ທລຍ ເສີມສ້າງຄວາມເຂັ້ມແຂງໃຫ້ແກ່ຊຸມຊົນຂັ້ນທ້ອງຖິ່ນ
ໂດຍ: ພັດທະນາຊຸມຊົນ ເມືອງວຽງພູຄາ
ໃນລະຫວ່າງທ້າຍເດືອນສິງຫາ 2017 ນີ້, ທລຍ ເມືອງວຽງພູຄາ ແຂວງຫລວງນໍ້າທາ ຮ່ວມກັບຂະແໜງພັດທະນາຊົນນະບົດ ແລະ ຂະແໜງສາທາລະນະສຸກ ໄດ້ຝຶກອົບຮົມ ກ່ອນການຈັດຕັ້ງປະຕິບັດໂຄງການສ້ອມແປງລະບົບນໍ້າລິນ ຮອບວຽນທີ 14 (ປີ 2017) ຢູ່ບ້ານ ພູລັນເໜືອ ແລະ ບ້ານ ນໍ້າລຸງ ກຸ່ມບ້ານ ນໍ້າສິງ ເມືອງວຽງພູຄາ ແຂວງຫຼວງນໍ້າທາ ໂດຍການເປັນປະທານຂອງທ່ານ ນາຍບ້ານ ພູລັນເໜືອ ແລະ ບ້ານ ນໍ້າລຸງ ມີຜູ້ເຂົ້າຮ່ວມທັງໝົດປະມານ 150 ກວ່າຄົນ, ຍິງ 80 ຄົນ.
ໃນການຈັດຊຸດຝຶກອົບຮົມຄັ້ງນີ້ ແມ່ນເພື່ອເສີມສ້າງຄວາມເຂັ້ມແຂງ ແລະ ຄວາມເຂົ້າໃຈໃຫ້ກັບທີມງານຈັດຕັ້ງປະຕິບັດຂັ້ນບ້ານ, ອໍານາດການປົກຄອງບ້ານ ແລະ ປະຊາຊົນພາຍໃນບ້ານ ໃຫ້ມີຄວາມເຂົ້າຕໍ່ກັບລະບຽບຫຼັກການ, ຮູບແບບວິທີການສ້ອມແປງນໍ້າລິນ, ການປະສົມຫິນແຮ່-ຊາຍ, ການແບ່ງຈຸແບ່ງໜ່ວຍການຈັດຕັ້ງປະຕິບັດໃນແຕ່ລະມື້ ແລະ ມີຄວາມສາມັກຄີກັນໃນການສ້ອມແປງນໍ້າລິນ ໃຫ້ສໍາເລດຕາມເປົ້າໝາຍທີ່ວາງໄວ້.
ນອກຈາກນັ້ນຍັງໄດ້ ອະທິບາຍ ໃຫ້ຄວາມກະຈ່າງແຈ້ງ ເຖິງວິທີການຈັດຕັ້ງບັດ ພາຍໃຕ້ລະບຽບຫຼັກການ ຂອງກອງທຶນຫຼຸດຜ່ອນຄວາມທຸກຍາກກໍ່ຄື ຜູ້ໃຫ້ທຶນ ເຊັ່ນ: ການນໍາໃຊ້ເງິນບໍລິຫານບ້ານ 3% ແລະ ກຸ່ມບ້ານ 2% ຢ່າງລະອຽດ ແລະ ຈະແຈ້ງ ຄຽງຄູ່ ກົນໄກສະແດງຄໍາຄິດຄໍາເຫັນ ແລະ ລາຍງານບັນຫາຕ່າງຕ່າງໆ ຜ່ານແຕ່ລະຊອງທາງ ໃນລະຫວ່າງການຈັດຕັ້ງປະຕິບັດຈົນສໍາເລັດໂຄງການ. ເຊິ່ງເຫັນໄດ້ວ່າຊຸມຊົນມີຄວາມເຂົ້າໃຈຕໍ່ກັບລະບຽບ ຫລັກການ, ຂັ້ນຕອນ ແລະ ຮູບແບບວິທີການຈັດຕັ້ງປະຕິບັດ ຢ່າງລະອຽດ ແລະ ພ້ອມທີ່ຈະເປັນເຈົ້າການໃນການສ້ອມແປງນໍ້າລິນໃຫ້ສໍາເລັດຕາມຄາດໝາຍທີ່ວາງໄວ້.
