Lao
Englishການລົງຕິດຕາມກວດກາການຈັດຕັ້ງປະຕິບັດໂຄງການຍ່ອຍ ຢູ່ 2 ແຂວງເປົ້າໝາຍ
ໂດຍ: ປອ. ຫັດທະຈັນ ພິມພັນທະວົງ
ເພື່ອຕິດຕາມພາບລວມການຈັດຕັ້ງປະຕິບັດວຽກງານ ທລຍ ຢູ່ແຂວງຊຽງຂວາງ ແລະ ຫົວພັນ, ລວມທັງການກວດກາຄວາມຖືກຕ້ອງຂອງເພດານກຸ່ມ ແລະ ງົບປີສຸດທ້າຍຂອງສອງແຂວງ ເພື່ອເປັນແບບຢ່າງໃຫ້ແກ່ແຂວງອື່ນໆ ພ້ອມທັງແນະນຳສິ່ງທີ່ຕ້ອງເອົາໃຈໃສ່ ໃນການຈັດຕັ້ງປະຕິບັດວຽກງານໃນຕໍ່ໜ້າ, ເພື່ອທົດລອງການນຳໃຊ້ແບບສອບຖາມປະເມີນພາຍໃນກ່ຽວກັບຄຸນນະພາບໂຄງການຍ່ອຍ ແລະ ປະເມີນວຽກງານ ກຸ່ມຊ່ວຍເຫລືອເຊິ່ງກັນ ແລະ ກັນ (ກຊກ), ເພື່ອແນະນຳກ່ຽວກັບການເກັບຂໍ້ມູນວຽກງານ ສະແດງຄຳຄິດເຫັນ ແລະ ແກ້ໄຂບັນຫາ ໃຫ້ແກ່ທິມງານແຂວງ ແລະ ເມືອງ.
ສະນັ້ນ ໃນລະຫວ່າງວັນທີ 16-24 ສິງຫາ 2017 ຕາງໜ້າຄະນະຮັບຜິດຊອບໂຄງການ ທລຍ ຂັ້ນສູນກາງ ປອ. ຫັດທະຈັນ ພິມພັນທະວົງ, ຫົວໜ້າພະແນກຕິດຕາມ-ປະເມີນຜົນ ຈຶ່ງໄດ້ລົງເຮັດວຽກພາກສະໜາມຢູ່ແຂວງຊຽງຂວາງ ແລະ ຫົວພັນ ເຊິ່ງໃນນັ້ນ ໄດ້ໄປຢຽ້ມຢາມຊຸມຊົນບ້ານຖໍ້າເສືອ, ກຸ່ມບ້ານ ຄັງພະນຽນ, ເມືອງ ຫນອງແຮດ, ແຂວງ ຊຽງຂວາງ ເຊິ່ງໄດ້ຮັບການຊ່ວຍເຫລືອຈາກ ທລຍ ຄື: ຕະຂ່າຍໄຟຟ້າ ປີ 2008, ທະລຸເສັ້ນທາງຊົນນະບົດ ປີ 2011 ແລະ ໂຮງຮຽນປະຖົມທີ່ຫາກໍ່ສ້າງສຳເລັດ ປີ 2017 ແລະ ມອບໃຫ້ຊຸມຊົນເປັນຜູ້ຄຸ້ມຄອງ ແລະ ນໍາໃຊ້. ເພື່ອເປັນການຢ້ຽມຢາມຖາມຂ່າວເຖິງພໍ່ແມ່ປະຊາຊົນ, ຕິດຕາມການນຳໃຊ້ໂຄງການຍ່ອຍທີ່ ທລຍ ໄດ້ໃຫ້ການສະໜັບສະໜູນຈາກ ທລຍ 1 ແລະ ທລຍ 2 ແລະ ຕິດຕາມຄວາມຄືບໜ້າຂອງການກໍ່ສ້າງໂຄງການຍ່ອຍຂອງ ທລຍ 3 ໃນຮອບວຽນທີ 14; ເຊິ່ງຊຸມຊົນແມ່ນມີຄວາມເພິ່ງພໍໃຈ ແລະ ຂອບໃຈມາຍັງ ທລຍ ແຂວງ ແລະ ສູນກາງ ກໍຄືພັກ ແລະ ລັດຖະບານ ທີ່ໄດ້ໃຫ້ການຊ່ວຍເຫຼືອບ້ານຂອງເຂົາເຈົ້າ. ນອກຈາກນັ້ນຊຸມຊົນ ກໍ່ໄດ້ຍົກໃຫ້ເຫັນເຖິງຄວາມແຕກຕ່າງລະຫວ່າງ ກ່ອນ ແລະ ຫຼັງທີ່ມີການທະລຸເສັ້ນທາງໂດຍ ທລຍ ຄືວ່າ: ກ່ອນໜ້າທີ່ ທລຍ ຍັງບໍ່ໄດ້ຊ່ວຍເຫຼືອ ຊຸມຊົນພາຍໃນບ້ານ ແມ່ນມີຄວາມຫຍຸ້ງຍາກຫຼາຍທີ່ສຸດ, ການໄປມາຫາສູ່ກັນກໍ່ພົບຄວາມຫຍຸ້ງຍາກ, ບໍ່ມີໄຟຟ້າໃຊ້, ເດັກນ້ອຍພາຍໃນບ້ານກໍ່ຫຍຸ້ງຍາກໃນການຮ່ຳຮຽນໜັງສື, ພາຍໃນບ້ານມີສິນຄ້າກໍ່ບໍ່ສາມາດນຳອອກໄປຂາຍຢູ່ຕະຫຼາດໄດ້ ແຕ່ພາຍຫຼັງທີ່ ທລຍ ເຂົ້າມາໃຫ້ການຊ່ວຍເຫຼືອ ໂຄງການປະເພດດັ່ງກ່າວ ໄດ້ເຮັດໃຫ້ຊີວິດການເປັນຢູ່ຂອງຊຸມຊົນດີຂຶ້ນຫຼາຍ, ມີການໄປມາຫາສູ່ກັນໄດ້ສະດວກ, ສາມາດນຳເອົາສິນຄ້າອອກໄປຂາຍ ແລະ ມີພໍ່ຄ້າແມ່ຄ້າ ເຂົ້າມາຊື້ເອົາສິນຄ້າຢູ່ພາຍໃນບ້ານ ເປັນຕົ້ນແມ່ນ ໝາກໝັ້ນ, ໝາກຄາຍ ແລະ ອື່ນໆ, ມີໄຟຟ້ານຳໃຊ້ທີ່ສາມາດຕໍ່າຫູກໃນຕອນຄໍ່າ ແລະ ມີໂຮງຮຽນເຮັດໃຫ້ເດັກນ້ອຍພາຍໃນບ້ານກໍ່ໄດ້ເຂົ້າຮຽນຕາມເກນອາຍຸ ແລະ ບໍ່ແອອັດຄືໄລຍະຜ່ານມາ.
ຫລັງຈາກນັ້ນ ໄດ້ໄປຢ້ຽມຢາມບ້ານຕອງ, ກຸ່ມບ້ານໂພນທອງ, ເມືອງ ວຽງໄຊ, ແຂວງຫົວພັນ ເຊິ່ງໄດ້ຮັບການຊ່ວຍເຫລືອໃນການກໍ່ສ້າງໂຮງຮຽນ ປະຖົມ 1 ຫລັງຈາກ ທລຍ 3, ຮອບວຽນ 14(ປີ2017), ເລີ່ມກໍ່ສ້າງຕັ້ງແຕ່ ເດືອນ ກໍລະກົດ 2017 ແລະ ຄາດວ່າຈະສໍາເລັດພາຍໃນເດືອນກັນຍາ 2017 ນີ້.ເຊິ່ງຕົວແທນປະສານງານກຸ່ມບ້ານກໍ່ໄດ້ລາຍງານສະພາບລວມໃນການຈັດຕັ້ງປະຕິບັດ ໃນດ້ານການຮ່ວມຂັ້ນຕອນການເປີດຊອງປະມູນ, ການເລືອກຕົວແທນກຸ່ມບ້ານ, ການຄັດເລືອກຜູ້ຮັບເໝົາກໍ່ສ້າງ, ການຝຶກເຂົ້າອົບຮົມຕ່າງໆລ້ວນແລ້ວແຕ່ໄດ້ເຂົ້າຮ່ວມການຕັດສິນໃຈ ລວມໄປເຖິງການປະກອບ ສ່ວນຂອງຊຸມຊົນ ແລະ ອື່ນໆ ເຊິ່ງສາມາດເວົ້າໄດ້ວ່າ ທຸກສິ່ງທຸກຢ່າງແມ່ນມາຈາກປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນໂດຍແທ້ຈິງ.
