Lao
Englishບ້ານນໍ້າມີ້ມີໂຮງຮຽນປະຖົມຫັລງໃໝ່
ໂດຍ: ຄຳພັນ ພັນທະວົງ
ບ້ານນໍ້າມີ້ ບ້ານຊົນເຜົ່າກຶມມຸ ເປັນບ້ານໜຶ່ງທີ່ຂື້ນກັບ ກຸ່ມບ້ານດອນຄູນ ເມືອງວຽງຄຳ ແຂວງຫລວງພະບາງ , ຕັ້ງຢູ່ທາງທິດເໜືອຂອງເມືອງວຽງຄຳຫ່າງຈາກເທດສະບານເມືອງ ປະມານ 64ກິໂລແມັດ, ມີຈໍານວນ 41 ຄອບຄົວ, ປະຊາກອນທັງໝົດ: 220ຄົນ,ຍິງ112ຄົນ. ການດຳລົງຊີວິດປະຊາຊົນພາຍໃນບ້ານສ່ວນໃຫ່ຍແມ່ນດຳລົງຊີວິດໂດຍອາໃສການເຮັດໄຮ່ຄົງທີ່, ລ້ຽງສັດເປັນອາຊີບຕົ້ນຕໍແລະເຮັດສວນເປັນອາຊີບສຳຮອງ.
ບ້ານນໍ້າມີ້ ສ້າງຕັ້ງຂຶ້ນໃນປີ 1986 ຜູ້ນຳພາມາຕັ້ງບ້ານທຳອິດແມ່ນພໍ່ເຖົ້າດອກ ແລະ ພໍ່ເຖົ້າຮັງ,ມີຮີດຄອງປະເພນີແລະວັດທະນາທຳອັນດີງາມເຊິ່ງເປັນເອກະລັກຂອງບ້ານເຊັ່ນ: ບຸນປົດປີ ຫລື ເອີ້ນວ່າ ບຸນ(ເກຼິ) ເຮັດທຸກໆປີ ທີ່ເປັນການສົ່ງທ້າຍປີເກົ່າຕ້ອນຮັບປີໃໝ່ຂອງເຜົ່າກຶມມຸ.
ມາຮອດຮອບວຽນທີ 10 (ສົກປີ 2012-2013) ບ້ານ ນໍ້າມີ້ ໄດ້ຮັບທຶນສະໜັບໜູນຈາກກອງທຶນຫຼຸດຜ່ອນຄວາມທຸກຍາກ ຈຳນວນ 1 ໂຄງການຄື: ໂຄງການກໍ່ສ້າງໂຮງຮຽນປະຖົມ 1 ຫັລງ, ປະກອບມີ 3 ຫ້ອງຮຽນ ຕົກເປັນມູນຄ່າທັງໝົດແມ່ນ:337 ລ້ານກ່ວາກີບ ໃນນັ້ນ ຊຸມຊົນປະກອບສ່ວນແມ່ນ:39 ລ້ານກ່ວາກີບ, ເຊິ່ງແມ່ນບໍລິສັດ BNP ກໍ່ສ້າງເຄຫາສະຖານຈໍາກັດ ເປັນຜູ້ຮັບເໝົາກໍ່ສ້າງ.
ໂຄງການດັ່ງກ່າວນັ້ນ ແມ່ນໄດ້ຕອບສະໜອງກັບຄວາມຕ້ອງການຂອງພໍ່ແມ່ປະຊາຊົນບ້ານນໍ້າມີຢ່າງແທ້ຈິງ ເພາະເຂົາເຈົ້າໝົດບ້ານເປັນຜູ້ຕັດສິນໃຈເອົາໂຄງການກໍ່ສ້າງໂຮງຮຽນຫລັງນີ້ ກ່ອນຈະໄດ້ໂຄງການດັ່ງກ່າວນັ້ນ ໄດ້ຜ່ານການວາງແຜນຢູ່ຂັ້ນບ້ານ, ຂັ້ນກຸ່ມບ້ານ ແລະ ຂັ້ນເມືອງຕາມລໍາດັບ. ໂຄງການດັ່ງກ່າວໄດ້ເລີ່ມລົງມືກໍ່ສ້າງໂຄງການນັບແຕ່ວັນທີ 5 ມິຖຸນາ 2013 ມາຮອດປະຈຸບັນ ການກໍ່ສ້າງໂຮງຮຽນຫລັງດັ່ງກ່າວສຳເລັດແລ້ວ ແລະ ຜ່ານການກວດກາຈາກຄະນະກຳມະການ ມອບຮັບໃຫ້ຊຸມຊົນເປັນຄຸ້ມຄອງນຳໃຊ້ເປັນທີ່ຮຽບຮ້ອຍແລ້ວ.
ຕາມການໃຫ້ສຳພາດຂອງທ່ານ ຕັງຈັນຍະສອນ ເລຂາພັກບ້ານ ນາຍບ້ານບ້ານນໍ້າມີ້ໃຫ້ຮູ້ວ່າ: “ຜ່ານມາຫລາຍສິບປີບ້ານເຮົາບໍ່ເຄີຍມີໂຮງຮຽນງາມແບບຖາວອນ, ມີແຕ່ໂຮງຮຽນຊົ່ວຄາວຄືທີ່ເຫັນ ແລະ ກໍ່ນ້ອຍບໍ່ພຽງພໍກັບການຂະຫຍາຍໂຕຂອງລູກຫລານນັກຮຽນພາໃຫ້ພົບຂໍ້ຫຍຸ້ງຍາກຫລາຍ,ຈົນມາຮອດປີນີ້ຈຶ່ງມີ ທລຍ ມາໃຫ້ການຊ່ວຍເຫລືອ ເຊິ່ງສາມາດບັນຈຸນ້ອຍນັກຮຽນພາຍໃນບ້ານຢ່າງພຽງພໍ ແລະ ສະດວກສະບາຍກວ່າແຕ່ກ່ອນ.
ຂ້າພະເຈົ້າໃນນາມຕາງໜ້າອຳນາດການປົກຄອງບ້ານ ແລະ ຊຸມຊົນພາຍໃນບ້ານ ຂໍຂອບໃຈນຳໂຄງການ ທລຍ ທີ່ໃຫ້ທຶນສະໜັບສະໜູນ ແລະ ຄວາມເອົາໃຈໃສ່ຂອງຫ້ອງການກ່ຽວຂ້ອງພາກລັດທີ່ໄດ້ ຊີ້ນຳ, ນຳພາໃນການກໍ່ສ້າງໂຮງຮຽນໃຫ້ແກ່ບ້ານຂອງຂ້າພະເຈົ້າ”.
