ທລຍ ເມືອງໜອງແຮດ ມອບເງິນຕົ້ນທຶນໃຫ້ ກຊກ ບ້ານພັກຫຼັກ
ໂດຍ: ສຸຫາ ຊົງປໍ, ພະນັກງານປັບປຸງຊີວິດການເປັນຢູ່ຂັ້ນບ້ານ, ທລຍ ເມືອງໜອງແຮດ
ໃນຕອນເຊົ້າຂອງວັນທີ 1 ສິງຫາ 2023 ຜ່ານມາ ທີມງານ ໂຄງການ ທລຍ ເມືອງໜອງແຮດ ແລະ ທລຍ ຂັ້ນບ້ານ ໄດ້ຈັດພິທີມອບ-ຮັບເງີນຕົ້ນທຶນມູນຄ່າ 184.380.000 ກີບ ໃຫ້ ບ້ານພັກຫຼັກ, ກຸ່ມບ້ານເທດສະບານ, ເມືອງໜອງແຮດ, ແຂວງຊຽງຂວາງ ພາຍໃຕ້ການເປັນປະທານຂອງທ່ານ ເຍ່ຍຈົງວຶ່, ເລຂາພັກບ້ານ, ນາຍບ້ານ ບ້ານພັກຫຼັກ, ພ້ອມດ້ວຍຄະນະ ແລະ ການເຂົ້າຮ່ວມຂອງບັນດາຄະນະບໍລິຫານກຸ່ມຊ່ວຍເຫຼືອກັນ (ຄບກ) ແລະ ສະມາຊິກ ກຸ່ມຊ່ວຍເຫຼືອກັນ (ກຊກ) ເຂົ້າຮ່ວມທັງໝົດ 65 ຄົນ, ຍິງ 50 ຄົນ.
ເປັນກຽດມອບເງີນຕົ້ນທຶນຄັ້ງນີ້ ໂດຍທ່ານ ເກົາວຶ່ ໝອກພູຂຽວ, ຫົວໜ້າທິມງານ ທລຍ ເມືອງໜອງແຮດ. ບ້ານພັກຫຼັກ ປະກອບມີກຸ່ມ ກຊກ 5 ກຸ່ມ, ມີສະມະຊິກ ກຊກ ທັງໝົດ 70 ຄົນ, ຍິງ 66 ຄົນ. ທ່ານ ເກົາວຶ່ ໝອກພູຂຽວ ໄດ້ກ່າວວ່າ: “ຂໍໃຫ້ສະມະຊິກ ກຊກ ແລະ ຄະນະ ຄບກ ນໍາໃຊ້ເງິນຕົ້ນທຶນທີ່ໂຄງການ ທລຍ ໄດ້ນຳມາມອບໃຫ້ໃນຄັ້ງນີ້ ໃຫ້ເກີດດອກອອກຜົນ ໂດຍສະເພາະແມ່ນນໍາໃຊ້ໃນການສົ່ງເສີມການປູກ, ການລ້ຽງ ໃຫ້ໄດ້ຮັບໝາກຜົນສູງສຸດ”.
ໃນຕອນທ້າຍ ທ່ານ ເຍ່ຍຈົງວຶ່, ເລຂາພັກບ້ານ, ນາຍບ້ານ ບ້ານພັກຫຼັກ ໄດ້ມີຄຳເຫັນວ່າ: “ໃນນາມການຈັດຕັ້ງບ້ານ ພ້ອມດ້ວຍ ສະມະຊິກ ກຊກ ທຸກຄົນ ຈະປະຕິບັດຕາມຄໍາແນະນໍາ ຂອງໂຄງການ ທລຍ ໂດຍຈະນຳໃຊ້ຕົ້ນທຶນດັ່ງກ່າວ ເປັນຈຸດລິເລີ່ມໃນການພັດທະນາຄອບຄົວໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ”.
