Lao
Englishການຫຼຸດຜ່ອນຄວາມທຸກຍາກ ການເຂົ້າເຖິງການບໍລິການທາງດ້ານພື້ນຖານໂຄງລ່າງທີ່ຈໍາເປັນແລ້ວ ຊຸມຊົນຕ້ອງມີລາຍຮັບເພີ້ມຂື້ນ ແບບຍືນຍົງ
ໂດຍ: ສິນນະຄອນ ອິນທິລາດ
ທ່ານ ຈິດ ທະວິໃສ, ຜູ້ອໍານວຍການກອງທືນຫຼຸດຜ່ອນຄວາມທຸກຍາກ (ທລຍ) ໄດ້ກ່າວ ເນື່ອງໃນໂອກາດ ທີ່ທ່ານໄດ້ມາຢ້ຽມຢາມ ພະນັກງານ ທລຍ ແຂວງສະຫວັນນະເຂດ ໃນເດືອນພຶດສະພາ 2018 ຜ່ານມາ. ການຈັດຕັ້ງປະຕິບັດວຽກງານຂອງ ທລຍ ແມ່ນໄດ້ ມີອາຍຸເວລາຍາວນານພໍສົມຄວນແລະ ຜ່ານການຈັດຕັ້ງປະຕິບັດວຍກງານ ທລຍ ກໍໄດ້ປະສົບຜົນສໍາເລັດຫລາຍໃນການ ກໍ່ສ້າງພື້ນຖານໂຄງລ່າງເພື່ອໃຫ້ ຊຸມຊົນໄດ້ເຂົ້າເຖິງການນໍາໃຊ້ການບໍລິການ ຢ່າງສະດວກສະບາຍໃນຫຼາຍດ້ານທີ່ຈໍາເປັນ ແລະ ໄດ້ສ້າງຄວາມເຂັ້ມແຂງໃຫ້ແກ່ຊຸມຊົນ ເຮັດໃຫ້ເຂົາເຈົ້າໄດ້ ເຂົ້າຮ່ວມໃນທຸກຂະບວນການ ຂອງການຈັດຕັ້ງປະຕິບັດ ເປັນຕົ້ນ ການມີສ່ວນຮ່ວມໃນການວາງແຜນ ກໍຄືການ ຄັດເລືອກເອົາບັນດາໂຄງການຍ່ອຍເພື່ອພັດທະນາ ໃນທ້ອງຖີ່ນດ້ວຍພວກເຂົາເຈົ້າເອງ , ມີສ່ວນຮ່ວມໃນການສໍາຫຼວດອອກແບບໂຄງການ, ມີສ່ວນຮ່ວມໃນການຈັດຊື້-ຈັດຈ້າງ, ການບໍລິຫານງົບປະມານຂອງກຸ່ມບ້ານ ແລະ ມີຄວາມເຂັ້ມແຂງໃນການປົກປັກຮັກສາຄຸ້ມຄອງນໍາໃຊ້.
ຄຽງຄູ່ກັບການກໍ່ສ້າງພື້ນຖານໂຄງລ່າງທລຍ ກໍໄດ້ມີການທົດລອງໃນການສົ່ງເສີມ ກິດຈະກໍາສ້າງລາຍຮັບໃນ 2 ແຂວງ ໂດຍສະເພາະຢູ່ແຂວງສະຫວັນນະເຂດ ມີ 3 ເມືອງໃນ 5 ເມືອງເປົ້າໝາຍ ເຊິ່ງການຈັດຕັ້ງທັງໝົດແຕ່ປີ 2012-2018 ມີ20 ກຸ່ມບ້ານ, 73 ບ້ານ, 442 ກຸ່ມ ກຊກ, ສະມາຊິກ 4,957 ຄົນ ແລະ ນໍາໃຊ້ທຶນໝູນວຽນ ຈໍານວນ 5,2 ຕື້ກວ່າ ກີບ ມີສາມະຊີກກູ້ຢືມເງີນໄປເຮັດກິດຈະກໍາແລ້ວຈໍານວນ 4,350 ຄົນ ເທົ່າກັບ 87% ຍັງອີກ 607 ຄົນ
ທີ່ຍັງບໍ່ທັນພ້ອມໃນການກູ້ຢືມ ແລະຜ່ານການນໍາໃຊ້ທຶນໝູນວຽນ ມາຮອດປະຈຸບັນ ມີທຶນເພີ້ມຂື້ນ 675 ລ້ານກວ່າກີບ ເຮັດໃຫ້ຈໍານວນທຶນໝູນວຽນເພີ່ມຂຶ້ນເປັນ 5,8 ຕື້ກວ່າກີບ , ຈໍານວນສາມະຊີກສາມາດສົ່ງທຶນ ໄດ້ບາງສ່ວນ 1,797 ຄົນ ເທົ່າກັບ 41% , ສາມາດສົ່ງທຶນໄດ້ທັງໝົດ 485 ຄົນ ເທົ່າກັບ 11% , ບໍ່ທັນຮອດກໍານົດສົ່ງທຶນ 1,501 ຄົນ ເທົ່າກັບ 35% , ຈໍານວນສາມະຊິກ ທີ່ຍັງບໍ່ທັນສົ່ງຍ້ອນວ່າບໍ່ທັນໄດ້ຂາຍຜົນຜະລິດ ຈໍານວນ 530 ຄົນ ເທົ່າກັບ 12% ແລະ ຍັງມີຜູ້ທີ່ຖືກໄພພິບັດອີກຈໍານວນໜຶ່ງປະມານ 37ຄົນ ເທົ່າກັບ 1% ສະນັ້ນທິດທາງໃນການພັດທະນາ ກິດຈະກໍາສ້າງລາຍຮັບ ຂອງແຕ່ລະຄອບຄົວສາມະຊີກຈິ່ງສອດຄ່ອງການເໜັ້ນໜັກຂອງ ຜູ້ອໍານວຍການ ໃນການຊຸກຍູ້ ຕິດຕາມ ແລະສ້າງຕົວແບບໃຫ້ໄດ້ຫຼາຍ ແລະ ເຮັດຢ່າງຕໍ່ເນື່ອງ ເພື່ອໃຫ້ປະສົບຜົນສໍາເລັດໃນການຫຼຸດຜ່ອນຄວາມທຸກຍາກແບບຍືນຍົງ.
