ທລຍ ເສີມສ້າງຄວາມເຂັ້ມແຂງໃຫ້ແກ່ພະນັກງານທົ່ວປະເທດປະຈໍາປີ 2013 [1]
ທລຍ ເສີມສ້າງຄວາມເຂັ້ມແຂງໃຫ້ແກ່ພະນັກງານທົ່ວປະເທດປະຈໍາປີ 2013
ໂດຍ: ແສງອາລຸນ ພິລາຈັນ
ເພື່ອເປັນການທົບທວນຄືນ ແລະ ເສີມສ້າງຄວາມເຂັ້ມແຂງໃຫ້ແກ່ພະນັກງານ ກອງທຶນຫລຸດຜ່ອນຄວາມທຸກຍາກ (ທລຍ) ໃຫ້ມີການປັບປຸງຈຸດອ່ອນທີ່ຍັງຄ້າງຄາ ໃນແບບແຜນວິທີການເຮັດວຽກ ແລະ ທັງເປັນການຊອກຫາວິທີແກ້ໄຂບັນຫາຫຍຸ້ງຍາກຕ່າງໆທີ່ໄດ້ພົບພໍ້ ໃຫ້ບັນລຸຕາມຈຸດປະສົງເປົ້າໝາຍຂອງ ທລຍ ນັ້ນ.
ໃນລະຫວ່າງວັນທີ 27-30 ສິງຫາ 2013 ຜ່ານມາ ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ຈັດກອງປະຊຸມທົບທວນຄືນ ແລະ ສ້າງຄວາມເຂັ້ມແຂງປະຈໍາປີ 2013 ໃຫ້ແກ່ພະນັກງານ ທລຍ ຢູ່ໂຮງແຮມຈໍາປາສັກແກຼນ, ແຂວງຈໍາປາສັກ ໂດຍການເປັນປະ ທານຂອງທ່ານ ບຸນເຮືອງ ດວງພະຈັນ, ລັດ ຖະມົນຕີປະຈໍາຫ້ອງວ່າ ການລັດ ຖະບານ, ຫົວໜ້າຄະນະພັດທະນາຊົນ ນະບົດ ແລະ ລຶບລ້າງຄວາມທຸກຍາກຂັ້ນສູນກາງ ທັງເປັນປະທານສະພາບໍລິຫານ ທລຍ ແລະ ການເຂົ້າຮ່ວມຂອງພະນັກງານທັງໝົດທີ່ມາຈາກສູນກາງ ແລະ 42 ເມືອງຂອງ 10 ແຂວງເປົ້າໝາຍ(ຜົ້ງສາລີ, ຫລວງນໍ້າທາ, ຫົວພັນ, ອຸດົມໄຊ, ຊຽງຂວາງ, ຫລວງພະບາງ, ສະຫວັນນະເຂດ, ສາລະວັນ, ເຊກອງ ແລະ ອັດຕະປື) ຈໍານວນທັງໝົດ 254 ຄົນ, ຍິງ 64 ຄົນ.
ທີ່ກອງປະຊຸມໄດ້ມີການແບ່ງກຸ່ມຄົ້ນຄົ້ວອອກເປັນ 5 ກຸ່ມ: ບໍລິຫານ-ການເງິນ, ວິສະວະກໍາ, ຕິດຕາມ-ປະເມີນຜົນ, ພັດທະນາຊຸມຊົນ ແລະ ໂຄງການປັບປຸງຊີວິດການເປັນຢູ່ ເພື່ອຄໍ້າປະກັນດ້ານສະບຽງອາຫານ ແລະ ໂພຊະນາການ ເຊິ່ງແຕ່ລະກຸ່ມຄົ້ນຄົ້ວເຫັນໄດ້ດ້ານຕັ້ງໜ້າ, ຂໍ້ໂຄງຄ້າງ ພ້ອມທັງລົງເລີກ ສຶກສາຊອກຫາສາເຫດ ແລະ ວິທີແກ້ໄຂຂອງແຕ່ລະໜ້າວຽກ ແລະ ສະຫລຸບລາຍງານສູ່ທີ່ປະຊຸມຢ່າງກົງໄປກົງມາ ເຊິ່ງໃນນັ້ນ ພະແນກ ບໍລິຫານ-ການເງິນ ສິ່ງທ້າທາຍ ແລະ ປັບປຸງໃນຕໍ່ໜ້າຄື: ຜູ້ຮັບຜິດຊອບການເງິນຂັ້ນກຸ່ມບ້ານ ຍັງບໍ່ທັນເຂົ້າໃຈວຽກບໍລິຫານ-ການເງິນ ຢ່າງເປັນລະບົບເທື່ອ, ການອະນຸມັດເບີກຈ່າຍເງິນໂຄງການຍ່ອຍແມ່ນຊັກຊ້າ, ການປະສານສົມທົບກັບອໍານາດການປົກຄອງເມືອງ, ແຂວງ ຫລື ບາງທ້ອງຖິ່ນບໍ່ທັນໄດ້ດີ. ສິ່ງທ້າທາຍ ແລະ ປັບປຸງໃນຕໍ່ໜ້າຂອງ ພະແນກພັດທະນາຊຸມຊົນມີຄື: ການພົວພັນກັບອໍານາດການປົກຄອງຍັງບໍ່ທັນຕໍ່ເນື່ອງ ແລະ ແທດເຖິງ, ການປະສານງານກັບບາງກຸ່ມບ້ານ ຫລື ບາງບ້ານໃນເຂດຫ່າງໄກສອກຫລີກຍັງບໍ່ຕໍ່ເນື່ອງ, ຄວາມສາມາດຂອງຊາວບ້ານໃນບາງບ້ານໃນການ ບໍລິຫານ-ການເງິນ, ຈັດຊື້-ຈັດຈ້າງ ຍັງບໍ່ທັນສູງ. ສໍາລັບ ພະແນກວິສະວະກໍາ ສິ່ງທ້າທາຍ ແລະ ຄວນປັບປຸງໃນຕໍ່ໜ້າມີຄື: ການກໍ່ສ້າງໂຄງການຍ່ອຍບໍ່ຖືກຕາມລະດູການ, ການຕິດຕາມສິ່ງກໍ່ສ້າງ ແລະ ຄຸນນະພາບການກໍ່ສ້າງກໍບໍ່ຕໍ່ເນື່ອງ ແລະ ເປັນລະບົບ, ຂາດການຕິດຕາມ ພາຍຫລັງສິ່ງກໍ່ສ້າງໄດ້ສໍາເລັດ ແລະ ມອບໝາຍໃຫ້ກຸ່ມບ້ານຮັບຜິດຊອບ ສ່ວນພະແນກຕິດຕາມ-ປະເມີນຜົນ ມີສິ່ງທ້າທາຍ ແລະ ປັບປຸງແກ້ໄຂໃນຕໍ່ໜ້າມີຄື: ພະນັກງານສ່ວນຫລາຍຍັງກໍາບໍ່ທັນແໜ້ນ ຕົວຊີ້ວັດເພື່ອຕິດຕາມຄວາມຄຶບໜ້າຂອງໂຄງການ, ການກໍານົດແບບຟອມເກັນກໍາຂໍ້ມູນພື້ນຖານຂອງໂຄງການກໍບໍ່ທັນເປັນເອກະພາບ. ສິ່ງທ້າທາຍ ແລະ ປັບປຸງແກ້ໄຂໃນຕໍ່ໜ້າຂອງໂຄງການປັບປຸງຊີວິດການເປັນຢູ່ ເພື່ອຄໍ້າປະກັນດ້ານສະບຽງອາຫານ ແລະ ໂພຊະນາການ ມີຄື: ບັນຫາຮີບດ່ວນແມ່ນການຂຽນ ແລະ ສ້າງປື້ມຄູ່ມືຈັດຕັ້ງປະຕິບັດໂຄງການຍັງຊັກຊ້າ, ລະບົບການສ້າງແຜນປີກໍບໍ່ທັນສໍາເລັດໃນໄລຍະຜ່ານມາ, ກົນໄກການບໍລິຫານໂຄງການກໍຍັງບໍ່ທັນເຂັ້ມແຂງ
ທ່ານ ບຸນກວ້າງ ສຸວັນ ນະພັນ, ຜູ້ອໍານວຍການບໍລິຫານ ທລຍ ໄດ້ຂຶ້ນກ່າວສະຫລຸບ ແລະ ຕີລາຄາການຈັດຕັ້ງປະຕິບັດວຽກງານຂອງແຕ່ລະແຂວງ ແລະ ແຕ່ລະພະແນກ ໄດ້ລາຍງານໃນ 1 ປີຜ່ານມາ ວ່າມີບັນຫາ ຂໍ້ຫຍຸ້ງຍາກ ແລະ ຄວນແກ້ໄຂແນວໃດ ເພື່ອເຮັດໃຫ້ການຈັດຕັ້ງປະຕິບັດວຽກງານຂອງ ທລຍ ໃນສົກປີ 2013-2014 ໄດ້ເດີນແມ່ນແລ່ນສະດວກກວ່າເກົ່າ, ຫັນເອົາສິ່ງທ້າທາຍ, ຈຸດອ່ອນ ຂໍ້ຄົງຄ້າງໃຫ້ກາຍເປັນມາດຕະການ ແລະ ວິທີແກ້ໄຂທີ່ແທດເໝາະ ກັບແຕ່ລະສະພາບການ ເພື່ອເຮັດໃຫ້ປະກົດການຫຍໍ້ທໍ້ໃຫ້ໄດ້ແກ້ໄຂເທື່ອລະກ້າວ ແນໃສ່ເຮັດໃຫ້ການຈັດຕັ້ງປະຕິບັດໃນຮູບແບບການພັດທະນາທີ່ຂັບເຄື່ອນໂດຍຊຸມຊົນເອງໃຫ້ປະກົດຜົນເປັນຈິງ.
ຜ່ານການລາຍງານ ແລະ ການຄົ້ນຄວ້າ ປຶກສາຫາລື ທີ່ປະຊຸມໄດ້ມີຄຳເຫັນ ແລະຕົກລົງເປັນເອກກະພາບໃສ່ໃນແຕ່ລະວຽກງານ, ເພື່ອປັບປຸງແກ້ໄຂບັນຫາຕ່າງໆທີ່ພົບເຫັນໃນການຈັດຕັ້ງປະຕິບັດວຽກງານ ທລຍ ໃນໄລຍະຜ່ານມາ ແລະ ສ້າງຄວາມເຂັ້ມແຂງໃຫ້ແກ່ພະນັກງານ ທລຍ ເພື່ອນຳໄປຈັດຕັ້ງປະຕິບັດໜ້າທີ່ວຽກງານຂອງຕົນໃນຕໍ່ໜ້າ ໃຫ້ເກີດຜົນປະໂຫຍດສູງສຸດ ໃນການແກ້ໄຂຄວາມມທຸກຍາກຂອງປະຊາຊົນບັນດາເຜົ່າໃນທົ່ວປະເທດ.
