Lao
English
15 ປີການຈັດຕັ້ງປະຕິບັດວຽກງານ ຂອງ ທລຍ ຊ່ວຍປະກອບສ່ວນໃຫ້ຊຸມຊົນໃນບັນດາເມືອງເປົ້າໝາຍຂອງ ແຂວງສະຫວັນນະເຂດ ມີຄວາມເຂັ້ມແຂງ
ໂດຍ: ທລຍ
ເພື່ອປະຕິບັດຕາມແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020 ) ແລະ ຜັນ ຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ໂດຍສະເພາະບຸກທະລຸທັງສີ່ດ້ານ ເພື່ອສ້າງພື້ນຖານ ແລະ ເງື່ອນ ໄຂອັນຈໍາເປັນສໍາລັບການນໍາເອົາປະເທດຊາດຂອງພວກເຮົາຫຼຸດພົ້ນອອກຈາກຄວາມດ້ອຍພັດທະນາໃນປີ 2020. ປະ ຕິບັດຕາມແນວທາງນະໂຍບາຍຂອງພັກ ແລະ ລັດ ກ່ຽວກັບການຫຼຸດຜ່ອນຄວາມທຸກຍາກຢູ່ເຂດຊົນນະບົດໄປຄຽງຄູ່ກັບການຄໍ້າປະກັນທາງດ້ານສະບຽງອາຫານ ແລະ ມີໂພຊະນາການທີ່ດີນັ້ນແມ່ນໜ້າທີ່ຂອງພົນລະເມືອງລາວທຸກຄົນທີ່ຈະຕ້ອງເອົາໃຈໃສ່ສ້າງເສດຖະກິດຄອບຄົວໃຫ້ມີຢູ່ມີກິນ, ພ້ອມດຽວກັນນັ້ນ, ພັກ-ລັດ ໄດ້ມີນະໂຍບາຍໃນດ້ານວຽກງານ ພັດທະນາຊົນນະບົດ ແລະ ລືບລ້າງຄວາມທຸກຍາກໃຫ້ໄດ້ຕາມແຜນການທີ່ວາງໄວ້ໂດຍສະເພະ ສະຫັດສະຫວັດດ້ານ ການພັດທະນາ(MDGs) ທີ່ອົງການສາກົນໄດ້ມີການນຳນົດໃຫ້ບັນລຸເປົ້າໝາຍໄປຕາມທິດທາງດຽວກັນເຊິ່ງປະກອບມີຄື: ເປົ້າໝາຍທີ 1). ເປັນເປົ້າໝາຍທີ່ສຳຄັນທີ່ສຸດໃນການຈັດຕັ້ງປະຕິບັດເພື່ອແກ້ໄຂຄວາມທຸກຍາກ, ການຄ້ຳປະກັນສະ ບຽງອາຫານ ແລະ ໂພສະນາການ, ເປົ້າໝາຍທີ 2). ໃຫ້ທຸກຄົນໄດ້ຮັບການສືກສາຂັນປະຖົມຢ່າງທົວເຖີງ, ເປົ້າໝາຍທີ 3). ສົງເສີມບົດບາດຍີງ-ຊາຍ ແລະ ສ້າງຄວາມເຂັມແຂງໃຫ້ແກ່ແມ່ຍີງ, ເປົ້າໝາຍທີ 4). ຫຼຸດຜ່ອນອັດຕາການເສັຍຊີວິດຂອງເດັກນ້ອຍ, ເປົ້າໝາຍທີ 5). ປັບປຸງສຸຂະພາບຂອງແມ່, ເປົ້າໝາຍທີ 6). ຕ້ານກັບເຊື້ອພະຍາດ HIV/AIDS, ມະລາເຣຍ ແລະ ພະຍາດອື່ນໆ, ເປົ້າໝາຍທີ 7). ຮັບປະກັນຄວາມຍືນຍົງທາງດ້ານສິ່ງແວດລ້ອມ, ເປົ້າໝາຍທີ 8). ສ້າງຄູ່ຮ່ວມງານດ້ານການພັດທະນາ. ທັງໝົດນີ້ແມ່ນຈະຊ່ວຍໃນການສະໜັບສະໜູນໂດຍກົງ ຕໍ່ການຈັດຕັ້ງປະຕິບັດວຽກງານການຫຼຸດຜ່ອນຄວາມທຸກຍາກໃນຊົນນະບົດ, ເພີ່ມປະສິດທີພາບ ແລະ ປະສິດທິຜົນຂອງລະບົບກະສິກຳ ແລະ ສະບຽງອາຫານ. ລວມໄປເຖິງຂອງການປັບຕົວໃຫ້ເຂົ້າກັບສະພາບການປຽ່ນແປງດິນຟ້າອາກາດ.
ສະນັ້ນ ສຳລັບ ສປປ ລາວໄດ້ຮ່ວມມືກັບບັນດາອົງການຈັດຕັ້ງສາກົນ ລວມທັງອົງການຈັດຕັ້ງທາງສງຄົມໄດ້ ຮັບການສະໜັບສະໜູນຊ່ວຍເຫຼືອບັນດາແຂວງທີ່ນອນຢູ່ໃນບັນດາເປົ້າໝາຍໃນຂອບເຂດທົ່ວປະເທດ ໂດຍສະເພາະ ແຂວງ ສະຫວັນນະເຂດ ກອງທືນຫຼຸດຜ່ອນຄວາມທຸກຍາກ(ທລຍ)ເລີ່ມໃຫ້ການຊ່ວຍເຫຼືອ ແຂວງ ສະຫວັນນະເຂດ ໃນ 5 ເມືອງເປົ້າໝາຍທີ່ຢູ່ໃນເຂດພູດອຍ ຫ່າງໄກສອກຫຼີກ ແລະ ປະຊາຊົນໃນເຂດດັ່ງກ່າວ ແຕ່ກ່ອນແມ່ນທຸກຍາກຫຼາຍ, ສ່ວນຫຼາຍແມ່ນຊົນເຜົ່າ ບຣູ (ຕຣີ, ມັງກອງ ແລະ ກະຕາງ)ເຂົາເຈົ້າດໍາລົງຊີວິດຢູ່ຕາມທໍາມະຊາດ ໄດ້ຮັບການສືກສາຕໍ່າ ເຮັດໃຫ້ບໍ່ມີຄວາມກ້າຫານ ໃນການທີ່ຈະປະເຊີນໜ້າ ກັບບຸກຄົນພາຍນອກ ບໍ່ກ້າເວົ້າ ບໍ່ກ້າຖາມ ບໍ່ກ້າຕອບ ໂດຍສະເພາະແມ່ນຜູ້ຍິງ ຊຶ່ງເປັນເພດທີ່ອາດຈະເວົ້າໄດ້ວ່າ ບໍ່ມີໂອກາດທີ່ຈະໄດ້ເຂົ້າຮ່ວມໃນການປະຊຸມ ຫຼື ການພົບປະໂອລົມກັບບຸກຄົນພາຍນອກເລີຍ ມີແຕ່ອອກແຮງງານໜັກ ໄປໄຮ່, ໄປສວນ, ຫາບຟືນ, ຫາຫຼົວ, ຫາອາຫານເພື່ອລຽ້ງ ຄອບຄົວ. ຫຼັງຈາກກັບມາເຮືອນແລ້ວກໍຕ້ອງ ໄດ້ຕັກນໍ້າ ຕໍາເຂົ້າອີກ ດໍາລົງຊີວິດແບບນີ້ສືບມື້ສືບວັນ.
ສະພາບດັ່ງກ່າວ ແບບນີ້ໄດ້ປູກຝັງໃຫ້ເຂົາເຈົ້າຄິດວ່າ ເຂົາເຈົ້າເກີດມາເປັນຜູ້ຍິງ ແລ້ວຈະບໍ່ມີວາດສະໜາທີ່ຈະໄປແຂ່ງກັບພວກຜູ້ຊາຍ ແລະ ຕ້ອງໄດ້ກົ້ມໜ້າກົມຕາຮັບກໍານີ້ໄປຕະຫຼອດ. ແຕ່ເມື່ອ ທລຍ ໄດ້ມາຊ່ວຍເຫຼືອຢູ່ໃນເມືອງ ດັ່ງກ່າວນີ້ ກໍໄດ້ມີ ລະບຽບຫຼັກການທີ່ຊັດເຈນ ກ່ຽວກັບການຍົກສູງບົດບາດຂອງຜູ້ຍິງ ຄື : ໃຫ້ຜູ້ຍີງໄດ້ມີສ່ວນຮ່ວມ ໃນການປະກອບເຂົ້າເປັນຜູ້ປະສານງານກຸ່ມບ້ານ ຢ່າງນ້ອຍ 2 ໃນ3ຄົນ, ປະກອບເປັນຕົວແທນບ້ານຢ່າງນ້ອຍ 3ໃນ6ຄົນ, ເປັນທີມງານຈັດຕັ້ງປະຕິບັດຂອງບ້ານຢ່າງນ້ອຍ1ໃນ3ຄົນ ແລະ ການເຂົ້າຮ່ວມ ພ້ອມມີສ່ວນຮ່ວມໃນກອງປະຂຸມຕ່າງໆ ໂດຍສະເພາະກອງປະຊູມວາງແຜນ ຕ້ອງໄດ້ 50%ຂື້ນໄປ ແລະ ເວລາຄັດເລືອກຄວາມຕ້ອງການກໍໄດ້ມການແບ່ງກຸ່ມໃຫ້ຜູ້ຍິງມີສິດເລືອກຕ່າງຫາກ ພ້ອມທັງໃນການຈັດລຽງບູລິມະສິດຂອງບ້ານກໍໄດ້ໃຫ້ເບິ່ງໃນ 5 ບຸລິມະສິດທໍາອິດຂອງບ້ານ 1-3 ຕ້ອງແມ່ນເປັນບຸລິມະສິດທີ່ມາຈາກກຸ່ມຂອງຜູ້ຍິງ ຫຼື ບຸລິມະສິດທີ່ຜູ່ຍິງມີສ່ວນຮ່ວມໃນການເລືອກ.
ທ່ານ ທ່ອນແກ້ວ ພູດທະໄກຍະລາດ ຮອງເຈົ້າແຂວງ ໆສະຫວັນນະເຂດ ທັງເປັນຜູ້ຊີ້ນໍາວຽກງານລົບລ້າງຄວາມທຸກຍາກຂັ້ນແຂວງ ຢືນຢັ້ນຕໍ່ຜູ້ໃຫ້ທຶນຈາກທະນາຄານໂລກ ແລະ ອົງການເພື່ອການພັດທະນາ ແລະ ຮ່ວມມືຂອງປະເທດສະວິດເຊີແລນ ທີ່ໄດ້ມາຢ້ຽມຢາມວ່າ: ການຈັດຕັ້ງປະຕິບັດວຽກງານໃນບັນດາເມືອງເປົ້າໝາຍທີ່ ທລຍ ໃຫ້ການສະໜັບສະໜູນ ໄດ້ເຮັດໃຫ້ຊຸມຊົນ ໂດຍສະເພາະແມ່ນຜູ້ຍິງມີຄວາມເຂັ້ມແຂງ ແລະ ທ່ານກໍໄດ້ ຍ້ອງຍໍ ຊົມເຊີຍ ບັນດາທ່ານ ຈາກຜູ້ໃຫ້ທຶນທັງຫຼາຍ ທີ່ໄດ້ມີຄວາມພະຍາຍາມສູ້ຊົນ ເປີດໂອກາດໃຫ້ແກ່ເຂົາເຈົ້າ ແລະ ໄດ້ໃຫ້ການຝືກອົບຮົມຢ່າງຕໍ່ເນື່ອງລຽນຕິດ ສາມາດສ້າງພື້ນຖານໃຫ້ແກ່ຊຸມຊຸນ ໄດ້ມີຄວາມກ້າຫານຈົນສາມາດກ້າສະແດງອອກຮອດໃນເວທີລະ ດັບກອງປະຊຸມໃນຂັ້ນເມືອງ ຊຶ່ງໄດ້ຮັບການຢັ້ງຢືນຈາກບັນດາທ່ານ ຮອງເຈົ້າເມືອງ ແຕ່ລະເມືອງອີກວ່າ ຍັງບໍ່ທັນມີ ພາກສ່ວນໃດເຮັດໄດ້ຄືແບບນີ້.
ໃນການຈັດຕັ້ງປະຕິບັດລົບລ້າງຄວາມທຸກຍາກໃນ 15 ປີ ທີ່ຜ່ານມາເຫັນວ່າ ການຈັດຕັ້ງປະຕິບັດຂອງກອງທຶນ ຫຼຸດຜ່ອນຄວາມທຸກຍາກເຫັນວ່າມີຫຼາຍດ້ານມີຄວາມຄືບໜ້າ ໂດຍສະເພາະປີ2018 ນີ້ທລຍ ແຂວງສະຫວັນນະເຂດ ໄດ້ມີແຜນໃນການກໍ່ສ້າງໂຄງການຍ່ອຍ ທີ່ໄດ້ຮັບຮອງຈາກກອງປະຊຸມປະສານງານການວາງແຜນພັດທະນາກຸ່ມບ້ານ ໃນ 5 ເມືອງເປົ້າໝາຍລວມທັງໝົດ 46 ໂຄງການຍ່ອຍ ເຊິ່ງຈະນໍາໃຊ້ທຶນທັງໝົດ 15.7ຕື້ກວ່າ ກີບ ໃນນັ້ນ ມີທຶນທີ່ ທລຍ ສະໜັບສະໜູນ 15 ຕື້ກວ່າກີບ ແລະ ຊຸມຊົນປະກອບສ່ວນຈໍານວນ 667 ລ້ານກວ່າກີບ. ໃນຈໍານວນ 46 ໂຄງການດັ່ງກ່າວນັ້ນໄດ້ ແຍກອອກຕາມ 5 ຂະແໜງການຫຼັກຄື :
1. ຂະແໜງ ກະສິກໍາ ແລະ ປ່າໄມ້ ມີຈໍານວນ 3 ໂຄງການຍ່ອຍ ນໍາໃຊ້ງົບປະມານ 483 ລ້ານກວ່າກີບ, ທລຍ ສະໜັບສະໜູນ 459 ລ້ານກວ່າກີບ, ຊຸມຊົນປະກອບສ່ວນ 23 ລ້ານກວ່າກີບ.
2. ຂະແໜງ ໂຍທາທິການ ແລະ ຂົນສົ່ງ ມີຈໍານວນ 14 ໂຄງການ ນໍາໃຊ້ງົບປະມານ 5.3 ຕື້ກວ່າກີບ, ທລຍ ສະໜັບສະໜູນ 5 ຕື້ກວ່າກີບ, ຊຸມຊົນປະກອບສ່ວນ 158 ລ້ານກີບ.
3. ຂະແໜງ ສາທາລະນະສຸກມີຈໍານວນ 9 ໂຄງການ ນໍາໃຊ້ງົບປະມານ 3.1 ຕື້ກວ່າກີບ, ທລຍ ສະໜັບສະໜູນ 2.9 ຕື້ກວ່າກີບ, ຊຸມຊົນປະກອບສ່ວນ 173 ລ້ານກວ່າກີບ.
4. ຂະແໜງ ສືກສາທິການມີຈໍານວນ 18 ໂຄງການນໍາໃຊ້ງົບປະມານ 6 ຕື້ກວ່າກີບ, ທລຍ ສະໜັບສະໜູນ 5.7 ຕື້ກວ່າກີບ, ຊຸມຊົນປະກອບສ່ວນ 301 ລ້ານກວ່າກີບ.
5. ຂະແໜງ ພະລັງງານ ແລະ ບໍ່ແຮ່ ມີຈໍານວນ 2 ໂຄງການ ນໍາໃຊ້ງົບປະມານ 722 ລ້ານກວ່າກີບ, ທລຍ ສະໜັບສະໜູນ 712 ລ້ານກວ່າກີບ, ຊຸມຊົນປະກອບສ່ວນ 10.000.000 ກີບ.
ການຈັດຕັ້ງມາຮອດປະຈຸບັນນີ້ ໃນແຕ່ລະເມືອງ ສາມາດກໍ່ສ້າງໄດ້ສໍາເລັດຫຼາຍກວ່າ 50% ແລ້ວ ຍ້ອນວ່າ ມີ 26 ໂຄງການຍ່ອຍທີ່ ໄດ້ກໍ່ສ້າງສໍາເລັດ 100% ແລະໄດ້ຮັບການກວດກາຈາກຄະນະກໍາມະການທີ່ຮັບຜິດຊອບພ້ອມທັງໄດ້ມອບໃຫ້ຊຸມຊົນສາມາດນໍາໃຊ້ໄດ້ແລ້ວ ຄື: ເມືອງນອງສໍາເລັດ ແລະ ກວດກາ 100%ແລ້ວ ມີ 5 ໂຄງ ການຍ່ອຍໃນໂຄງການກໍ່ສ້າງທັງໝົດ 9 ໂຄງການ, ເມືອງເຊໂປນ ສໍາເລັດ ແລະ ກວດກາ 100%ແລ້ວ ມີ 9ໂຄງການຍ່ອຍ ໃນໂຄງການກໍ່ສ້າງທັງໝົດ 13 ໂຄງການ, ເມືອງພີນ ສໍາເລັດ ແລະ ກວດກາ 100%ແລ້ວ ມີ 3 ໂຄງການຍ່ອຍ ໃນໂຄງການກໍ່ສ້າງທັງໝົດ 7 ໂຄງການ, ເມືອງອາດສະພອນ ສໍາເລັດ ແລະ ກວດກາ 100% ແລ້ວ ມີ 5 ໂຄງການຍ່ອຍ ໃນໂຄງການກໍ່ສ້າງທັງໝົດ 9 ໂຄງການ ແລະ ເມືອງທ່າປາງທອງ ສໍາເລັດແລະກວດກາ 100% ແລ້ວມີ 3ໂຄງການຍ່ອຍ ໃນໂຄງການກໍ່ສ້າງທັງໝົດ 8 ໂຄງການ, ນອກນັ້ນ ການກໍ່ສ້າງໃນແຕ່ລະເມືອງ ແມ່ນສໍາເລັດໄປແລ້ວຫຼາຍວ່າ 70% ໃນແຕ່ໂຄງການຍ່ອຍ ແລະ ປະຈຸບັນນີ້ແມ່ນກໍາລັງຂຸ້ນຂ້ຽວ ເພື່ອໃຫ້ທັນກັບລະດູການ ແລະ ແຜນການທີ່ໄດ້ວາງໄວ້ ເຊິ່ງໃນການກໍ່ສ້າງແຕ່ລະໂຄງການນັ້ນກໍໄດ້ຮັບການຮ່ວມໄມ້ຮ່ວມມື ຈາກຊຸມຊົນໃນແຕ່ລະບ້ານທີ່ໄດ້ຮັບໂຄງການຍ່ອຍເປັນຢ່າງດີ.
ນອກຈາກ ທລຍ ຈະສ້າງພື້ນຖ່ານໂຄງລ່າງ, ສ້າງຄວາມເຂັ້ມແຂງ ແລະ ບົດບາດຍິງ-ຊາຍໃຫ້ຊຸມຊົນແລ້ວ ທລຍ ຍັງສົ່ງເສີມໃຫ້ຊຸມຊົນຫັນມາທຳການປູກຝັງ ແລະ ລຽ້ງສັດຕື່ມອີກດ້ວຍເຊັ່ນວ່າ: ການລ້ຽງເປັດ, ໄກ່ ກໍ່ແມ່ນອາຊິບເສີມຢ່າງໜຶ່ງ ທີ່ຊຸມຊົນໄດ້ເຮັດສືບຕໍ່ກັນມາຫຼາຍຊົ່ວອາຍຸຄົນ ໂດຍສະເພາະໃນຊຸມຊົນທີ່ຢູ່ເຂດຫ່າງໄກສອກ ຫຼີກ. ແຕ່ບັນຫາທີ່ເປັນອຸປະສັກໃນການລ້ຽງເປັດ, ໄກ່ ມັກຈະເປັນພະຍຸ, ຕາຍຍົກຮັງ ເຮັດໃຫ້ພໍ່ແມ່ປະຊາຊົນມີຄວາມທໍ້ຖອຍ ບໍ່ລ້ຽງຕໍ່ ແລະ ມີບາງຄົວເຮືອທີ່ໄດ້ລ້ຽງຕາມທໍາມະຊາດ, ປະປ່ອຍໃຫ້ນອນໄປຕາມຕົ້ນໄມ້ ໝາຍຄວາມວ່າປ່ອຍຕາມມີຕາມເກີດ ຖ້າຍັງກະຂາຍໃນລາຄາແພງ.
ແຕ່ໃນເມື່ອ ທລຍ ໄດ້ມີການນໍາເອົາໂຄງການ ປັບປຸງຊີວິດການເປັນຢູ່ ເຊື່ອມສານໂພຊະນາການ ມາທົດລອງໃນ 3 ເມືອງເປົ້າໝາຍຂອງ ທລຍ ແຂວງສະຫວັນນະເຂດ ແລ້ວກໍ່ສາມາດແກ້ໄຂບັນດັ່ງກ່າວຂ້າງເທິງນີ້ໄດ້ ຍ້ອນວ່າ ກອງທຶນຫຼຸດຜ່ອນຄວາມທຸກຍາກ ພວກເຮົາໄດ້ມີວິທີການໃຫ້ພະນັກງານໄດ້ລົງໃກ້ສິດກັບຊຸມຊົນ ໃຫ້ເຂົາ ເຈົ້າປະຈໍາຢູ່ກຸ່ມບ້ານ ຊ່ວຍເຫຼືອດ້ານເຕັກນິກໃຫ້ແກ່ຊຸມຊົນ, ຝືກອົບຮົມໃຫ້ແກ່ເຂົາເຈົ້າ ໃນການສັກ ແລະ ຢອດຢາ ປ້ອງກັນພະຍາດສັດ ໃຫ້ຊຸມຊົນເຮັດໄດ້ດ້ວຍຕົວເຂົາເອງ ຈຶ່ງສາມາດແກ້ໄຂບັນຫາໄດ້ຢ່າງທັນການ, ນອກຈາກນັ້ນກໍໄດ້ສອນໃຫ້ເຂົາເຈົ້າ ຮູ້ເຖິງເຕັກນິກວິທີການລ້ຽງແບບເຮັດຄອກ, ການຜະລິດອາຫານທີ່ມີໂປຼຕິນສູງ ແທນຈາກເຂົ້າ ແລະ ຮໍາທີ່ຫາຍາກ,ຈາກນັ້ນສັດລ້ຽງຂອງເຂົາເຈົ້າກໍ່ເພີ່ມຂື້ນຢ່າງຫຼວງຫຼາຍໃນແຕ່ລະກຸ່ມຊ່ວຍເຫຼືອເຊິ່ງກັນ ແລະ ກັນ (ກຊກ). ແຕ່ໃນເມື່ອສັດລ້ຽງມີຫຼາຍຂື້ນແລ້ວ ການສ້າງລາຍຮັບພັດຍັງບໍ່ທັນໄດ້ດີຍ້ອນວ່າ ຊຸມຊົນຍັງເຄີຍມີແນວຄິດດັ່ງເດີມຄື: ບໍ່ຍາກຂາຍໃນລາຄາຖືກ ເຄີຍຂາຍລາຄາແພງ ລ້ຽງໃຫຍ່ສຸດແລ້ວຈຶ່ງຂາຍ ໂດຍທີ່ຍັງບໍ່ຮູ້ວ່າ ສັດລ້ຽງໃນເມືອລ້ຽງຮອດໄລຍະຈະເລີນເຕີມໂຕສູງສຸດແລ້ວມັນກໍຢູ່ໂຕ ລາຄາມັນກໍຢູ່ໂຕນໍາ ແຕ່ຕົ້ນທຶນການລ້ຽງຈະສູງຂຶ້ນ. ດັ່ງນັ້ນ ພະນັກງານ ທລຍ ກໍ່ໄດ້ຊ່ວຍສ້າງທັດສະນະຄະຕິ ແນວຄິດໃຫມ່ ໃຫ້ແກ່ເຂົາເຈົ້າ ລ້ຽງແລ້ວກໍ່ຕ້ອງຂາຍໃນເວລາທີ່ເໝາະສົມ ໃຫ້ໄດ້ເປັນທຶນໝູນວຽນໄດ້ຫຼາຍຮອບຂາຍໄດ້ລາຄາ ເຖິງຈະຕໍ່າກວ່າຕໍ່ໂຕ ແຕ່ໄດ້ຂາຍຫຼາຍໂຕຕໍ່ເດືອນ ປີໜຶ່ງກະໄດ້ຂາຍຫຼາຍເທື່ອ.
ໃນເມື່ອຊຸມຊົນໄດ້ເຂົ້າໃຈແລ້ວ ເຂົາເຈົ້າກໍ ໄດ້ມີແຜນການໃນການລ້ຽງແລ້ວຂາຍເປັນປົກກະຕິ ມີພໍ່ຄ້າແມ່ຄ້າ ລົງໄປຊື້ຮອດບ້ານ ສ້າງລາຍຮັບໃຫ້ຊຸມຊົນໄດ້ມີໃບໜ້າໃໝ່ ມີເຕັກນິກການລ້ຽງເປັດ ລ້ຽງໄກ່ ທີ່ສາມາດສ້າງລາຍຮັບ ຊ່ວຍຫຼຸດຜ່ອນຄວາມທຸກຍາກໃຫ້ເຂົາເຈົ້າໄດ້. ນອກຈາກນັ້ນ ເພື່ອຊ່ວຍໃຫ້ກຸ່ມ ກຊກ ໄດ້ມີຄວາມເຂັ້ມແຂງໃນການບໍລິຫານຈັດການດ້ານການເງິນ ມີຄວາມສາມັກຄີກັນ ໄດ້ຮັບຟັງບັນຫາຂອງກັນ ແລະ ກັນ ເພື່ອແລກປ່ຽນບົດ ຮຽນໃນການແກ້ໄຂ ພະນັກງານ ທລຍ ພວກເຮົາຍັງໄດ້ແນະນໍາຊຸກຍູ້ໃຫ້ກຸ່ມ ກຊກ ໄດ້ມີການປະຊຸມ ຊຶ່ງຖືວ່າກອງ ປະຊຸມປຽບເໝືອນໝາກຫົວໃຈຂອງ ກຸ່ມ ກຊກ ອີກດ້ວຍ.
ກິດຈະກໍາປັບປຸງຊີວິດການເປັນຢູ່ ເຊື່ອມສານໂພຊະນາການ ແມ່ນວຽກງານໜຶ່ງທີ່ ທລຍ ໃຫ້ການສະໜັບສະໜູນໃນຮູບແບບການຈັດຕັ້ງກຸ່ມ ຊ່ວຍເຫຼືອເຊິ່ງກັນ ແລະ ກັນ (ກຊກ) ເພື່ອສ້າງຄວາມເຂັ້ມແຂງໃຫ້ແກ່ຊຸມຊົນ ໂດຍສະເພາະຜູ້ທຸກຍາກໃນເຂດຫ່າງໄກສອກຫຼີກ ໃຫ້ເຂົ້າເຈົ້າສາມາດ ຄຸ້ມຄອງບໍລິຫານທຶນກູ້ຢືມ ໃນລັກສະນະເປັນທຶນໝູນວຽນ ດ້ວຍພວກເຂົາເຈົ້າເອງ ທັງນີ້ກໍແມ່ນ ເພື່ອໃຫ້ພວກເຂົາເຈົ້າໄດ້ມີລາຍຮັບ ທີ່ໝັ້ນຄົງ ນໍາໄປສູ່ ການຫຼຸດຜ່ອນ ແລະ ລົບລ້າງຄວາມທຸກຍາກແບບຍືນຍົງ.ແຜນງານດັ່ງກ່າວນີ້ແມ່ນ ໄດ້ເນັ້ນການຝຶກອົບຮົມສ້າງຄວາມເຂັ້ມແຂງ, ຝຶກອົບຮົມອາຊີບຫຼາກຫຼາຍວິຊາ ຕາມທີ່ຊຸມຊົນ ຕ້ອງການນໍາເອົາໄປຈັດຕັ້ງປະຕິບັດເພື່ອສ້າງລາຍຮັບໃຫ້ແກ່ຄອບຄົວ.
ດັ່ງຄອບຄົວ ນາງ ທອງມີ ບ້ານ ໂນນສະຫວ່າງ ເມືອງ ທ່າປາງທອງ ແຂວງສະຫວັນນະເຂດ ກໍແມ່ນຄອບ ຄົວໜຶ່ງ ໃນເປົ້າໝາຍ 79 ຄອບຄົວ ທີ່ຈະສ້າງເປັນຄອບຄົວຕົວແບບ ທາງດ້ານການສ້າງລາຍຮັບ ຊຶ່ງລາວໄດ້ເຂົ້າເປັນສາມະຊິກ ກຊກ ໃນວັນທີ 1/12/2016 ແລະ ພາຍຫຼັງທີ່ໄດ້ຮັບການຝືກອົບຮົມ ແລະ ໄດ້ຜ່ານຂະບວນການສ້າງຄວາມເຂັ້ມແຂງ ຕາມແຕ່ລະບາດກ້າວແລ້ວ ມາຮອດວັນທີ 1/1/2017 ລາວກໍໄດ້ ຍືມເງີນຈາກກອງທຶນໝູນ ວຽນທີ່ ທລຍ ໃຫ້ການສະໜັບສະໜູນປະມານ 8.600.000 ກີບ ເພື່ອດໍາເນີນກິດຈະກໍາລ້ຽງໄກ່ ໃນນັ້ນລາວໄດ້ເລີ່ມຈາກການລ້ຽງໄກ່ໃຫຍ່ຈໍານວນ 20 ໂຕ ພ້ອມທັງເຫຼືອເງິນໄວ້ຊື້ອຸປະກອນໃນການລ້ຽງ ພ້ອມດ້ວຍຢາວັກຊີນທີ່ຈໍາເປັນຈໍານວນໜຶ່ງ ຜ່ານການລ້ຽງ ມາໄດ້ 4 ເດືອນ ລາວກໍ່ສາມາດຂາຍໄກ່ໄດ້ ປະມານ 135 ໂຕ ໃນລາຄາ 20.000ກີບ/ກິໂລໄດ້ເງິນທັງໝົດ 2.700.000 ກີບ ເຊິ່ງສາມາດສົ່ງທຶນໝູນວຽນ ແລະ ເພີ່ມຈໍານວນໄກ່ ພໍ່ແມ່ພັນ ໄດ້ຫຼາຍກວ່າເກົ່າ ແລະ ຈະມີການຂະຫຍາຍກິດຈະກໍາອື່ນອີກ.
ຄອບຄົວນາງ ທອງມີ ກໍຄືຄອບຄົວອື່ນໆ ທີ່ເປັນສາມະຊີກ ຂອງກຸ່ມ ກຊກ ບໍ່ພຽງແຕ່ສາມາດລຽ້ງສັດຖືກຕ້ອງຕາມເຕັກນີກແລ້ວ ແຕ່ຍັງສາມາດ ສັກຫຼືຢອດຢາວັກຊີນ ໃຫ້ແກ່ສັດລຽ້ງໄດ້ອີກດ້ວຍ, ອັນເປັນປັດໃຈສໍາຄັນໃນການແກ້ໄຂບັນຫາຕ່າງໆທີ່ເກີດຂື້ນໄດ້ຢ່າງທັນເວລາ ເຊັ່ນວ່າ: ປັນຫາສັດຕາຍ ນັ້ນມັນເປັນປັນຫາທີ່ສະສົມມາແຕ່ດົນນານ ເປັນບັນຫາທີ່ເຮັດໃຫ້ຊຸມຊົນທໍ້ຖອຍ, ຍ້ອນວ່າລ້ຽງແລ້ວບາດຈະໄດ້ຂາຍພັດຕາຍກ່ອນ ເຮັດໃຫ້ເຂົາເຈົ້າຫຼຸບທຶນ ແລ້ວບໍ່ຍາກລ້ຽງຕໍ່. ສະນັ້ນ ທລຍ ໄດ້ເຫັນປັນຫາດັ່ງກ່າວນີ້ ຈຶ່ງໄດ້ພະຍາຍາມແກ້ໄຂ ໃຫ້ພະນັກງານລົງໃກ້ສິດກັບຊຸມຊົນ ຝືກອົບຮົມກັບທີ່ທາງດ້ານວິຊາການຕ່າງໆ ນັບທັງການເຮັດອາຫານໃຫ້ສັດ ການສັກຫຼືຢອດຢາ ການຕິດຕາມເຝົ້າລະວັງ ການປູກພືດໃຫ້ເປັນອາຫານສັດນອກຈາກຮໍາ ແລະ ເຂົ້າ, ການເຮັດນໍ້າໝັກຊີວະພາບ ເພື່ອສ້າງພູມກຸ້ມກັນໃຫ້ສັດລຽ້ງແຂງແຮງ ສອນໃຫ້ເຂົາເຈົ້າລ້ຽງແລ້ວຕ້ອງຂາຍໃຫ້ທັນເວລາ. ດ້ວຍຄວາມເອົາໃຈ ແລະ ພາຍາຍາມ ຈິ່ງໄດ້ເຮັດໃຫ້ກິດຈະກໍາສ້າງລາຍຮັບ ດັ່ງກ່າວນັ້ນຈະປະສົບຜົນສໍາເລັດ.
ຍ້ອນວ່າການຈັດຕັ້ງປະຕິບັດຂອງ ທລຍ ນອກຈາກການກໍ່ສ້າງບັນດາພື້ນຖານໂຄງລ່າງທີ່ຈໍາເປັນ ເພື່ອໃຫ້ຊຸມຊົນຜູ້ທີ່ທຸກຍາກໃນບ້ານທີ່ຢູ່ຫ່າງໄກສອກຫຼີກໄດ້ເຂົ້າເຖິງການບໍລິການ ທີ່ເປັນປັດໃຈສໍາຄັນໃນການດໍາລົງຊີວິດແລ້ວ, ກິດຈະກໍາທີ່ສໍາຄັນ ແລະ ແຕກຕ່າງຈາກໂຄງການອື່ນນັ້ນກໍຄື: ການສ້າງຄວາມເຂັ້ມແຂງໃຫ້ແກ່ຊຸມຊົນ, ໃຫ້ເຂົ້າເຈົ້າມີຄວາມກ້າຫານ, ມີສ່ວນຮ່ວມໃນການວາງແຜນການ ເພື່ອເລືອກເອົາບຸລິມະສິດຄວາມຕ້ອງການທີ່ຈໍາເປັນ ເພື່ອບັນ ຈຸເປັນແຜນການພັດທະນາກຸ່ມບ້ານ. ທີມງານບ້ານ ແລະ ກຸ່ມບ້ານ ມີຄວາມສາມາດໃນການນໍາສະເໜີ ການປືກສາຫາລື ແລະ ສາມາດຕິດຕາມກວດກາການກໍ່ສ້າງໂຄງການຍ່ອຍ. ການສະຫຼູບການໃຊ້ຈ່າຍງົບບໍລິຫານໂຄງການຜູ້ປະສານງານກຸ່ມບ້ານ ສາມາດນໍາພາໃນການຈັດກອງປະຊຸມຂັ້ນບ້ານ ແລະ ຂັ້ນກຸ່ມໄດ້, ຮູບແບບການເຮັດວຽກຂອງພະນັກງານ ທລຍ ແຕ່ລະຂັ້ນໄດ້ມີຄວາມຮັບຜິດຊອບສູງ ມີຄວາມບຸກບືນ ແລະ ອົດທົນລົງເຖິງພື້ນທີ່ ເຖິງວ່າຈະມີຄວາມຫຍຸ້ງຍາກລໍາບາກປານໃດກໍຕາມປະຕິບັດໄດ້ ລະບຽບ ຫຼັກການ ແລະ ຕໍ່ຄໍາຂວັນທີ່ວ່າ “ດຸໝັ່ນ ຊື່ສັດ ປະຫຍັດ ອົດທົນ ພາທຸກຄົນພົ້ນທຸກ ”
ຈາກແຕ່ກ່ອນ ທີ່ ທລຍ ຍັງບໍ່ທັນໄດ້ເຂົ້າມາໃຫ້ການສະໜັບສະໜູນຊຸມຊົນ ຫຼື ຕົວແທນກຸ່ມບ້ານບໍ່ເຄີຍມີຄວາມກ້າຫານໃນການນໍາສະເໜີ ປືກສາຫາລື. ແຕ່ພາຍຫຼັງ ທລຍ ໄດ້ມາຝືກອົບຮົມສ້າງຄວາມເຂັ້ມແຂງໃຫ້ ແລະ ໄດ້ນໍາພາໃນການຈັດກອງປະຊຸມວາງແຜນແບບມີສ່ວນຮ່ວມ ແຕ່ລຸ່ມຂຶ້ນເທີງ ໃຫ້ສິດແກ່ຜູ້ຍິງໃນການມີສ່ວນຮ່ວມ ສໍາລັບຂະບວນການວາງແຜນໃຫ້ສິດໃນການປະກອບເປັນທິມງານຕ່າງໆ ໂດຍໃຫ້ມີສັດສ່ວນ ເທົ່າກັບຫຼືຫຼາຍກວ່າຜູ້ຊາຍ. ເຊິ່ງໃນຕະຫລອດໄລຍະທີ່ ທລຍ ໃຫ້ການຊ່ວຍເຫຼືອໃນບັນດາເມືອງເປົ້າໝາຍ ຈິ່ງໄດ້ເຮັດໃຫ້ຊຸມຊົນມີຄວາມເຂັ້ມແຂງເປັນຕົ້ນ: ແມ່ຍີງມີຄວາມສາມາດອອກຄວາມຄິດຄວາມເຫັນ ພ້ອມທັງ ກ້າເຂົ້າຮ່ວມ ແລະ ນໍາສະເໜີແນວຄວາມຄິດຂອງຕົນໄດ້.
