Lao
Englishນ້ອງນ້ອຍບ້ານ ລະຕຶບ, ກຸ່ມທີ: 4 ເມືອງພີນ ແຂວງສະຫວັນນະເຂດ ດີໃຈທີ່ຈະໄດ້ໂຮງຮຽນຫລັງໃໝ່
ໂດຍ: ທລຍ
ບ້ານລະຕຶບ, ກຸ່ມບ້ານທີ: 4 ເມືອງພີນ ແຂວງສະຫວັນນະເຂດ ເຊິ່ງເປັນບ້ານໜຶ່ງ ທີ່ມີຄວາມອຸດົມສົມບູນທາງດ້ານຊັບພະຍາກອນທໍາມະຊາດ ແລະ ເປັນບ້ານທີ່ມີມູນເຊື້ອ ໃນການຕໍ່ສູ້ເພື່ອປົກປັກຮັກສາປະທາດຊາດ ແລະ ສ້າງສາປະເທດຊາດ ເຊີ່ງບ້ານດັ່ງກ່າວ ມີເນື້ອທີ່ຕິດກັບບັນດາບ້ານອ້ອມຂ້າງຄື : ທິດເໜືອຕິດກັບບ້ານວັງບ້ວງ, ທິດໃຕ້ຕິດກັບບ້ານແກ້ງລະແທ້ງ, ທິດຕາເວັນອອກຕິດກັບ ເຊບັ້ງຫຽງ ເຊິ່ງເປັນເຂດແດນ ເມືອງເຊໂປນ ແລະ ທິດຕາເວັນຕົກຕິດກັບເຂດປ່າສະຫງວນດົງພູວຽງ ເຂດເມືອງພີນ. ບ້ານລະຕຶບ ມີປະຊາກອນທັງໝົດ 390 ຄົນ, ຍິງ 207 ຄົນ, ຄົວເຮືອນທັງໝົດ 66 ຄົວເຮືອນ, 66 ຄອບຄົວ ມີຄົວເຮືອນ ທຸກຫຼາຍ 4 ຄົວເຮືອນ, ທຸກ 6 ຄົວເຮືອນ, ທຸກປານກາງ 43 ຄົວເຮືອນ, ບໍ່ທຸກ 13 ຄົວເຮືອນ.
ເຖິງວ່າບ້ານ ລະຕືບ ຈະເປັນບ້ານທີ່ມີຄວາມອຸດົມສົມບູນ ທາງດ້ານ ຊັບພະຍາກອນ ທໍາມະຊາດ ແຕ່ບ້ານລະຕືບກໍຍັງເປັນບ້ານທີ່ທຸກຍາກ, ການເຂົ້າເຖີງການບໍລິການ ທາງດ້ານການສືກສາຍັງຫຍຸ້ງຍາກ ມີໂຮງຮຽນ ທີ່ຊຸມຊົນ ກໍ່ສ້າງເອງ ເຊິ່ງມີສະພາບຊຸດໂຊມ ເປ້ເພ ຍາມຝົນກໍຮົ່ວ ສະນັ້ນມາຮອດ ຮອບວຽນທີ 14 (ສົກປີ 2016-17) ຊາວບ້ານ ລະຕືບ ທັງກຸ່ມຍິງ ແລະ ກຸ່ມຊາຍ ກໍໄດ້ເລືອກເອົາການກໍ່ສ້າງໂຮງຮຽນປະຖົມ ເປັນບຸລິມະສິດ ທີ່ໜຶ່ງ ພ້ອມນັ້ນ ບຸລິມະສິດດັ່ງກ່າວກໍໄດ້ ເຂົ້າໃນແຜນພັດທະນາກຸ່ມບ້ານ ທີ 4 ແລະຖືກຮັບຮອງຈາກກອງປະຊຸມ ປະສານງານການວາງແຜນຂັ້ນເມືອງ ແລະໄດ້ມີການກໍ່ສ້າງ ດ້ວຍງົບປະມານທັງໝົດ 346 ກວ່າລ້ານກີບ, ທລຍ ສະໜັບສະໜູນ 317 ກວ່າລ້ານກີບ ໃນນັ້ນ ຊຸມຊົນປະກອຍສ່ວນທາງດ້ານແຮງງານ ແລະ ວັດຖຸທ້ອງຖິ່ນທີ່ຫາໄດ້ ຄິດເປັນເງິນ28 ກວ່າລ້ານກີບ
ເຊິ່ງການກໍ່ສ້າງໂຮງຮຽນປະຖົມຫລັງດັ່ງກ່າວໄດ້ເລີ່ມລົງມືກໍ່ສ້າງ ແຕ່ຕົ້ນເດືອນມິຖຸນາ 2017 ແລະ ປະຈຸບັນ ການກໍ່ສ້າງໄດ້ມີຄວາມຄືບໜ້າຫລາຍກວ່າ 40 % ດ້ວຍຄວາມເຂັ້ມແຂງຂອງ ຜູ້ປະສານງານກຸ່ມບ້ານ ໄດ້ມີການປຸກລະດົມ ຊຸກຍູ້ ຊຸມຊົນເຂົ້າໃນການປະກອບສ່ວນ ເພື່ອເຮັດແນວໃດໃຫ້ບັນລຸຈຸດປະສົງໃນການສ້າງຄວາມເຂັ້ມແຂງໃຫ້ແກ່ຊຸມຊົນ ແລະ ເງື່ອນໄຂດ້ານຕ່າງໆຄື:
Ø ປະຕິບັດຕາມ ທິດຊີ້ນໍາຂອງຂັ້ນເທິງ ເພື່ອລົບລ້າງການກືກໜັງສືໃນເຂດຫ່າງໃກສອກລີກ
Ø ປະຕິບັດຕາມ ລະບຽບ, ຫຼັກການຂອງການພັດທະນາຊຸມຊົນຂອງ ທລຍ ລະບຽບຂໍ້ທີ: 8 ຄືຊຸມຊົນເປັນເຈົ້າຂອງໂຄງການ (ເປັນເຈົ້າການໃນການວາງແຜນ, ເປັນເຈົ້າການໃນການ ຕິດຕາມ-ກວດກາ ການຈັດຕັ້ງປະຕິບັດການກໍ່ສ້າງໂຄງການຕະຫລອດຮອດ ການປົກປັກຮັກສາຄຸ້ມຄອງນໍາໃຊ້).
ຄາດວ່າການກໍ່ສ້າງໂຮງຮຽນປະຖົມຫລັງດັ່ງກ່າວ ຈະສໍາເລັດພາຍໃນເດືອນສິງຫາ 2017 ແລະ ຈະສາມາດຕອບສະໜອງການຮຽນການສອນໃຫ້ແກ່ນ້ອງນ້ອຍໃນເກນອາຍຸເຂົ້າໂຮງຮຽນຢູ່ບ້ານດັ່ງກ່າວ ກໍຄືກຸ່ມບ້ານທີ 4 ໄດ້ຢ່າງທົ່ວເຖິງ.
