Lao
Englishທລຍ ສະໜັບສະໜູນ ການກໍ່ສ້າງຊົນລະປະທານ ບ້ານຫ້ວຍຄະ
ໂດຍ: ຂົງຄຳອີນຍະຊາງ
ໂຄງການກໍ່ສ້າງຊົນລະປະທານບ້ານຫ້ວຍຄະກຸ່ມບ້ານສະ ເມືອງລອງ ແຂວງຫຼວງນ້ຳທາ ແມ່ນໜື່ງໃນໂຄງການທີ່ໄດຮັບທຶນສະໜັບສະໜູນຈາກ ກອງທຶນຫຼຸດຜ່ອນຄວາມທຸກຍາກ (ທລຍ)ປະຈຳຮອບວຽນທີ12 (ສົກປີ 2014-2015) ໂດຍຜ່ານຂະບວນການວາງແຜນແບບມີສ່ວນຮ່ວມ ໃນທຸກໆຂັ້ນຕອນ ແລະ ສອດຄ່ອງກັບ ຄຳຂັວນຂອງພັກທີ່ວ່າ: “ທຸກສີ່ງທຸກຢ່າງມາຈາກປະຊາຊົນ ໂດຍປະຊາຊົນ ເພື່ອຜົນປະໂຫຍດຂອງປະຊາຊົນ“ ໂຄງການດັ່ງກ່າວ ມີຂະໜາດ 4x5 ແມັດ, ໂດຍນຳໃຊ້ງົບປະມານການກໍ່ສ້າງທັງໝົດ 77 ລ້ານກ່ວາກີບ, ໃນນັ້ນ ທຶນຂອງ ທລຍ 69 ລ້ານກ່ວາກີບ ແລະຊຸມຊົນປະກອບສ່ວນ 7 ລ້ານກ່ວາກີບເປັນຕົ້ນແມ່ນທາງດ້ານວັດຖຸທ້ອງຖີ່ນ ແລະ ແຮງງານຂອງຊຸມຊົນ, ໂດຍແມ່ນບໍລິສັດພອນຈະເລີນ ເປັນຜູ້ຮັບເໝົາກໍ່ສ້າງ, ເຊີ່ງລົງມືຈັດຕັ້ງປະຕິບັດໂຄງການ ມາແຕ່ວັນທີ 3/4/2015 ແລະ ມາຮອດປະຈຸບັນສຳເລັດ 100% .
ໃນນັ້ນທີມງານທລຍ ແລະພາກສ່ວນທີ່ກ່ຽວຂ້ອງຂັ້ນເມືອງລົງໄປກວດ100% ໃນຄັ້ງວັນທີ 3 ມິຖຸນາ 2015 ເຊີ່ງມີທ່ານກຸມແສງອີນສະຫວັດຫົວໜ້າໜ່ວຍງານກໍ່ສ້າງຮາກຖານຈາກຫ້ອງການພັດທະນາຊົນນະບົດ ແລະລືບລ້າງຄວາມທຸກຍາກເມືອງ ພ້ອມດ້ວຍພາກສ່ວນທີ່ກ່ຽວຂ້ອງສົມທົບກັບບໍລິສັດຜູ້ຮັບເໝົາ-ກໍ່ສ້າງລົງໄປກວດກາໂຄງການດັ່ງກ່າວ ເຫັນວ່າສຳເລັດ100% ແລະ ຖືກຕ້ອງຕາມມາດຕະຖານເຕັກນິກທີ່ໄດ້ກໍານົດໄວ້ ພ້ອມນີ້ທາງບໍລິສັດຜູ້ຮັບເໝົາກໍສ້າງຍັງຈະໄດ້ໃຫ້ການຄໍ້າປະກັນເປັນເວລາ 1 ປີຕື່ມອີກ.
ພາຍຫຼັງໂຄງການກໍ່ສ້າງໄດ້ສຳເລັດລົງແລ້ວ ໄດ້ມອບໂຄງການດັ່ງກ່າວໃຫ້ແກ່ພໍ່ແມ່ປະຊາຊົນພາຍໃນບ້ານ ເປັນຜູ້ຄຸ້ມຄອງ ແລະ ຊົມໃຊ້ ໂດຍໄດ້ແບ່ງຄວາມຮັບຜິດຊອບໃຫ້ແກ່ແຕ່ລະຄອບຄົວເພື່ອສ້າງຄວາມສະ ດວກສະບາຍໃນການຊົມໃຊ້, ໃນນັ້ນ ໄດ້ສ້າງກອງທຶນບູລະນະສ້ອມແປງຂັ້ນບ້ານຂຶ້ນ ເພື່ອນໍາໃຊ້ເງິນໃນກໍລະນີທີ່ຊົນລະປະທານເກີດມີການເປ່ເພເສຍຫາຍເຊິ່ງຊ່ວຍເຮັດໃຫ້ໂຄງການດັ່ງກ່າວມີຄວາມຍືນຍົງ ແລະ ເຮັດໃຫ້ປະຊາຊົນບ້ານຫ້ວຍຄະ ແລະ ປະຊາຊົນ ພາຍໃນກຸ່ມບ້ານສະ ເມືອງລອງ ມີຄວາມສະດວກສະບາຍໃນການເຮັດການກະເສດຕ່າງໆ ໄດ້ສອງລະດູ ອັນເປັນເງື່ອນໄຂ ເຮັດຊ່ວຍແກ້ໄຂຄວາມທຸກຍາກຂອງປະຊາຊົນບ້ານຫ້ວຍຄະ ກໍຄືປະຊາຊົນພາຍໃນກຸ່ມບ້ານສະ ໃນລະດັບໃດໜຶ່ງ.
