Lao
Englishທາງເຂົ້າບ້ານໜອງໄຊ ກຸ່ມບ້ານຫົວຊຽງ ເມືອງຊຳໃຕ້ ໄດ້ຮັບພັດທະນາ
ໂດຍ: ທລຍ
ບ້ານໜອງໄຊຕັ້ງຢູ່ຫ່າງຈາກເທດສະບານເມືອງຊໍາໃຕ້ໄປທາງທິດຕາເວັນ ຕົກສ່ຽງເໜືອປະມານ 93 ກິໂລແມັດ, ເປັນບ້ານຊົນເຜົ່າມົ່ງ, ປະກອບມີ 34 ຫຼັງຄາເຮືອນ, ພົນລະເມືອງທັງໝົດ 314 ຄົນ, ຍິງ 142 ຄົນ ອາຊີບຕົ້ນຕໍແມ່ນເຮັດໄຮ່ ເຮັດນາ ອາຊີບສໍາຮອງແມ່ນລ້ຽງສັດ ແລະ ເກັບເຄື່ອງປ່າຂອງດົງ. ບ້ານດັ່ງກ່າວ ແຕ່ກ່ອນແມ່ນເປັນພຽງຄຸ້ມໜຶ່ງຂຶ້ນກັບບ້ານໜອງແຮດຕົກມາຮອດ ຕົ້ນປີ 2016 ທາງພັກ-ລັດ ຂັ້ນເທີິງໄດ້ເຫັນດີໃຫ້ສ້າງຕັ້ງ ເປັນບ້ານໜອງໄຊໂດຍສະເພາະ.
ອິງຕາມບຸລິມະສິດຄວາມຕ້ອງການຂອງຊຸມຊົນທີ່ໄດ້ຜ່ານການວາງແຜນແຕ່ຂັ້ນບ້ານ, ກຸ່ມບ້ານ ແລະ ຂັ້ນເມືອງ ໃນປີ 2017 ຈຶ່ງໄດ້ຕົກລົງເຫັນດີໃຫ້ມີການກໍ່ສ້າງສ້ອມແປງທາງເຂົ້າຫາບ້ານໜອງໄຊ, ກຸ່ມບ້ານຫົວຊຽງ, ເມືອງຊໍາໃຕ້ ແຂວງຫົວພັນ ທີ່ມີຄວາມຍາວ 2,5 ກິໂລແມັດ, ຄວາມກວ້າງຂອງໜ້າທາງບ່ອນທີ່ມີ ຜາຫີນ ຄວາມກ້ວາງ ໜ້າທາງ ຕໍ່າສຸດ ແມ່ນບໍ່ໃຫ້ຫລຸດ 3 ແມັດ ແລະ ໜ້າດິນທົ່ວໄປແມ່ນໃຫ້ໄດ້ຄວາມກ້ວາງ 4 ແມັດ ແລະ ໄດ້ວາງທໍ່ນໍ້າລອດທາງໃສ່ 2 ຈຸດ ເຊິ່ງມີມູນຄ່າໃນການກໍ່ສ້າງສ້ອມແປງທັງໝົດ 116 ລ້ານກີບ ໃນນັ້ນ ຊຸມຊົນປະກອບສ່ວນທາງດ້ານແຮງງານ ຄິດເປັນເງິນ 10 ລ້ານກວ່າກີບ. ການກໍ່ສ້າງສ້ອມແປງທາງເຂົ້າຫາບ້ານດັ່ງກ່າວ ໄດ້ເລີ່ມລົງມື ແຕ່ວັນທີ 10/8/2017 ເຖິງວັນທີ 1/9/2017 ໄດ້ສໍາເລັດ.
ຜ່ານການກວດກາຂອງວິຊາການພ້ອມດ້ວຍຄະນະກໍາມະການຄັ້ງນີ້ ຈາກຜູ້ຕາງໜ້າ ຫ້ອງການ ຍທຂ ຂອງເມືອງ, ຫ້ອງການ ທລຍ ເມືອງ ຊໍາໃຕ້, ທີມງານ ທລຍ ຂັ້ນກຸ່ມບ້ານຫົວຊຽງ, ອໍານາດການປົກຄອງຂັ້ນກຸ່ມ, ອໍານາດການປົກຄອງຂັ້ນບ້ານ ແລະ ພໍ່ແມ່ປະຊາຊົນພາຍໃນບ້ານໜອງໄຊ ເຂົ້າຮ່ວມທັງໝົດມີ 94 ທ່ານ ຍີິງ 51 ທ່ານເຫັນວ່າ: ການສ້ອມແປງ ແລະ ວາງທໍ່ນໍ້າລອດທາງໄດ້ເຮັດສໍາເລັດ ແລະ ຖືກຕ້ອງຕາມມາດຕະຖານເຕັກນິກຄົບຖ້ວນ ແລະ ມີຄວາມໂປ່ງໃສ ດັ່ງນັ້ນ ໃນວັນທີ 6 ພະຈິກ 2017 ທາງ ຄະນະກໍາມະການກວດກາ ຈິ່ງໄດ້ມອບໂຄງການກໍ່ສ້າງສ້ອມແປງທາງເຂົ້າຫາບ້ານດັ່ງກ່າວ ໃຫ້ແກ່ຊຸມຊົນ ແລະ ອໍານາດການປົກຄອງບ້ານໜອງໄຊເປັນຜູ້ຊົມໃຊ້ ແລະ ປົກປັກຮັກສາໃຫ້ມີຄວາມຍືນຍົງ ເກີດຜົນປະໂຫຍດຢ່າງກຸ້ມຄ່າ.
