Lao
Englishກອງປະຊຸມ
ກະກຽມການປະເມີນຜົນໄລຍະກາງສະໄໝ ຂອງ ທລຍ 2
Kick-off Meeting for PRF2 MIDTERM REVIEW
ໂດຍ: ແສງເພັດ ວັນນະວົງ
ຕອນແລງ ຂອງວັນທີ່ 27 ມັງກອນ 2014 ຢູ່ທີ່ຫ້ອງປະຊຸມຂອງກອງທຶນຫລຸດຜ່ອນຄວາມທຸກຍາກ ໄດ້ຈັດກອງປະຊຸມກະກຽມ ສຳລັບການປະເມີນຜົນໄລຍະກາງສະໄໝ ວຽກງານກອງທຶນຫລຸດຜ່ອນຄວາມທຸກຍາກ ໄລຍະທີ່ສອງ (ທລຍ 2) ໂດຍມີຜູ້ເຂົ້າຮ່ວມທັງໝົດ 35 ຄົນ ໃນນັ້ນລວມມີຜູ້ຕາງໜ້າຜູ້ໃຫ້ທຶນແກ່ ທລຍ ທຸກພາກສ່ວນເຊັ່ນ: ທະນາຄານໂລກ, ອົງການ ແອັດ ດີ ຊີ (SDC) ແລະ ອົງການ ອົດສະເອດ (AusAID), ຄະນະບໍລິຫານໂຄງການ ທລຍ ຂັ້ນສູນກາງ ໂດຍການເປັນປະທານຂອງ ທ່ານ ຈິດ ທະວີໃສ ຫົວໜ້າຫ້ອງ ການແຜນການ ແລະ ພົວພັນການຕ່າງປະເທດ, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ (ຄພທສ).
ທລຍ 2 ແມ່ນໂຄງການນື່ງ ທີ່ຂຶ້ນກັບ ຄພທສ, ຫ້ອງວ່າການລັດຖະບານ ໂດຍມີກຳນົດເວລາໃນການດຳເນີນໂຄງການ 5 ປີ (2011-2016). ມາຮອດປະຈຸບັນ ຖືວ່າໂຄງການ ທລຍ 2 ໄດ້ເດີນທາງມາເປັນເວລາເຄີ່ງທາງພໍດີ ສະນັ້ນກ່ອນທີ່ຈະກ້າວສູ່ເຄີ່ງໄລຍະທ້າຍຂອງໂຄງການ ຜູ້ໃຫ້ທຶນຈຶ່ງໄດ້ດຳເນີນການປະເມີນຜົນໄລຍະກາງສະໄໝເທື່ອນີ້ ໂດຍຈະເລີ່ມຂຶ້ນໃນລະຫວ່າງວັນທີ່ 27/1-14/2/ 2014 ຈຸດປະສົງເພື່ອປະເມີນຜົນເບີ່ງຜົນໄດ້ຮັບ ລວມທັງຜົນກະທົບຂອງໂຄງການ ຕ່ໍການພັດທະນາຊົນນະບົດ ແລະ ລຶບລ້າງຄວາມທຸກຍາກຢູ່ ສ ປ ປ ລາວ ເວົ້າລວມ, ເວົ້າສະເພາະຢູ່ໃນຂົງເຂດພື້ນທີ່ເປົ້າໝາຍຂອງໂຄງການ. ຕະຫລອດໄລຍະການມາປະເມີນຜົນຄັ້ງນີ້ ຜູ້ໃຫ້ທຶນຈະໄດ້ມີການປຶກສາຫລາລື ແລະ ແລກປ່ຽນນຳ ພາກສ່ວນກ່ຽວຂ້ອງຕ່າງໆ ທັງຢູ່ຂັ້ນສູນກາງ ແລະ ຂັ້ນທ້ອງຖີ່ນ ນອກຈາກນັ້ນຍັງຈະໄດ້ຕິດຕາມກວດກາ ແລະ ສຳພາດພ່ໍແມ່ປະຊາຊົນຜູ້ໄດ້ຮັບຜົນປະໂຫຍດ ແລະ ອຳນາດການປົກຄອງຂັ້ນທ້ອງຖີ່ນ ໂດຍຈະໄດ້ອອກເປັນ 3 ຄະນະຄື: ຄະນະທີ່ນື່ງ ຈະຂຶ້ນເມືອແຂວງຫລວງນ້ຳທາ ແລະ ແຂວງອຸດົມໄຊ, ຄະນະທີ່ສອງຈະຂຶ້ນເມືອແຂວງຫົວພັນ ແລະ ຄະນະທີ່ສາມຈະລົງໄປທາງແຂວງສະຫວັນນະເຂດ ແລະ ແຂວງສາລະວັນ.
ພອ້ມດຽວກັນ ການປະເມີນຜົນຄັ້ງນີ້ ຍັງຈະໄດ້ຊອກຫາທິດທາງໃນການປັບປຸງຂໍ້ຂາດຕົກບົກພ່ອງ ແລະ ຂໍ້ຈຳກັດຕ່າງ ເພື່ອເຮັດໃຫ້ໂຄງການ ທລຍ 2 ໃນໄລຍະທີ່ເຫລືອປະມານ 2 ປີເຄີ່ງ ໃຫ້ມີຜົນສຳເລັດສູງສຸດ ແລະ ນຳເອົາຜົນປະໂຫຍດ ມາສູ່ພ່ໍແມ່ປະຊາຊົນຜູ້ທຸກຍາກ ທີ່ດຳລົງຊີວິດຢູ່ໃນເຂດຊົນນະບົດຫ່າງໄກສອກຫລີກ ຈຳນວນ 1,967 ບ້ານ ທີ່ນອນໃນ 278 ກຸ່ມບ້ານ ຂອງ 42 ເມືອງ ໃນ 10 ແຂວງ ໂດຍສະເພາະໃຫ້ສາມາດເຂົ້າເຖິງໂຄງລ່າງພື້ນຖານອັນຈຳເປັນ ແລະ ມີຄວາມເຂັ້ມແຂງ ສາມາດເປັນເຈົ້າການ ໃນການພັດທະນາຊຸມຊົນເຂົາເຈົ້າຂອງເຂົາ ໂດຍໂຕເຂົາເຈົ້າເອງ.
