Lao
Englishນັກພັດທະນາກອນທ້ອງຖີ່ນ ຄືຂອດຕັດສິນ
ການພັດທະນາຊຸມຊົນ
ໂດຍ: ແສງເພັດ ວັນນະວົງ
ເມືອງຈອມເພັດ ແມ່ນນື່ງໃນ 5 ເມືອງ ທີ່ກອງທຶນຫລຸດຜ່ອນຄວາມທຸກຍາກ (ທລຍ) ກໍາລັງທົດລອງຈັດຕັ້ງປະຕິບັດ ການນຳໃຊ້ວິທີການພັດທະນາ ທີ່ຂັບເຄື່ອນໂດຍຊຸມຊົນເອງ ແບບເຕັມຮູບແບບ. ຖ້າຫາກໂຄງການດັ່ງກ່າວນີ້ ມີຜົນສຳເລັດ ກໍຈະກາຍເປັນເຄື່ອງມື ທີ່ນຳໃຊ້ເຂົ້າໃນວຽກງານ ທລຍ ໃນຕ່ໍໜ້າ ກໍຄືການແກ້ໄຂຄວາມທຸກຍາກ ຢູ່ເຂດຊົນນະບົດຫ່າງໄກສອກຫລີກ ຂອງ ສ ປ ປ ລາວ.
ຄຳວ່າ: ການພັດທະນາທີ່ຂັບເຄື່ອນດ້ວຍຊຸມຊົນເອງ ມີຄວາມໝາຍອັນດຽວກັນກັບ ຄຳເວົ້າຂອງພັກທີ່ວ່າ: ”ມາຈາກປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ“ ແລະ ມັນແມ່ນການມອບຄວາມຮັບຜິດຊອບໃຫ້ແກ່ຊຸມຊົນເປັນຜູ້ຈັດຕັ້ງປະຕິບັດເອງທັງໝົດ ນັບທັງການຄັດເລືອກໂຄງການ, ການດຳເນີນການຈັດຊື້-ຈັດຈ້າງໂຄງການ, ການຄຸ້ມຄອງບໍລິຫານງົບປະມານ ທີ່ນຳເຂົ້າມາພັດທະນາຢູ່ຊຸມຊົນຂອງເຂົາເຈົ້າ ແລະ ຮັບ ຜິດຊອບໃນການຕິດຕາມກວດກາຄຸນນະພາບໂຄງການ...ທັງໝົດເຫລົ່ານັ້ນຕ້ອງແມ່ນບົນພື້ນ ຖານການສ້າງຄວາມເຂັ້ມແຂງໃຫ້ແກ່ເຂົາເຈົ້າ. ເຖິງແນວໃດກໍຕາມ ຖ້າຢາກໄດ້ຄືແນວນັ້ນ ຕ້ອງຮັບປະກັນວ່າມີນັກພັດທະ ນາກອນຂັ້ນທ້ອງຖີ່ນ ທີ່ມີຄວາມເຂັ້ມແຂງ ມີຄຸນນະພາບ ເພາະເຂົາເຈົ້າເປັນຜູ້ຢູ່ກັບປະຊາຊົນ ໃນແຕ່ລະມື້ ແລະ ເຂົາເຈົ້າເຫລົ່ານີ້ຈະເປັນຜູ້ແນະນຳພ່ໍແມ່ປະຊາຊົນ ຢູ່ແຕ່ລະບ້ານ ໃນການພັດທະນາບ້ານຂອງເຂົາເຈົ້າ, ຊຶ່ງຕ່າງກັບພະນັກງານໂຄງການ ຫຼື ພະນັກງານຂັ້ນເມືອງ ຂັ້ນແຂວງ ທີ່ດົນໆຈຶ່ງລົງໄປເທື່ອນື່ງ... ຊຶ່ງເຮັດໃຫ້ການພັດທະນາຊັກຊ້າ ທັງບໍ່ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງຊຸມຊົນ. ດ້ວຍເຫດຜົນດັ່ງກ່າວ ໜ້າວຽກຕົ້ນຕໍຂອງ ທລຍ ພາຍໃຕ້ໂຄງການທົດລອງນຳໃຊ້ວິທີການພັດທະນາທີ່ຂັບເຄື່ອນ ໂດຍຊຸມຊົນເອງ ແບບເຕັມຮູບແບບ ດັ່ງທີ່ໄດ້ກ່າວມາຂ້າງເທິງນັ້ນ ຈຶ່ງຖືເອົາການສ້າງນັກພັດທະນາກອນຂັ້ນທ້ອງຖີ່ນ ໄປກ່ອນວຽກງານອື່ນບາດກ້າວນື່ງ ໂດຍຢູ່ແຕ່ລະກຸ່ມບ້ານຂອງ 5 ເມືອງດັ່ງກ່າວ ຈະມີນັກພັດທະນາກອນ 3 ຄົນ, ໃນນັ້ນເປັນຍິງ 2 ຄົນ. ຖ້ານັບລວມທັງ 10 ແຂວງ ທີ່ ທລຍ ກຳລັງເຮັດວຽກຢູ່ແລ້ວ ປະຈຸບັນນີ້ ທລຍ ກຳລັງສ້າງນັກພັດທະນາກອນທ້ອງຖີ່ນ ທີ່ມີລັກສະນະດັ່ງກ່າວນີ້ ປະມານ 600 ຄົນ, ໃນນັ້ນເປັນຜູ້ຍິງເກືອບເຄິ່ງນື່ງ. ຢ່າງໜ້ອຍເຂົາເຈົ້າມີຄວາມສາມາດໃນການໂຄສະນາຂົນຂວາຍ ແລະ ຮູ້ນຳພາ ພ່ໍແມ່ປະຊາຊົນເຮັດການພັດທະ ນາຕົວຈິງ. ດັ່ງໃນຮູບຂ້າງລຸ່ມນີ້ ແມ່ນ ສະຫາຍ ລືຊາຊົງ ນັກພັດທະນາກອນໜຸ່ມນ້ອຍ ຂອງກຸ່ມບ້ານ ນໍ້າລືມ, ເມືອງຈອມເພັດ ແຂວງຫລວງພະບາງ. ພາຍຫລັງທີ່ໄດ້ຮັບການຝຶກອົບຮົມແລ້ວ ຜູ້ກ່ຽວກຳລັງຈະລົງໄປແນະນຳ ແລະ ນຳພາພ່ໍ ແມ່ປະຊາຊົນ ບ້ານນາແລໃນ ການຈັດຕັ້ງປະຕິບັດໂຄງການຍ່ອຍ ທີ່ຊ່ວຍເຫລືອໂດຍ ທລຍ.
