ທລຍ ປຶກສາຫາລືການເຊື່ອມສານວຽກງານປັບປຸງຊີວິດການເປັນຢູ່ເຂົ້າກັບວຽກງານໂພຊະນາການ ກັບຂະແໜງການທີ່ກ່ຽວຂ້ອງ
ໂດຍ: ແສງອາລຸນ ພິລາຈັນ
ກອງປະຊຸມປຶກສາຫາລືການເຊື່ອມສານວຽກງານປັບປຸງຊີວິດການເປັນຢູ່ເຂົ້າກັບວຽກງານໂພຊະນາການ ລະຫວ່າງ ໂຄງການປັບປຸງຊີວິດການເປັນຢູ່ ເພື່ອຄໍ້າປະກັນດ້ານໂພຊະນາການ (ທລຍ/ຄປພ) ກັບກະຊວງກະສິກໍາ ແລະ ປ່າໄມ້, ກະຊວງສາທາລະນະສຸກ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນສູນກາງ ແລະ ຕາງໜ້າບັນດາຜູ້ໃຫ້ທຶນ ເປັນຕົ້ນແມ່ນທະນາຄານໂລກ ເຊິ່ງເປັນກອງປະຊຸມປະຖົມມະເລີກ ໄດ້ຈັດຂຶ້ນໃນວັນທີ 10 ກໍລະກົດ 2014 ທີ່ໂຮງແຮມ Mercure ໂດຍການເປັນປະທານຂອງທ່ານ ບົວລອງ ອິນທະວົງສາ, ຫົວໜ້າຫ້ອງການຈັດຕັ້ງ-ບໍລິຫານ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ແລະ ການເຂົ້າຮ່ວມຂອງບັນດາຜູ້ແທນທີ່ມາຈາກກະຊວງທີ່ກ່ຽວຂ້ອງ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນສູນກາງ ແລະ ຕາງໜ້າບັນດາຜູ້ໃຫ້ທຶນຈໍານວນຫລາຍກວ່າ 35 ທ່ານ .
ກອງປະຊຸມປຶກສາຫາລືໃນຄັ້ງນີ້ ໄດ້ຈັດຂຶ້ນໃນທ່າມກາງບັນຍາກາດທີ່ ສ.ປ.ປ. ລາວ ພວກເຮົາພວມຜັນຂະຫຍາຍ ການທົດລອງວຽກງານສາມສ້າງ ແລະ ປະຕິບັດຂໍ້ແຂ່ງຂັນສ້າງຂະບວນການຮັກຊາດ-ພັດທະນາ ເຂົ້າສູ່ລວງເລີກ ຊຶ່ງເປັນການເພີ້ມທະວີ ກໍາລັງແຮງ ໃຫ້ແກ່ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຢູ່ປະເທດຂອງພວກເຮົາ. ພ້ອມດຽວກັນ ກອງປະຊຸມໃນເທື່ອນີ້ ໄດ້ຈັດຂຶ້ນຕາມການປະເມີນຕີລາຄາຂອງຜູ້ໃຫ້ທຶນ ໂດຍສະເພາະແມ່ນທະນາຄານໂລກທີ່ເຫັນໄດ້ຄວາມສໍາຄັນຂອງວຽກງານເຊື່ອມສານການປັບປຸງຊີວິດການເປັນຢູ່ເຂົ້າກັບວຽກງານໂພຊະນາການຢ່າງເປັນຮູບປະທໍາ ເພື່ອເຮັດໃຫ້ ສ.ປ.ປ. ລາວ ບັນລຸເປົ້າໝາຍສະຫັດສະວັດ 1 ແລະ 3 ໃນປີ 2020.
ໃນປີ 2012 ຜູ້ໃຫ້ທຶນໄດ້ໃຫ້ການສະໜັບສະໜູນ ທລຍ ໃນການຈັດຕັ້ງປະຕິບັດວຽກງານປັບປຸງຊີວິດການເປັນຢູ່ທີ່ເຊື່ອມເຂົ້າກັບວຽກງານໂພຊະນາການ ພາຍໃຕ້ໂຄງການທົດລອງທີ່ມີຊື່ວ່າ: ໂຄງການປັບປຸງຊີວິດການເປັນຢູ່ ເພື່ອຄໍ້າປະກັນດ້ານໂພຊະນາການ (ຄປພ) ຕາມການສະເໜີຂອງລັດຖະບານລາວ ທີ່ສະເໜີຕໍ່ທະນາຄານໂລກ ໃນການໃຫ້ທຶນສະໜັບສະໜູນວຽກງານພັດທະນາຊີວິດການເປັນຢູ່ເຊື່ອມເຂົ້າກັບວຽກງານດ້ານໂພຊະນາການ ເພື່ອແກ້ໄຂຄວາມທຸກຍາກໃນ ສ.ປ.ປ. ລາວ. ແລະ ໃນລະຫວ່າງຕົ້ນເດືອນເມສາທີ່ຜ່ານມາ ບັນດາຜູ້ໃຫ້ທຶນ ໄດ້ມີການປະເມີນຜົນການຈັດຕັ້ງປະຕິບັດໄລຍະກາງສະໄໝຂອງໂຄງການປັບປຸງຊີວິດການເປັນຢູ່ ເພື່ອຄໍ້າປະກັນດ້ານໂພຊະນາການ ເຊິ່ງຜູ້ໃຫ້ທຶນໄດ້ມີຄໍາເຫັນວ່າຄວນຈະມີການຈັດກອງປະຊຸມປຶກສາຫາລືການເຊື່ອມສານວຽກງານປັບປຸງຊີວິດການເປັນຢູ່ເຂົ້າກັບວຽກງານໂພຊະນາການຢ່າງເປັນຮູບປະທໍາ, ດັ່ງນັ້ນ ກອງປະຊຸມຄັ້ງນີ້ ຈຶ່ງມີຄວາມສໍາຄັນ ເພື່ອເຮັດໃຫ້ວຽກງານປັບປຸງຊີວິດການເປັນຢູ່ ແລະ ໂພຊະນາການໄດ້ຮັບການຈັດຕັ້ງປະຕິບັດຢ່າງມີປະສິດຕິຜົນ.
ທີ່ກອງປະຊຸມບັນດາຜູ້ແທນໄດ້ມີການປຶກສາຫາລື ແລະ ແລກປ່ຽນຄໍາຄິດຄໍາເຫັນ ແລະ ພ້ອມກັນກໍານົດທິດທາງໃນການຈັດຕັ້ງປະຕິບັດການເຊື່ອມສານວຽກງານປັບປຸງຊີວິດການເປັນຢູ່ເຂົ້າກັບວຽກງານໂພຊະນການ, ພ້ອມທັງກໍານົດແຜນການຈັດຕັ້ງປະຕິບັດເພື່ອນໍາສະເໜີຕໍ່ ຜູ້ໃຫ້ທຶນໃນການສະໜັບສະໜູນໃນບາດ ກ້າວຕໍ່ໄປ. ພິເສດສຸດມ ໃນກອງປະຊຸມຄັ້ງນີ້ບັນດາຜູ້ແທນໄດ້ຍົກເອົາຫລາຍບັນຫາ ເພື່ອມາສົນທະນາແລກປ່ຽນ ໂດຍສະເພາະແມ່ນບັນຫາກ່ຽວກັບຍຸດທະສາດແຫ່ງຊາດ ເພື່ອຄໍ້າປະກັນດ້ານສະບຽງອາຫານ ແລະ ຍຸດທະສາດໃນການຫລຸດຜ່ອນການຂາດສານອາຫານໃນ ສ.ປ.ປ. ລາວ.
