ຝຶກອົບຮົມກ່ຽວກັບ
ການນຳໃຊ້ລະບົບຖານຂໍ້ມູນຂອງ ໂຄງການກອງທຶນຫລຸດຜ່ອນຄວາມທຸກຍາກ
ໄລຍະ 3 (ປີ 2017-2020)
ໂດຍ: ປອ. ຫັດທະຈັນ ພິມພັນທະວົງ
ກອງທຶນຫລຸດຜ່ອນຄວາມທຸກຍາກ (ທລຍ) ແມ່ນອີກໜຶ່ງໃນຄວາມພະຍາຍາມຂອງລັດຖະບານ ຖືກສ້າງຕັ້ງຂື້ນເພື່ອປະກອບສ່ວນເຂົ້າໃນວຽກງານພັດທະນາເສດຖະກິດ-ສັງຄົມ ເປັນຕົ້ນແມ່ນການຫລຸດຜ່ອນຄວາມ ທຸກຍາກຂອງປະຊາຊົນບັນດາເຜົ່າ ໂດຍຜ່ານຂະບວນການວາງແຜນ ແລະ ຈັດຕັ້ງປະຕິບັດແບບມີສ່ວນຮ່ວມຂອງຊຸມຊົນ. ຫລາຍວ່າ 13 ປີ ( 2003-2016) ຂອງການຈັດຕັ້ງປະຕິບັດວຽກງານຕົວຈິງ ຖືວ່າ ທລຍ ໄດ້ປະກອບສ່ວນຢ່າງໃຫຍ່ຫລວງໃຫ້ແກ່ແຜນຍຸດທະສາດແຫ່ງການພັດທະນາ ແລະ ລຶບລ້າງຄວາມທຸກຍາກຂອງລັດຖະບານແຫ່ງ ສປປ ລາວ. ຍ້ອນໝາກຜົນດັ່ງກ່າວ ລັດຖະບານ ແລະ ຜູ້ໃຫ້ທຶນ ໄດ້ຕັດສິນໃຈໃຫ້ສືບຕໍ່ກິດຈະກໍາຂອງ ທລຍ ໄລຍະທີ 3 ແຕ່ປີ 2017 ຫາ ປີ 2020 ເປົ້າໝາຍຫລັກແມ່ນສືບຕໍ່ຈາກວຽກງານໄລຍະຜ່ານມາຂອງໂຄງການ ເປັນຕົ້ນວຽກງານພັດທະນາຊົນນະບົດ ແລະ ລືບລ້າງຄວາມທຸກຍາກ ໂດຍຜ່ານຂະບວນການວາງແຜນ ແລະ ຈັດຕັ້ງປະຕິບັດແບບມີສ່ວນຮ່ວມຂອງຊຸມຊົນ ເປັນຕົ້ນແມ່ຍິງ, ຜູ້ດ້ອຍໂອກາດ ແລະ ຊົນເຜົ່າຢູ່ເຂດຫ່າງໄກສອກຫລີກ.
ອົງປະກອບສຳຄັນທີ່ສະແດງຜົນໄດ້ຮັບຂອງວຽກງານ ທລຍ ແມ່ນມີການພັດທະນາລະບົບຕິດຕາມ-ປະເມີນຜົນ ເປັນຕົ້ນແມ່ນມີລະບົບຖານຂໍ້ມູນ ທີ່ບັນດາຜູ້ໃຫ້ທຶນສາມາດຍອມຮັບ ເປັນຕົ້ນລະບົບຖານຂໍ້ມູນ ທລຍ 2 ທີ່ສາມາດນໍາໃຊ້ທັງລະບົບທີ່ບໍ່ເຊື່ອມຕໍ່ (OFF LINE) ແລະ ເຊື່ອມຕໍ່ເຂົ້າອິນເຕີເນັດ (ON LINE) ທີ່ສາມາດສະໜອງຂໍ້ມູນ ສຳຄັນຕໍ່ຕົວຊີ້ວັດຜົນໄດ້ຮັບຂອງໂຄງການ ແລະ ຂໍ້ມູນສຳຄັນອື່ນໆ ທີ່ໃຊ້ໃນການບໍລິຫານ ແລະ ຂໍ້ມູນອື່ນໆຕາມການສະເໜີຂອງບັນດາຜູ້ໃຫ້ທຶນ.
ເພື່ອຍົກສູງຄຸນນະພາບ ແລະ ຄວາມຫລາກຫລາຍຂອງຂໍ້ມູນ ທີ່ທັນສະໃໝຕາມການປ່ຽນແປງຂອງການພັດທະນາດັ່ງກ່າວນັ້ນ ມັນຮຽກຮ້ອງໃຫ້ມີການພັດທະນາລະບົບຖານຂໍ້ມູນ ທີ່ສາມາດຕິດຕາມທຸກກິດຈະກໍາ ລວມທັງການນໍາໃຊ້ງົບປະມານຕ່າງໆ. ສະນັ້ນ, ລະບົບຖານຂໍ້ມູນຂອງ ທລຍ 3 ໄດ້ຖືກສ້າງຂື້ນ ແລະ ກຽມພ້ອມສຳລັບການຈັດຕັ້ງປະຕິບັດຂອງ ທລຍ 3. ສະນັ້ນ ການຝືກອົບຮົມໃນຄັ້ງນີ້ແມ່ນມີຈຸດປະສົງເພື່ອເຮັດໃຫ້ພະນັກງານ ທລຍ ທັງໝົດ ໂດຍສະເພາະຜູ້ຮັບຜິດຊອບວຽກງານຕິດຕາມ-ປະເມີນຜົນ ມີຄວາມເຂົ້າໃຈກ່ຽວກັບການຕິດຕັ້ງ ແລະ ການນໍາໃຊ້ລະບົບດັ່ງກ່າວ ທີ່ເປັນເອກະພາບກັນ ຫລັງຈາກນັ້ນ ເຂົາເຈົ້າຈະສາມາດ ນຳເອົາຄວາມຮູ້ຈາກການຝຶກອົບຮົມໃນຄັ້ງນີ້ ໄປຜັນຂະຫຍາຍຕໍ່ ໃຫ້ພະນັກງານແຂວງ ແລະ ເມືອງທີ່ເຂົາເຈົ້າສັງກັດຢູ່.
ວິທະຍາກອນ ສຳລັບການຝຶກອົບຮົມໃນຄັ້ງນີ້ແມ່ນນຳໂດຍຜູ້ພັດທະນາລະບົບຖານຂໍ້ມູນ ທລຍ 3 ທີ່ມາຈາກບໍລິສັດ ຊູໂມ ຄື ທ່ານ ສາຄອນ ແກ້ວວົງຊາຍ ແລະ ທ່ານ ເລີດໄຊພອນ ສຸທໍາມະວົງ ໂດຍມີຜູ້ເຂົ້າຮ່ວມທັງໝົດຈຳນວນ 28 ຄົນ ເປັນຍິງ 5 ຄົນ ທີ່ມາຈາກ ທລຍ ສູນກາງ, ແຂວງ ແລະ ເມືອງ.
