Lao
Englishຜູ້ປະສານງານທີ່ເຂັ້ມແຂງ
ໂດຍ: ສິນນະຄອນ ອິນທິລາດ
ນາງ ອິນຕາ ໄຂຄໍາພິທູນ ແມ່ນຜູ້້ປະສານງານກຸ່ມບ້ານມັນຈີ (ກຸ່ມທີ 4) ເມືອງເຊໂປນ ແຂວງສະຫວັນນະເຂດ, ນາງອິນຕາ ແມ່ນຜູ້ປະສານງານໃນຈຳນວນ 3 ຄົນ ທີ່ເຮັດວຽກປະສານງານວຽກງານ ທລຍ, ລາວປະຕິບັດວຽກງານຄຽງບ່າຄຽງໄລ່ກັບຜູ້ປະສານງານ ຜູ້ຊາຍຄົນອື່ນໆ ໄດ້ຢ່າງສະດວກສະບາຍ ແລະ ສາມາດເຮັດວຽກຮ່ວມກັນເປັນທີມໄດ້ຢ່າງມີປະສິດທິພາບ, ນາງ ອິນຕາ ຮັບຜິດຊອບເປັນຜູ້ປະສານງານກຸ່ມບ້ານເລີ່ມແຕ່ປີ 2003 ເຊິ່ງເປັນປີທໍາອິດທີ ທລຍ ເຂົ້າມາສະໜັບສະໜູນກິດຈະກໍາ ດ້ານພື້ນຖານໂຄງລ່າງ ຊຶ່ງສ້າງເງື່ອນໄຂໃນການຫຼຸດ ຜ່ອນຄວາມທຸກຍາກຂອງປະຊາຊົນບັນດາເຜົ່າໃນຊຸມຊົນລາວເອງ.
ນາງ ອິນຕາ ອາຍຸໄດ້ 45 ປີແລ້ວ ແຕ່ລາວກໍ່ຍັງມີຄວາມຫ້າວຫັນໃນການຈັດຕັ້ງປະຕິບັດວຽກງານຮ່ວມກັບ ທລຍ. ສະນັ້ນ ໃນການເລືອກຕັ້ງ ຜູ້ປະສານງານກຸ່ມ ໃນແຕ່ລະປີ ຢູ່ກອງປະຊຸມທົບທວນ ລະ ວາງແຜນພັດທະນາກຸ່ມບ້ານ ລາວຈຶ່ງໄດ້ຮັບການເລືອກຕັ້ງເຂົ້າມາເປັນປະສານງານກຸ່ມບ້ານໃນທຸກໆປີ ແລະ ປະຈຸບັນ ນີ້ກໍແມ່ນຮອບວຽນ ທີ 12 (2014-2015) ແລ້ວ ໝາຍຄວາມວ່າຕະຫຼອດໄລຍະ 12 ປີໃນໜ້າທີ່ຮັບຜິດຊອບເປັນຜູ້ປະສານງານ ລາວໄດ້ຮັບການເສີມສ້າງຄວາມເຂັ້ມແຂງ ແລະ ພັດທະນາທັກສະ; ຄວາມສາມາດ ໃນດ້ານການວາງແຜນພັດທະນາ, ການເປັນຄູຝຶກ, ການເປັນຜູ້ອຳນວຍຄວາມສະດວກ, ການບໍລິຫານການເງິນໂຄງ ການຍ່ອຍ ແລະ ການດຳເນີນຂະບວນການຈັດຊື້-ຈັດຈ້າງໂດຍຊຸມຊົນເອງ. ປະສົບການ ແລະ ຄວາມຮູ້ຄວາມສາມາດທີ່ລາວມີຜ່ານມານັ້ນ ໄດ້ຊ່ວຍ ນຳເອົາສິດຜົນປະໂຫຍດຕ່າງໆມາພັດທະນາກຸ່ມບ້ານຂອງລາວ ຊຶ່ງເປັນກຸ່ມບ້ານທີ່ຢູ່ຫ່າງໄກສອກຫຼີກ; ທຸກຍາກ;ເຊິ່ງມີທັງໝົດ 8 ບ້ານ.
ນາງ ອີນຕາ ໄດ້ອໍານວຍຄວາມສະດວກ (ເປັນຜູ້ນຳພາ) ໃນກອງປະຊຸມວາງແຜນພັດທະນາບ້ານ ແລະ ກຸ່ມບ້ານແຕ່ລະປີ; ຕິດຕາມການຈັດຕັ້ງປະຕິບັດໂຄງການຍ່ອຍຂອງແຕ່ລະບ້ານທີ່ໄດ້ຮັບການສະໜັບ ສະໜູນດ້ານພື້ນຖານໂຄງລ່າງຈາກ ທລຍ, ນອກຈາກນີ້ແລ້ວ ລາວຍັງຊ່ວຍນຳເອົາແຜນພັດທະນາບ້ານຕ່າງໆ ພາຍໃນກຸ່ມບ້ານຂອງລາວ ໄປສະເໜີກັບໂຄງການພັດທະນາອື່ນໆ ທີ່ໃຫ້ການຊ່ວຍເຫຼືອ ຢູ່ພາຍໃນເມືອງເຊໂປນ ຈົນຖືກຈັດຕັ້ງປະຕິບັດຫຼາຍໆໂຄງການ ເປັນຕົ້ນແມ່ນໂຄງການກໍ່ສ້າງນໍ້າບາດານ, ໂຄງການກໍ່ສ້າງຕາຄ່າຍໄຟຟ້າ, ໂຄງການສະໜອງຕູ້ຢາປະຈໍາບ້ານ, ທະນາຄານເຂົ້າ ແລະ ອື່ນໆ...ເຊິ່ງເປັນເຫດຜົນເຮັດໃຫ້ຊຸມຊົນ ຢູ່ໃນຈໍານວນບ້ານທີ່ຢູໃນກຸ່ມທີ່ລາວຮັບຜິດຊອບນັ້ນ ມີຄວາມເຂັ້ມແຂງ ເຂົ້າອົກເຂົ້າໃຈໃນການປະກອບສ່ວນເຂົ້າໃນການຈັດ ຕັ້ງປະຕິບັດວຽກງານໄດ້ດີ ເປັນຕົ້ນແມ່ນການເຂົ້າຮ່ວມໃນການວາງແຜນການແບບມີສ່ວນຮ່ວມການມີສ່ວນຮ່ວມໃນຈັດຕັ້ງປະຕິບັດໂຄງການຍ່ອຍ ແລະ ມີສ່ວນຮ່ວມໃນການປົກປັກຮັກສາຄຸ້ມຄອງ ນໍາໃຊ້.
ກ່ຽວກັບວຽກງານ ການຮັບຄໍາຄິດຄໍາເຫັນ ແລະ ແກ້ໄຂບັນຫາ ທີ່ມີໃນຊຸມຊົນ ລາວກໍແມ່ນຢູ່ໃນ ຄະນະກໍາມະການ ກສກ ຂັ້ນກຸ່ມ ລາວກໍໄດ້ມີການຕິດຕາມ ແລະເປີດຕູ້ຮັບຄໍາເຫັນ ທີ່ຕິດຢູ່ຫໍຂ່າວຂອງກຸ່ມບ້ານ ຊຶ່ງເປັນຊ່ອງທາງໃຫ້ຊຸມຊົນໄດ້ສະແດງຄໍາຄິດຄໍາເຫັນ ແລະ ເປັນປະໂຫຍດໃນການຈັດຕັ້ງປະຕິບັດໂຄງການ ຮັບປະກັນຄວາມໂປ່ງໃສສາມາດກວດສອບໄດ້. ນາງ ອິນຕາ ໄດ້ເຄີຍໃຫ້ສໍາພາດກັບພະນັກງານ ທລຍ ພວກເຮົາກ່ຽວກັບການເຮັດວຽກງານຜ່ານມາ ແລະ ສິ່ງທີ່ເປັນແຮງຜັກດັນເຮັດໃຫ້ລາວມີຄວາມເຂັ້ມແຂງ ໝາຍເຖີງວ່າມີຄວາມສາມາດ ໃນການຕິດຕາມກວດກາຈັດຕັ້ງປະຕິບັດໂຄງການຍ່ອຍ…ລາວເວົ້າວ່າ “ ແຕ່ກ່ອນລາວກໍ່ຍັງບໍ່ທັນມີຄວາມລື້ງເຄີຍໃນການເຮັດວຽກ ເປັນຕົ້ນແມ່ນການເປັນຜູ້ປະສານງານ ແຕ່ໃນເມື່ອປະຊາຊົນໄດ້ເລືອກ ໃຫ້ມາຮັບຜິດຊອບວຽກງານດັ່ງກ່າວນີ້ກໍໄດ້ຕັດສິນໃຈສູງ ຕັ້ງອົກຕັ້ງໃຈ ຄິດວ່າ ທລຍ ກໍ່ຄືອົງການຊ່ວຍເຫຼືອຈາກສາກົນ ເພີ່ນຍັງໃຫ້ການຊ່ວຍເຫຼືອປະຊາຊົນລາວ ໂດຍສະເພາະປະຊາຊົນໃນກຸ່ມຂອງເຮົາ ສະນັ້ນເຮົາເປັນຄົນລາວ ເປັນພີ່ ນ້ອງຢູ່ໃນກຸ່ມດຽວກັນ ມີຊ່ອງທາງໃດທີ່ຈະຊ່ວຍກັນໄດ້ ເຮົາຕ້ອງຕັດສິນໃຈເຮັດເພື່ອນໍາພາກັນໄປເຖີງເປົ້າໝາຍ ”
