ຜູ້ໃຫ້ທຶນຕິດຕາມກວດກາຄວາມຄືບໜ້າຂອງການຈັດຕັ້ງປະຕິບັດ ທລຍ 3 ຢູ່ຂັ້ນທ້ອງຖິ່ນ
ໂດຍ: ທລຍ
ໃນລະຫວ່າງວັນທີ 23-27 ຕຸລາ ຜ່ານມາ ຄະນະຜູ້ໃຫ້ທຶນຈາກ ທະນາຄານໂລກ(WB) ແລະ ອົງການຮ່ວມມືເພື່ອການພັດທະນາຂອງ ປະເທດສະວິດເຊີແລນ (SDC) ໄດ້ລົງຕິດຕາມກວດກາຄວາມຄືບໜ້າຂອງການຈັດຕັ້ງປະຕິບັດ ທລຍ 3 ຢູ່ແຂວງສະຫວັນນະເຂດ ເພື່ອຕິດຕາມກວດກາຄຸນນະພາບຂອງການຈັດຕັ້ງປະຕິບັດວຽກງານຂອງ ທລຍ ຕົວຈິງຂັ້ນທ້ອງຖິ່ນ. ໃນນັ້ນ ຜູ້ໃຫ້ທຶນໄດ້ເຂົ້າຮ່ວມກອງປະຊຸມປະເມີນ ແລະ ສະຫລຸບຄວາມຄືບໜ້າໂຄງການຍ່ອຍປະຈໍາງວດຂັ້ນບ້ານ ກ່ຽວກັບ ການກໍ່ສ້າງຫໍພັກນັກຮຽນ ແລະ ຫໍພັກຄູ ປີ 2017 ຂອງບ້ານ ຕໍາລວງ ເມືອງນອງ, ຢ້ຽມຢາມ ກຸ່ມບູລະນະສ້ອມແປງທາງຂັ້ນບ້ານ ບ້ານສະແລນ, ເມືອງເຊໂປນ, ຢ້ຽມຢາມໂຄງການຍ່ອຍທີ່ຊຸມຊົນຈັດຕັ້ງປະຕິບັດເອງ ແລະ ການປຸງແຕ່ງອາຫານເສີມ ສໍາລັບແມ່ມານ ແລະ ເດັກນ້ອຍຢູ່ສະໂມສອນໂພຊະນາການ ບ້ານປະເລາະ ເມືອງນອງ, ຢ້ຽມຢາມກິດຈະກໍາປັບປຸງຊີວິດການເປັນຢູ່ ເຊື່ອມສານໂພຊະນາການ ບ້ານລະຄືມ ເມືອງເຊໂປນ, ຢ້ຽມຢາມ ກິດຈະກໍາ ຊຸມຊົນເປັນເຈົ້າການວຽກສຸຂະອະນາໄມ (ຊຈສ) ແລະ ກິດຈະກໍາ ປັບປຸງຊີວິດການເປັນຢູ່ ເຊື່ອມສານໂພຊະນາການ ບ້ານອາລາງ ເມືອງເຊໂປນ ແລະ ໄດ້ເດີນທາງໄປຢ້ຽມຢາມການປົກປັກຮັກສາ ແລະ ຄຸ້ມຄອງນໍາໃຊ້ ໂຮງຮຽນຫລັງໃໝ່ຂອງ ບ້ານມັນຈີ ເຊິ່ງແຕ່ລະບ່ອນທີ່ ຜູ້ໃຫ້ໄດ້ໄປຢ້ຽມຢາມນັ້ນ ໄດ້ມີການເປີດກວ້າງ ສົນທະນາ ປຶກສາຫາລື ລະຫວ່າງຜູ້ໃຫ້ທຶນ ແລະ ຊຸມຊົນ ຢ່າງກົງໄປກົງມາ ໂດຍສະເພາະ ຜູ້ໃຫ້ທຶນໄດ້ມີຄວາມສົນໃຈຫລາຍກ່ຽວກັບ ໂຄງການຍ່ອຍທີ່ຊຸມຊົນຈັດຕັ້ງປະຕິບັດເອງ ຢູ່ບ້ານປະເລາະ ຊົນເຜົ່າຕຼີ ເພາະແມ່ນຈຸດປະສົງເປົ້າໝາຍຂອງໂຄງການ ທລຍ ຢ່າງແທ້ຈິງ. ໃນສົກປີ (2015-2016) ບ້ານປະເລາະ ໄດ້ຮັບທຶນສະໜັບສະໜູນຈາກກອງທຶນຫຼຸດຜ່ອນຄວາມທຸກຍາກ (ທລຍ) ໃນການກໍ່ສ້າງສູນບໍລິການຂໍ້ມູນຂ່າວສານ 1 ຫຼັງ ຂະໜາດ 5x11 ແມັດ ທີ່ມູນຄ່າທັງໝົດ 74,100,210ກີບ ກ່ອນຈະໄດ້ໂຄງການດັ່ງກ່າວນັ້ນ ໄດ້ຜ່ານຂະບວນການວາງແຜນນັບແຕ່ຂັ້ນບ້ານ, ກຸ່ມບ້ານ ແລະ ເມືອງ ເພື່ອຮັບຮອງເອົາບຸລິມະສິດຄວາມຕ້ອງການຂອງປະຊາຊົນ ຈາກນັ້ນ ໄດ້ມີການສໍາຫລວດອອກແບບຄວາມເປັນໄປໄດ້ໃນການກໍ່ສ້າງໂຄງການດັ່ງກ່າວ, ການຈັດຊື້ວັດສະດຸ ແລະ ອຸປະກອນຕ່າງໆ ເພື່ອມາກໍ່ສ້າງສູນບໍລິການຂໍ້ມູນຂ່າວສານ ແມ່ນຊຸມຊົນເປັນຜູ້ດໍາເນີນການເອງ ຈົນຮອດການກໍ່ສ້າງສໍາເລັດ ແລະ ຄຸ້ມຄອງນໍາໃຊ້. ເພື່ອໃຫ້ໂຄງການດັ່ງກ່າວມີຄວາມຍືນຍົງ ແລະ ນໍາໃຊ້ໄດ້ຍາວນານນັ້ນ ເຂົາເຈົ້າໄດ້ຄັດເລືອກຄະນະກຳມະການບົວລະບັດຮັກສາ ແລະ ຄຸ້ມຄອງນຳໃຊ້ ມີທັງໝົດ 11 ຄົນ , ຍິງ 2 ຄົນ ພ້ອມທັງສ້າງຕັ້ງກອງທຶນບູລະນະປະຈໍາບ້ານຂຶ້ນ ເພື່ອນໍາໃຊ້ສ້ອມແປງໃນເວລາມີການເປ່ເພ.
ສູນບໍລິການຂອງບ້ານນີ້ພາຍຫຼັງທີ່ກໍ່ສ້າງສຳເລັດແລ້ວກໍ່ໄດ້ນຳໃຊ້ສູນດັ່ງກ່າວນີ້ເປັນບ່ອນແຕ່ງອາຫານໃຫ້ແກ່ແມ່ມານ ແລະ ເດັກນ້ອຍໃນຕອນແລງ, ຕອນກາງເວັນແມ່ນນຳໃຊ້ເປັນບ່ອນຮຽນໜັງສືໃນສົກປີ 2016-2017,ປູກຜັກສວນຄົວ ເພື່ອນຳໃຊ້ໃນການປຸງແຕ່ງອາຫານ, ເປັນບ່ອນສາທິດກ່ຽວກັບການເຮັດອາຫານສັດໃຫ້ຊຸມຊົນ,ປະຊຸມວຽກງານຕ່າງໆພາຍໃນບ້ານ. ນອກນີ້ ຜູ້ໃຫ້ທຶນຍັງໄດ້ເຫັນຄວາມເຂັ້ມແຂງຂອງກຸ່ມຊ່ວຍເຫລືອເຊິ່ງກັນ ແລະ ກັນ (ກຊກ) ຢູ່ບ້ານປະເລາະ ເຊິ່ງປະກອບມີທັງໝົດ 8 ກຸ່ມ ມີສະມາຊີກທັງໝົດ 97ຄົນ/ຍິງ97 ຄົນ ໄດ້ຮັບການສະໜັບສະໜູນເງິນທຶນໝູນວຽນຈາກໂຄງການ ທລຍ ຈຳນວນ 78,4000,000 ກີບ ເງິນທຶນດັ່ງກ່າວ ໄດ້ປ່ອຍໃຫ້ສະມາຊິກ ກຊກ ກູ້ຢືມເພື່ອໄປສ້າງເສດຖະກິດຄອບຄົວຈໍານວນ 85 ຄອບຄົວ ເຊັ່ນ: ກິດຈະກຳລ້ຽງໄກ່ 4 ຄອບຄົວ, ລ້ຽງແບ້ 44 ຄອບຄົວ, ລ້ຽງໝູ 19 ຄອບຄົວ, ລ້ຽງປາ 1 ຄອບຄົວ, ປູກກ້ວຍ 2 ຄອບຄົວ ແລະ ຄ້າຂາຍ 15 ຄອບຄົວ ເຊິ່ງເຂົາເຈົ້າໄດ້ຈັດກອງປະຊຸມປຶກສາຫາລື ແລະ ແລກປ່ຽນບົດຮຽນເປັນປະຈໍາ ເພາະການ ປະຊຸມກັນແມ່ນໝາກຫົວໃຈສໍາຄັນຂອງ ກຸ່ມ ກຊກ ຖ້າບໍ່ມີການປະຊຸມກໍ່ປຽບເໝືອນຫົວໃຈຢຸດເຕັ້ນ ສະນັ້ນ ກຸ່ມ ກຊກ ຈຶ່ງໄດ້ຈັດກອງປະຊຸມດັ່ງກ່າວຢ່າງໜ້ອຍ 1 ຄັ້ງ/ເດືອນ.
ນອກຈາກ ໂຄງການກໍ່ສ້າງສູນບໍລິການຂໍ້ມູນຂ່າວສານ ບ້ານປະເລາະ ແລະ ກິດຈະກໍາປັບປຸງຊີວິດການເປັນຢູ່ ເຊື່ອມສານໂພຊະນາການ ຜູ້ໃຫ້ທຶນໄດ້ມີຄວາມສົນໃຈ ຕໍ່ກິດຈະກໍາກຸ່ມບູລະນະສ້ອມແປງທາງຂັ້ນບ້ານ ບ້ານສະແລນ ເມືອງເຊໂປນ ເຊິ່ງເປັນໂຄງການທົດລອງ ທລຍ 3 ເພື່ອສ້າງຄວາມເຂັ້ມແຂງ ແລະ ລາຍຮັບໃຫ້ແກ່ຜູ້ທີ່ທຸກຍາກ ແລະ ດ້ອຍໂອກາດ ເປັນຕົ້ນແມ່ນແມ່ຮ້າງ ນາງໝ້າຍ ເຂົາເຈົ້າຈະໄດ້ເງິນເດືອນຜູ້ລະ 2 ແສນກີບ ກຸ່ມບູລະນະສ້ອມແປງທາງຂັ້ນບ້ານ ປະກອບມີ 4 ຄົນ ຮັບຜິດຊອບໃນການບູລະນະສ້ອມແປງທາງເຂົ້າຫາບ້ານ 2,5 ກິໂລແມັດ. ໂຄງການທົດລອງດັ່ງກ່າວ ສໍາລັບເມືອງເຊໂປນ ໄດ້ເຮັດທົດລອງຢູ່ 7 ບ້ານ ຄື: ສະແລນ, ວັງເລີກ, ລະຄືມ, ສະແກງ, ເຄ່ວິນ, ວັງໄຮ ແລະ ຕ້າຍ ແລະ ເມືອງວຽງຄໍາ ແຂວງຫລວງພະບາງ ໄດ້ເຮັດທົດລອງຢູ່ 4 ບ້ານ ຄື: ຈອງໃຕ້, ຫ້ວຍຄູ່, ຫ້ວຍໂຄນ ແລະ ປ່າໄຜ່ ຖ້າຫາກໂຄງການດັ່ງກ່າວ ປະສົບຜົນສໍາເລັດ ຄາດວ່າຈະຂະຫຍາຍທົ່ວເຂດພື້ນທີ່ເປົ້າໝາຍຂອງ ທລຍ ໃນ 10 ແຂວງ.
ຜ່ານການລົງຕິດຕາມກວດກາຄວາມຄືບໜ້າຂອງການຈັດຕັ້ງປະຕິບັດ ທລຍ 3 ເປັນເວລາ 5 ວັນເຕັມນັ້ນ ທ່ານ ອີຣິກ ຄາເວວ ຈອນຊັນ (Mr. Erik Caldwell Johnson), ຜູ້ຮັບຜິດຊອບໂຄງການ ທລຍ ຈາກທະນາຄານໂລກ ໄດ້ມີທັດສະນະຕໍ່ການຈັດຕັ້ງປະຕິບັດ ທລຍ 3 ໃນໄລຜ່ານມາວ່າ: “ການຈັດຕັ້ງປະຕິບັດວຽກງານຂອງ ທລຍ ແມ່ນມີລະບົບລະບຽບຄັກແນ່, ຊຸມຊົນມີຄວາມເຂັ້ມແຂງ ກ້າຫານໃນການສະແດງຄໍາຄິດຄໍາເຫັນ ຮູ້ຈັກວາງແຜນພັດທະນາບ້ານຂອງຕົນເອງ ແລະ ຈັດຕັ້ງປະຕິບັດໂຄງການຍ່ອຍດ້ວຍຕົນເອງ ເຊິ່ງເຮັດໃຫ້ມູນຄ່າໃນການກໍ່ສ້າງຖືກກວ່າ ໂຄງການຍ່ອຍທີ່ຈ້າງຜູ້ຮັບເໝົາເປັນຜູ້ກໍ່ສ້າງໃຫ້ ພ້ອມທັງເຮັດໃຫ້ໂຄງການດັ່ງກ່າວມີຄວາມຍືນຍົງ” ທ່ານ ອີຣິກ ຄາເວວ ຈອນຊັນ ກ່າວຕື່ມວ່າ: “ໃນຕໍ່ໜ້າ ທຸກໆໂຄງການຍ່ອຍທີ່ບໍ່ໃຊ້ເຕັກນິກສູງແມ່ນຢາກໃຫ້ຊຸມຊົນເປັນຜູ້ຈັດຕັ້ງປະຕິບັດເອງ”.
