ກອງທຶນຫຼຸດຜ່ອນຄວາມທຸກຍາກ ເມືອງບຸນໃຕ້ ແຂວງຜົ້ງສາລີ
ສໍາເລັດການຈັດຕັ້ງປະຕິບັດວຽກງານຢູ່ 15ບ້ານເປົ້າໝາຍ
ໃນລະຫວ່າງວັນທີ 5-12 ມັງກອນ 2021, ກອງທຶນຫຼຸດຜ່ອນຄວາມທຸກຍາກ ເມືອງບຸນໃຕ້, ແຂວງຜົ້ງສາລີ ໄດ້ສົມທົບກັບພະນັກງານຈາກຫ້ອງການສາທາລະນະສຸກເມືອງ, ສະຫາພັນແມ່ຍິງເມືອງ ແລະ ຫ້ອງການກະສີກຳ ແລະ ປ່າໄມ້ເມືອງ ສໍາເລັດການລົງໄດ້ຈັດກອງປະຊຸມສ້າງຕັ້ງກຸ່ມຊ່ວຍເຫຼືອກັນແກ້ໄຂຄວາມທຸກຍາກ(ກຊກ) ແລະ ກຸ່ມໂພຊະນາການ (ກພກ) ແລະ ການຝຶກອົບຮົມວິທີປ້ອງກັນພະຍາດໂຄວິດ-19 ໂດຍໄດ້ມີການໃຫ້ຄວາມຮູ້ດ້ານການປ້ອງກັນພະຍາດ ແລະ ແນະນໍາວິທີແກ້ໄຂບັນຫາຂັ້ນຕົ້ນໃນກໍລະນີເກີດພະຍາດລະບາດຢູ່ພາຍໃນບ້ານ, ຮຽນຮູ້ວິທີຫຍິບຜ້າອັດປາກໃຫ້ແກ່ປະຊາຊົນ ໂດຍການສະໜັບສະໜູນທຶນຈາກ ລັດຖະບານລາວ, ທະນາຄານໂລກ ແລະ ອົງການພັດທະນາ ແລະ ຮ່ວມມືຈາກປະເທດສະວິດເຊີແລນ (SDC) ໃນ 15 ບ້ານ ໂດຍມີຜູ້ເຂົ້າຮ່ວມທັງໝົດ760 ຄົນ, ຍິງ 494 ຄົນ.
ການລົງຝຶກອົບຮົມທັງ ສາມໜ້າວຽກນີ້ ໄດ້ເຮັດໃຫ້ປະຊາຊົນທີ່ທຸກຍາກ ໃນແຕ່ລະບ້ານມີຄວາມສົນໃຈເຂົ້າຮ່ວມໂຄງການຢ່າງເປັນຂະບວນຟົດຟື້ນ ໂດຍສະເພາະ ແມ່ນການຝາກເງິນຂອງສະມາຊິກກຸ່ມ ກຊກ ຈໍານວນທັງໝົດ 899 ຄົນ, ຍິງ 471 ຄົນ. ສໍາລັບກຸ່ມໂພຊະນາການບ້ານ 15 ກຸ່ມ ແມ່ນມີສະມາຊິກ, ປະກອບມີແມ່ຖືພາ 81 ຄົນ, ເດັກອາຍຸ 0-5 ເດືອນ 46 ຄົນ, ຍິງ 24, ເດັກອາຍຸ 6-23 ເດືອນ 217 ຄົນ, ຍິງ 115 ຄົນ.
ການລົງຈັດຕັ້ງປະຕິບັດວຽກງານຂອງກອງທຶນຫຼຸດຜ່ອນຄວາມທຸກຍາກ ແບບມີສ່ວນຮ່ວມ ກັບຫ້ອງການກ່ຽວຂ້ອງພາກລັດຂັ້ນເມືອງໃນຄັ້ງນີ້ ເຫັນວ່າປະຊາຊົນສ່ວນໃຫຍ່ໃຫ້ຄວາມຮ່ວມມື, ມີຄວາມເຂົ້າໃຈ ແລະ ມີຄວາມກຽມພ້ອມຫຼາຍດ້ານ ເພື່ອເປັນພື້ນຖານໃຫ້ແກ່ການສືບຕໍ່ຈັດຕັ້ງປະຕິບັດວຽກງານໃນຂັ້ນຕອນຕໍ່ໄປໄດ້ເປັນຢ່າງດີ.
