Lao
English8 ເມືອງແຂວງ ຫົວພັນ
ສຳເລັດກອງປະຊຸມປະສານງານການວາງແຜນຂັ້ນເມືອງ
ໂດຍພັດທະນາຊຸມຊົນ ແຂວງຫົວພັນ
ເພື່ອເຮັດໃຫ້ການຊ່ວຍເຫຼືອຊຸມຊົນທີ່ທຸກຍາກໃນຂົງເຂດພື້ນທີ່ເປົ້າໝາຍໄດ້ຮັບການແກ້ໄຂໃຫ້ທ່ວງທັນກັບເວລາໃນການຈັດຕັ້ງປະຕິບັດໂຄງການຍ່ອຍສໍາລັບຮອບວຽນທີ 12 (ສົກປີ 2013-2014).ສະນັ້ນ ໃນລະ ຫວ່າງວັນທີ 9 ຕຸລາ ຫາ 14 ຕຸລາ 2014 ກອງທຶນຫລຸດຜ່ອນຄວາມທຸກຍາກ (ທລຍ) ແຂວງຫົວພັນ ໄດ້ຈັດກອງປະຊຸມປະສານງານການວາງແຜນຂັ້ນເມືອງ ໃນທົ່ວແຂວງ ເຊິ່ງໄດ້ເລີ່ມຈາກເມືອງກັວນ,ເມືອງຊຳໃຕ້,ເມືອງຊ່ອນ,ເມືອງຮ້ຽມ,ເມືອງວຽງໄຊ,ເມືອງຫົວເມືອງ,ເມືອງຊຽງຄໍ້ ແລະ ເມືອງຊຳເໜືອ. ໂດຍການເຂົ້າຮ່ວມຂອງຫົວໜ້າພັດທະນາຊົນນະບົດແລະລຶບລ້າງຄວາມທຸກຍາກແຂວງ ທັງເປັນຜູ້ປະສານງານຝ່າຍລັດຂັ້ນແຂວງ,ທ່ານເຈົ້າເມືອງແລະຮອງເຈົ້າເມືອງ,ຜູ້ປະສານງານຝ່າຍລັດຂັ້ນເມືອງ,ຫ້ອງການອ້ອມຂ້າງເມືອງ,ທລຍແຂວງ, ທລຍເມືອງ,ຜູ້ຕາງໜ້າເລຂາພັກກຸ່ມບ້ານ,ຜູ້ປະສານງານກຸ່ມບ້ານ,ຕົວແທນກຸ່ມບ້ານ ແລະໂຄງການພັດທະນາອື່ນໆ.
ກອງປະຊຸມດັ່ງກ່າວໄດ້ມີການສະຫຼຸບຫຍໍ້ການຈັດຕັ້ງປະຕິບັດວຽກງານໂຄງການຍ່ອຍຮອບວຽນ11ຜ່ານມາຂອງ ທລຍ ຂັ້ນເມືອງ. ສະແດງໃຫ້ເຫັນເຖິງຜົນສຳເລັດຂອງວຽກງານດ້ານດີ ແລະ ຂໍ້ຄົງຄ້າງພາຍໃນເມືອງຂອງຕົນແລະຖອດຖອນບົດຮຽນຊຶ່ງກັນແລະກັນ. ຈາກນັ້ນ ກອງປະຊຸມໄດ້ມີການປຶກສາຫາລື ຮ່ວມກັນກ່ຽວກັບແຜນພັດທະນາກຸ່ມບ້ານທີ່ ທລຍ ໃຫ້ການສະໜັບສະໜູນກຸ່ມບ້ານໂດຍສະເພາະແມ່ນການກໍ່ສ້າງໂຄງການຍ່ອຍຮອບວຽນທີ່ 12 ສົກປີ(2014-2015)ເພື່ອໃຫ້ຊຸມຊົນຢູ່ເຂດຫ່າງໄກຊອກຫຼີກໄດ້ຮັບການແກ້ໄຂຄວາມທຸກຍາກໄດ້ທົ່ວເຖິງ ສະນັ້ນ. ໂຄງການທີ່ຈະໄດ້ຮັບການກໍ່ສ້າງ ໃນ 8 ເມືອງ ແຂວງຫົວພັນມີຈຳນວນທັງໝົດ 125 ໂຄງການຍ່ອຍໃນທົ່ວແຂວງ ໂດຍນໍາໃຊ້ງົບປະມານ 19 ຕື້ກວ່າກີບ.
ໂຄງການຕ່າງໆເຫລົ່ານັ້ນໄດ້ກວາມເອົາ 4 ຂະແໜງການເປັນຫຼັກຄື:ຂະແໜງສາທາລະນະສຸກ,ຂະແໜງສຶກສາທິການ ແລະ ກິລາ,ຂະແໜງກະສິກຳ-ປ່າໄມ້ ແລະຂະແໜງໂຍທາທິການ ແລະ ຂົນສົ່ງຄື: ເມືອງວຽງໄຊ ມີຈຳນວນ 5 ກຸ່ມບ້ານໄດ້ຮັບການຊ່ວຍເຫຼືອຈຳນວນ 11 ໂຄງການຍ່ອຍຕົກເປັນມູນຄ່າກໍ່ສ້າງປະມານ 1ຕື້ 189 ລ້ານກ່ວາກີບ,ເມືອງຊຽງຄໍ້ 5 ກຸ່ມບ້ານ ໄດ້ຮັບການຊ່ວຍເຫຼືອ 16 ໂຄງການຍ່ອຍງົບປະມານການກໍ່ສ້າງຈຳນວນ 1ຕື້822 ລ້ານກ່ວາກີບ,ເມືອງຊ່ອນ 5 ກຸ່ມບ້ານໄດ້ຮັບການຊ່ວຍເຫຼືອ 12 ໂຄງການຍ່ອຍ ງົບປະມານການກໍ່ສ້າງ 1ຕື້826 ລ້ານກ່ວາກີບ,ເມືອງຮ້ຽມ 4 ກຸ່ມບ້ານ ໄດ້ຮັບການຊ່ວຍເຫຼືອ 8 ໂຄງການຍ່ອຍງົບປະມານການກໍ່ສ້າງ 1ຕື້189 ລ້ານກ້ວາກີບ,ເມືອງກວັນ 9 ກຸ່ມບ້ານ ໄດ້ຮັບການຊ່ວຍເຫຼືອ 22 ໂຄງການຍ່ອຍຄາດຄະເນງົບປະມານໃນການກໍ່ສ້າງ 3ຕື້747 ລ້ານກ່ວາກີບ,ເມືອງຊຳໃຕ້ 8 ກຸ່ມບ້ານໄດ້ຮັບການຊ່ວຍເຫຼືອ 18 ໂຄງການຍ່ອຍງົບປະມານ ຄາດຄະເນການກໍ່ສ້າງ 3ຕື້104 ລ້ານກ່ວາກີບ,ເມືອງຫົວເມືອງ 8 ກຸ່ມບ້ານ ໄດ້ຮັບການຊ່ວຍເຫຼືອ 16 ໂຄງການຍ່ອຍງົບປະມານຄາດຄະເນໃນການກໍ່ສ້າງ 3ຕື້210 ລ້ານກ່ວາກີບ ແລະ ເມືອງຊຳເໜືອ 8 ກຸ່ມບ້ານໄດ້ຮັບການຊ່ວຍເຫຼືອ 22 ໂຄງການຍ່ອຍຄາດຄະເນງົບປະມານການກໍ່ສ້າງ 3ຕື້93 ລ້ານກ່ວາກີບ.
ໃນຕອນທ້າຍຂອງກອງປະຊຸມຍັງໄດ້ຮັບຟັງການໂອລົມຂອງທ່ານ ພັນທອງ ໄຊສົມພັນ ຫົວໜ້າຫ້ອງການພັດທະນາຊົນນະບົດແຂວງ ທັງເປັນຜູ້ປະສານງານຝ່າຍລັດຂັ້ນແຂວງ ໄດ້ໃຫ້ທິດຊີ້ນຳທີມງານຂັ້ນກຸ່ມບ້ານເພື່ອບໍ່ໃຫ້ການກໍ່ສ້າງຫຼ້າຊ້າ ແມ່ນກະກຽມການປະກອບສ່ວນດ້ານແຮງງານແລະວັດສະດຸທ້ອງຖິ່ນເຂົ້າໃນການກໍ່ສ້າງແລະການຈັດຊື້-ຈັດຈ້າງໂຄງການຍ່ອຍ.ຖ້າຫາກວ່າການກໍ່ສ້າງໂຄງການຍ່ອຍຕ່າງໆພາຍໃນ 8 ເມືອງນີ້ສຳເລັດພ້ອມທັງມອບໃຫ້ຊຸມຊົນເປັນຜູ້ຊົມໃຊ້ແລ້ວແມ່ນສາມາດແກ້ໄຂຄວາມທຸກຍາກຂອງຊາວບ້ານໄດ້ຢ່າງຫຼວງຫຼາຍ.
