Lao
Englishກະຊວງຊັບພະຍາກອນ ແລະ ສິ່ງແວດລ້ອມ ແລກປ່ຽນບົດຮຽນກັບ ທລຍ ກ່ຽວກັບການຄຸ້ມຄອງໂຄງການ
ໂດຍ: ແສງອາລຸນ ພິລາຈັນ
ໃນວັນທີ 6 ເມສາ 2015, ກະຊວງຊັບພະ ຍາກອນທໍາມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມສໍາມະນາ ເພື່ອແລກປ່ຽນບົດຮຽນກ່ຽວກັບການຄຸ້ມຄອງໂຄງການ ຂຶ້ນທີ່ຫ້ອງປະຊຸມກົມສົ່ງເສີມຄຸນນະພາບ ແລະ ສິ່ງແວດລ້ອມ ໂດຍການເປັນປະທານຂອງ ທ່ານ ນາງ ມອນມະນີ ຍອຍບົວກ່ອງ, ລັດຖະມົນຕີຊ່ວຍວ່າການ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໂດຍການນໍາສະເໜີບົດຮຽນ ແລະ ຮູບແບບໃນການຄຸ້ມຄອງໂຄງການ ທລຍ ຂອງ ທ່ານ ບຸນກວ້າງ ສຸວັນນະພັນ, ຜູ້ອໍານວຍການບໍລິຫານ ທລຍ, ທ່ານ ດຣ.ຫັດທະຈັນ ພິມມະວົງ, ຫົວໜ້າພະແນກຕິດຕາມ-ປະເມີນຜົນ, ທ່ານ ໄພສານ ສີຫາບຸດ, ຜູ້ຮັບຜິດຊອບຄຸ້ມຄອງ ແລະ ບໍລິຫານລະບົບຖານຂໍ້ມູນ ແລະ ການເຂົ້າຮ່ວມຮັບຟັງການນໍາສະເໜີ ແລະ ບັນລະຍາຍຂອງທຸກໆກົມ, ກອງ, ສູນຂໍ້ມູນ-ຂ່າວສານ, ຫ້ອງການ ແລະ ສະຖາບັນຂອງກະຊວງດັ່ງກ່າວກວ່າ 30 ທ່ານ.
ທີ່ກອງປະຊຸມ ໄດ້ມີການນໍາສະເໜີ ແລະ ບັນລະຍາຍຢ່າງມີເນື້ອໃນ ແລະ ຄວາມໝາຍສໍາຄັນ ໂດຍສະເພາະແມ່ນ ການວາງແຜນແບບສົມເຫດສົມຜົນ, ຜົນຂອງການຕິດຕາມ-ປະເມີນຜົນ ແລະ ຄວາມຍືນຍົງຂອງໂຄງການ, ການຄຸ້ມຄອງລະບົບຂໍ້ມູນ ເຫັນໄດ້ວ່າຜູ້ເຂົ້າຮ່ວມໄດ້ມີຄວາມສົນໃຈຫລາຍ ເຊິ່ງສະແດງອອກຢູ່ບ່ອນວ່າ ພາຍຫລັງທີ່ສໍາເລັດການນໍາສະເໜີແລ້ວ ຜູ້ເຂົ້າຮ່ວມໄດ້ມີການຖາມຈຸດໃດທີ່ຍັງບໍ່ທັນເຂົ້າໃຈລະອຽດຢ່າງກົງໄປກົງມາ.
ທ່ານ ມອນມະນີ ຍອຍບົວກ່ອງ, ລັດຖະມົນຕີຊ່ວຍວ່າການ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມໄດ້ໃຫ້ທັດສະນະຕໍ່ການນໍາສະເໜີ ແລະ ບັນລະຍາຍໃນເທື່ອນີ້ວ່າ: “ຂ້າພະເຈົ້າຂໍສະແດງຄວາມຂອບອົກຂອບໃຈນໍາວິທະຍາກອນ ທລຍ ທີ່ມານໍາສະເໜີ ແລະ ບັນລະຍາຍຄວາມຮູ້ໃນການຈັດຕັ້ງປະຕິບັດຕົວຈິງສູ່ທາງກະຊວງພວກເຮົາ ຖືໄດ້ວ່າມີປະໂຫຍດຫລາຍ ເຊິ່ງທາງກະຊວງພວກເຮົາໄດ້ຮຽນຮູ້ຫລາຍຢ່າງຈາກວິທະຍາກອນ ທລຍ ໂດຍສະເພາະແມ່ນ ຮູ້ຈັກການວາງແຜນ-ການຂຽນໂຄງການ, ການຮ່າງແຜນຍຸດທະສາດ, ແຜນງານ, ການວາງຕົວຊີ້ວັດ, ຕິດຕາມ-ກວດກາການຈັດຕັ້ງປະຕິບັດໂຄງການ, ການກວດກາຄຸນນະພາບຂອງໂຄງການ“ “ ຄວາມຮູ້ຕ່າງໆທີ່ໄດ້ຈາກການນໍາສະເໜີ ແລະ ບັນລະຍາຍໃນເທື່ອນີ້ ພວກຂ້າພະເຈົ້າ ຈະນໍາເອົາເປັນບົດຮຽນໝູນໃຊ້ເຂົ້າໃນການຈັດຕັ້ງປະຕິບັດໂຄງການຕ່າງໆຂອງກະຊວງພວກເຮົາ, ການແລກປ່ຽນບົດຮຽນໃນເທື່ອນີ້ເປັນເທື່ອທໍາອິດ ພວກເຮົາຈະສຶບຕໍ່ແລກປ່ຽນບົດຮຽນເຊິ່ງກັນ ແລະ ກັນອີກໃນໂອກາດໜ້າ”.
