Lao
Englishກອງປະຊຸມຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ (ຄພທສ) ແລະ ບັນດາຜູ້ໃຫ້ທຶນກ່ຽວກັບການທົບທວນຄືນໃນການດໍາເນີນວຽກງານ ທລຍ 2 ໄລຍະກາງສະໄໝ
ໂດຍ: ແສງອາລຸນ ພິລາຈັນ
ທລຍ 2 ມີກຳນົດເວລາໃນການດຳເນີນໂຄງການ 5 ປີ (2011-2016)ກ່ອນທີ່ຈະກ້າວສູ່ເຄີ່ງໄລຍະທ້າຍ ຂອງໂຄງການ. ມາຮອດປະຈຸບັນຖືວ່າໂຄງການ ທລຍ 2 ໄດ້ເດີນທາງມາເປັນເວລາເຄີ່ງທາງພໍດີ ສະນັ້ນໃນວັນທີ 30 ມັງກອນ 2014 ຈຶ່ງໄດ້ມີການຈັດກອງປະຊຸມສະຫລຸບກາງສະໄໝ ລະຫວ່າງ ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ (ຄພທສ) ກັບ ບັນດາຜູ້ໃຫ້ທຶນຂຶ້ນທີ່ໂຮງແຮມລາວພຣາຊາ ທັ້ງນີ້ກໍເພື່ອເປັນການປະເມີນຜົນເບີ່ງຜົນໄດ້ຮັບລວມທັງຜົນກະທົບຂອງໂຄງການ ຕ່ໍການພັດທະນາຊົນນະບົດ ແລະ ລຶບລ້າງຄວາມທຸກຍາກຢູ່ ສ ປ ປ ລາວ ເວົ້າລວມ, ເວົ້າສະເພາະຢູ່ໃນຂົງເຂດພື້ນທີ່ເປົ້າໝາຍຂອງໂຄງການ ອີກດ້ານໜຶ່ງ ກໍເພື່ອເປັນການເສີມຂະຫຍາຍປະສິດທິຜົນຂອງການຮ່ວມມື, ສົ່ງເສີມຄວາມເຂົ້າໃຈອັນດີ ລະຫວ່າງ ລັດຖະບານ ສປປ ລາວ ເວົ້າລວມ, ເວົ້າສະເພາະ ຄພທສ ກັບຄູ່ຮ່ວມພັດທະນາ ແລະ ຜູ້ໃຫ້ທຶນ, ທັງເປັນການຜັນຂະຫຍາຍເນື້ອໃນຈິດໃຈຂອງກອງປະຊຸມໂຕະມົນຄັ້ງທີ 13 ໂດຍສຸມໃສ່ຈັດຕັ້ງປະຕິບັດບັນດາເປົ້າໝາຍສະຫັດສະວັດດ້ານການພັດທະນາ ໃນໄລຍະເຄິ່ງສະໄໝ ທີ່ຍັງເຫລືອ ໃຫ້ມີຄວາມກ້າວໜ້າ ຖືກຕາມຈຸດສຸມບຸລິມະສິດ ແລະ ມີຄວາມເປັນເອກະພາບໃນລວງດຽວກັນດີຂຶ້ນກວ່າເກົ່າ.
ກອງປະຊຸມໃນຄັ້ງນີ້ ໄດ້ຮັບກຽດການເປັນປະທານຂອງທ່ານ ບຸນເຮືອງ ດວງພະຈັນ, ລັດຖະມົນຕີປະຈໍາຫ້ອງວ່າການລັດຖະບານ, ຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນສູນກາງ, ປະທານສະພາບໍລິຫານ ກອງທຶນຫລຸດຜ່ອນຄວາມທຸກຍາກ ແລະ ການເຂົ້າຮ່ວມຂອງຜູ້ຕາງໜ້າຂອງຫ້ອງວ່າການລັດຖະບານ, ກະຊວງການຕ່າງປະເທດ, ກະຊວງແຜນການ ແລະ ການລົງທຶນ, ກະຊວງການເງິນ, ກະຊວງພາຍໃນ, ກະຊວງກະສິກໍາ ແລະ ປ່າໄມ້, ຫ້ອງການ ຄພທສ, ຄຊກລ, ຄກລ ແລະ ບັນດາຜູ້ໃຫ້ທຶນທີ່ມາຈາກພາກສ່ວນ: ທະນາຄານໂລກ, ອົງການເພື່ອການພັດທະນາ ແລະ ການຮ່ວມມືຂອງປະເທດສະວິດເຊີແລນ, ກົມການຄ້າ ແລະ ພົວພັນຕ່າງປະເທດຂອງປະເທດອົດສະຕຣາລີ, ແລະ ຫ້ອງການ ທລຍ ເຂົ້າຮ່ວມຈໍານວນທັງໝົດ 40 ຄົນ; ໃນນັ້ນ ຍິງ 10 ຄົນ.
ທີ່ກອງປະຊຸມໄດ້ມີການນໍາສະເໜີຈຸດເດັ່ນຂອງການຮ່ວມມືໃນໄລຍະເຄິ່ງສະໄໝຜ່ານມາ ໂດຍເນັ້ນໃສ່ການຈັດຕັ້ງປະຕິບັດຄາດໝາຍສູ້ຊົນທາງດ້ານແກ້ໄຂຄວາມທຸກຍາກ ທີ່ນອນໃນ MDG1, ທິດທາງ, ຄາດໝາຍສູ້ຊົນ ແລະ ບັນດາຈຸດສຸມໃນປີ 2014 ແລະ 2015 ແລະ ມາດຕະການໃນການສູ້ຊົນ ບັນລຸຄາດໝາຍດັ່ງກ່າວ, ຊີ້ແຈງແນວທາງນະໂຍບາຍຂອງລັດຖະບານ ໂດຍສະເພາະ ແມ່ນນະໂຍບາຍການແກ້ໄຂຄວາມທຸກຍາກ, ສ້າງບ້ານໃຫ້ກາຍເປັນຫົວໜ່ວຍພັດທະນາ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ, ການຈັດສັນພູມລໍາເນົາຄົງທີ່ບ່ອນທໍາມາຫາກິນຖາວອນອາຊີບໝັ້ນທ່ຽງໃຫ້ປະຊາຊົນບັນດາເຜົ່າ.
ໃນທີ່ປະຊຸມຜູ້ໃຫ້ທຶນກໍຍັງໄດ້ຮັບຟັງການສະເໜີວິໃສທັດການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ່ 8(2016-2020) ຕໍ່ໜ້າ, ແຜນຍຸດທະສາດພັດທະນາເຂດເນີນສູງ.
ຜ່ານການປຶກສາຫາລືທີ່ປະຊຸມ ບັນດາຄູ່ຮ່ວມພັດທະນາ ແລະ ຜູ້ໃຫ້ທຶນ ໄດ້ສັງເກດຕີລາຄາໝາກຜົນທີ່ທາງຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນສູນກາງ ກໍຄື ທລຍ ສາມາດບັນລຸຄາດໝາຍໃນລະດັບໜຶ່ງ ແລະ ມີແຜນການປັບປຸງຊຸກຍູ້ໃຫ້ ທລຍ ມີຄວາມເຂັ້ມແຂງໃນການພັດທະນາກວ່າເກົ່າ ກ້າວໄປສູ່ບັນລຸເປົ້າໝາຍຂອງ MDG1 ເພື່ອນຳເອົາຜົນປະໂຫຍດ ມາສູ່ພ່ໍແມ່ປະຊາຊົນຜູ້ທຸກຍາກ ທີ່ດຳລົງຊີວິດຢູ່ໃນເຂດຊົນນະບົດຫ່າງໄກສອກຫລີກ ຈຳນວນ 1967 ບ້ານ ທີ່ນອນໃນ 278 ກຸ່ມບ້ານ ຂອງ 42 ເມືອງ ໃນ 10 ແຂວງ ໂດຍສະເພາະໃຫ້ສາມາດເຂົ້າເຖິງໂຄງລ່າງພື້ນຖານອັນຈຳເປັນທີ່ສຸດກ່ອນ.
ພ້ອມກັນນີ້ ກໍໄດ້ມີການປຶກສາຫາລືລະຫວ່າງລັດຖະບານກັບຄູ່ຮ່ວມງານ ແລະ ຜູ້ໃຫ້ທຶນເຖິງການກະກຽມ ທລຍ 3 (2016-2020) ໃນຕໍ່ໜ້າ, ບັນຫາສໍາຄັນທີ່ບໍ່ທັນໄດ້ຈັດຕັ້ງປະຕິບັດຜ່ານມາແມ່ນບັນຫາການສ້າງລາຍຮັບໃຫ້ປະຊາຊົນບັນດາເຜົ່າ ໂດຍແນໃສ່ແກ້ໄຂຄວາມທຸກຍາກຢ່າງຍືນຍົງ ເຮັດໃຫ້ຊີວິດການເປັນຢູ່ຂອງປະຊາຊົນດີຂື້ນເປັນກ້າວໆໃນອະນາຄົດ.
ທ່ານ ບຸນເຮືອງ ດວງພະຈັນ, ໄດ້ກ່າວເນັ້ນທີ່ກອງປະຊຸມວ່າ: “ອີກບັນຫາໜຶ່ງທີ່ສໍາຄັນ ແມ່ນຢາກສະເໜີ ໃຫ້ຜູ້ໃຫ້ທຶນຄົ້ນຄວົ້ກ່ຽວກັບ ທລຍ ໄລຍະ 3, ເພາະວ່າ ທລຍ ໄລຍະທີ 2 ໄດ້ສ້າງພື້ນຖານໂຄງລ່າງຊົນນະບົດ ສ້າງຄວາມເຂັ້ມແຂງໃຫ້ປະຊາຊົນ ແລະ ສາມາດແກ້ໄຂຄວາມທຸກຍາກໄດ້ໃນລະດັບໜຶ່ງ ແຕ່ບັນຫາທີ່ຍັງບໍ່ທັນເຮັດໄດ້ ແມ່ນການສ້າງລາຍຮັບໃຫ້ແກ່ຊຸມຊົນ. ພ້ອມກັນນັ້ນ ຂໍຮຽກຮ້ອງມາຍັງຜູ້ໃຫ້ທຶນຕ່າງໆ ຈົ່ງສົ່ງເສີມຄວາມເຂົ້າໃຈອັນດີ, ເພີ້ມທະວີ ປະສິດທິຜົນຂອງການຮ່ວມມືລະຫວ່າງລັດຖະບານ ແລະ ຄູ່ຮ່ວມພັດທະນາ ໃຫ້ແໜ້ນແຟ້ນຍິ່ງຂຶ້ນ ແນໃສ່ບັນລຸເປົ້າໝາຍສະຫັດສະວັດແຫ່ງການພັດທະນາ ທີ່ ສປປ ລາວ ແລະ ວົງສາຄະນະຍາດສາກົນໄດ້ມີພັນທະຮ່ວມກັນ”.
