ວຽກງານປັບປຸງຊີວິດການເປັນຢູ່ ເຊື່ອມສານໂພຊະນາການຂອງ ກອງທຶນຫລຸດຜ່ອນຄວາມທຸກຍາກ(ທລຍ) ກໍ່ແມ່ນວຽກງານໜຶ່ງທີ່ສໍາຄັນ ເຊິ່ງເຮັດໃຫ້ຄອບຄົວຜູ້ທຸກຍາກສາມາດມີລາຍຮັບເພີ່ມຂຶ້ນ

ວຽກງານປັບປຸງຊີວິດການເປັນຢູ່ ເຊື່ອມສານໂພຊະນາການຂອງ

ກອງທຶນຫລຸດຜ່ອນຄວາມທຸກຍາກ(ທລຍ) ກໍ່ແມ່ນວຽກງານໜຶ່ງທີ່ສໍາຄັນ

ເຊິ່ງເຮັດໃຫ້ຄອບຄົວຜູ້ທຸກຍາກສາມາດມີລາຍຮັບເພີ່ມຂຶ້ນ

    ໂດຍ:  ທລຍ ຫົວເມືອງ

ກອງທຶນຫລຸດຜ່ອນຄວາມທຸກຍາກ (ທລຍ) ບໍ່ພຽງແຕ່ໃຫ້ທຶນສະໜັບສະໜູນດ້ານພື້ນຖານໂຄງລ່າງໃຫ້ແກ່ຊາວບ້ານພຽງເທົ່ານັ້ນ ຍັງໄດ້ໃຫ້ທຶນສະໜັບສະໜູນວຽກງານ ປັບປຸງຊິວິດການເປັນຢູ່ເຊື່ອສານໂພຊະນາການ (LN) ອີກ.  ໃນປີ 2016 ທລຍ ໄດ້ສະໜັບສະໜູນ ກິດຈະກໍາ ປັບປຸງຊີວິດການເປັນຢູ່ ເຊື່ອສານໂພຊະນາການ ເຊິ່ງໄດ້ກຳນົດເອົາ 32 ບ້ານ ໃນ 8 ກຸ່ມບ້ານຂອງເມືອງຫົວເມືອງ ຕາມຂໍ້ກຳນົດເງື່ອນໄຂ ທລຍ ວາງອອກ ແລະ ສາມາຄັດເລືອກເອົາຜູ້ຍີງທີ່ທຸກຍາກເຂົ້າເປັນກຸ່ມສຳມາຊິກກຸ່ມຊ່ວຍເຫລືອເຊິ່ງກັນ ແລະ ກັນ (ກຊກ) ທັງໝົດໄດ້ 1,719 ຄົນ  ແລະ ເປົ້າໝາຍຫລັກຂອງກິດຈະກໍານີ້  ແມ່ນເພື່ອປັບປຸງຊິວິດການເປັນຢູ່ ເຊື່ອມສານໂພຊະນາການແນໃສ່ຄອບຄົວທີ່ທຸກຍາກ ທີ່ອາໃສຢູ່ເຂດຫ່າງໄກສອກຫລີກໄດ້ຮັບການຊ່ວຍເຫລືອ, ໃຊ້ຮູບແບບການພັດທະນາ ໂດຍຊຸມຊົນເປັນເຈົ້າການ (CDD) ກິດຈະກໍາຫລັກແມ່ນຊຸກຍູ້ໃຫ້ເຂົາເຈົ້າຮູ້ຈັກການປະຫຍັດ, ໃຊ້ເງິນໃຫ້ຄຸ້ມຄ່າ, ຮຽນຮູ້ການລົງທຶນຕາມຄວາມສາມາດຂອງເຂົາເຈົ້າ ເຊັ່ນວ່າຊຸກຍູ້ສົ່ງເສີມການປູກ, ການລ້ຽງ  ຫລື  ການສ້າງລາຍຮັບຕ່າງໆ ເຂົ້າສູ່ຄົວເຮືອນໃຫ້ມີລາຍຮັບເພີ່ມຂື້ນຈົນສາມາດກາຍເປັນຄອບຄົວຕົວແບບໃນຕໍ່ໜ້າ.

ໃນເບື້ອງຕົ້ນ   ສະມາຊິກຢູ່ໃນແຕ່ລະບ້ານໄດ້ມີການເຕົ້າລວມປະຈຳອາທິດເພື່ອທ້ອນເງິນດ້ວຍຕົວເຂົາເຈົ້າເອງເຊິ່ງບໍ່ໃຫ້ຫລຸດຜູ້ໜຶ່ງ 2,000 ກີບ (ສອງພັນກີບ)/ອາທິດ ເຫັນວ່າເຂົາເຈົ້າມີຄວາມເຂັ້ມແຂງໃນວຽກງານນີ້ແລ້ວ  ຮອດປີ 2017 ປ່ຽນຈາກການປະຊຸມອາທິດລະຄັ້ງ ມາເປັນເດືອນລະຄັ້ງການຝາກເງິນແມ່ນ 8,000ກີບ/ຄົນ/ເດືອນເມື່ອເຫັນໄດ້ ແກ່ຄວາມຫ້າວຫັນ ກະຕືລືລົ້ນຂອງກຸ່ມຊ່ວຍເຫລືອຊິ່ງກັນ ແລະ ກັນໃນ 32 ບ້ານ  ທາງກອງທຶນຫລຸດຜ່ອນຄວາມ ທຸກຍາກ(ທລຍ) ຈິ່ງໄດ້ໃຫ້ທຶນສະໜັບສະໜູນໃຫ້ແກ່ບ້ານເປົ້າໝາຍ  32 ບ້ານຈຳນວນ 1,375,200,000ກີບ(ໜື່ງພັນສາມຮ້ອຍເຈັດສິບຫ້າລ້ານສອງຮ້ອຍພັນກີບ) ສະເລ່ຍໃສ່ສະມາຊິກ ກຊກ ທັງໝົດ 1,719 ຄົນ ຜູ້ໜຶ່ງໄດ້ຮັບ 8,000 ກີບ

     ໃນປີ 2017 ໄດ້ປ່ອຍກູ້ໃຫ້ແກ່ສະມາຊິກ ຈໍານວນ 1,375,200,000 ກີບ ເຊີ່ງກຳນົດດອກເບ້ຍ 2% ຕໍ່ເດືອນເຊີ່ງມີລາຍຮັບຈາກດອກເບ້ຍທັງໝົດ 96,754,000 ກີບ(ເກົ້າສິບຫົກລ້ານເຈັດຮ້ອຍຫ້າສິບສີ່ພັນກີບ) ສ່ວນຫລາຍເງິນທີ່ຢືມໄປ ແມ່ນເຂົາເຈົ້າໄປເຮັດກິດຈະກຳຕ່າງໆຄື: ລ້ຽງແບ້, ລ້ຽງຫມູ, ລ້ຽງໄກ່, ລ້ຽງປາ, ຕໍ່າຫູກ ແລະ ຂາຍເຄື່ອງຍ່ອຍ.

    ເມື່ອຕົກມາເຖິງຕົ້ນປີ 2018 ການປ່ອຍກູ້ເປັນໄລຍະທີ 2 ໂດຍເຂົາເຈົ້າເປັນຜູ້ກຳນົດດອກເບ້ຍເອງ ແລະ ຈຳນວນເງິນທີໄດ້ປ່ອຍກູ້ໃຫ້ສຳມາຊິກໃນງວດທີສອງແມ່ນ 1,562,965,000ກີບ (ໜື່ງພັນຫ້າຮ້ອຍຫົກສິບສອງລ້ານເກົ້າຮ້ອຍຫົກສິບຫ້າພັນກີບ) ສະມາຊິກກຸ່ມຊ່ວຍເຫລືອກັນ ແລະ ກັນ ​ໃນ 32 ບ້ານ ຂາຍ​ສັດ ​ແລະ ອື່ນ​ໆ ສາມາດ​ສ້າງ​ລາຍ​ຮັບ​ໄດ້ 1,941,109,500 ກີບ (ໜື່ງພັນ​ເກົ້າ​ຮ້ອຍ​ສິ່ສິບ​ເອັດ​ລ້ານ​ ໜື່ງແສນ​ເກົ້າ​ພັນ​ຫ້າ​ຮ້ອຍ​ກີບ).

      ໃນໄຍລະຜ່ານມາເງິນດອກເບ້ຍແມ່ນໄດ້ປັນຜົນຕາມ ລະບຽບຂອງກອງທຶນບ້ານ:  60% ໃຫ້ສະມາຊິກ, 25% ແມ່ນໃຫ້ຄະນະຄຸ້ມຄອງ, 5% ເປັນເງິນບໍລິຫານ, 2,5% ເປັນເງິນກອງທຶນພັດທະນາບ້ານ ແລະ 2,5% ເປັນເງິນແຮສະສົມ, 5% ເປັນເງິນປະກັນສັງຄົມ.

ນັບແຕ່ເລີ່ມຕົ້ນມາດ້ານດີແມ່ນມີວິຊາການທາງຫ້ອງການ ທລຍ ເມືອງ, ວິຊາກນປະຈຳຢູ່ກຸ່ມບ້ານໄດ້ສົມທົບກັບຫ້ອງການກະສິກຳ ແລະ ປ່າໄມ້ເມືອງ ໃນການລົງຕິດຕາມ​ກຸ່ມ​ຊ່ວຍ​ເຫລືອ​ເຊິ່ງກັນ ​ແລະ ກັນ ເພື່ອກະຕຸກຊຸກຍູ້ໃນການຄຸ້ມຄອງບໍລິຫານກອງທຶນ,    ຝຶກອົບຮົມເຕັກນິກການລ້ຽງສັດນ້ອຍ ແລະ ການສັກຢາປ້ອງກັນພະຍາດສັດເປັນປົກກະຕິ.

ຄາດວ່າໃນຕໍ່ໜ້າຈະສູ້ຊົນສຸມໃສ່ຄອບຄົວທີ່ມີທ່າແຮງໃຫ້ສາມາດເປັນຄອບຄົວຕົວແບບໃຫ້ໄດ້ 5-10 ຄອບຄົວ ຫລື ຫລາຍກ່ວານັ້ນ ແລະ ທາງເມືອງຈະສະເໜີຂໍງົບປະມານເພື່ອໃຫ້ກຸ່ມສະມາຊິກ (ກຊກ)  ຢູ່ໃນແຕ່ລະກຸ່ມໄປທັດສະ ນະແລກປ່ຽນບົດຮຽນຢູ່ບ່ອນອື່ນ ແລະ ສ້າງໃຫ້ໄດ້ 1 ຄອບຄົວເປັນຜູ້ຜະລິດແນວພັນໄກ່ ແລະ ເປັດເພື່ອຈໍາໜ່າຍ.