂອງທ່ານ ສໍສະຫວັນ ບານຄໍາມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ຫົວໜ້າໂຄງການ ທລຍ ແຂວງຫົວພັນ, ທ່ານ ຈອນຈິດ ດວງພະຈັນ ຜູ້ຮັບຜິດຊອບວຽກປັບປຸງຊີວິດການເປັນຢູ່ຂັ້ນສູນກາງ, ທລຍ ເມືອງ, ຫ້ອງການກ່ຽວຂ້ອງຂັ້ນເມືອງ, ຄະນະພັກຂັ້ນບ້ານ, ອໍານາດການປົກຄອງ ພ້ອມດ້ວຍສະມາຊິກ ກຸ່ມຊ່ວຍເຫຼືອເຊິ່ງກັນ ແລະ ກັັນ ບ້ານ ຫ້ວຍສາ, ນໍ້າສາດ ກຸ່ມບ້ານທາດຮ້ຽມ ໄດ້ເຂົ້າຮ່ວມຢ່າງພ້ອມພຽງ.
ໃນການຝຶກອົບຮົມຄັ້ງນີ້ ອຳນາດການປົກຄອງ 2 ບ້ານ ໄດ້ຜ່ານບົດສະຫຼຸບກ່ຽວກັບການຈັດຕັ້ງປະຕິບັດວຽກງານ ກອງທຶນຫຼຸດຜ່ອນຄວາມທຸກຍາກໃນໄລຍະຜ່ານມາ ເຊິ່ງໄດ້ຍົກໃຫ້ເຫັນການຈັດຕັ້ງປະຕິບັດກ່ຽວກັບ ວຽກງານປັບປຸງຊີວິດການເປັນຢູ່ພາຍໃນກຸ່ມ ເຫັນວ່າຍັງບໍ່ທັນເຮັດໄດ້ຕາມເຕັກນິກໃນການລ້ຽງສັດ, ໂອກາດດັ່ງກ່າວ ວິຊາການປັບປຸງຊີວິດການເປັນຢູ່ປະຈໍາເມືອງນອງ,ເມືອງທ່າປາງທອງ ແລະ ເມືອງເຊໂປນ ແຂວງສະຫວັນນະເຂດ ກໍຄືສະມາຊິກ ກຊກ ທີ່ສາມາດຈັດຕັ້ງປະຕິບັດວຽກງານປັບປຸງຊີວິດການເປັນຢູ່ໄດ້ດີ ພາຍໃນ 3 ເມືອງ ດັ່ງກ່າວ ໄດ້ເຝິກອົບຮົມພາກທິດສະດີພ້ອມທັງຊີ້ນຳກ່ຽວກັບເຕັກນິກໃນການລ້ຽງສັດ, ສັດຕະວະແພດ ແລະ ສູດອາຫານໝັກໃຫ້ສັດລ້ຽງເປັນຕົ້ນ: ເປັດ,ໄກ່, ໝູ ໃຫ້ແກ່ສະມາຊິກ ກຊກ ບ້ານຫ້ວຍສາ ແລະ ບ້ານນ້ຳສາດ . ຈາກນັ້ນຍັງໄດ້ນໍາພາ ສະມາຊິກ ກຸ່ມຊ່ວຍເຫຼືອເຊິ່ງກັນ ແລະ ກັັນ ສອງບ້ານດັ່ງກ່າວ ຈັດຕັ້ງປະຕິບັດພາກຕົວຈິງ ຜ່ານການຈັດຕັ້ງປະຕິບັດຕົວຈິງເຫັນວ່າສະມາຊິກ ກຸ່ມຊ່ວຍເຫຼືອເຊິ່ງກັນ ແລະ ກັັນ ໄດ້ເອົາໃຈໃສ່ໃນການປະກອບສ່ວນເປັນວັດຖຸດິບ, ອຸປະກອນ, ແຮງງານ ເຂົ້າໃນການຈັດຕັ້ງປະຕິບັດ ແລະ ມີຄວາມເຂົ້າໃຈເຖິງຂັ້ນຂັ້ນຕອນ ເຕັກນິກຕ່າງໆໃນການລ້ຽງສັດປິກ, ການເຮັດອາຫານໝັກ, ການປິ່ນປົວ ແລະ ປ້ອງກັນ ພະຍາດສັດປິກ ແລະ ໝູ ເຊິ່ງເຮັດໃຫ້ການຝຶກອົບຮົມໃນຄັ້ງນີ້ມີຮັບຜົນສຳເລັດ.
ພາຍຫຼັງໄດ້ຮັບການເຝິກອົບຮົມພາກທິດສະດີ ແລະ ພາກຈັດຕັ້ງປະຕິບັດຕົວຈິງແລ້ວ ສະມາຊິກກຸ່ມຊ່ວຍເຫຼືອເຊິ່ງກັນ ແລະ ກັັນ ພາຍໃນ 2 ບ້ານດັ່ງກ່າວຈະນໍາເອົາຄວາມຮູ້ຈາກການຝຶກອົບຮົມໃນເທື່ອນີ້ໄປຜັນຂະຫຍາຍເຂົ້າສູ່ການຈັ້ດຕັ້ງປະຕິບັດຕົວຈິງພາຍໃນຄົວເຮືອນຂອງຕົນເອງ ແລະ ປັບປຸງຊີວິດການເປັນຢູ່ໃຫ້ນັບມື້ດີຂຶ້ນເປັນກ້າວໆ.
ທັງໝົດເຫລົ່ານີ້ ຖືໄດ້ວ່າເປັນຮຸບແບບການສ້າງຄວາມເຂັ້ມແຂງທີ່ເໝາະສົມ, ກະທັດຫັດ ແລະ ເຫັນຜົນໄດ້ຮັບ ໄວທີ່ສຸດ.
LN news.docx [2]
