Lao
Englishຜົນສໍາເລັດຂອງ ທລຍ2 ເປັນຂົວຕໍ່ກ້າວເຂົ້າສູ່ ທລຍ3
ໂດຍ: ບຸນກວ້າງ ສຸວັນນະພັນ
ກອງທຶນຫລຸດຜ່ອນຄວາມທຸກຍາກ ໄດ້ສືບຕໍ່ເຄື່ອນໄຫວ ໄລຍະ 2 ແຕ່ປີ 2012-2016 ເປັນເວລາ 5 ປີ,
ໃນຕົວຈິງໄລຍະໂຄງການມີພຽງແຕ່ 4 ປີ ເນື່ອງຈາກວ່າໄດ້ຮັບການສືບຕໍ່ຕ່ືມອີກ 1 ປີ (ສົກປີ 2015-2016) ສໍາລັບ 7 ແຂວງ, ມູນຄ່າໂຄງການທັງໝົດ 86,37 ລ້ານໂດລາສະຫະລັດ. ໃນນັ້ນ, ກວມເອົາທຶນ ທລຍ 2 : 68,75 ລ້ານໂດລາສະຫະລັດ ແລະ ທຶນເພີ້ມໃນສົກປີ 2015-2016 : 17,62 ລ້ານໂດລາສະຫະລັດ; ຂອບເຂດໂຄງການກວມເອົາ 10 ແຂວງ/ 42 ເມືອງ/ 278 ກຸ່ມບ້ານ ແລະ 1.951ບ້ານ.
ໃນຈໍານວນທຶນ 83,37[1] ລ້ານໂດລາສະຫະລັດ, ໃນນັ້ນ, ຄິດເປັນທຶນຊ່ວຍເຫຼືອລ້າ 61,70 ລ້ານໂດລາ, ທຶນກູ້ຢືມ 11,60 ລ້າໂດລາສະຫະລັດ (ທຶນຈໍານວນ 83,37ລ້ານໂດລາໄດ້ມາຈາກ: (1). ທະນາຄານໂລກ 36,60 ລ້ານໂດລາ(ທຶນຊ່ວຍເຫຼືອລ້າ 25 ລ້ານໂດລາ ແລະ ທຶນກູ້ຢືມ 11,60ລ້ານໂດລາ); (2). ທຶນຊ່ວຍເຫຼືອລ້າຈາກອົງການຮ່ວມມື ແລະ ພັດທະນາປະເທດສະວິດເຊີແລນ 17,25 ລ້ານໂດລາ ; (3). ທຶນຊ່ວຍເຫຼືອລ້າຈາກປະເທດອົດສະຕາລີ 16,90 ລ້ານໂດລາ; (4). ທຶນຊ່ວຍເຫຼືອລ້າຈາກອົງການພັດທະນາສັງຄົມປະເທດຍີ່ປຸ່ນ 2, 62 ລ້ານໂດລາ ແລະ (5). ທຶນປະກອບສ່ວນຂອງລັດຖະບານ 10 ລ້ານໂດລາສະຫະລັດ).
ຜົນຂອງຈັດຕັ້ງປະຕິບັດໂຄງການ ທລຍ 2 ແຕ່ປີ 2012 ຫາປີ 2015 ມີຈຳນວນທັງໝົດ 1.426 ໂຄງການທີ່ໄດ້ຮັບອະນຸມັດ ແລະ ຄາດຄະເນການໃຊ້ຈ່າຍງົບປະມານທັງໝົດ 300 ກວ່າຕື້ກີບ. ມີຫຼາຍກວ່າ 1.300 ບ້ານທີ່ໄດ້ຮັບຜົນປະໂຫຍດໂດຍກົງ ແລະ ກວມເອົາປະຊາກອນ 683.797ຄົນ. ໃນນັ້ນ ເປັນເພດຍິງກວມເອົາເຄິ່ງໜຶ່ງ (50%) ແລະ ຊົນເຜົ່າສ່ວນນ້ອຍກວມເອົາຫຼາຍກວ່າ 60% ຂອງຜູ້ໄດ້ຮັບຜົນປະໂຫຍດທັງໝົດ.
ສຳລັບຜົນໄດ້ຮັບທີ່ພົ້ນເດັ່ນກ່ຽວກັບປະເພດໂຄງການທີ່ ທລຍ ໄດ້ຊ່ວຍເຫຼືອ ສາມາດສັງລວມໄດ້ຄື: ກໍ່ສ້າງ ແລະ ປັບປຸງເສັ້ນທາງຊົນນະບົດທັງໝົດໄດ້ 225 ເສັ້ນທາງ (ຍາວທັງໝົດ 1.228 ກິໂລແມັດ), ກໍ່ສ້າງ ແລະ ສ້ອມແປງຂົວໄດ້ 45 ແຫ່ງ, ຈັດສັນຜັງບ້ານ ແລະ ວາງທໍ່ລອດໄດ້ 18 ແຫ່ງ, ສະໜອງຕາຄ່າຍໄຟຟ້າຂະໜາດນ້ອຍໄດ້ 18 ແຫ່ງ, ກໍ່ສ້າງ ແລະ ສ້ອມແປງໂຮງຮຽນໄດ້ 386 ແຫ່ງ (ເປັນຈຳນວນທັງໝົດ 955 ຫ້ອງ), ກໍ່ສ້າງ ແລະ ສ້ອມແປງສຸກສາລາໄດ້ 33 ແຫ່ງ, ກໍ່ສ້າງ ແລະ ສ້ອມແປງລະບົບນ້ຳໄດ້ 711 ແຫ່ງ, ກໍ່ສ້າງ ແລະ ສ້ອມແປງສິ່ງ
ອຳນວຍຄວາມສະດວກດ້ານກະສິກຳເຊັ່ນ ຊົນລະປະທານ ແລະ ຝາຍກັ້ນນໍ້າໄດ້ 63 ແຫ່ງແລະ ຕະຫຼາດຊຸມຊົນໄດ້ 10 ແຫ່ງ.
ພ້ອມດຽວກັນນັ້ນ ທລຍ ໄດ້ທົດລອງຊອກຫາຮູບແບບ ກ່ຽວກັບວຽກງານປັບປຸງຊີວິດການເປັນຢູ່ເພື່ອຄໍ້າປະກັນດ້ານໂພຊະນາການ ໃນເຂດຊົນນະບົດຢູ່ 4 ເມືອງ ໃນສອງແຂວງຄື: ເມືອງຮ້ຽມ ແລະ ເມືອງຊ່ອນ ແຂວງຫົວພັນ, ເມືອງເຊໂປນ ແລະ ເມືອງນອງ ແຂວງສະຫວັນນະເຂດ ດ້ວຍວິທີການ: (1). ສ້າງຕັ້ງກຸ່ມຊ່ວຍເຫລືອເຊິ່ງກັນ ແລະ ກັນ ຕິດພັນກັບ (2). ການສ້າງຕັ້ງກຸ່ມອ້ອມຊັບ(ຝາກປະຫຍັດ) ແລະ (3). ກຸ່ມທໍາກິດຈະກໍາປັບປຸງຊີວິດການເປັນຢູ່(ກຸ່ມຜະລິດສ້າງລາຍ) ເພື່ອແນໃສ່ແກ້ໄຂການຂາດແຄນດ້ານສະບຽງອາຫານ ຕິດພັນກັບການກີນຖືກຫຼັກໂພຊະນາການ ແລະ ສຸຂະອະນາໄມ ຂອງຄອບຄົວ ແລະ ພາຍໃນບ້ານທີ່ທຸກຍາກ, ຊຶ່ງສາມາດສ້າງຕັ້ງກຸ່ມຊ່ວຍເຫຼືອເຊິ່ງກັນ ແລະ ກັນໄດ້ 706 ກຸ່ມ, ກວມເອົາ 165 ບ້ານ (ຜ່ານມາສ້າງໄດ້ 85ບ້ານ, ປີ 2016 ສ້າງຕ່ືມ 80ບ້ານ), ກວມເອົາ 8,400 ກວ່າຄົວເຮືອນ ໂດຍປະກອບທຶນມູນວຽນ 1 ລ້ານກີບ/ ຕໍ່ຄົວເຮືອນ ເປັນກອງທຶນສ້ເພື່ອສ້າງລາຍຮັບໃຫ້ແກ່ຄອບຄົວ ໂດຍຜ່ານວິທີການປູກຈິດສໍານຶກ ສ້າງຄວາມເປັນເຈົ້າໃຫ້ແກ່ແມ່ຍິງ ແລະ ຊົນເຜົ່າສ່ວນນ້ອຍ ໃນການຕັດສິນໃຈແກ້ໄຂບັນຫາຄວາມທຸກຍາກ ແລະ ການຂາດແຄນອາຫານໃນຄອບຄົວຂອງຕົນ ພ້ອມທັງມອບຄວາມຮັບຜິດຊອບ ແລະ ຄວາມຕັດສິນໃຈໃຫ້ແກ່ຊຸມຊົນໃນການວາງແຜນການພັດທະນາທ້ອງຖິ່ນ ແລະ ແຜນຜະລິດຂອງຄອບຄົວ ດ້ວຍຕົນເອງ , ຊຶ່ງສາມາດສ້າງໄດ້ບ້ານຕົວແບບພົ້ນຄວາມທຸກຍາກ ກໍາລັງຂະ ຫຍາຍອອກສູ່ທາງກວ້າງ ເຊັ່ນ: ບ້ານສາກົກ, ບ້ານຫ້ວຍສາ, ບ້ານນາວຽງ, ບ້ານແທ້ງຮີ່ງ ເມືອງຮ້ຽມ; ບ້ານທາດ, ບ້ານບໍ່, ບ້ານໝັ້ນ, ບ້ານນໍ້າງ່ອນ, ບ້ານວັດ ເມືອງຊ່ອນ ແຂວງຫົວພັນ; ບ້ານແກ້ງກວີ, ບ້ານຫ້ວຍຕ້ອນ, ບ້ານຫ້ວຍຍື່ງ ເມືອງເຊໂປນ ແຂວງສະຫວັນນະເຂດ. ສະເພາະ ບ້ານຕົວແບບ ເມືອງຮ້ຽມ ແລະ ເມືອງຊ່ອນ ໄດ້ທໍາການຜະລິດ ເພື່ອຄໍ້າປະກັນສະບຽງອາຫານ ຕິດພັນກັບການອະນາໄມ 3 ສະອາດ ແລະ ການສ້າງວິດຖ່າຍໃນຄອບຄົວ ໄດ້ກາຍເປັນບ້ານສາທາລະນະສຸກແບບຢ່າງ ກ້າວໄປສູ່ການແກ້ໄຂການກີນຖືກຫລັກໂພຊະນາການ ເທື່ອລະກ້າວ.
ສັງລວມແລ້ວ ທລຍ II (2012-2016) ໄດ້ປະກອບສ່ວນເຂົ້າໃນການພັດທະນາເມືອງທຸກຍາກ ກາຍເປັນເມືອງພົ້ນທຸກ 6 ເມືອງຄື: ເມືອງພູຄູນ, ເມືອງຄູນ, ເມືອງວິລະບູລີ, ເມືອງບາຈຽງຈະເລີນສຸກ, ເມືອງສຸຂຸມາ ແລະ ເມືອງທ່າໂທມ.
ຍ້ອນຜົນງານທີ່ຍາດມາໄດ້ນັ້ນ, ທະນາຄານໂລກ ຈຶ່ງໄດ້ສະແດງເຈດຈໍານົງ ໃຫ້ການສືບຕໍ່ ໂຄງການກອງທຶນຫຼຸດຜ່ອນຄວາມທຸກຍາກ ທລຍ ໄລຍະ 3, ຊຶ່ງໃນວັນທີ 28 ເມສາ 2016 ໄດ້ມີການເຈລະຈາຂອງຄະນະວິຊາການ ຝ່າຍລາວ ແລະ ຄະນະວິຊາການຂອງທະນາຄານໂລກ ກ່ຽວກັບໂຄງການ ທລຍ 3 ຊຶ່ງໄດ້ຮັບຜົນສໍາເລັດໃນເບື້ອງຕົ້ນທຶນທັງໝົດຂອງ ທລຍ 3 ຈໍານວນ 52 ລ້ານໂດລາສະຫະລັດ (30 ລ້ານໂດລາຈາກທະນາຄານໂລກ, 16 ລ້ານໂດລາຈາກອົງການ ເພື່ອການພັດທະນາຂອງປະເທດສະວິດເຊີແລນ ແລະ 6 ລ້ານຈາກ ສປປ ລາວ).
ຄາດຄະເນວ່າ ທລຍ 3 ຈະໄດ້ຖືກຈັດຕັ້ງປະຕິບັດໃນປີ (2017-2019) ໂດຍກວາມເອົາ 40 ເມືອງຂອງ 10 ແຂວງເປົ້າໝາຍຂອງ ທລຍ.
