ທລຍ ເສີມສ້າງຄວາມເຂັ້ມແຂງໃຫ້ແກ່ພະນັກງານວຽກປັບປຸງຊີວິດການເປັນຢູ່ ແລະ ໂພຊະນະການ
ໂດຍ: ແສງອາລຸນ ພິລາຈັນ
ໃນລະຫວ່າງວັນທີ 12-14 ສິງຫາ 2015 ກອງທຶນຫລຸດຜ່ອນຄວາມທຸກຍາກ(ທລຍ) ໄດ້ຈັດກອງປະຊຸມສໍາມະນາວຽກປັບປຸງຊີວິດການເປັນຢູ່ ແລະ ໂພຊະນາການ ຂຶ້ນທີ່ ສູນວິໄຈພະຍາດຊຶມເຊື້ອຄຣິສຕົຟ ເມຣິເອີ ລາວ, ກະຊວງສາທາລະນະສຸກ ໂດຍການເປັນປະທານຂອງ ທ່ານ ແສງເພັດ ວັນນະວົງ, ຫົວໜ້າພະແນກ ພັດທະນາຊຸມຊົນ ແລະ ໃຫ້ກຽດເຂົ້າຮ່ວມຂອງທ່ານ ທ່ານ (Satoshi ISHIHARA) ຊະໂຕຊິ ອີຊີຮາຣະ, ຜູ້ຊີ້ນໍາວຽກງານ ທລຍ ຫ້ອງການທະນາຄານໂລກ ປະຈໍາ ສປປ ລາວ, ທ່ານ ນາງ (Jutta KRAHN) ຈຸດຕາ ຄຣານ, ຊ່ຽວຊານວຽກງານໂພຊະນາການ ແລະ ການເຂົ້າຮ່ວມຂອງພະນັກງານປັບປຸງຊີວິດການເປັນຢູ່ ແລະ ວຽກງານໂພຊະນາການ ຈາກ 4 ເມືອງ: ເມືອງຮ້ຽມ, ຊ່ອນ ແຂວງຫົວພັນ ແລະ ເມືອງນອງ, ເຊໂປນ ແຂວງສະຫວັນນະເຂດຈໍານວນທັງໝົດ 20 ທ່ານ, ຍິງ 5 ທ່ານ.
ຈຸດປະສົງຂອງກອງປະຊຸມສໍາມະນາໃນຄັ້ງນີ້ ແມ່ນເພື່ອປຶກສາຫາລື ແລະ ແລກປ່ຽນບົດຮຽນໃນການຈັດຕັ້ງປະຕິບັດວຽກງານປັບປຸງຊີວິດການເປັນຢູ່ ແລະ ໂພຊະນາການ ໃນໄລຍະຜ່ານມາ ແລະ ວາງແຜນວຽກໃນຕໍ່ໜ້າ ພ້ອມທັງເປັນການເສີມສ້າງຄວາມເຂັ້ມແຂງ ແລະ ຄວາມເຂົ້າໃຈໃຫ້ແກ່ພະນັກສານວຽກປັບປຸງຊີວິດການເປັນຢູ່ ແລະ ໂພຊະນາການ ໄດ້ເຂົ້າໃຈຕໍ່ວຽກງານດັ່ງກ່າວເລີກເຊິ່ງກວ່າເກົ່າ.
ທີ່ກອງປະຊຸມໄດ້ມີການຈັດແບ່ງກຸ່ມຄົ້ນຄວ້າ ເປັນ 4 ກຸ່ມ: ກຸ່ມປັບປຸງຊີວິດການເປັນຢູ່ 2 ກຸ່ມ ແລະ ກຸ່ມໂພຊະນາການ 2 ກຸ່ມ, ສົນທະນາປະສົບການເຮັດວຽກໃນໄລຍະຜ່ານມາ, ທົບທວນ 18 ບາດກ້າວທີ່ຮ່າງໃໝ່, ເພີ່ມຄວາມຕ້ອງການ: ອຸປະກອນ, ຜົນໄດ້ຮັບ, ເອກະສານ ແລະ ຄວາມຮັບຜິດຊອບ ໃນນັ້ນ ໄດ້ມີການສົນທະນາ ເພື່ອຕົກລົງເຫັນດີ ຈຸດທີ່ຕ້ອງແກ້ໄຂ ແລະ ເພີ່ມເຕີມໃນຮ່າງ 18 ຂັ້ນຕອນ ສໍາລັບຈັດຕັ້ງປະຕິບັດວຽກງານປັບປຸງຊີວິດການເປັນຢູ່ຂອງ ທລຍ. ນອກຈາກນັ້ນ ໄດ້ມີການສົນທະນາສິ່ງທ້າທາຍທີ່ພົບ ເພື່ອເຮັດໃຫ້ການສື່ສານກັບຊາວບ້ານໃຫ້ດີກວ່າເກົ່າ, ຂໍ້ຫຍຸ້ງຍາກ ໃນການສື່ສານ ຈຸດທີ່ສາມາດສ້າງການປ່ຽນແປງພຶດຕິກໍາຂອງພວກເຂົາໄດ້, ເຄື່ອງມືໃນການສື່ສານໃນປະຈຸບັນ ມີການນໍາໃຊ້ແນວໃດ, ຄວນມີການເນັ້ນໜັກຈຸດໃດ, ທິດສະດີ ແລະ ຊ່ອງຫວ່າງໃນການໃຊ້ຕົວຈິງມີຄືແນວໃດ, ຄວາມຖີ່ ແລະ ຄວາມສາມາດໃນການສົ່ງຄວາມຮູ້ມີຄືແນວໃດ, ການບັນທຶກຂໍ້ມູນ ແລະ ການຕິດຕາມໃນໄລຍະຜ່ານມາມີຜົນໄດ້ຮັບຄືແນວໃດ.
ເຖິງແນວໃດກໍດີ ກອງປະຊຸມຍັງໄດ້ເນັ້ນເຖິງການເຊື່ອມສານຂອງການຈັດຕັ້ງປະຕິບັດກິດຈະກໍາປັບປຸງຊີວິດການເປັນຢູ່ ແລະ ໂພຊະນາການ ກັບວຽກງານ ທລຍ ໃຫ້ເປັນອັນໜຶ່ງອັນດຽວກັນ ເປັນຕົ້ນແມ່ນ 4 ໄລຍະ 8 ຄາດໝາຍ ແລະ 18 ຂັ້ນຕອນ: ໄລຍະທີ 1 “ແນະນໍາ” ປະກອບມີ ກອງປະຊຸມແນະນໍາໂຄງການຂັ້ນເມືອງ, ຂັ້ນກຸ່ມບ້ານ ແລະ ຂັ້ນບ້ານ; ໄລຍະທີ 2 “ສ້າງແຜນການ” ” ປະກອບມີ ກະກຽມແຜນພັດທະນາຂັ້ນບ້ານ, ກະກຽມແຜນພັດທະນາກຸ່ມບ້ານ, ກອງປະຊຸມປະສານງານການວາງແຜນຂັ້ນເມືອງ, ສ້າງຕັ້ງກຸ່ມຊ່ວຍເຫລືອເຊິ່ງກັນ ແລະ ກັນ ແລະ ຄັດເລືອກຄະນະກໍາມະການບໍລິຫານກຸ່ມທ້ອນເງິນຂັ້ນບ້ານ; ໄລຍະທີ 3 “ອອກແບບໂຄງການຍ່ອຍ ແລະ ກວດກາປະເມີນຜົນ” ” ປະກອບມີ ຝຶກອົບຮົມຫົວໜ້າກຸ່ມຊ່ວຍເຫລືອເຊິ່ງກັນ ແລະ ກັນ, ຝຶກອົບຮົມຫົວໜ້າຄະນະກໍາມະການບໍລິຫານກຸ່ມທ້ອນເງິນຂັ້ນບ້ານ; ໄລຍະທີ 4 “ຈັດຕັ້ງປະຕິບັດໂຄງການຍ່ອຍ ດ້ານປັບປຸງຊີວິດການເປັນຢູ່” ປະກອບມີ ຈັດຊື້-ຈັດຈ້າງ ໂດຍຊຸມຊົນ, ຝຶກອົບຮົມໃຫ້ແກ່ຜູ້ທີ່ໄດ້ຮັບຜົນປະໂຫຍດ ກ່ຽວກັບການຈັດຕັ້ງປະຕິບັດກິດຈະກໍາສ້າງລາຍຮັບ, ເກັບເງິນກູ້ຢືມຄືນ ແລະ ຈັດສັນເງິນກູ້ໃໝ່.
ຜ່ານການປະຊຸມສໍາມະນາເປັນເວລາ 3 ວັນເຕັມ ເຫັນໄດ້ວ່າ ຜູ້ເຂົ້າຮ່ວມໄດ້ມີຄວາມເຂົ້າໃຈ ແລະ ກໍາໄດ້ຢ່າງເລິກເຊິ່ງ ກ່ຽວກັບວຽກປັບປຸງຊີວິດການເປັນຢູ່ ແລະ ໂພຊະນາການ ໂດຍສະເພາະແມ່ນ 4 ໄລຍະ 8 ຄາດໝາຍ ແລະ 18 ຂັ້ນຕອນ ສໍາລັບການຈັດຕັ້ງປະຕິບັດວຽກງານປັບປຸງຊີວິດການເປັນຢູ່ຂອງ ທລຍ ແລະ ຄາດວ່າເຂົາເຈົ້າຈະສາມາດນໍາເອົາຄວາມຮູ້ດັ່ງກ່າວໄປຜັນຂະຫຍາຍເຂົ້າສູ່ວຽກງານຕົວຈິງຂອງເຂົາເຈົ້າຢ່າງມີຜົນສໍາເລັດ.
